Daniel 1–6

N̄an jino juon iien ekōnno kōn ekōjkan an Daniel, Shadrach, Meshach, im Abed-nego kar kwaļo̧k tōmak ilo Irooj, kwomaron̄ kajjitōk ippān jejjo ro uwaan kūlaaj eo n̄an ba ilo tukadu in apan̄ ko em̧m̧aan rein emen raar jelm̧ae, kar kōm̧eļeļeik ilo Daniel1, 3, im6. Etke ekar aikuj in pen n̄an erom tiljek ilo jekjek kein? Ta jekjek ko jej jelm̧ai me rej idajon̄jon̄e tōmak eo ad? Ro uwaan kūlaaj eo remaron̄ etale Daniel 1:10–13; 3:15–18; 6:10, pukōt ekōjkan an em̧m̧aan rein emen kar ņa mejļan idajon̄jon̄ ko aer. Ekōjkan an waanjon̄ak ko aer jipan̄ kōj ilo kijejeto ko ad n̄an erom rikaļoor ro retiljek an Jisōs Kraist?

Elōn̄ iaad, āinwōt Daniel im ro m̧ōttan, kar en̄jake kipel eo n̄an errā kōn jon̄ak ko ad. Ta jet iaan kein jipan̄ ko an kipel in ilo mour ko ad? N̄an jipan̄ ro uwaan kūlaaj eo ekkatak jān waanjon̄ak eo an Daniel im ro m̧ōttan, kwomaron̄ ajije kūlaaj eo n̄an jilu kumi ko im kappeik kajjojo kumi n̄an etale juon iaan jebta kein: Daniel1, 3, ak6. Ekōjkan an kar Irooj kōjeraam̧m̧an Daniel, Shadrach, Meshach, im Abed-nego ke raar kāālet n̄an tiljek wōt jekdo̧o̧n kipel eo raar jelm̧ae? Kajjojo kumi remaron̄ kwaļo̧k ippān kūlaaj eo ta eo rekar loe. Innām ro uwaan kūlaaj eo remaron̄ kapilōk ippān doon kōn ekōjkan pād wōt ilo tiljek jekdo̧o̧n kipel in iaio eo ak kain kipel ko jet. Remaron̄ barāinwōt ekōnono kōn aorōk eo an kappukōt ro m̧ōttad rem̧m̧an me renaaj rie kōj ilo jon̄ok ko ad.

Ekōnono kōn Daniel2 emaron̄ jipan̄ kūlaaj eo am̧ meļeļe kōn ekōjkan an Kabun̄ eo an Jisōs Kraist im Armej ro Rekwojarjar ilo Raan-ko Āliktata ej kakūrm̧ool jem̧ļo̧k eo an āinwōt dekā eo kar kanaan kake “ jeke dekā eo jān juon toḷ” (eoon45). N̄an jinoe, kwomaron̄ etale āinwōt juon kūlaaj kōmeļeļe an Daniel’ kōn ettōņak eo an Nebuchadnezzar, loe ilo Daniel 2:31–45. Innām kwomaron̄ kwaļo̧k juon pija in juon dekā (ak jin̄aik juon ioon boot eo). Kajjitōk ippān ro uwaan kūlaaj eo n̄an kwaļo̧k ta eo rej ekkatak kōn aelōn̄ in kiin̄ eo an Anij kōn keidik n̄an kōmeļeļe ko kōn dekā eo ilo Daniel 2:34–35, 44–45. Bōlen ro uwaan kūlaaj eo remaron̄ jeļā jet iaan bwebwenato in Kabun̄ in ilo eria eo ami me remaron̄ kwaļo̧ke. Ekōjkan ad kar lo an kanaan ko an Daniel kar kūrm̧ool ilo mour ko ad kajjojo?

Bōlen ro uwaan kūlaaj eo renaaj jeraam̧m̧an jān ekkatak kōn ekōjkan an Daniel kar kōpooj e make n̄an bōk revelesōn eo kar aikuji n̄an kōmeļeļeik im ukōt meļeļe in ettōņak eo an Nebuchadnezzar Kwomaron̄ jino kōn kajjitōk ippān ro uwaan kūlaaj eo n̄an etale Daniel 2:1–15 innām kwaļo̧k ekōjkan aer naaj kar en̄jake eļan̄n̄e raar lo er make ilo jekjek eo an Daniel. Kajjitōk ippāer n̄an etale Daniel 2:16–18 n̄an ekkatak kōn ta eo Daniel ekar kōm̧m̧ane. Ta eo jej ekkatak jān Daniel 1:17 kōn ekōjkan an Anij kar kōpooj Daniel? Ta eo jemaron̄ ekkatak jān Daniel me emaron̄ jipan̄ kōj ilo ad kappukōt revelesōn an juon make? Ta eo jemaron̄ ekkatak jān naan ko im jerbal ko an Daniel ālkin an kar bōk jipan̄ eo an Irooj? (lale Daniel 2:20–30).

En̄jake eo an Shadrach, Meshach, im Abed-nego loe ilo Daniel3 emaron̄ jipan̄ ro uwaan kūlaaj eo ļapļo̧k aer meļeļe ta meļeļe in n̄an wōr tōmak ilo Jisōs Kraist. Kwomaron̄ kajjitōk ippān ro uwaan kūlaaj eo n̄an kwaļo̧k ilo tukadu in apan̄ eo Shadrach, Meshach, im Abed-nego raar jelm̧ae (lale Daniel 3:1–12) innām ekōnono kōn ekōjkan aer kar uwaake (lale Daniel 3:13–18). Ta eo jemaron̄ ekkatak kōn tōmak jān uwaak eo an em̧m̧aan rein? Kwomaron̄ je ioon boot eo naan ko Am Anij emaron̄ in… im Ak eḷan̄n̄e jab… jān eoon 17–18. Ro uwaan kūlaaj eo remaron̄ elmakote ekōjkan ar maron̄ kakūrm̧ool ilo būļāān̄ ko kōn jekjek ko remaron̄ in jelm̧ae. N̄an waanjon̄ak, remaron̄ elmakote “Am Anij ej maron̄ in uwaake aolep kajjitōk ko aō” im “Ak eļan̄n̄e jaab, inaaj kijenmej ilo lōke E.” Ilo an ro uwaan kūlaaj eo kwaļo̧k waanjon̄ak ko, kōketak er n̄an kōnono kōn ekōjkan an Rilo̧mo̧o̧r eo rie im kōkajoorļo̧k kōj jekdo̧o̧n n̄e jejjab jeļā ekōjkan an men ko naaj waļo̧k.