Aiseia 58–66

• N̄an jipan̄ ro uwaan kūlaaj eo ekōnono kōn etke im ekōjkan an Irooj kar kakiene kōj n̄an jitlo̧k, kwomaron̄ kōm̧m̧ane juon kaļōm̧ ioon boot eo ļebōļi “Koṃij Jab Jitlọk Rainin” im “Jitlọk Eo Iar Kāālōte.” Innām ro uwaan kūlaaj eo remaron̄ riiti Aiseia 58:3–7, kanne kaļōm̧ eo kein kajuon kōn kōmeļeļe ko kōn ekōjkan an armej in Israel ro kar jitlo̧k im kaļōm̧ eo kein karuo kōn kōmeļeļe ko kōn jitlo̧k eo āinwōt an Irooj kōņaan. Ekōjkan an kōmeļeļe kein jelet wāween ad kalimjōk jitlo̧k? Ro uwaan kūlaaj eo remaron̄ barāinwōt kwaļo̧k ekōjkan, ilo jeļā eo aer, jitlo̧k ej tōlļo̧k n̄an kōjeraam̧m̧an ko an Irooj ekar kallim̧ur kaki ilo eoon 8–12.

• Jet uwaan kūlaaj eo emaron̄ wōr aer en̄jake ko ilo aer kōmeļeļeik n̄an ro jet etke jej jitlo̧k. Kajjitōk ippāer n̄an kwaļo̧k ta eo rej ba. Kwomaron̄ barāinwōt kajjitōk ippān juon uwaan bisoprik eo n̄an kōnono kōn ekōjkan an jortak in jitlo̧k ko jerbal. Ak kwomaron̄ kwaļo̧k juon iaan waanjon̄ak ko jān ennaan eo an Būreejtōn Henry B. Eyring “E Jab En̄in Jitlo̧k eo Iar Kāālōte?” (Kweilo̧k eo Eļap, Māe 2015, 22–25). Ekōjkan an jitlo̧k im kōļļā jortak in jitlo̧k ko jipan̄ “jeḷate toon ine eo” ad make im ro jet? (Aiseia 58:6).

• Ke Jisōs Kraist ekar kōjjeļļāik armej in Nazareth ro bwe E ekar Messia eo, Ekar kōnono jān Aiseia 61:1–3 (lale Luk 4:16–21; lale barāinwōt pija in alooj eo “Jesus Declares He Is the Messiah,” ChurchofJesusChrist.org). Bōlen ro uwaan kūlaaj eo remaron̄ riiti Aiseia 61:1–3 im kōnono kōn etke eoon kein rej juon kōmeļeļe em̧m̧an kōn mijen eo an Rilo̧mo̧o̧r eo. Kwomaron̄ kōllaajrake ioon boot eo men ko kajjojo Rilo̧mo̧o̧r eo ekar ekkapit n̄an kōm̧m̧ani im ekōnono kōn ta meļeļe in kajjojo iaer. Ekōjkan an kar Rilo̧mo̧o̧r eo kakūrm̧ool m̧ōttan ko an mijen eo An ilo tōre en mour eo An ilo mour in? Ekōjkan An kar kakūrm̧ooli ilo mour ko ad?

  

  3:24

• Ro uwaan kūlaaj eo remaron̄ barāinwōt riiti Aiseia 63:7–9 im kwaļo̧k ekōjkan an Jisōs Kraist kar kōjeraam̧m̧an er ilo wāween kein.

• Aiseia 61:1–3 ej kōjerbal kajin eo aiboojoj im kajin boem̧ n̄an kōmeļeļeik kajoor eo an Jisōs Kraist n̄an lo̧mo̧o̧ren ta eo ekar āinwōt jorrāān. N̄an jipan̄ kōmeļeļe eoon kein, ļōmņak in kwaļo̧k juon bwebwenato kōn juon men eo me kar ļōmņak enaaj kar jako ak jorrāān bōtaab ekar oktak n̄an juon men eo em̧ool eļapļo̧k an aiboojoj. Kōn waanjon̄ak ko, lale pija in alooj eo “Provo City Center Temple” (ChurchofJesusChrist.org; lale barāinwōt “Kein Jipan̄ ko Jet”) ak bwebwenato eo ilo jinoin ennaan eo an Būreejtōn Dieter F. Uchtdorf “Enaaj Likūt Eok Ioon Aeran im Kotak Eok N̄an Kapijuknen” (Kweilo̧k eo Eļap, Māe 2016, 101–4). Ro uwaan kūlaaj eo remaron̄ kōnono kōn ekōjkan aer kar loe an Irooj leļo̧k n̄an armej juon men aiboojoj ke raar ļōmņak mour ko aer raar jorrāān.

  

  7:19

• Aiseia 65:17–25 ej kōmeļeļeik jekjek ko ioon laļ in ālkin Itok Eo Kein Karuo an Rilo̧mo̧o̧r eo. Kwomaron̄ kajjitōk ippān ro uwaan kūlaaj eo n̄an etale eoon kein kappukōt uwaak kko n̄an kajjitōk ko āinwōt kein: Ekōjan naaj mour ioon “laļ kāāl” eo oktak jān wāween mour kiiō ioon laļ in ? Ta eo kwoj loe ilo eoon kein me ekōm̧m̧an menin am̧ lem̧ōņōņō?

Ālkin kwaļo̧k ekōjkan an kijeek eo nan̄in kar kakkure Provo Tabernacle eo, kōm̧m̧an bwe en bar ekkal tokālik āinwōt Provo City Center Tampeļ, Sister Linda S. Reeves ekar ba: “Irooj ej kōtļo̧k bwe jān kajjieon̄ im mālijjon̄, jet iien n̄an aolepān kajoor eo ad. Jaar loe mour ko an ro rejitōn bōro— im bōlen eo ad make—til im menkwaraar im kar bwilōn̄ etke juon Jemedwōj Ilan̄ eo eiakwe im kea enaaj kōtļo̧k an men kein waļo̧k. Ak E jab likūt kōj ilo menkwaraar ko; Ej jutak kōn Pein epeļļo̧k, kijerjer in karuwaineneik kōj n̄an itok n̄an E. Ej kalōk mour ko ad n̄an tampeļ ko rekabwlōn̄lōn̄ ijo Jetōb eo An emaron̄ pād ie n̄an indeeo” (“Bōk Kōjeraam̧m̧an ko an Bujen ko Am̧,” Kweilo̧k eo Eļap, Nob. 2013,119).