Jenesis 37–41

• Āinwōt Josep, ro uwaan kūlaaj eo am̧ remaron̄ iooni men ko reppen. N̄an jipan̄ kūlaaj eo am̧ kappukot im̧we ilo waanjon̄ak eo an Josep, kwomaron̄ ajeej e er n̄an jilu kurup ko im kajjitōk ippān kajjojo kurup n̄an etale juon iaan eoon kein: Jenesis 39; 40:1–19; or 41:9–45. Kajjojo kurup remaron̄ tokāļik kwaļo̧k wāween an kar Irooj pād ippān Josep ilo apan̄ ko an. N̄e ekkar, ro uwaan kūlaaj eo remaron̄ kwalo̧k en̄jake ko aer ke Irooj ekar pād ippāer ilo juon iien epen. Ewi wāween ad maron̄ ekkatak n̄an ad em̧m̧anļo̧k ad loe an Anij pād ippād ilo mour ko ad?

• Ekkatak in emaron̄ jipan̄ kwaļo̧k wāween ad maron̄ eļļā ilōn̄ in men ko renana, likūt juon men ejjab eddo, ko āinwōt juon bwiļajtiik bo̧o̧l edik, ilo ilaļtata in juon kantāiner ejimettan kobban kōn raij ak biin ko. Kūr juon armej n̄an kadikdik kōm̧akūtkūt kantāiner eo m̧ae iien bo̧o̧l eo ej walōn̄tak n̄an lōn̄tata. Ewi wāween an kar Josep āinwōt bo̧o̧l in? Ro uwaan kūlaaj eo remaron̄ kwaļo̧k waanjon̄ak ko in an Irooj jipan̄ Josep eļļā ilōn̄in apan̄ ko jān Jenesis 37:5–11; 39; 40:1–19; 41:9–45. Remaron̄ bar kwaļo̧k iien ko ke Irooj ekar jipan̄ er ilo jekjek kein reiten āinwōt juon.

• Kwomaron̄ kajjitōk ippān ro uwaan kūlaaj eo am̧ n̄an al ak riiti naan ko ilo juon al in jar kōn kōm̧m̧ani kāālet ko rejim̧we, ko āinwōt “Kōm̧m̧ōne Ta Eo Ejimwe” (Al in Jar, no. 24). Innām ro uwaan kūlaaj eo remaron̄ kappukot im̧we ko ak naan ko ilo Jenesis 37:1–28; 39; 40:1–19; 41:9–45 me ej kwaļo̧k kōn ennaan ko an al in jar in. Ewi wāween an kar Josep bōk jeraam̧m̧an, mekarta men ko reppen n̄ane, ke ekar kōm̧m̧ane ta eo ejim̧we? N̄āāt eo Irooj ekar kōjeram̧m̧an kōj ilo iien ko reppen kōn ad kōm̧m̧ane men eo ejim̧we?

• Men̄e ejjab aolep rej bōk revelesōn an juon make ilo ettōņak ko, ewōr men ko jej aikuj ekkatak kōn revelesōn jān men ko raar waļo̧k n̄an Josep, rijerbal ro an Pero, im Pero. Kwomaron̄ kūr ro uwaan kūlaaj eo am̧ n̄an etale Jenesis 37:5–11; 40:5–8; 41:14–25, 37–38 im kwaļo̧k jabdewōt men rej ekkatak kōn revelesōn. Kwomaron̄ barāinwōt kūr er n̄an kwaļo̧k ta eo ekar jipan̄ er kōppopo n̄an bōk, meļeļe, im kōttōprak juon revelesōn.

  

• Kwomaron̄ kajjitōk ippān ro uwaan kūlaaj eo n̄an kwaļo̧k ta eo rekar ekkatak kake kōn anjo̧ ioon kapo ilo aer riiti Jenesis 39 ilo wiik in. Ta eo Josep ekar kōm̧m̧an n̄an anjo̧ jān kapo? (lale eoon ko 7–12). Pija ko “Leave the Party” im “Dare to Stand Alone” (ChurchofJesusChrist.org) rej letok waanjon̄ak ko in an armej anjo̧ jān kapo. Lōmņak in kajjitōk ippān ro uwaan kūlaaj eo n̄an kōm̧m̧ane juon laajrak in men ko jemaron̄ kōm̧m̧ane n̄an bōk an Anij kajoor n̄e jej jelm̧aik mālijjon̄ ko. (Ro uwaan kūlaaj eo remaron̄ kappukot itia ko ilo Matu 4:1–11 ak ilo jeje ko rekwojarjar rej pād ium̧win “Tempt, Temptation” ilo Guides to the Scriptures [scriptures.ChurchofJesusChrist.org].)

• Ewi wāween am̧ maron̄ kōjerbal waanjon̄ak eo an Josep n̄an jipan̄ ro uwaan kūlaaj eo anjo jān kapo an jerawiwi in m̧ōm̧ ilo kanniōk? N̄an kakkoababa n̄an etale Jenesis 39:1–20, ro uwaan kūlaaj eo remaron̄ alooje bitio eo “Chastity: What Are the Limits?” (ChurchofJesusChrist.org) ak lale “Mour Erreo” (ilo N̄an Kōkajoorļo̧k Jodikdik ro [2011], 35–37). Remaron̄ kwaļo̧k ta eo rekar ekkatak kake kōn anjo̧ jān ļōmņak ko, naan ko, im m̧akūtkūt ko me rej tōlļo̧k n̄an jerawiwi ilo kanniōk. Etale “Ukweļo̧k” (ilo N̄an Kōkajoorļo̧k Jodikdik ro, 28–29) emaron̄ jipan̄ ro uwaan kūlaaj eo meļeļe kōn iien em̧m̧an in me Jisōs Kraist ekar letok n̄an kōj bwe jen ukweļo̧k.

• Kwomaron̄ kajjitōk ippān juon iaan ro uwaan kūlaaj eo n̄an kōmeļeļeik ettōņak ko an Pero (lale Jenesis 41:15–24) im bar juon armej n̄an kwaļo̧k kōmeļeļe ko an Josep (lale eoon ko 25–32). Ta eo Josep ekar kōņaan kōm̧m̧ane? (lale eoon ko 33–36, 47–49). Ta menin ekkatak ko repād ilo bwebwenato in n̄an raan kein ad? (lale kapilōk eo an Būreejtōn Gordon B. Hinckley ilo “Kakkobaba in Kein Jipan̄ ko jet”).

Būreejtōn Godon B. Hinckley ekar ba: “Ij iuun kom̧ n̄an lukkuun kōkm̧anm̧an ami kōjerbal jāān; kauweik kom̧ make ilo ami wia im kajjeon̄ in jab kōm̧m̧an m̧uri jān jon̄an eo me jemaron̄e. Kōļļāik m̧uri ko iien eo em̧ōkaj tata kwomaron̄. … Kakkoņ jāān, men̄e edik” (“To the Boys and to the Men,” Ensign, Nov. 1998, 54).