Exodus 18–20

• Kwomaron̄ rojan̄ kūlaaj eo am̧ n̄an ekkōnono kōn kapilōk eo an Jetro ekar leļo̧k n̄an Moses (lale Exodus 18:13–26) ilo am̧ kajjitōk ippāer n̄an pijaikļo̧k bwe rej kōnono ippān juon armej eo rej en̄jake bwe kūr ko an ilo Kabun̄ in, aikuj ko an baam̧le, ak eddo ko jet rej “kanooj eddo” im bwe ļāeo ak lieo renaaj “ban kōm̧m̧ane make” (Exodus 18:18). Ekōjkan an naaj kapilōk in ilo Exodus 18:13–26 maron̄ jipan̄? Ta kakkobaba in kapilōk ko jet jemaron̄ kwaļo̧k jān en̄jake ko ad make?

• Ekōnono kōn Exodus 18:13–26 emaron̄ letok juon iien em̧m̧an n̄an ekkōnono kōn wāween jerbal in karejar maron̄ jipan̄ kōj “ineek eddo in ippān” ritōl ro ad ilo jerbal eo an Irooj (Exodus 18:22). Ta m̧wil ko Jetro ekar kwaļo̧k n̄an Moses bwe en kappukot ilo ro renaaj jerbal āinwōt “ritōl” an armej ro? (lale Exodus 18:21). Etke m̧wil kein raorōk ilo kijejeto ko ad n̄an jerbal in karejar n̄an doon? Ekōjkan jerbal in karejar n̄an ro uwaan baam̧le, membōr in Kabun̄ in, im ro jet jipan̄ “ineek eddo in” an ritōl ro ad ilo Kabun̄ in? Āinwōt m̧ōttan ekkōnono in am̧, kwomaron̄ kwaļo̧k juon iaan bitio ko loe ilo ministering.ChurchofJesusChrist.org.

  

• Jemaron̄ ke ļōmņak kōn juon jerbal me em̧m̧anļo̧k n̄e jej kadedeļo̧k bun̄tōn ko reaorōktata m̧okta? (Waanjon̄ak ko remaron̄ koba jerbale juon waanjon̄ak in math ak ļoor juon iiōk). Kwaļo̧k ippān kūlaaj eo jet waanjon̄ak ko ewōr am̧ jeļā kaki, im kūr er n̄an ļōmņak kōn ko aer make. Ekōjkan ilo ad kadedeļo̧k bun̄tōn ko reaorōk m̧okta iookļo̧k wōt kien ko Exodus 20:2–11? Ta eo kien ko rej katakin kōj kōn likūt Anij m̧oktata ilo mour ko ad? Ta men ko me jemaron̄ po n̄an kōm̧m̧ani m̧okta jān E? (N̄an jet waanjon̄ak ko, lale ennaan eo ilo “Kein Jipan̄ ko Jet.”) Etale Exodus 20:2–11 emaron̄ jipan̄ ro uwaan kūlaaj eo am̧ kejōkļo̧kjeņ kōn kallim̧ur eo aer n̄an likūt Anij m̧okta.

• Ekōjkan am̧ maron̄ jipan̄ ro uwaan kūlaaj eo am̧ meļeļe aorōkin Kien ko Jon̄oul ilo raan kein ad? Kwomaron̄ ajeeje kūlaaj eo am̧ n̄an pea ko im kūr er n̄an riiti Exodus 20:2–17 im tokālik ekkōnono kōn wāween an pokake kajjojo iaan kien ko rej kōjeraam̧m̧an er, baam̧le ko aer, im armej ro ipeļaakier. Kwomaron̄ barāinwōt kwaļo̧k bitio eo “Obedience to the Ten Commandments” (ChurchofJesusChrist.org). Ta kōjeraam̧m̧an ko Jemedwōj Ilan̄ ej kallim̧ur kōj kōn ad pokake kien ko An? (lale, n̄an waanjon̄ak, Mosaia 2:41). Ewi wāween an kien kein kwaļo̧k iakwe eo an Anij n̄an kōj?

Būreejtōn Spencer W. Kimball ekar katakin bwe ejjeļo̧k oktak ikōtaan kabun̄ in etto n̄an ekjab im m̧wil eo m̧wilin armej rainin. Eaar ba:

“Kabun̄ n̄an ekjab ej juon iaan jerawiwi ko reļļap. …

“Kabun̄ n̄an ekjab ilo raan kein ak riab in anij ko remaron̄ jekjek ko āinwōt nuknuk ko, m̧ōko, pejnej ko, mijiin ko, wa ko, waan lo̧jet ko rem̧m̧an, im m̧weik ko jet rej bōk kōj jān iaļ eo ekwojarjar. …

“Men ko jejjab maron̄ un̄ūri im loi rej kōm̧m̧ani āinwōt anij ro repojak. Tiikri ko im leta ko im taitōļ ko remaron̄ erom̧ ekjab ko. …

“Ekanooj lōn̄ armej rej ekkal im kanne juon em̧ im wia wa m̧okta—im tokālik lo bwe rej ‘jab maron̄ kōļļā’ juon m̧ōttan jon̄oul. Wōn eo rej kabun̄ n̄ane? Aaet em̧ool ejjab Irooj in lan̄ im laļ. …

“Ekanooj lōn̄ rej kabun̄ n̄an iien kakidudu, tūreep in en̄od, iien kakkije, piknik ko ilo jem̧lo̧kin juon wiik im m̧akūtkūt ko inam̧ōj. Ro jet ewōr aer ekjab āinwōt ikkure ko an sport, ākiuu, football, bullfight, ak golf. …

“Aaet juon pija in armej rej kabun̄ n̄ane ej kōn kajoor im bun̄bun̄. … Anij kein in kajoor, m̧weie, im kareel rej ko eļaptata aer eppen im rej lukkuun m̧ool in āinwōt kidu gold ko an ajri ro in Israel ilo āne jem̧aden” (Teachings of Presidents of the Church: Spencer W. Kimball [2006], 146–47).