Moses 1; Ebream 3

• M̧ool ko rej waļo̧k ilo visōn ko an Moses im Ebream emaron̄ wōr juon aer im̧we ekajoor ilo jokāālet ko ad im ilo maron̄ eo ad n̄an eļļā ioon mālijjon̄ ko an mour in. Ewi wāween am̧ maron̄ jipan̄ ro uwaan kūlaaj eo am̧ jeļā kōn m̧ool kein ilo Moses 1 im Ebream 3? Juon ļōmņak ej n̄an ajeeje kūlaaj eo ilo kurup ko im leļo̧k n̄an kajjojo kurup kein juon iaan eoon kein: Moses 1:1–10; Moses 1:37–39; Ebream 3:22–26. Kajjojo iaan kurup eo emaron̄ kappukot uwaak ko n̄an kajjitōk ko āinwōt “Wōn n̄a?” “Etke ij pād ijin?” im “Wōn eo Anij ekōņaan bwe in erom̧?” Ālkin jidik iien, kurup ko remaron̄ kiiō kwaļo̧k uwaak ko aer. Ewi wāween an uwaak kein jelet m̧akūtkūt ko ad kajjojo raan?

  

• Iakweleel eo an Moses im Setan, lo ilo Moses 1:12–23, ewōr ie katak ko me kwomaron̄ jipan̄ ro uwaan kūlaaj eo am̧ ilo aer jelm̧aik mālijjon̄ ak kabwebwe ko an rinana eo. Ta eo jemaron̄ ekkatak jān uwaak eo an Moses? Pija eo “I Am a Son of God” (ChurchofJesusChrist.org) emaron̄ jipan̄ ro uwaan kūlaaj eo ekkōnono kōn juon iaan aujiid ko an Setan— eo ej kapoik kōj n̄an pere en̄jake ko ad il jetōb (lale barāinwōt “Kakkobaba in Kein Jipan̄ ko jet”). Emaron̄ ļap tokjen n̄e ro uwaan kūlaaj eo rej kwaļo̧k ļōmņak ko im naan in rojan̄ n̄an jipan̄ doon kile im anjo̧ ioon kijejeto ko an Setan.

• Juon ekkatak jān en̄jake eo an Moses ej bwe Setan ej kapoik kōj ilo an riab kōn m̧ool im kajoor an Anij. N̄an jipan̄ ro uwaan kūlaaj eo pijaikļo̧k menin, kwomaron̄ bōktok jejjo men ko n̄an kūlaaj eo me rej riabin kape in elōn̄ men ko, ko āinwōt juon riabin mennin eddōk ak juon nin̄nin̄ to̧ļļe. Ewi wāween ad jeļā bwe men kein rej riabin? Ta jet iaan wāween riab ko an Setan me ej kōjerbali rainin n̄an kapoik kōj? Ewi wāween ad kili im kajekdo̧o̧ni? (N̄an ekkatak wāween an Moses kar kōm̧m̧ane menin, lale Moses 1:13–18.) Ekōjkan an Irooj jipan̄ kōj ilo kijejeto ko ad? (lale Moses 1:24–26).

• Ewi wāween am̧ maron̄ jipan̄ ro uwaan kūlaaj lo mour ko aer āinwōt juon iien em̧m̧an n̄an kam̧ool aer tiljek n̄an kakien ko an Anij? Kwomaron̄ ijjino jān am̧ kajjitōk ippāer n̄an ekōnono kōn en̄jake ko raar bōki ke rekar aikuj kwaļo̧k jon̄an ļap in jeļā eo aer ilo juon kapeel—n̄an waanjon̄ak, ilo jikin jikuuļ, jikin jerbal, ak ilo juon tiim in ikkure. Remaron̄ kōnono kōn ta eo rekar aikuj kōm̧m̧ane n̄an kwaļok aer jeļā. Ewi wāween an en̄jake kein reiten āinwōt juon n̄an ta eo kar kōmeļeļeik ilo Eberam 3:24–26? Ewi wāween aer oktak? Ewi wāween ad kobaiktok Jemedwōj Ilan̄ im Rilo̧mo̧o̧r ilo kijejeto ko ad n̄an “kwaļo̧k ad jeļā”? (Ebream 3:25). Ekōjkan ilo ad jeļā bwe jej pād ijin n̄an kwaļo̧k ad jeļā pokake jelet wāween ad jelm̧aik melijjon̄ ko an mour in?

• Ta eo jej barāinwōt ekkatak jān Ebream 3:22–28 kōn mour eo m̧okta, ak “pād eo aer kein kajuon”? (eoon 26). Etke m̧ool kein raorōk n̄an kōj?

Elder Jeffrey R. Holland ekar katakin menin kōn en̄jake eo an Moses ilo Moses 1: “Ennaan eo an Moses n̄an eok rainin ej: Kōkm̧anm̧an Wōt. Jab ļōmņak bwe juon revelesōn eļap, jet kabwilōn̄lōn̄, juon iien eļap im̧we, peļļo̧kin juon iaļ eim̧we, ej jem̧ļo̧kin. … To̧o̧n wōt an naaj wōr im̧we, ekkōl kōn kapo eo n̄an ro̧o̧likļo̧k jān men eo em̧m̧an. Eļan̄n̄e eaar jim̧we am̧ jar kake im kar lōke im kar mour kake, ej tōre eo in. Jab ebbweer eļan̄n̄e ej eddo tok. Jab tōmak rinana eo me ej kakkure m̧ōņōņō eo am̧. Jelm̧aik pere ko am̧. Kamineneik eok kōn ta ko rej kamijak eok. ‘Jab joḷọk ami peran’ [Hibru 10:35]. Pād wōt ilo iaļ in im lale aibojooj in mour eo kōpooj n̄an eok” (“Cast Not Away Therefore Your Confidence,” Ensign, Mar. 2000, 7, 9).