Jenesis 12–17; Ebream 1–2

• En̄jake ko an Ebream im Serai kar je ilo Jenesis 15; 17; Ebream 1 remaron̄ jipan̄ ro uwaan kūlaaj eo dāpij tōmak bwe ikdeleel ko aer rejim̧we ren kūrm̧ool ilo iien eo an Irooj. Ewi wāween am̧ jinoe juon ekkōnono kōn katak in? Juon ļōmņak ej n̄an kūr kūlaaj eo n̄an kappukot ilo Jenesis 15:1–6 im Ebream 1:1–19 im kōmeļeļeik ikdeleel ko an Ebream im jekjek ko an reppen. Ewi wāween an Ebream im Serai kwaļo̧k aer tōmak ilo iien ko reppen? (lale Hibru 11:8–13). Ekōjkan an ikdeleel ko aer rejim̧we kar āliktata kūrm̧ool? (lale Jenesis 17:15–22; 21:1–3; Katak im Bujen Ko 132:29; Ebream 1:31). Ewi wāween ad kwaļo̧k ad tōmak n̄e ikdeleel ko ad rejim̧we rejjan̄in kūrm̧ool ilo ad kōņaan bwe reņ? Bōlen ro uwaan kūlaaj eo remaron̄ kwaļo̧k wāween an Rilo̧mo̧o̧r kar jipan̄ er ilo iien rōt kein.

• Jejjo uwaan kūlaaj eo am̧ remaron̄ bōk jidik jipan̄ jān baam̧le ko aer ilo aer kajjeon̄ mour kōn gospel in—im remaron̄ bar jelm̧ae jum̧ae. Ta eo jemaron̄ ekkatak jān waanjon̄ak eo an Ebream ilo Ebream 1:1–19 me emaron̄ jipan̄ ro rej kajjieon̄ mour jim̧we ilo iien rōt kein?

• Kwomaron̄ kajjitōk ippān ro uwaan kūlaaj eo n̄an riiti Ukook eo an Josep Smith, Jenesis 14:36–40 (ilo Bible appendix eo) im kwaļo̧k ta eo rej ekkatak kōn tōmak eo im ikdeleel ko an Ebream. Remaron̄ barāinwōt kwaļo̧k wāween aer kar jeram̧m̧an ke rekar kōjerbal tōmak eo aer n̄an kōļļā juon m̧ōttan jon̄oul.

• N̄an jipan̄ ro uwaan kūlaaj meļeļe ta in bujen eo an Ebream, kwomaron̄ kwaļok ennaan eo jān Būreejtōn Russell M. Nelson ilo “Kakkobaba in Kein Jipan̄ ko jet” (lale barāinwōt Gospel Topics, “Abrahamic Covenant,” topics.ChurchofJesusChrist.org). Ro uwaan kūlaaj ro emaron̄ m̧ōj aer ekkatak kōn bujen eo an Ebream jān Ebream 2:6–11, āinwōt kar elmakote ilo laajrak in katak eo an wiik in in Itok, Ļoor Eō—N̄an Kajjojo Armej im Baam̧le ko. Bōlen ro uwaan kūlaaj eo remaron̄ kwaļo̧k ta eo rekar ekkatak, ak kūlaaj eo remaron̄ ekkatak ippān doon kōn eoon kein. Ta kallim̧ūr ko im eddo ko jej bōki jān bujen eo an Ebream? Pija eo “Special Witness—President Nelson” emaron̄ jipan̄ uwaake kajjitōk in (ChurchofJesusChrist.org/media-library/video/2011-04-18-special-witness-president-nelson). Ta eo jej aikuj kōm̧m̧ane n̄an bōk kōjeraam̧m̧an ko ilo bujen in? Ewi wāween ad maron̄, āinwōt ro ineen Ebream, kōjeraam̧m̧an “aolep nokwe ko an laļ”? (Ebream 2:11).

• Kōn Jepļaaktok eo an gospel in, eiten aolepān membōr ro an Kabun̄ in rejeļā kōn Melkizedek Priesthood eo, ak jejjo rejjab jeļā kōn em̧m̧aan eo Melkizedek. N̄an jipan̄ ro uwaan kūlaaj eo ekkatak eļapļo̧k kōn e, bōlen kwomaron̄ kūr er n̄an pijaikļo̧k bwe em̧ōj kar kajjitōk ippāer n̄an kwalo̧k kajjeen Melkizedek n̄an juon armej eo ejjab jeļā kake e im kōm̧m̧ane juon laajrak ilo bo̧o̧t eo kōn men ko remaron̄ ba. Remaron̄ pedped ioon jilu men ko rekar riiti ilo Ukook eo an Josep Smith, Genesis 14:26–27, 33–38 (ilo Bible appendix eo); Alma 13:13–19; im Katak im Bujen Ko 107:1–4. Ta eo jej ekkatak kōn Melkizedek Priesthood eo jān eoon kein?

  

Būreejtōn Russell M. Nelson eaar katakin:

“Bujen eo an Anij ekar kōm̧m̧an ippān Anij im tokālik kar leļo̧k n̄an Aisek im Jekab eutiej im kanooj aorōk. … Irooj ekar waļo̧k ilo raan kein āliktata n̄an kōkāāl bujen eo an Ebream. … Kōn kōkāāl in, kōm kar bōke, āinwōt kar ro etto, priesthood eo ekwojarjar im gospel eo ejjeļo̧k jem̧ļo̧kin. Ewōr am maron̄ in bōk tarlep in gospel eo, lan̄lōn̄ kōn kōjeraam̧m̧an ko an priesthood eo, im karbōb n̄an bōk kōjeraam̧m̧an eo eļaptata an Anij—me an mour indeeo” (“Covenants,” Liahona, Nov. 2011, 87–88).

“Tarlep in kōjeraam̧m̧an ko an bujen eo an Ebream rej litok ilo tampeļ ko rekwojarjar. Kōjeraam̧m̧an kein rej kōtļo̧k bwe jen jerkak ilo Jerkakpeje eo Jinointata im jolete tūroon, laļ ko, kajoor ko, jikin ko, irooj, n̄an ad ‘mour āinwōt Anij im aiboojoj ilo aolep men otemjeļo̧k’ [Katak im Bujen Ko 132:19]” (“Special Witnesses of Christ,” Ensign, Apr. 2001, 7).