Exodus 7–13

N̄an jipan̄ ro uwaan kūlaaj ļōmņak kōn aer m̧ōņōņō in leļo̧k būruwer n̄an Anij, komaron̄ kajjitōk ippāer n̄an riiti juon iaan eoon kein: Exodus 7:14–25; 8:5–15; 8:16–19; 8:20–32; 9:1–7; 9:8–12; 9:22–26; 10:12–15; 10:21–29; 12:29–33. Innām remaron̄ je ioon bo̧o̧t eo naan ak eoon ko me rej kōmeļeļe wāween an Pero kar eoron̄ kōn jon̄oul nan̄inmej ko Anij naaj kar jilkintok ioon RiIjept ro. (Komaron̄ kōņaan keememej bwe Ukook eo an Josep Smith ej kwaļo̧k bwe Pero eaar kappen būruōn.) Etke Pero eaar kalimjōk jekjek in āindein? Etke jet iien ej pen n̄an leļo̧k būruōd im ankilaad n̄an Anij? Ekōjkan an Jemedwōj Ilan̄ im Jisōs Kraist jipan̄ kōj eļļā jān men kein reppen?

Ilo am̧ boktok n̄an kūlaaj juon men epen im juon men epidodo, komaron̄ jipan̄ ro uwaan kūlaaj meļeļe ta meļeļein an wōr ippād juon bōro epen im juon bōro epidodo. Komaron̄ jaake to jaake tak men ko ruo iloan kūlaaj, ilo an juon armej riiti juon iaan kōmeļeļe ko an būruōn Pero loe ilo Exodus 7–10 (eo āinwōt Exodus 9:22–35). Etke “epen” juon kōmeļeļe em̧m̧an kōn būruōn Pero? Ta ko eoon kein rej katakin kōj kōn ta meļeļein n̄an wōr ippād bōro em̧m̧an? (N̄e ejipan̄, ro uwaan kūlaaj remaron̄ kappok ļōmņak ilo juon ak elōn̄ jān iaan eoon kein: 1 Nipai 2:16; Mosaia 3:19; Alma 24:7–8; 62:41; Ether 12:27.) Elmen an Rilo̧mo̧o̧r eo jipan̄ kōj kapidodoikļo̧k būruōd? Pija in alooj eo “A Change of Heart” (ChurchofJesusChrist.org) emaron̄ jipan̄ kakobabaļo̧k ilo meļeļe eo aer.

N̄an jipan̄ ro uwaan kūlaaj kōļmenļo̧kjeņ etke Irooj eaar leļo̧k nan̄inmej ioon Ijipt, komaron̄ kajjitōk ippān kajjojo iaan kūlaaj n̄an kāālet juon eoon in jipan̄ jān laajrak eo im kappok un ko: Exodus 3:20; 7:5, 17; 9:14–16; 10:1–2. Komaron̄ barāinwōt kajjitōk ippān ro uwaan kūlaaj n̄an kwaļo̧k elmen aer kar ekkatak ke “ejjeļo̧k āinwōt [Jemedwōj Ilan̄ im Jisōs Kraist] ilo aolepen laļ in” (Exodus 9:14).

Kememe Kwojkwoj in Kijoone eo eaar jipan̄ ro nejin Israel ro keememej bwe Irooj eaar kanemkwoj er jān kōm̧akoko. N̄an jipan̄ ro uwaan kūlaaj meļeļe kōn kōkaļļe eo an Kijoone, komaron̄ ejaak ro po̧o̧k in laajrak ioon bo̧o̧t im je Kōkaļļe im Meļeļe, ippān juon pija in Jisōs Kraist ilōn̄ in po̧o̧k in laajrak ko. Ro uwaan kūlaaj remaron̄ ekkatak Exodus 12:1–13 im je ioon bo̧o̧t eo jabdewōt jān eoon kein me emaron̄ kōkaļļein anemkwoj eo ad kōnke kōn Jisōs Kraist. Innām remaron̄ kōmeļeļe ta kōkaļļe kein rej katakin kōj kōn Pinmuur eo an Rilo̧mo̧o̧r (lale tabōļ eo ilo “Kakobaba in Kein Jipan̄” n̄an jejjo ļōmņak). Pija in alooj eo “The Passover” (ChurchofJesusChrist.org) emaron̄ jipan̄ er loe ta eo rej riiti ilo Exodus 12.

N̄an jet armej, kwojkwoj eo ejjab ejetōbtōb aolep iien āinwōt an aikuj kar. Ļōmņak kōn wāween juon kōmeļeļe in Exodus 12 emaron̄ jipan̄ aolep ro uwaan kūlaaj pukot meļeļe eo emwilaļo̧k in kwojkwoj eo. N̄an waanjon̄ak, ālkin ro uwaan kūlaaj etale Exodus 12, komaron̄ kajjitōk ippāer n̄an kwaļo̧k RiIsreal ro jān tōre eo maron̄ kar ba eļan̄n̄e juon nejin ļaddik ak nejin leddik kajjitōk ta meļeļe in Kijoone eo n̄an er. Ro uwaan kūlaaj remaron̄ kōmeļeļe ta remaron̄ ba n̄e juon ej kajjitōk ta meļeļein kwojkwoj eo n̄an er, ekoba jabdewōt ļōmņak raar bōk jān Kijoone eo. Komaron̄ leļo̧k an ro uwaan kūlaaj eo iien n̄an aer lin̄ūri ta eo remaron̄ kōm̧m̧ane n̄an keememej Rilo̧mo̧o̧r eo aolep raan. Pija in alooj eo “Always Remember Him” (ChurchofJesusChrist.org) emaron̄ jipan̄ er.