Exodus 35–40; Levitikōs 1; 16; 19

• Ilo an ro uwaan kūlaaj eo ekkatak Exodus 35–40 ilo wiik in, remaron̄ kar ļōmņak kōn ewi an jet iaan jerbal ko ilo tabernacle eo m̧okta ej ukōt ļōmņak ko aer n̄an Jisōs Kraist. Eļan̄n̄e renaaj, kōketak er n̄an kwaļo̧k ļōmņak ko aer. Laajrak eo ilo unin tōl eo an wiik in ilo Itok, Ļoor Eō—N̄an Kajjojo Armej im Baam̧le ko emaron̄ jipan̄ ilo kōnono eo. Komaron̄ bar kōnaan kōn ta meļeļein kōkaļļe kein rej kobaļo̧k ippān tabernacle eo ej katakin eļapļo̧k n̄an kojarjar. Ekōjkan an Jisōs Kraist kar jipan̄ kōj bwe en ļapļo̧k ad kojarjar?

• N̄an elōn̄, ļōmņak eo n̄an kwojarjarļo̧k emaron̄ lukkuun pen n̄an tōpare. Ewi wāween am̧ naaj jipan̄ ro uwaan kūlaaj eo meļeļe ke oktak im kwojarjar ej juon iaan wūn ko ilo karōk eo an Jemedwōj Ilan̄ n̄an kōj? Komaron̄ riit ippān doon ennaan eo an Būreejitōn Henry B. Eyring ilo “Kein Jipan̄ Ko Jet.” Ta meļeļein oktak im kwojarjar? Ewi wāween an tampeļ ko ilo raan kein āliktata im jerbal ko jej kōm̧m̧ani ijeņ jipan̄ kōj oktak im ekwojarjarļo̧k (bar lale Katak im Bujen Ko 84:19–24; 109:6–26; 128:15–18). Komaron̄ kajjitōk ippān ro uwaan kūlaaj eo n̄an kwaļo̧k ewi an men kein jipan̄ er—ak men ko jet rejeļā—ļapļo̧k ilo kojarjar.

• Tabernacle eo an riIsrael ro ilo āne jōmaden ejjeļo̧k oktak ilo elōn̄ wāween ko ilo tampeļ ko ad raan kein. Komaron̄ karuwaineneik ro uwaan kūlaaj eo n̄an laajrak e men ko rekar ekkatak jān tabernacle eo ilo Exodus 35–40 im rej kakeememej er kōn ta en̄jake eo aer ilo tampeļ. Eļan̄e renaj aikuj jipan̄, komaron̄ jitōn̄ļo̧k er n̄an eoon kein ilo Exodus 40 ennaan kōn ren̄ōl eo, lokatok, nuknuk ko rekwojarjar, karreoki, im kabiti. Ewi wāween an tampeļ eo jipan̄ kōj itok n̄an Kraist? Ta eo jej kōm̧m̧ane n̄an dāpij wōt iien ko ad ilo tampeļ ilo E?

• Men̄e ļōmņak ko kōn katok kōn menin mour emaron̄ jab em̧m̧an lale n̄an kōj rainin, elōn̄ men jemaron̄ ekkatak jān m̧akūtkūt in kōn pinmuur eo an Jisōs Kraist. N̄an jinoe kōmeļeļe, komaron̄ likūt pija ko an Rilo̧mo̧o̧r eo ilo Gethsemane im ilo ioon depāāl eo (lale Gospel Art Book, nos. 56, 57). Ro uwaan kūlaaj eo remaron̄ kwaļo̧k naan ko rej en̄jake ke rej āinwōt n̄an pinmuur eo an Jisōs Kraist. Innen karuwaineneik ro uwaan kūlaaj eo n̄an etale Levitikōs 1:1–9 ak Levitikōs 16, eo im ej kōmeļeļeik katok ko kōn menin mour, im pukot naan ko rej en̄jake ke rej āinļo̧k wōt en̄taan eo an Rilo̧mo̧o̧r eo. Ewi wāween an katok in etto kein jipan̄ kōj jeļā meļeļe kōn Pinmuur eo an Jisōs Kraist? Ro uwaan kūlaaj remaron̄ al juon al kōn Rilo̧mo̧o̧r eo im kwaļo̧k en̄jake ko aer kōn E.

  

• Emaron̄ lukkun jipan̄ ro uwaan kūlaaj eo n̄an kāide jitlo̧k eo Irooj ekar aikuji ilo iien ko an Kallim̧ur M̧okta ippen katok ko Ej kajjitōk ipped rainin. N̄an waanjon̄ak, remaron̄ laajraki wāween ko jej kōm̧m̧an katok ko n̄an Irooj im jerbal eo an, āinwōt jerbal ilo kūr ko, kōļļā jitlo̧k ko, kōm̧m̧an jerbal in menmenbwij, ak jerbal in karejar n̄an ro jet. Innem komaron̄ riit ippān doon Levitikōs 1:1–9 im karuwaineneik ro uwaan kūlaaj eo n̄an lale jōkjōk ko ilo katok ko im rej kōmeļeļeik eoon kein im remaron̄ āinļo̧kwōt katok ko Irooj ej kajjitōk ippād rainin (lale 3 Nipai 9:19–20; Katak im Bujen Ko 64:34). Ta eo jemaron̄ ekkatak jān Moses 5:7 kōn ewi wāween ad maron̄ lale katok ko n̄an jerbal eo an Irooj?

Būreejtōn Henry B. Eyring ekar katakin:

M̧ōņōņō eo eļap ej itok jān kwojarjar eo eļap an juon make. … Jeje ko rekwojarjar rej katakin kōj bwe ilubwilijin men ko jet, jemaron̄ kōkwojarjar ak ļapļo̧k ad kwojarjar n̄e jej kōjerbal tōmak ilo Kraist, bokake, ukweļo̧k, kaarmejete kōn E, bōk kain̄i ko rekwojarjar, im kōjparok bujen ko ad Ippān. …

“Al ‘More Holiness Give Me’ [Hymns, no. 131] ej elmakote juon wāween n̄an jar kōn jipan̄ ilo erom̧ eļapļo̧k kwojarjar. Rijeje eo ej elmakote bwe kwojarjar eo jej kappukōte ej juon menin letok jān Anij eo ej iakwe, kar letok ilo iien ko, ālkin ad kōm̧m̧ane aolep men ko” (“Holiness and the Plan of Happiness,” Liahona, Nov. 2019, 100–101, 103).