Joshua 1–8; 23–24

Kar ba n̄an Joshua, “Kwōn kajoor im kanooj peran” elōn̄ iien ko (lale Duteronomi 31:7, 23; Joshua 1:6–7, 9). Bōlen ro uwaan kūlaaj eo renaaj jeraam̧m̧an jān ekōnono kōn ta meļeļein an Irooj ba jen eoon in. Remaron̄ pukōte ilo Joshua 1:1–9 kōn kapilōk eo Irooj ekar leļo̧k n̄an Joshua n̄an jipan̄ e bwe en kajoor im peran. Remaron̄ barāinwōt kwaļo̧k waanjon̄ak ko jen armej ro im rejeļā ewōr ippāer m̧wil kein. Ewi wāween an Joshua kwaļo̧k kajoor im peran ilo jeje kein jej loi ilo bok in? (n̄an waanjon̄ak, lale jebta 3, 6, im 8). Ro uwaan kūlaaj eo remaron̄ kwaļo̧k ekōjkan aer kajjieon̄ n̄an kajoor im peran ilo Kraist.

N̄an kōkajoor ro uwaan kūlaaj eo ilo mour ko aer make im baam̧le eo katak jeje ko rekwojarjar, komaron̄ riiti Joshua 1:8 ippān doon ilo kūlaaj. Ta eo jej katak jān eoon kein kōn ekōjkan ad ekkatak jeje ko rekwojarjar? Bōlen ro uwaan kūlaaj eo remaron̄ kwaļo̧k ta eo rej kōm̧m̧ane n̄an “lukkuun ļōmņak kake” ilo jeje ko rekwojarjar “raan im bon̄.” Ewi an Irooj kar kōm̧m̧ani “iaļen jeraam̧m̧an ko ad” im letok n̄an kōj “tōprak rem̧m̧an” ilo ad ekkatak naan ko An?

Bōlen ro uwaan kūlaaj eo renaaj jeraam̧m̧an jān aer etale jeje kein an Riisrael ro ilo aer etetal ioļapen River Jordan. Komaron̄ kōjnolo̧k kūlaaj eo ilo ruo iaan ruo im kajjitōk ippāerro n̄an kwaļok bwebwenato in n̄an doon, bōk koņaan doon juon jantej kajjojo iien (kōkajoor er n̄an pukote ilo Joshua 3 eļan̄n̄e renaaj aikuj jipan̄ er keememej bwebwenato in). Innām, āinwōt juon kūlaaj, remaron̄ kōnono kōn kajjojo men ko rem̧m̧an ippāer. Ta eo jej ekkatak jān bwebwenato in im emaron̄ jipan̄ kōj en̄jake “menin bwilōn̄” ko an Irooj ilo mour ko ad? (eoon 5). Ta “menin bwilōn̄” ko em̧ōj An kōm̧m̧ani n̄an kōj? Etke ej aorōk bwe kajjojo epepen en wōr aer en̄jake ko jen jetōb kwojarjar im rej katakin er ke “Irooj … ekajoor”? (Joshua 4:24).

Jekdoon n̄e kōjwōj aikuj wōr ad make en̄jake ko n̄an kalōk tōmak ko ad, keememej ke ta eo Irooj ekar kōm̧m̧ane n̄an ro jibūd im jim̧m̧ad ej barāinwōt aorōk. Ekkar n̄an Joshua 4, ta ko Riisrael ro ekar kōm̧m̧ane n̄an jipan̄ epepen ko tokālik keememej ilo aer etetal ioļapān River Jordan? (lale Joshua 4:1–7). Ta eo jej kōm̧m̧ane n̄an lale bwe en̄jake ko ad ren jab meļo̧kļo̧k jān epepen ko tokālik?

Unin tōl eo an wiik in ilo Itok, Ļoor Eō—N̄an Kajjojo Armej im Baam̧le ko ej elmakote keidi ritariņae ro ikōtaan Riisrael ro im Rikenan ro ilo Joshua 6–8 ippān tariņae ko ad make ippān kapo ko. Kwomaron̄ kajjitōk ippān ro uwaan kūlaaj eo ta ļōmņak ko ak im̧we ko rekar en̄jaki ilo aer kar riiti jepta ko ilo kōļmenļo̧kjeņ eo ilo kwe. Ak komaron̄ jitōn̄ļo̧k er n̄an jejjo eoon ko im rej aorōk n̄an tarinae in ad n̄an bōbrae jerawiwi, im remaron̄ kōnnaan kōn ta ko eoon kein rekar katakin kōn lapļok ad maron̄ n̄an bōk kajoor an Anij ilo mour ko ad. Jet iaan eoon kein remaron̄ kōbaļo̧k Joshua 6:1–5, 18, 20; 7:11–13.

Bōlen emaron̄ jipan̄ ro uwaan kūlaaj eo kōjerbal Joshua 23–24 n̄an er make eļan̄n̄e rej ļōmņak ke er kar riIsrael ro rej ron̄ an Joshua leļo̧k naan in kapilōk jemļo̧kinļo̧k mour eo an. Komaron̄ leļo̧k jejjo eoon n̄an riiti ilo ejjeļo̧k ainikien innem kajjitōk ipper n̄an kwaļo̧k jet ennan jen eoon ko im rekar kadel er n̄an ped wōt ilo tōmak n̄an Irooj. Remaron̄ bar kwaļo̧k ewi wāween aer make kōm̧m̧an kālet eo n̄an “wōn [rej] jerbal n̄an e” (Joshua 24:15). Etke raar kōm̧mane kālet in?

Komaron̄ karuwaineneik ro uwaan kūlaaj eo n̄an kāālet juon eoon jān Joshua 23–24 im ej im̧we er bwe ren kālet n̄an jerbal n̄an Anij im kōm̧m̧ane juōn peba kileplep ak meme ippān ennaan in n̄an kadeelel kake ilo m̧ōko ak ilo social media.