Hoseia 1–6; 10–14; Joel

• Kwomaron̄ jino juon iien ekōnono kōn Hoseia 1–3 kōn je m̧are ioon boot eo im kajjitōk ippān ro uwaan kūlaaj eo n̄an kōllaajraki naan ko me rej kobaļo̧k ippān m̧are. Ekōjkan an kōm̧m̧ane juo bujen ippān Irooj āinwōt deļo̧n̄ ilo juon m̧are? Ekōjkan an rupe bujen jab eo āinwōt jab m̧ool n̄an eo pālem̧? (lale Hoseia 2:5–7,13). Innām kūlaaj eo emaron̄ kōnono kōn ekōjkan an kadkad eo ikōtaan Hoseia im Gomer jutak kōn kadkad eo ikōtaan Irooj im armej ro An. Ta eo Hoseia 2:14–23 im Hoseia 14 katakin kōj kōn iakwe im tūriam̧okake eo an Irooj? Ekōjkan ad kwaļo̧k n̄an Irooj ad iakwe im m̧ool n̄an E?

• Hoseia14 ej kōmeļeļeik elōn̄ kallim̧ur ko raiboojoj an Irooj ekar kōm̧m̧ani n̄an m̧weo im̧ōn Israel eļan̄n̄e renaaj kar bar ro̧o̧l n̄an E. Bōlen ro uwaan kūlaaj eo remaron̄ etale jebta in pukōt kallim̧ur kein. Ta eo Irooj ekar ba E enaaj kar kōm̧m̧ane? Ta meļeļe in naan eo emaron̄ in kar “yokwe er ilo jouj”? (eoon4). Ta eo eo menin eddōk eo ej jutak kake ilo eoon 5–8 ej katakin kōj kōn kōjeraam̧m̧an ko an Irooj n̄an kōj, ekoba kōjeraam̧m̧an ko an ukweļo̧k?

  

• Hoseia 6:6 im Joel 2:12–13 rej kōnono kōn katok an menin mour im ekkekōl nuknuk āinwōt kakōļļe in ukweļo̧k. Ilo an kain iminene kein maron̄ jab jeļā kaki rainin, eoon kein remaron̄ tōlļo̧k n̄an juon iien ekōnono kōn ta eo aorōk tata n̄an Irooj. Kom̧ maron̄ riiti ippān doon Hoseia 6:6 im ekōnono kōn ta eo eoon in emaron̄ meļeļe in. Kajjitōk ippān jet ro uwaan kūlaaj eo n̄an riiti Matu 9:10–13 im ro jet riiti Matu 12:1–8. Innām ro uwaan kūlaaj eo remaron̄ katakin doon ekōjkan an m̧akūtkūt kein ilo jerbal in karejar eo an Rilo̧mo̧o̧r eo jipan̄ kōj meļeļe pedped in katak eo kar katakin ilo Hoseia 6:6. Ekōjkan ad maron̄ mour kōn pedped in katak in ilo tōre in ad?

  Kwomaron̄ barāinwōt riit ippān doon Joel 2: 12–13 im ekōnono kōn ta eo emaron̄ meļeļe in n̄an n kekōl būruōd im jab baj wōt nuknuk ko ad. Ta eo jemaron̄ ekkatak jān eoon kein kōn ta meļeļe in n̄an erom rikaļoor ro rem̧ool an Jisōs Kraist?

• N̄an jino juon iien ekōnono kōn Joel2, kwomaron̄ kwaļo̧k ippān kūlaaj eo ta eo Moronai ekar ba kōn kanaan in ke ekar loļo̧k Josep Smith ilo 1823 eo (lale Josep Smith—Bwebwenato 1:41). Ro uwaan kūlaaj eo remaron̄ kwaļo̧k ekōjkan aer en̄jake kōn naan in kanaan ko ilo Joel 2: 28–32 kōn aer kar kūrm̧ool ilo tōre in ad. Kwomaron̄ barāinwōt ekōnono kōn ekōjkan an naan ko an Elder David A. Bednar ilo “Kein Jipan̄ ko Jet” iookļo̧k kanaan eo an Joel. Ro uwaan kūlaaj eo maron̄ ekōnono kōn meļeļe in n̄an er n̄an en̄jake juon lutōktok in Jetōb Kwojarjar eo ilo mour ko aer raan otemjeļo̧k. Ta eo jemaron̄ kōm̧m̧ane eļan̄n̄e jej en̄jake ad jab āinwōt bōk lutōktok jab in? Ekōjkan ad maron̄ jipan̄ “rro [nejid] m̧aan im ro [nejid] kōrā” bōke? (eoon28).

Elder DavidA. Bednar ekar katakin:

“Emakijkij ad kapene n̄an kōj make n̄an bōk revelesōn eo an juon make. Kōn menin ij ba, bujen kallim̧ur eo ej bwe ilo ad kautiej bujen ko ad, jemaron̄ aolep iien bōk Jetōb Kwojarjar eo n̄an an erom eo m̧ōttad iien otemjeļo̧k. Bōtaab jej kōnono kake im jej kōm̧m̧ane n̄an e āinwōt eļan̄n̄e ron̄jake ainikien Irooj kōn Jetōb eo An ej juon iien ejeja. … [Jetōb eo] ej aikuj pād ippād aolep iien. Ejjab aolep iien ilo juon iien ekanooj kadu, bōtaab eļan̄n̄e juon armej ej kōm̧m̧ane ilo em̧m̧an tata an—kwojjab aikuj in erom weppān—bōtaab eļan̄n̄e kwe im n̄a rej kōm̧m̧ane ilo em̧m̧an tata ippād im jejjab kōm̧m̧ani jerawiwi ko reļļap, innām jemaron̄ pedped ioon Jetōb Kwojarjar n̄an tōl kōj.…

“…Jej āinwōt tōmak bwe Jetōb Kwojarjar eo ejidimkij im kilep im m̧ōkaj, n̄e ej lur im dik im kwaļo̧k ilo iien. Kwojjab aikuj in kile bwe kwoj bōk revelesōn ilo iien eo me kwoj bōk revelesōn” (“Elder DavidA. Bednar Discussion” [evening with a General Authority, Feb.7, 2020], broadcasts.ChurchofJesusChrist.org).