Jenesis 3–4; Moses 4–5

• Kōnke anemkwoj in kāālet eo—Anij ekar letok jim̧we eo n̄an kōm̧m̧ani kāālet ko—ej juon m̧ōttan eaorōk an mour wabanban, jet iien jej likōmājeje bajjōk kake. N̄an kam̧wilaļļo̧k kam̧m̧oolol eo an membōr ro kōn menin letok in, remaron̄ riit im kōmeļeļe kake Moses 4:1–4. Ta ko eoon kein rej katakin kōn aorōk in anemkwoj in kāālet? Etke karōk eo an Anij enaaj kar kakkure eļan̄n̄e enkar ejeļo̧k anemkwoj in kāālet? Kout ko ilo “Kein Jipan̄ Ko Jet” emaron̄ letok jet ļōmņak ko.

• Bōlen ro uwaan kūlaaj rekar ekkatak kōn ennaan eo an Būreejtōn Dallin H. Oaks “Jum̧ae ilo Men Otemjej” (Kweilo̧k eo Eļap, Māe 2016, 114–17) āinwōt m̧ōttan ekkatak eo aer make ak ekkatak eo an baam̧le eo. Ilo wiik in, komaron̄ ļōmņak in kūrtok jejjo armij n̄an itok im pojak n̄an kwaļo̧k juon men jān ennaan eo an me eaar jipan̄ er meļeļe kōn Wōtļo̧k eo an Adam im Iv (lale eļaptata jekjōn I im II). Etke Jemedwōj Ilan̄ ej kōtļo̧k bwe jen en̄jake “jum̧ae ilo men otemjej”? (lale 2 Nipai 2:11–16). Komaron̄ karuwaineneik kūlaaj eo n̄an riiti Katak im Bujen Ko 29:39–40 im kōmeļeļe etke kapo ko an Setan remenin aorōk ilo karōk eo an Anij. Ekōjkan an Jemedwōj Ilan̄ im Jisōs Kraist jipan̄ kōj n̄e jej jelm̧ae kapo?

  

• Moses 4:4–12; 5:13–33 emaron̄ jipan̄ ro uwaan kūlaaj eo kwaļo̧k jet wāween ko me Setan ej kapo kōj n̄an kōm̧m̧an nana. Komaron̄ kajjitōk ippān jimettan in kūlaaj eo n̄an riiti Moses 4:4–12 im jimettan eo juon n̄an riiti Moses 5:13, 18–33. Ilo aer riit, remaron̄ kōllaajrak wāween ko Setan eaar kajjieon̄ kapoik Adam im Iv im ajri ro nejier. Ekōjkan an bar kajjieon̄e ejja menin rainin? Ekōjkan an Jemedwōj Ilan̄ jipan̄ kōj eļļo̧k jān m̧ōņ ko an Setan?

• Ļapļo̧k in ad meļeļe kōn jorrāān eo an Wōtlo̧k eo, ļapļo̧k in wōt ad kam̧m̧oolol kōn Pinmurr eo an Jisōs Kraist. Ro uwaan kūlaaj remaron̄ etale jorrāān ko an Wōtlo̧k eo ilo Jenesis 3:1–7; Moses 4:22–31 im laajraki ta ko rej loe ilo bo̧o̧t eo. Innām remaron̄ etale Moses 5:4–12, 14–15 n̄an ekkatak kōn karōk eo an Anij n̄an lo̧mo̧o̧ren kōj jān jorrāān kein (barāinwōt lale 2 Nephi 2:19–25; Alma 12:22–34) im laajraki ta ko raar loi ilo bo̧o̧t eo. Remaron̄ bar kwaļo̧k ta ko im̧we er kōn naan in kam̧ool ko an Adam im Iv kōn Jisōs Kraist loi ilo eoon 10–12. Elmen ad en̄jake kōn karōk eo an Anij ālkin riiti jeje ko rekwojarjar?

• Bwebwenato in kōjatdikdik im lo̧mo̧o̧r eo an Adam im Iv emaron̄ kōketak ro uwaan kūlaaj n̄e mour ej pen. Ļo̧mņak in karuwaineneik er n̄an kappukot naan im jantōj ko ilo Moses 5:7–12 me ej kwaļo̧ke kōjatdikdik eo bwe Adam im Iv raar en̄jake bwe Rilo̧mo̧o̧r eo emaron̄ kar lo̧mo̧o̧ren erro. N̄āāt eo emōj ad kar en̄jake ejja āinwōt ta eo Adam im Iv raar en̄jake? Ļōmņak in kajjitōk ippān ro uwaan kūlaaj eo n̄an kwaļo̧k al eo em̧m̧antata ippāer me ej kwaļo̧k kōjatdikdik me ej itok jān Pinmuur eo an Rilo̧mo̧o̧r eo. Kom maron̄ al kōn jejjo iaaer ippān doon.

Elder Dale G. Renlund ekar katakin:

“Kōttōpar eo an Jemedwōj Ilan̄ ilo kōkaajriri ejjab n̄an ajri ro Nejin bwe ren kōm̧m̧ane ta eo ejim̧we; ej n̄an ajri ro Nejin bwe ren kāālet n̄an kōm̧m̧ane ta eo ejim̧we im āliktata n̄an erom āinwōt E. Eļan̄n̄e En kar kōņaan bwe jen pokake, En kar kajju letok nōbar im kaje ko n̄an kōkm̧anm̧an m̧wil ko m̧wilid.

“Ak Anij ejjab kōņaan bwe Ajri ro ren kaminene wōt im pokake āinwōt “menin mour ko” ko me reban kijkiji an jodi ilo celestial ruum̧. Ejjab, Anij ekōņaan bwe ajri ro Nejin ren rūttoļo̧k ilo mour in jetōb im kobaļo̧k Ippān ilo aolep makūtkūt ko an baam̧le” (“Kom̧win Kāālōt Rainin,” Liaona, Nob. 2018, 104).