Exodus 1–6

• Em̧ool men̄e Rilo̧mo̧o̧r eo ekar jab kōnono kōn āt eo ilo Exodus 1–2, bwebwenato in emaron̄ jipan̄ ro uwaan kūlaaj kallōk tōmak ilo mijen eo An n̄an bokļo̧k kōj jān en̄taan. Ro uwaan kūlaaj remaron̄ elolo naan an eoon ilo Exodus 1–2 me ej kōmeļeļe kōn en̄taan ko Riisrael ro raar jelm̧ae. Elmen an kōmeļeļe kein āinjuon n̄an en̄taan eo ilo jetōb ak men ko reppen jej jelm̧ae? Ewi wāween an ajri in Israel ro kappukōt aer rōļo̧k, im elmen an kar Anij uwaake er? (barāinwōt lale Exodus 2:23–25; 3:7–8). Elmen ad kōjerbal kajoor eo an Anij n̄e jej aikuj rōļļo̧k? Ewi wāween an Anij uwaak e akweļap ko ad kōn jipan̄? Ro uwaan kūlaaj eo remaron̄ pukōt elōn̄ļo̧k ļōmņak ko ilo ennaan eo an Būreejtōn Russell M. Nelson “Bōktok Kajoor eo an Jisōs Kraist ilo Mour ko Ad” (Kweilo̧k eo Eļap, Eprōļ 2017, ).

  

• Laajrak eo an wiik in ilo Itok, Ļoor Eō—N̄an Kajjojo Armej im Baam̧le ko ej kajjitōk n̄an etale Exodus 3–4 n̄an lale ewi wāween an Irooj kar uwaake abņōņō eo an Moses kōn jerbal in bōkļo̧k Risrael ro jān en̄taan. Eļan̄n̄e ro uwaan kūlaaj eo rekar kōm̧m̧ane menin ilo m̧weo, kajjitōk ippāer n̄an kwaļo̧k ta eo rekar ekkatak. Ak kom̧ maron̄ kōm̧m̧ane m̧akūtkūt in ilo kūlaaj. Ilo alikkar, ro uwaan kūlaaj remaron̄ etale Exodus 3:11–18; 4:1–17, im lale abņōņō ko an Moses im uwaak ko an Anij n̄an kajjojo iaer. Elmen an uwaak ko an Anij jipan̄ kōj n̄e ewōr ad pere kōn ad maron̄ kōm̧m̧ane jerbal eo An?

• Ewi wāween am̧ maron̄ kōjerbal waanjon̄ak eo an Moses n̄an im̧we juon kōmeļeļe kōn elmen ad aikuj kōm̧m̧an n̄an men ko rekwojarjar? N̄an waanjon̄ak, ālkin riiti Exodus 3:5 ippān doon, komaron̄ kwaļo̧t jet men ak pijain men ko rekwojarjar (āinwōt jeje ko rekwojarjar ak tampeļ) im pijain men ko jet me ekkā loi (āinwōt bok in jikuuļ ko ak juon em̧ bajjok). Ro uwaan kūlaaj remaron̄ bar kōnono kōn jet men rej likūt ke rekwojarjar im kwaļo̧k elmen aer kwaļo̧k kautiej n̄an men kein (barāinwōt lale Leviticus 19:30; Katak im Bujen Ko 6:10–12). Etke Rilo̧mo̧o̧r eo ekōņaan bwe jen kōm̧m̧an n̄an men ko rekwojajar ilo kautiej?

• Emaron̄ kabweerer n̄an kijejeto ko ad rem̧ool n̄an kōm̧m̧an em̧m̧an rejjab tōprak—bōlen juon m̧ōttad ejjab eltok n̄an kijejeto in jerbal in karejar eo ad ak jar ko an kōn ajri ro rejabwābwe rejjab uwaak. N̄an ekkatak kōn ejja āinwōt en̄jake eo an Moses, ro uwaan kulaaj remaron̄ riiti Exodus 5:4–9, 20–23. Elmen an kar Irooj jipan̄ Moses anjo jān en̄jake in pere ko an? (lale Exodus 6:1–13). Ro uwaan kūlaaj remaron̄ kwaļo̧k en̄jake ko ad ke raar jab m̧ōkaj in loe tōprak in kijejeto ko aer n̄an jerbal n̄an Irooj. Ta en̄jake eo an Moses ej katakin kōj ilo jebta kein kōn ewi wāween ad kalimjok ejja kain jekjek rōt in? (Lale barāinwōt “Kein Jipan̄ ko.”)

Būreejtōn Joy D. Jones ekar ba kōn ewi wāween an im ļeo pāleen jerbal in jipan̄ ilo tōmak ilo juon jerbal in karejar bōtaab kar jab lo tōprak in kijejeto ko aer. Ripālele rein raar kejekļo̧kjeņ im jar kōn tōl. Kakeememej uwaak eo an jar ko aer, Būreejtōn Jones ekar ba:

“Kom̧ro kar kile bwe kom̧ro kar lukkuun m̧ool ilo am̧ro kajjieon̄ jipan̄ baam̧le in im n̄an jipan̄ bisop eo am, ak kom̧ro kar kajjitōkin kom̧ro make eļan̄n̄e kōm kar lukkuun jipan̄ kōn iakwe eo an Irooj. Kiin̄ Benjamin ekar kalikkar oktak in ke ekar kwaļo̧k, ‘Lo, ij ba n̄an kom̧ bwe kōnke iaar ba n̄an kom̧ bwe iaar juļo̧k raan ko aō ilo jerbal n̄an kom̧, ij jab kōņaan likōmjāje, bwe iaar pād wōt ilo jerbal n̄an Anij’ [Mosaia 2:16; kar kakobaiktok].

“Kōn menin wōn eo me Kiin̄ Benjamin ekar lukkuun jerbal n̄an e? Jemedwōj Ilan̄ im Rilo̧mo̧o̧r. Ad jeļā wōn im etke ilo ad jerbal n̄an ro jet ejipan̄ kōj meļeļe bwe iakwe eo eutiejtata ej wūjlepļo̧k n̄an Anij.” (“N̄an E,” Liaona, Nob. 2018, 50).