Jenesis 5; Moses 6

• Emaron̄ wōr juon armej ilo kūlaaj eo am̧ em̧ōj an en̄jake— ak ej en̄jake—ak m̧ōjņo ak likjab kōn juon eddo ilo m̧ōn jar eo ak ilo m̧weo. N̄an kalōk tōmak eo an ro uwaan kūlaaj eo bwe Irooj emaron̄ jipan̄ er, kwomaron̄ kūr er n̄an riiti en̄jake eo an Inōk kar loe ilo Moses 6:26–39. Ewi wāween an Irooj kar jipan̄ Inōk kōm̧m̧ane jerbal eo An jekdo̧o̧n Inōk ekar mijak? Kajjitōk ippān ro uwaan kūlaaj eo n̄an ļōmņak kōn waanjon̄ak ko kōn armej ro me rekar eļļā jān ioon m̧ōjņo̧ ko aer im kōttōprak jerbal eo an Irooj, emaron̄ jān jeje ko rekwojarjar ak mour ko aer make. Ta waanjon̄ak ko jemaron̄ kwaļo̧ki? (lale barāinwōt Exodus 4:10–16; Jeremaia 1:4–10; 2 Nipai 33:1–4; Ether 12:23–29).

• Elōn̄ rikaļoor ro raan kein im rikanaan ro rekar kwaļo̧k aer inepata eiten āinwōt Inōk ke rekar kōmeļeļeik wāween aer kar en̄jake ke rekar bōk kūr ko aer. En̄jake ko aer remaron̄ kōļapļo̧k jeļā eo an ro uwaan kūlaaj eo kōn Moses 6:26–39. Ļōmņak in kwaļo̧k bitio eo “On the Lord’s Errand: The Life of Thomas S. Monson” (ChurchofJesusChrist.org; ikōtaan minit ko 35:46 im 39:40) ak juon katak jān juon membōr eo ej kab m̧ōj jitōn̄e n̄an Doulul eo an Jon̄oul Rijilōk ro im ej kab (n̄an waanjon̄o̧k, lale naan in kam̧ool ko an Elder Ronald A. Rasband, Elder Gary E. Stevenson, im Elder Dale G. Renlund [Liaona, Nov. 2015, 89–94]). Kōm̧m̧an bwe ro uwaan kūlaaj eo ren kwaļo̧k ta eo ej im̧we er kōn waanjon̄ak kein. Ta eo jemaron̄ ekkatak jān ritōl rein kōn en̄jake kōn m̧ōjņo ak likjab ko ad? Ennaan eo jān Būreejtōn Thomas S. Monson ilo “Bar jet Kein Jipan̄ ko” emaron̄ barāinwōt jipan̄ āinwōt m̧ōttan kōmeļeļe in.

• Laajrak eo an wiik in ilo Itok, Ļoor Eō—N̄an Kajjojo Armej im Baam̧le ko ej elmakot n̄an riiti Moses 6:48–62 n̄an kappukot ta eo kajjojo iaad aikuj jeļā im aikuj kōm̧m̧ane n̄an bōk lo̧mo̧o̧r. Bōlen ro uwaan kūlaaj eo remaron̄ kwaļo̧k jabdewōt ļōmņak ko jān aer ekkatak ilo m̧ōko m̧weer. Ak kwomaron̄ ekkōnono kōn Moses 6:48–62 ippān doon ilo kūlaaj. Ewi wāween ad maron̄ uaake juon armej eo ej kajjitōk etke tōmak, ukweļo̧k, peptaij, im bōk menin letok eo an Jetōb Kwojarjar rej menin aikuj? Ewi wāween an Irooj uwaake kajjitōk in ilo eoon ko 53–65, im ta eo jej ekkatak jān uwaak eo An?

  

• Ilo Moses 6:51–63 jej ekkatak kōn m̧ool ko an gospel me Irooj ekar katakin Adam im kajjitōk ippān n̄an katakin epepen ko ilju im jekļaj. Bōlen ro uwaan kūlaaj eo remaron̄ kōm̧m̧ane juon laajrak kōn m̧ool kein ilo aer ekkatak kurup in eoon ko reddik, ko āinwōt eoon ko 51–52, 53–57, 58–60, 61–63. Etke m̧ool kein raorōk n̄an diktak in epepen eo rainin? Ta eo kwomaron̄ kōņaan bwe rūm̧m̧an ro ren jeļā kōn Rilo̧mo̧o̧r jān eoon kein? Ro uwaan kūlaaj eo remaron̄ m̧ōņōņō in kwaļo̧k ļōmņak ko ak en̄jake ko n̄an jipan̄ doon lukkuun katakin m̧ool kein n̄an ajri im jodikdik ro. Ta eo jemaron̄ barāinwōt ekkatak jān bun̄tōn ko an Irooj n̄an ro jinen im jemān ro Mosaia 4:14–15 im Katak im Bujen Ko 68:25–28; 93:40–50?

• N̄an kobaikļo̧k n̄an ta eo Moses 6 ej katakin kōn eddo eo an ro jinen im jemān n̄an katakin ajri ro nejier, kwomaron̄ kūr ro uwaan kūlaaj eo n̄an alooje juon ak elōn̄ļo̧k iaan bitio kein: “Parenting: Touching the Hearts of Our Youth,” “Proclamation Series: Children,” ak “Mother in Israel” (ChurchofJesusChrist.org). Ta eo jej ekkatak jān bitio kein kōn katakin gospel eo n̄an ajri ro nejid? Eļan̄n̄e kwoj katakin jodikdik ro, kwomaron̄ kūr er n̄an kwaļo̧k wāween aer jipan̄ ro jinen im jemān ilo aer kijejeto ko aer n̄an katakin gospel eo ilo m̧weeo.

  

  2:49

Būreejtōn Thomas S. Monson ekar katakin: “Jet iaami remaron̄ abje ilo nemmāme ak ļōmņak bwe kwojjab ekkar n̄an bōk juon kūr. Keememej bwe jerbal in ejjab am̧ im aō make. Ej jerbal eo an Irooj, im n̄e jej pād ilo ijjilōk eo an Irooj, jej maron̄ bōk jipan̄ eo an Irooj. Keememej bwe eo Irooj ej kūri, Irooj ej kakōrbōbe.” (“Duty Calls,” Ensign, May 1996, 44).