Exodus 14–17

• Lom̧aļo Ekūlm̧ūr eaar āinwōt ejjeļo̧k jem̧ļo̧kin n̄an RiIsreal ro, bōtaab Anij eaar jeļā ta ko rejaje. Etale bwebwenato eo kar kijoone Lom̧aļo Ekūlm̧ūr ekabwilōn̄ļōn̄ maron̄ kakeememej ro uwaan kūlaaj eo kōn iien ko ke Anij ekar kadiwōjļo̧k er jān mālijjon̄ ko aer. Komaron̄ kajjitōk ippān ro uwaan kūlaaj n̄an etale Exodus 14 im kwaļo̧k ta eo eļap tata an im̧we er kōn bwebwenato in. Barāinwōt kōketak er n̄an kwaļo̧k en̄jake ko aer kōn kar kadiwōjļo̧k er jān mālijjon̄ ko, ippānļo̧k eoon ko jān jebta eo me ekalōk tōmak eo aer bwe Anij emaron̄ kadiwōjļo̧k kōj.

• Emaron̄ barāinwōt kaitoktok limo n̄an riit ippān doon Katak im Bujen Ko 8:2–3. Ta eo eoon kein rej katakin kōj kōn Moses? Ewi wāween an eoon kein jelōt wāween ad kōļmenļo̧kjen kōn iien ko ilo Exodus 14? Ta eo rej elamakote kōn ekōjkan ad kappukōt diwōjļo̧k eo jān mālijjon̄ ko ad? Ļōmņak kōn ta ennaan eo ilo “Kein Jipan̄ ko” emaron̄ kobaikļok n̄an iien ekōnono eo ami.

• Exodus 15–17 ej letok elōn̄ bwebwenato ko me remaron̄ kalōk tōmak eo an ro uwaan kūlaaj eo ilo kajoor im m̧ōņōņō eo an Irooj n̄an kake aikuj ko ad ilo kanniōk im ilo jetōb. Bōlen kajjojo ro uwaan kūlaaj remaron̄ ekkatak juon iaan eoon kein, kappukōt ennaan ko ilo jetōb: Exodus 15:23–27; 16:1–15; 17:1–7. Leļo̧k n̄an jet iaan ro uwaan kūlaaj iien n̄an kwaļo̧k ta ko raar loi. Ekōjkan ad maron̄ kōjerbal bwebwenato kein n̄an kōketak juon eo me ekar jab bōk aikuj ko ilo kanniōk ak ilo jetōb?

• Ro uwaan kūlaaj eo remaron̄ barāinwōt riiti eoon kein im kwaļo̧k waanjon̄ak ko an allin̄ūrn̄ūr. Ewi wāween an maron̄ kōm̧eļeļe n̄an juon ta meļeļe in allin̄ūrn̄ūr? Ta jet iaan kaje ko an allin̄ūrn̄ūr me ekōm̧m̧an an kanooj kauwōtata? Bōlen ro uwaan kūlaaj eo remaron̄ kwaļo̧k naan in kapilōk kōn ekōjkan joļok kapo eo n̄an allin̄ūrn̄ūr ņae Irooj n̄e jej ioon mālijjon̄ ko reppen.

• Emaron̄ jipan̄ kūlaaj eo n̄an keidi m̧ōn̄ā eo kōmeļeļeik ilo Exodus 16 ippān aikuj in najdik eo jetōb ko ad raikuji. Ta eier wōt juon ko jej loi? Ta katak ko ilo jetōb Irooj emaron̄ in kar kōņaan katakin RiIsreal ro jān jilkinļo̧k m̧ōn̄ā ko ilo wāween eo E ekar jilkinļo̧k? (lale Jon 6:31–35, 48–58). Komaron̄ barāinwōt kwaļo̧k juon ak lōn̄ļo̧k pija in alooj ko loi ilo “Kein Jipan̄ ko Jet.”

• Bwebwenato eo kōn an Aron im Hur kotak lōn̄ļo̧k pā ko pein Moses ej kalikkar aorōk eo an rejtake ro me kar kūr n̄an tōl kōj. Komaron̄ kajjitōk ippān jejjo ro uwaan kūlaaj eo n̄an ikkure kōn bwebwenato eo ilo an bar juon uwaan kūlaaj eo kōļap ainikien an riiti. Ekōjkan an kijejeto ko an Aron im Hur n̄an kotak lōn̄ļo̧k pā ko pein Moses āinļo̧k wōt kijejeto ko ad n̄an rejtake ritōl ro ad? Ekōjkan ad kwaļo̧k ke jej rejtake ritōl ro ad?

Sister Michelle D. Craig ekar katakin:

“Āinwōt rikaļoor ro [an Rilo̧mo̧o̧r] rem̧ool, komaron̄ bōk ellowetak im revelesōn, ko me rejejjet n̄an kien ko An, me kar lewaj n̄an eok. Ewōr am̧ mijen ko reoktak im jerbal n̄an kōm̧m̧ani im naaj lewaj n̄an eok tōl ko reoktak n̄an kakūrm̧ooli.

“Nipai, brother eo an Jared, im barāinwōt Moses aolepāer ekar aikuj kijoone lom̧aļo eļap—im kajjojo iaer ekar oktak aer kōm̧m̧ane. Nipai ekar kōm̧m̧ane ‘“aļaļ kein aļaļ in wa eo’ [1 Nipai 18:1]. Brother eo an Jared ekar ekkal baaj ko me rekar ‘āinwōt juon jāpe’ [lale Ether 6:5–8 Im Moses ‘etetal ioon āne emōrā ilo ioļapen lojet’ [Exodus 14:29].

“Er kajjojo kar bōk tōl n̄an iaļ ko aer make, kar leļo̧k n̄an er, im kajjojo rekar lōke im kōm̧m̧ane. Irooj ej lale ro rej pokake im, ilo naan ko an Nipai, naaj ‘kōpooj juon iaļ [n̄an kōj] n̄an kōttōprak men eo ej kean̄’ [1 Nipai 3:7]. Keememej bwe Nipai ej ba, ‘juon iaļ’—ejjab ‘iaļ eo.’

“Jej ke rūmuji ak joļo̧ke juon ad make jerbal jān Irooj kōnke emōj An kōpooj “juon ial” oktak jān iaļ eo jekar kōtmene?” (“Maron̄ ilo Jetōb,” Liaona, Nob 2019, 21).

Ilo pija in alooj ko “Daily Bread: Pattern,” “Daily Bread: Experience,” im “Daily Bread: Change” (ChurchofJesusChrist.org), Elder D. Todd Christofferson ekar kwaļo̧k ļōm̧ņak ko kōn kabwilōn̄lōn̄ in mena.