Moses 7

• Ewi wōt wāween eo em̧m̧an tata n̄an kwaļo̧k kadkad in ļōmņak eo kōn Zaion ilo kūlaaj eo am̧? Juon ļōmņak emaron̄ n̄an ennaan ippān ro uwaan kūlaaj ilo wiik eo m̧okta jān kūlaaj im karuaineneik er n̄an boktok juon men jān m̧weeo me rej en̄jake ej jutak kōn m̧wil ko an armej in Zaion, āinwōt kar kōmeļeļeik ilo Moses 7:18. Ilo am̧ ekōnono ippān doon kōn eoon eo, ro uwaan kūlaaj remaron̄ kōmeļeļeik aorōk in men eo raar boktok.

  

• Pija in alooj eo “We Come Together and Unite as One” (ChurchofJesusChrist.org) emaron̄ jipan̄ eok jino juon iien ekōnono kōn ekōjkan ad maron̄ erom “juon bōro im juon kōļmenļo̧kjen” (Moses 7:18) ilo ward ko ad im baam̧le ko ad. Ļōmņak in kajjitōkin ro uwaan kūlaaj eo n̄an ļōmņak kōn iien ko me raar en̄jake ippān doon iloan baam̧le ko aer ak ke raar jerbal ippān ro jet ilo Kabun̄ in ak jukjuk in pād eo. Ta eo armej ro raar kōm̧m̧ane n̄an ejake juon wōt eo ilo jekjek kein? Ta eo jemaron̄ kekatak kōn Zaion im juon wōt eo jān Moses 7? (lale eļaptata eoon 16–21, 27, 53, 62–69). Erkein jet bar eoon ko me remaron̄ jipan̄: Pilipai 2:1–4; 4 Nipai 1:15–18; Katak im Bujen Ko 97:21; 105:5.

• Jet armej rej ļōmņak ettoļo̧k, ban kepaake, im em̧ool jab kea. Elmen am̧ maron̄ kōjerbal visōn eo an Inōk n̄an jipan̄ kūlaaj eo am̧ melele bwe Anij ej pād ilo mour ko ad im ej kea kōn kōj? Komaron̄ kajjitōk ippān ro uwaan kūlaaj n̄an riiti Moses 7:28–44 im kōm̧m̧ane juon laajrak in jet iaan un ko Anij ekar jan̄. Ta eo eoon kein rej katakin eok kōn ekōjkan an Anij en̄jake kōn ajri ro Nejin? Ennaan eo ilo “Kein Jipan̄ Ko Jet” emaron̄ letok jipan̄ n̄an iien ekōnono in.

• Laajrak eo an wiik in ilo Itok, Ļoor Eō—N̄an Kajjojo Armej im Baam̧le ko ej elmakote kōļmenļo̧kjeņ ta eo Moses 7:28–31, 35 ej katakin kōn Anij. Ro rekar kōm̧m̧ane menin ilo mwe remaron̄ m̧ōņōņō n̄an kwaļo̧k ļōmņak ko aer ippān kūlaaj eo. Ak komaron̄ kajjitōk ippān ro uwaan kūlaaj eo n̄an kejekļo̧kjeņ kōn eoon kein im ekōnono kaki ilo kūlaaj.

• Ewi wāween am̧ maron̄ jipan̄ ro uwaan kūlaaj loe ta eo Moses 7:59–67 ej katakin kōn Itok eo Kein Karuo an Rilo̧mo̧o̧r eo? Bōlen komaron̄ kōllaajrake ruo ak jilu m̧ool ko ak iien ko jān eoon kein ioon boot eo im kajjitōk ippān ro uwaan kūlaaj eo n̄an kappukōt eoon ko im kobaikļo̧k n̄an laajrak eo. Etke ej juon kōjeraam̧m̧an n̄an an wōr ļo̧o̧k eo an visōn eo an Inōk—juon iaan kanaan ko im̧aan tata kōn Itok eo Kein Karuo?

Elder Jeffrey R. Holland ekar katakin:

“Ilo ioļapļap in visōn eo ekilep an armej me lan̄ ekar peļļo̧k n̄an mejān, Inōk, ekar lale jim̧or kōjeraam̧m̧an ko im kapan̄pan̄ ko an mour wabanban, ej ukōt an kalimjōkļo̧k n̄an Jemān im ekar kūran̄ n̄an lo An jan̄. Ej ba ilo bwilōn̄ im ļo̧kjen an n̄an Armej in ekajoor bōtata ilo aolepān laļ in: ‘Ekōjkan Am̧ maron̄ jan̄?’ …

“Erreiļo̧k n̄an iien ko an enan̄in jabdewōt raan, Anij ej uwaak: ‘Kwōn lo rein jeiūm̧ im jatūm; er rej eļtan pā ko Peiū make. … Iaar leļo̧k n̄an er … [juon] kien eo, bwe ren iakwe doon, im bwe er ren kāālet Eō, eo Jemāer; a lo, er ejjeļo̧k aer en̄jake, im er rej dike bōtōktōkier make. … Kōn menin lan̄ ko ren jab jan̄, ke aolep lan̄ ko rej lo rein renaaj en̄taan ke?’ [Moses 7:29–33, 37].

“Men eo wōt, bwebwenato in ekar kōm̧m̧an eļapļo̧k n̄an katakin lukkuun nememein Anij jān jabdewōt katak ko kōn Anij kar kōm̧m̧ani. … Juon pija epen meļo̧klo̧k kōn an Anij kobatok ilo mour ko ad. Juon metak eļap ilo juon jinen ak jemān n̄e ajri ro nejin rejjab kāālete E ak ‘gospel eo an Anij’ E eaar jilkintok! [Rom 1:1]. Ewi jon̄an an pidodo n̄an iakwe juon eo me ekanooj kabwilōn̄lōn̄ an iakwe kōj!” (“The Grandeur of God,” Liahona, Nob. 2003, 72).