Jeremaia 30–33; 36; Liaajlo̧ļ 1; 3

• Ennaan ko an kōjatdikdik ilo kanaan ko an Jeremaia emaron̄ leļo̧k n̄an ro uwaan kūlaaj eo kōjatdikdik ilo jekjek ko aer make. Bōlen kūlaaj eo am̧ emaron̄ ekōnono kōn jekjek ko me remaron̄ kōm̧m̧an bwe armej ilo tōre in ad ren en̄jake jab kōjatdikdik āinwōt an kar armej ro ilo tōre eo an Jeremaia en̄jake (lale Jeremaia 30:5; 31:15; Liāājlo̧ļ 1:1–7; 3:1–5; im kout eo ilo “Kein Jipan̄ ko Jet”). Innām̧ kwomaron̄ ajije ro uwaan kūlaaj eo n̄an jilu kumi ko im kajjitōk ippān kajjojo kumi n̄an etale Jeremaia 30; 31; im 33 kōn ennaan ko me remaron̄ bōktok kōjatdikdik n̄an armej rainin. Ekōjkan an kar kōjatdikdik ilo Irooj kar jipan̄ kōj niknik ilo mālijjon̄ ko?

• Etale Jeremaia 31:31–34; 32:37–42 emaron̄ in jipan̄ kūlaaj eo am̧ kejekļo̧kjeņ kōn bujen ko raar kōm̧m̧ani. Juon wāween n̄an kōketak juon iien ekōnono kōn eoon kein ej n̄an leļo̧k n̄an ro uwaan kūlaaj eo jejjo minit ko n̄an riiti eoon ko innām je ioon juon peba jidikdik juon kajjitōk renaaj kōņaan kajjitōk ippān kūlaaj eo ta eo rej riiti. N̄an waanjon̄ak, remaron̄ kōņaan ekōnono kōn ta meļeļe in n̄an an kien ko an Anij jeje ilo būruōd (lale Jeremaia 31:33) ak ekōjkan an bujen ko jipan̄ kōj itok n̄an jeļā Irooj (lale Jeremaia 31:34). Kwomaron̄ ain kajjitōk ko im kāālet jejjo n̄an ekōnono kaki ippān doon. Ta eo jemaron̄ ekkatak jān eoon kein me rej im̧we kōj n̄an peran ilo kōjparok bujen ko ad?

• Ro uwaan kūlaaj eo am̧ remaron̄ kar bōk kōļmenļo̧kjeņ ko kōn jeje ko rekwojarjar ilo aer kar ekkatak kōn Jeremaia36 ilo m̧weo. Karuwaineneik er n̄an kwaļo̧k ta eo rekar ekkatak. Kwomaron̄ barāinwōt jitōn̄ ro uwaan kūlaaj eo etan juon armej ilo jebta eo im kajjitōk ippāer n̄an riit kōn ta eo armej eo ekar kōm̧m̧ane kōn naan eo an Anij. Ro uwaan kūlaaj eo remaron̄ ekkatak kōn naan ko im jerbal ko an Irooj (lale eoon 1–3, 27–31); Jeremaia (lale eoon 4–7,32); Baruch (lale eoon 4, 8–10, 14–18); Jehudi im Kiin̄ Jehoiakim (lale eoon 20–26); im Elnathan, Delaiah, im Gemariah (lale eoon25). Ekōjkan an naan ko im jerbal ko ad kwaļo̧k ekōjkan ad en̄jake kōn jejej ko rekwojarjar?

Būreejtōn M.Russell Ballard ekar kwaļo̧k jet jekjek ko me remaron̄ kōm̧m̧an bwe jet ren luuji kōjatdikdik, im ekar letok kapilōk eo kōn ia eo n̄an lo kōjatdikdik ie:

“Jet iaad remaron̄ lo mour ko ad robrak kōn illu, inepata, im būrom̧ōj. Elōn̄ rej en̄jake jab kōjatdikdik n̄an ņa mejļan kiojaļjaļ me āinwōt ej tōn anjo̧ ilo laļ in. Ro jet rej lukkuun inepata ioon ro uwaan baam̧le eo me rej kōm̧m̧an men ko me rej kakkure jon̄an ko rejim̧we, kōn ke laļ in ej watōki rem̧m̧an ak nōbari. … Em̧ool eļōn̄ em̧ōj aer kar errā er make n̄an bōk nana eo im kakkure eo enanan an laļ in āinwōt ban bar kōm̧m̧ane. Em̧ōj aer joļo̧k kōjatdikdik.…

“…Jet iaan ro ibwilijid remaron̄ kar luuji aolep kōjatdikdik kōn jerawiwi im bōd. Juon armej emaron̄ erom lukkuun jakoļo̧k ilo wāween ko an laļ in me ejjab lo jabdewōt wāween im luuji aolep kōjatdikdik. Akweļap eo aō n̄an aolep ro em̧ōj aer kar wōtlo̧k n̄an lowaan aujid in an rikapo eo ej n̄an jab ebbwer! Jekdo̧o̧n ta ewi jon̄an an men ko ejjeļo̧k kōjatdikdik ie remaron̄ in ak ewi jon̄an aer lukkuun maron̄ erom, jouj tōmak eō, kwomaron̄ iien otemjej wōr kōjatdikdik. IIen otemjej” (“Lan̄lōn̄ In Kōjatdikdik Ej Kūrm̧ool,” Ensign, Nob. 1992, 31–32).

“Ebwe an pidodo, kōjatdikdik eo ad kōn kōjparok ilo jetōb ilo iien ko rekurbalōklōk ej n̄an ukōt ļōmņak ko ad im būruōd n̄an Jisōs Kraist. … Tōmak ilo Anij im Nejin, Jisōs Kraist, ej lukkuun aorōk n̄an ad dāpij wōt jokkun wōt juon eo an erreim̧anļo̧k eo ilo iien ko an mālijjon̄ im apan̄” (“Lan̄lōn̄ In Kōjatdikdik Ej Kūrm̧ool,”32).