Jenesis 18–23

• Bwebwenato in ilo eoon kein remaron̄ im̧we ro uwaan kūlaaj eo rej ļōmņak eļan̄n̄e kallim̧ur ko an Anij n̄an er enaaj kūrm̧ool. N̄an ijjinoe juon ekkōnono, emaron̄ menin jipan̄ n̄an kūr ro uwaan kūlaaj e n̄an etale ippān bar juon armej ilo kūlaaj eo bwebwenato eo kōn kallim̧ur ko an Anij n̄an Ebream im Serai ilo Jenesis 17:4, 15–22; 18:9–14 im kakūrm̧ool in kallim̧ur ko Jenesis 21:1–7. Ta eo ilo eoon ko ro uwaan kūlaaj eo remeļeļe kake? Ta m̧ool ko jemaron̄ bōk jān en̄jake eo an Ebream im Serai n̄an kwaļo̧k ippān juon m̧ōttad eo ej jakoļo̧k kōjatdikdik eo an bwe Anij ej kakūrm̧ool kallim̧ur ko An? Ta eoon ko jet ak en̄jake ko an juon make jemaron̄ kwaļo̧k? (lale, n̄an waanjon̄o̧k, Rom 8:28; Hibrū 11; Mormon 9:19–21; Katak im Bujen Ko 88:64). Ta en̄jake ko ro uwaan kūlaaj eo remaron̄ kwaļo̧k ilo an kar kūrm̧ool kallim̧ur ko an Anij ilo mour ko aer? Ewi wāween ad dāpij tōmak ko ad n̄e kōjeraam̧m̧an ko kar kallim̧ur kaki remaron̄ jab bōke ilo mour in? (lale Hibru 11:8–13).

• Katak ta ko kwomaron̄ en̄jake bwe ro uwaan kūlaaj eo remaron̄ ekkatak kake jān bwebwenato in baam̧le eo an Ļat em̧m̧akūt jān Sodom im Gomora? Juon ekkatak kar elmakote ilo ennaan eo an Elder Jeffrey R. Holland ilo “Kein Jipan̄ ko jet.” Bōlen kwomaron̄ kwaļo̧ke ippān kūlaaj eo ālkin am̧ kwaļo̧k ilo tukadu in men ko rej kōmeļeļeik ilo Jenesis 19:15–26. Ilo wāween ta ko ak ilo jekjek ta ko jet iien jej “[erre] likļo̧k” (eoon 26) n̄e jej aikuj reim̧aanļo̧k kōn tōmak ilo Rilo̧mo̧o̧r? Bōlen ro uwaan kūlaaj eo remaron̄ kwaļo̧k en̄jake ko me rej kalikkar arōk eo an jab relikļo̧k. Ta eo Luk 9:62 ej kobaiktok n̄an meļeļe eo ad kōn menin?

  

• Bwebwenato eo kōn an Ebream ajeļo̧k ļadik eo nejin āinwōt juon katok emaron̄ katakin kōj kōn katok eo an Jemedwōj Ilan̄ kōn Eo Nejin. Juon wāween n̄an ekkatak kōn bwebwenato in ej n̄an leļo̧k n̄an jimettanin kūlaaj eo n̄an kejōkļo̧kjeņ kōn Jenesis 22:1–14 jān wāween an Ebream im Anij eo ej Jemed ļōmņak, ilo an jimettanin kūlaaj eo kejo̧kļo̧kjeņ kōn bwebwenato in jān wāween an Isaac im Jisōs Kraist ļōmņak. Kajjitōk ippān ro uwaan kūlaaj eo n̄an kwaļo̧k im̧we ko rekar en̄jaki. Eļaptata, ta eo ro uwaan kūlaaj eo rej ekkatak me ej kam̧wūlaļļo̧k kam̧m̧olool eo aer kōn Jemedwōj Ilan̄ im Jisōs Kraist? Āinwōt m̧ōttan ekkōnono in, kwomaron̄ kwaļo̧k pija eo pijaan Ebream an Bōke Aisek n̄an Katok Kake (Gospel Art Book, no. 9) ak kwaļok bitio eo “Akedah (The Binding)” (ChurchofJesusChrist.org).

Elder Jeffrey R. Holland ekar katakin:

“Emaron̄ m̧ool bwe lieo pāļeen Ļat ekar relikļo̧k kōn illu ippān Irooj kōn ta eo Ekar kajjitōk ippān n̄an em̧m̧akūt jene. … Aaet ejjab kōn wōt an kar relikļo̧k, ekar relikļo̧k kōn kōņaan eļap. Ilo tukadu in, iakwe eo an n̄an mour eo m̧okta ekar kaddoiki peran eo an n̄an ilju im jakļaj. …

“… Ij akweļap ippam̧ n̄an jab dāpdep ilo raan ko remootļo̧k ak ajeļo̧ke inne, jekdo̧o̧n eo jon̄an an kar em̧m̧an raan ko inne. Mour eo m̧okta ej n̄an ekkatak jān e im jab mour kake. Jej reilikļo̧k n̄an ekkatak jān m̧ōttan ko rem̧ootļo̧k jān en̄jake ko rem̧m̧an ak jab menkwaraar. Im n̄e jaar ekkatak ta eo jej aikuj in ekkatak im kar bōktok ippād em̧m̧antata eo jaar en̄jake, innām jej reim̧aanļo̧k im keememej bwe tōmak ej aolep iien jitōn̄ļo̧k ilju im jekļaj. …

“… [Lieo pāleen Ļat] ekar ejjeļo̧k an tōmak. Ekar pere maron̄ eo an Irooj n̄an leļo̧k n̄an e juon men em̧m̧anļo̧k jān ta eo ekar wōr kadede ippān. Em̧ool, ej ļōmņak bwe ejjeļo̧k men eo ej itok enaaj maron̄ em̧m̧anļo̧k jān ta eo ej joļo̧k ilikin. …

“…Dāpdep ilo mour ko m̧okta, ekoba bōd ko, ejjab kanooj jim̧we! Ejjab gospel eo an Jisōs Kraist” (“The Best Is Yet to Be,” Ensign, Jān. 2010, 24, 26–27).