Duteronomi 6–8; 15; 18; 29–30; 34

• Jān Duteronomi, ewōr eoon ko im remaron̄ kōketak kōj n̄an ļōmņak kōn jitōbōn jetōb ilo būruwōd. N̄an jipan̄ ro uwaan kūlaaj eo kwaļo̧k kōn eoon ko, komaron̄ jin̄aik juon bōro ioon boot eo. Innām kōjenolo̧k eoon kein ippān ro uwaan kūlaaj eo: Duteronomi 6:4–7, 20–25; 8:2–5, 11–17; 29:18–20; 30:6–10, 15–20. Karuwaineneik ro uwaak kūlaaj eo n̄an jei ennaan kein ilowaan bōro eo eļan̄n̄e katakin kōn jet men aikuj wōr ilo būruwōd ak n̄an jei jet ennaan tulikin bōro eo eļan̄n̄e ej katakin kōj n̄an kajjieon̄ jeerļo̧k jāni. Ta meļeļein n̄an lukkuun aolepen būruwōd n̄an Jemedwōj Ilan̄?

• Ewi wāween ad kōmeļeļeik n̄an baam̧le ko ad im ro jet etke jej pokake kien ko an Anij? Ālkin ļōmņak kake kajjitōk in, ro uwaan kūlaaj eo remaron̄ riiti Duteronomi 6:4–7, 20–25 ak ennaan eo ilo “Kein Jipan̄ Ko Jet” im kwaļo̧k ļōmņak ko am̧. Ewi wāween an ennaan kein jelet wāween ad en̄jake kōn kakien kein ak bujen ko?

• Jet iien emaron̄ jipan̄ n̄an ron̄jake ļōmņak ko jān ro jet ilo aer katakin im ekkatak kōn gospel eo ilo mōko m̧weer. Kōmeļeļe ewi wāween an ro uwaak kūlaaj eo ļoor kapilōk in ilo Duteronomi 6:4–9, 20–25 emaron̄ lewaj iien ko rem̧m̧an n̄an ro ilo kūlaaj eo n̄an ekkatak jān doon. Ta eo jej kōm̧m̧an n̄an katakin im “kōnono kake” (eoon 7) ennaan eo Anij āinwōt an eoon kein kōmeļeļeik? Ta en̄jake ko jemaron̄ kwaļo̧ke im Irooj ej tōl kōj ilo ad kajjieon̄?

• Jejjan̄in tōpartok ilo raan eo “en ejjeļo̧k rijeram̧ōļ ilubwiljimi” (Duteronomi 15:4), im ekkatak kōn jipan̄ ro rijeram̧ōl ilo Duteronomi 15 rej aorōk wōt, jekdoon n̄e jet ekkatak ko kōn m̧uri im rijerbal ro em̧ōj an oktak. Komaron̄ kūr ro uwaan kūlaaj eo am̧ n̄an etale eoon 1–15 im pukot katak ko kōn jipan̄ ro rijeram̧ōl im riaikuj im rej kōņan kōnono kake. Kajjitōk rot in remaron̄ jipan̄ kōnono eo: Ta meļeļein n̄an “erļo̧ke peim” n̄an ro rej aikuj? (eoon 8, 11). Ta jerbal eo an būruwōd n̄an jipan̄ ro jet? (lale eoon 7, 9–10). Ta jemaron̄ ekkatak kōn jipan̄ ro riaikuj jān waanjon̄ak eo an Irooj? (lale eoon 15).

• Emaron̄ kōm̧ōņōņō n̄an kāidi naan ko an Moses ilo Deuteronomy ippen jet iaan ekkatak ko an Lehi āliktata n̄an baam̧le eo an ilo 2 Nipaii 1–4. Bōlen ro uwaan kūlaaj eo remaron̄ pukot men ko re eirļo̧k wōt juon im oktak ko ikōtaan eoon kein ruo: Duteronomi 29:9 im 2 Nipai 4:4; Duteronomi 30:15–20 im 2 Nipai 2:26–29. Ewi wāween an Liai kōļapļo̧k ta eo Moses ekar katakin? Etke naan kein rej āinwōt mour im mej rej jōkjōk ko rem̧m̧an n̄an kōmeļeļeik kāālet ko ad n̄an “kōjparok” ak “oktaļo̧k” jān kien ko an Anij? (Duteronomi 30:16–17). Bōlen ro uwaan kūlaaj eo remaron̄ kwaļo̧k jet men raar loe ilo eoon kein im rekar im̧we er n̄an “kāālet mour” (Duteronomi 30:19).

Būreejtōn Linda K. Burton eaar katakin:

“Ilo aolepān wūn ko n̄an ad lukkuun tiljōk ilo kōjparok bujen ko ad, wūn in elukkuun in kōketak jān aolep men—iakwe. …

“‘Eļan̄n̄e jelukkuun em̧ōņōņō aolepān kōjeraam̧m̧an ko ad im rej jān en̄taan eo kar n̄an kōj, ejjeļo̧k men Irooj emaron̄ kar kajjitōk ippād im jejjab naaj ikdeleel im kōņaan kōm̧m̧ane’ [Joseph Fielding Smith, “Aorōk in Iien Kwojkwoj eo,” Relief Society Magazine, Oct. 1943, 592]. Ekkar n̄an ennaan in jān Būreejtōn Joseph Fielding Smith, kōjparok bujen eo ej juon iaan iaļ ko jej kwaļo̧k ad iakwe n̄an eo epen kōmeļeļeki, Pinmuur eo eļap an ad Rilo̧mo̧o̧r im Ripinmuur im iakwe eo etinwōde eo an Jemedwōj Ilan̄” (“The Power, Joy, and Love of Covenant Keeping,” Liahona, Nob. 2013, 114).