Exodus 24; 31–34

• Komaron̄ jinoe kajjitōk ippān ro uwaan kūlaaj eo eļan̄n̄e rekar aikuj kōmeļeļe n̄an juon iaan baam̧le ko ak ro m̧ōttaer etke rej kautiej Jabōt oktakļo̧k jān raan ko jet. Karuwaineneik er n̄an kwaļo̧k ta eo rej ba ak ta eo renaaj ba ilju im jekļaj. Riiti Exodus 31:12–17 ak ennaan eo ilo “Kein Jipan̄ Ko Jet” remaron̄ bar lewaj jet jipan̄ ko. Ewi wāween an kāālet ko ad ilo Jabōt kwaļo̧k ad kallim̧ur n̄an Jisōs Kraist?

• Men̄e jorrāān ko rej kōmeļeļe ilo Exodus 31:14–15 jab kōjerbali ilo rainin, rej kwaļo̧k jon̄an an Irooj en̄jake kōn Jabōt. Etke kien in elukkuun aorōk? Kōmeļeļeik eoon kein remaron̄ jipan̄: Exodus 31:12–17; Aiseia 58:13–14; Katak im Bujen Ko 59:9–13.

  

• N̄an jipan̄ ro uwaan kūlaaj eo ļōmņak im kōkm̧anm̧anļo̧k ļo̧o̧k eo ilo Exodus 32, m̧okta kajjitōk ippāer n̄an etale jebta eo make iaam̧ ak ippān kumi ko. Innām kajjitōk ippān ro uwaan kūlaaj eo n̄an bōk bun̄tōn eo an Riisrael ro im raar eddōkļo̧k ilo aer kar kijorjor im kōttar an Moses rooltok im kar kālet n̄an kōm̧m̧an juon ekjab kooļ. Ta en̄jake ko remaron̄ tōl er n̄an kabun̄jar n̄an ekjab? Ro jet ilo kūlaaj eo remaron̄ kajjieon̄ n̄an kōketak er n̄an pād wōt ilo m̧ool eo n̄an Irooj im rikanaan ro An. Ro uwaan kūlaaj eo remaron̄ kōnono kōn ta eo ekar im̧we er n̄an kōjparok bujen ko aer. Ta eo jemaron̄ kōm̧m̧ane n̄an jipan̄ ro im rej eddodo n̄an kōjparok bujen ko aer?

• N̄e armej rej riiti Kallim̧ur M̧okta, jet iien rej ilbōk kōn an lukkuun pen kakien ko Irooj ekar kōmeļeļeiki kōn jerawiwi. Exodus 34:1–9 emaron̄ jipan̄ er loe bwe Anij ej dike jerawiwi, E ej barāinwōt tūriam̧o, leļo̧k jeorļo̧k in bōd n̄an ro rej ukweļo̧k. Bōlen ro uwaan kūaaj eo remaron̄ riiti eoon kein im ļōmņak kōn kajjitōk ko āinwōt kein: Ta eo jej ekkatak kōn Rilo̧mo̧o̧r jān eoon kein? Etke jej aikuj in jeļā men kein kōn E? Komaron̄ jitōn̄ļo̧k bwe ukook eo an Josep Smith, , Exodus 34:7 (ilo Exodus 34:7, footnote e) kōmeļeļe bwe Anij eban “kowānōk ro rinana.” Ta meļeļein menin? Bōlen ro uwaan kūlaaj eo remaron̄ kwaļo̧k wāween aer kam̧ool kōn an Anij tiriam̧o. Ewi wāween an jerbal bwe Anij en jim̧we im tiriam̧o? (lale Alma 42:13–15).

• Exodus 34:6–17 emaron̄ loe āinwōt kōmeļeļe n̄an jipan̄ Riisrael ro ukweļo̧k jān jerawiwi ko aer jān ekjab (kōmeļeļe ilo Exodus 32). Ta eo kwoj loe ilo eoon kein me rej jipan̄ Riisrael ro ukweļo̧k? Ta eo jej ekkatak kōn Irooj im ukweļo̧k jān kōmeļeļein?

• Ewi wāween am̧ naaj jipan̄ ro uwaan kūlaaj eo kōjerbal ta eo Irooj ekar ba n̄an Moses ilo Exodus 33:11–17? Komaron̄ jinoe ilo etale jerbal ko Anij ekar aikuji Moses bwe en kakūrm̧ooli (lale Exodus 33:1–3). Ta eo jej loe ilo eoon 11–17 im emaron̄ kōkajoorļo̧k im kaenōm̧m̧an Moses? Ro uwaan kūlaaj eo remaron̄ ļōmņak kōn ta ko Anij ekōņaan bwe ren kōm̧m̧ane—āinwōt kakūrm̧ool kūr ko aer ilo Kabun̄ in, eddo ko an baam̧le, ak iien em̧m̧an n̄an jerbal in karejar. Innām remaron̄ riiti bar eoon kein. Ta loļo̧kjeņ ko jej būki kōn wāween an Irooj jipan̄ kōj?

Būreejitōn Russell M. Nelson ekar kōmeļeļeiki: “Ilo iiō ko ikar dik, ikar ekkatak jerbal n̄an ro jet im rekar kakobaik laajrak in men ko rej kōm̧m̧ani im men ko rejjab kōm̧m̧ani ilo Jabōt. Ejjan̄in etto ke ikar ekkatak jān jeje ko rekwojarjar bwe em̧akūtkūt ko aō im m̧wilū ilo Jabōt ren juon kōkaļļe ikōtaan n̄a im Jemedwōj Ilan̄ [lale Exodus 31:13; Ezekiel 20:12, 20]. Kōn meļeļe in, ijjab aikuj laajrak in men ko ij kōm̧m̧ani im jab kōm̧m̧ani. N̄e ij tin kōm̧m̧ane kālet eo aō n̄an kōm̧m̧ane juon makūtkūt ilo raan in Jabōt, ij kajjitōkin eō make, ‘Ta kōkaļļe eo ikōņaan bwe in leļo̧k n̄an Anij?’ Kajjitōk in ekar kōm̧m̧an bwe kāālet ko aō kōn raan in Jabōt ren alikkar” (“Jabōt ej juōn men in Lan̄lōn̄,” Liaona, Māe 2015, 130).