Jenesis 6–11; Moses 8

• Rinana ro ilo raan ko an Noa remaron̄ kakeememej kōj kōn nana ko jej loe ipeļaakid ilo raan kein. N̄an jipan̄ ro uwaan kūlaaj eo ekkatak jān katak ko ilo bwebwenato eo an Noa, kwomaron̄ je ioon bo̧o̧t eo Kakkōl ko im Kam̧ool ko. Ro uwaan kūlaaj eo remaron̄ etale Jenesis 6–8 ak Moses 8:13–30 im lo juon men rej en̄jake ke ej juon kakkōl eaorōk n̄an raan kein ad im juon men rej ļōmņak ej kam̧ool (barāinwōt lale “Kein Jipan̄ ko jet”). Remaron̄ je ta eo rej loe ium̧win laajrak eo ekkar ioon bo̧o̧t eo. Etke bwebwenato eo kōn Noa eaorōk n̄an kōj rainin?

• Laajrak in katak eo an wiik in ilo Itok, Ļoor Eō—N̄an Kajjojo Armej im Baam̧le ko ļōmņak in riiti Jenesis 9:8–17 im kejōkļo̧kjeņ kōn wāween an kōkaļļe ko maron̄ jerbal āinwōt kakeememej ko kōn bujen ko ad. N̄an jipan̄ ro uwaan kūlaaj eo kwaļo̧k ļōmņak ko aer, kwomaron̄ bōktok n̄an kūlaaj eo jejjo iaan men ko n̄an kakeememej kōj kōn aorōkin men ko—ko āinwōt juon riin̄ in m̧are, juon būļāāk an juon laļ, ak juon name tāāk an mijinede—im keidi ippān “kōkaļļe” in iia eo. Ta eo Ukook eo an Josep Smith, Jenesis 9:21–25 (ilo Bible appendix) ej katakin kōj kōn kōkaļļe in? Ewi wāween an Anij kōjerbal kōkaļļe ko n̄an jipan̄ kōj keememej bujen ko ad?

• Bwebwenato eo kōn armej ro an Bebel rej kalōk juon tawōr ej letok juon kōmeļeļe eo ealikkar n̄an bwebwenato eo kōn Inōk im armej ro an ro raar kalōk Zaion, eo me ro uwaan kūlaaj rekar ekkatak kake wiik eo ļo̧k. Jimōr kurup in armej ro rekar kajjeon̄ tōparļo̧k aelōn̄ in Anij ilo wāween ko reoktak jān doon. Kwomaron̄ kūr ro uwaan kūlaaj eo n̄an kōlaajrak ioon bo̧o̧t eo jabdewōt men eo rej keememej kōn armej ro an Zaion (lale Moses 7:18–19, 53, 62–63, 69) im ta eo rekar ekkatak jān Jenesis 11:1–9 im Hilamōn 6:26–28 kōn armej ro an Bebel. Ta oktak ko rej loi? Ta eo menin ej katakin kōj kōn kijejeto ko ad make n̄an jepļaakļo̧k n̄an im̧aan mejān Anij?

  

• Jikin eo etto an Bebel ejako, ak uteej bōro im kōkaļļeen kōņaan ko an laļin rej pād. N̄an jipan̄ ro uwaan kūlaaj eo mour kōn katak ko jān Tawōr eo an Bebel, ijjino jān am̧ kūr er n̄an etale Jenesis 11:1–9. Innām kwomaron̄ ajeej pepa ko em̧ōj limi im kūr ro uwaan kūlaaj eo n̄an je men ko armej rej kōm̧m̧ani me rej kattoļo̧k er jān Anij; innām, ioon pepa ko jet em̧ōj limi, remaron̄ je men ko armej rej kōm̧m̧ani me rej kepaakeļo̧k er n̄an Anij. Jodikdik ro remaron̄ itoklimouier n̄an karōke kurup in pepa ko jinointata ioon bo̧o̧t eo ilo jekjek in juon tawōr im kurup eo kein karuo n̄an jekjek in juon tampeļ. Ta eo Irooj ekar letok n̄an jipan̄ kōj “utiej n̄an lan̄”? (Jenesis 11:4; lale barānwōt Jon 3:16). Kwomaron̄ al juon al in jar kōn unin kōnono in, eo āinwōt “Nearer, My God, to Thee” (Hymns, no. 100).

Būreejtōn Henry B. Eyring ekar ba:

“Likjab eo n̄an bōk kapilōk in kanaan eo ej kadikļo̧k kajoor eo ad n̄an bōk kapilōk eo eim̧we ilju im jekļaj. Iien eo em̧m̧an tata n̄an kar kāālet n̄an jipan̄ Noa jōk wa eo eaar iien eo m̧oktata ekar kajjitōk ippān. Kajjojo iien kar kajjitōk ippān ālkin iien eo, kajjojo likjab in uwaak maron̄ kar kadikļo̧k im̧we ko n̄an Jetōb. Im kōn menin kajjojo iien ej kajjitōk emaron̄ in kar āinwōt an bwebwe, m̧ae iien eo eaar wōt. Innām eaar kanooj rūm̧ūj.

“Aolep iien ilo mour eo aō n̄e ij kāālet n̄an karūm̧ūjļo̧k aō ļoor kapilōk eo eim̧we ak kar kāālet bwe ej aō pepe, ikar jeļā bwe ij likūt eō ilo wāween eo ekauwōtata. Aolep iien ikar ron̄jake kapilōk eo an rikanaan ro, ikar en̄jake an kam̧oole ilo jar, innām ļoor e, ikar lo bwe ikar wōnm̧aanļo̧k ilo kōjparok” (“Finding Safety in Counsel,” Ensign, May 1997, 25).

Jet armej rej bwilōn̄ kōn jerbal in kajim̧we eo an Irooj ilo an kar jilikintok juon ibwijleplep n̄an “jeorļo̧k armej” (Jenesis 6:7). Elder Neal A. Maxwell ekar kōmeļeļeik bwe ilo iien Ibwijleplep eo Eļap “nana ekar tōpar juon tōre me ekar kakkure anemkwoj in kāālet me jetōb ekar jab maron̄, n̄an kajim̧we, pād ioon laļ in” (We Will Prove Them Herewith [1982], 58).