Jenesis 24–27

• Aorōk eo Ebream eaar likūt ilo kappukōt juon pāleen Aisek ej letok juon iien em̧m̧an n̄an kōnono kōn aorōkin bujen m̧are ilo karōk eo an Anij n̄an kōj. N̄an ijjino kōmeļeļe eo, ro uwaan kūlaaj remaron̄ etale Jenesis 24 im kwaļo̧k men ko Irooj eaar kōm̧m̧an n̄an boktok Aisek im Rebeka ippān doon ilo m̧are. Etke m̧are eaorōk n̄an Irooj? N̄an jipan̄ ro uwaan kūlaaj eo kōnono kōn kajjitōk in, komaron̄ kwaļo̧k naan eo an Elder D. Todd Christofferson ilo “Kein Jipan̄ Ko Jet.” Ekōjkan an jipan̄ kōm̧m̧an bwe jibadbad eo an Anij n̄an m̧are en tōprak?

• Kajjitōk ippān kūlaaj eo ta em̧m̧an ko ewōr ippān juon rikōrejeran, ro jinen im jeman, ak ripālele ko me ej kobaikļo̧k n̄an juon m̧are eo etōmak im m̧ōņōņō. Bwebwenato eo ilo Jenesis 24 ej kwaļo̧k em̧m̧an ko me remaron̄ jipan̄ juon armej ejaak m̧ōņōņō ilo m̧are—im bar jet men ilo mour in. N̄an waanjon̄ak, ilo eoon 12 jej ekkatak kōn tōl jān jar, im ilo eoon 19 jej ekkatak kōn leļo̧k eļapļo̧k kijejeto ilo jerbal in jipan̄. Bar ta jet katak ko maro̧n̄ loi ilo jepta kein? Ro uwaan kūlaaj eo remaron̄ lale ilo “Baam̧le eo: Juon Naan in Kean̄ n̄an Laļ in” (ChurchofJesusChrist.org).

• Ekōjkan am̧ maron̄ jipan̄ ro uwaan kūlaaj eo lo katak ko an juon make jen en̄jake eo an Jekab im Esau? Juon ļōmņak ej n̄an kajjitōk ippāer n̄an kōm̧m̧ane ruo laajrak ioon bo̧o̧t eo—juon an kōjeraam̧m̧an ko Anij ekōņaan letok n̄an kōj im eo juon an men ko an laļin me rej eļļo̧k kōj jān kōjeraam̧m̧an kein. Innām ro uwaan kūlaaj remaron̄ riiti Jenesis 25:29–34, bōk jikin “jolet” kōn juon men jān laajrak eo jinoin im “jūūp” kōn juon men jān laajrak eo tokālik. Elmen an riko̧wadon̄ eo kajjieon̄ n̄an kōm̧m̧an bwe kōj jān ukōt kōjeraam̧m̧an ko an Anij n̄an men ko edikļo̧k aorōkier? Ļōmņak in kajjitōk ippān ro uwaan kūlaaj n̄an leļo̧k naan in kōkajoor n̄an doon kōn wāween n̄an mijōk ioon Rilo̧mo̧o̧r im jeraam̧m̧an ko an indeoo ej letok n̄an kōj.

• Jenesis 26 ej kwaļo̧k jet iien me Aisek im m̧weeo im̧ōn rekar aikuj kōb aibōj laļ n̄an kappok aibōj, im mennin ekūtkūt an bōk eļap jerbal. M̧ool in emaron̄ jipan̄ eok katakin ro uwaan kūlaaj eo kōn kijejeto eo ebōk n̄an boktok “dān in mour” an Rilo̧mo̧o̧r n̄an mour ko ad. (lale Jon 4:10). Bōlen komaron̄ kwaļo̧k menin kōn juon jin̄a in jikin dān ettoon ioon bo̧o̧t eo. Ro uwaan kūlaaj remaron̄ kajjojo bōk koņaer joļo̧k ettoon ko ilo aer kōmeļeļeik wāween aer maron̄ lo dān in mour eo an Rilo̧mo̧o̧r. Kōketak er n̄an kōjerbal Unin Tōl eo n̄an Jejej ko Rekwōjarjar n̄an kappukōt eoon ko me rej ekkejel ippān men ko rej kwaļo̧ki.

  

Elder D. Todd Christofferson ekar letok jet un ko etke m̧are im baam̧le relukkuun aorōk n̄an karōk eo an Anij:

“Juon baam̧le ej ekkal ioon m̧are an ļeo im lieo rej kabwe n̄an jōkjōk eo em̧m̧antata n̄an karōk eo an Anij bwe en wōnm̧aanļo̧k—jōkjōk eo an n̄an ļotak an ajri ro rej itok ilo erreo im ejeļo̧k aer bōd jen Anij im jukjukinpād eo n̄an ekkatak im kōppopo ko renaaj aikuji n̄an mour in kanniōk eo em̧m̧an im mour indeeo ilo laļ eo ej itok. Ilo an dik oran baam̧le ko rej ekkal ioon m̧are jab in ej elukkuun aorōk bwe jukjukinpād ko ren wōnm̧aanļo̧k im eddōkļo̧k. …

Ak meļeļe eo am n̄an eddo eo an m̧are im baam̧le ejjab pedped ioon ekkatak ko kōn mour ak ej pedped ioon m̧ool eo bwe rej kōm̧anm̧an ko an Anij. Ej E eo ilo jinoin ekar kōm̧anm̧an Adam im Iv ilo nememe in wōt E, em̧m̧an im kōrā, im kobaik er āinwōt ļeo im lieo pālele n̄an erom “juon wōt ānbwin” im n̄an timoon im wōrļo̧k im kobrak mejen laļ. Kajjojo armej rej bōk nememe eo ekwojarjar, ak ej ilo ien koba ippān doon ilo m̧are eo an em̧m̧an im kōrā āinwōt juon wōt im jej bōk bolen lukkuun aolepān meļeļe eo kōn kōm̧anm̧an eo ad ilo nememe in Anij—em̧m̧an im kōrā. … M̧are kein rej lukkuun in “jen lan̄, jen Anij” ej lukkuun in m̧ōttan karōk in m̧ōņōņō eo āinwōt Wōtlo̧k eo im Pinmuur eo” (“Etke Jej M̧are, Etke Jej Bam̧le,” Kweilo̧k eo Eļap, Eprōļ 2015, ).