متّی ۸–۹؛ مرقس ۲–۵

اِن چند ابواب میں مُنّجی کی مُعجِزاتی شِفا کی بہت سی مثالیں قلمبند کی گئی ہیں۔ اُن شِفائیہ مُعجِزات کا مُطالعہ کرتے ہوئے، اپنے لیے ممکنہ پیغامات تلاش کریں۔ آپ خود سے پوچھ سکتے ہیں: یہ واقعہ اِیمان کے بارے میں کیا تعلیم دیتا ہے؟ یہ واقعہ مُنّجی کے بارے میں کیا سِکھاتا ہے؟ خُدا مجھے اِس مُعجِزے سے کیا سِکھانا چاہتا ہے؟

• کوڑھی (متّی ۸: ۱–۴)

• صُوبہ دار کا خادِم (متّی ۸: ۵–۱۳)

• پطرس کی ساس (متّی ۸: ۱۴–۱۵)

• دو اَندھے شخص (متّی ۹: ۲۷–۳۱)

• مفلُوج آدمِی (مرقس ۲: ۱–۱۲)

• آدمِی جِس میں ناپاک رُوحیں تھی (مرقس ۵: ۱–۲۰)

• یائِیر کی بیٹی (مرقس ۵: ۲۲–۲۳، ۳۵–۴۳)

• عَورت جِس کے خُون جاری تھا (مرقس ۵: ۲۴–۳۴)

مزید دیکھیں ڈیلن ایچ اوکس، ”Healing the Sick،“ انزائن یا لیحونا، مئی ۲۰۱۰، ۴۷–۵۰۔

صُوبہ دار، جو غیر قوم سے تھا، خود کو اِس لائِق نہِیں سمجھتا تھا کہ مُنّجی اُس کی چھت کے نیچے آئے۔ وہ عَورت جس کے خُون جاری تھا اُسے ناپاک سمجھا جاتا تھا اور یہودی معاشرے سے خارج کر دیا گیا تھا۔ پھر بھی مُنّجی نے اُن دونوں کو برکت بخشی۔ خُداوند سے مدد مانگنے کے بارے میں آپ اِن دو کہانیوں سے کیا سیکھتے ہیں؟

اِن آیات میں، یِسُوع نے سِکھایا کہ اُس کے شاگِرد بننے کے لیے درکار ہے کہ ہم اُسے اپنی زندگی میں اولین درجہ دیں، چاہے اِس ضمن میں بعض اوقات ہمیں اپنی دلپسند چِیزوں کو بھی قربان کیوں نہ کرنا پڑے۔ اِن حوالہ جات کا مطالعہ کرتے ہوئے، اپنی شاگِردی پر ہی غور کریں۔ شاگِردوں کو کیوں مُنّجی کو اولین ترجیح دینے پر راضی ہونا چاہیے؟ یِسُوع کو اولین ترجیح دینے کے لیے آپ کو کون سی چِیز ترک کرنے کی ضرورت ہے؟ (مزید دیکھیں لُوقا ۹: ۵۷–۶۲۔)

کیا آپ نے کبھی سمندر کے طُوفان میں یِسُوع کے شاگِردوں کی طرح محسوس کیا ہے—پانی کی لہروں کو کشتی میں بھرتے دیکھ کر پوچھتے ہوئے، ”اَے اُستاد کیا تجھے فِکر نہِیں کہ ہم ہلاک ہُوئےجاتے ہیں؟“

مرقس ۴: ۳۵–۴۱ میں، آپ کو چار سوالات ملیں گے۔ ہر ایک کی فہرست بنائیں، اور غور کریں کہ یِسُوع مسِیح پر اِیمان کے ساتھ زِندگی کی چنوتیوں کا مقابلہ کرنے کے بارے میں یہ آپ کو کیا تعلیم دیتا ہے۔ مُنّجی آپ کی زِندگی کے طُوفانوں کو کِس طرح تھام سکتا ہے؟

بعض اوقات جب لوگ ہمارے مذہبی عقائد اور رسوم پر تنقید کرتے ہیں تو اُن کو جواب دینا مشکل ہو جاتا ہے۔ جب آپ متّی ۹: ۱–۱۳ اور مرقس ۲: ۱۵–۱۷ پڑھیں، تو نالشیوں کی تنقید اور مُنّجی کے جوابات تلاش کریں۔ تنقید اور ردِعمل پہ مختلف رنگوں سے نشان لگانے یا اُن کو تحریر کرنے پر غور کریں۔ مُنّجی کے تعلیم دینے کے طریقے سے آپ نے کیا مشاہدہ کیا ہے؟ اِنجیلی اُصول یا کلیسیائی رسوم کے دفاع کے لیے اُس کی مثال کی پیروی کرنا کیسے آپ کی مدد کرسکتا ہے؟

جب ایک مفلُوج شَخص کو مُنّجی کے پاس لایا گیا تھا، تو ہجوم کے سامنے یہ بات عیاں تھی کہ اُسے جسمانی طور پر شِفا یاب ہونے کی ضرورت ہے۔ لیکن یِسُوع نے پہلے اُس آدمِی کی سب سے بڑی ضرورت کی طرف دھیان دیا—یعنی اُس کے گناہوں کی معافی۔ یہاں تک کہ اگر وہ شَخص جسمانی طور پر شِفا نہ پاتا، تب بھی وہ یِسُوع کی مشورت پر عمل پیرا ہوسکتا تھا کہ ”خاطِر جمع رکھّ“ (متّی ۹: ۲)۔ معافی پانے کے باعِث کیا آپ نے کبھی خُوشی محسوس کی ہے؟ (مزید دیکھیں ایلما ۳۶: ۱۸–۲۴۔)

اِن ابواب میں بیان کردہ مُعجِزات کی ایک فہرست بنانے اور اُن میں سے کچھ کی تصاویر تلاش کرنے پر غور کریں (دیکھیں the Gospel Art Book یا ChurchofJesusChrist.org)۔ آپ خاندان کے ہر فرد سے کہہ سکتے ہیں کہ وہ (اگر تصویر دستیاب ہو تو اُس کا استعمال کرتے ہوئے) ایک مُعجِزے کے بارے میں بتائیں اور اُس سے حاصل کردہ علم کا اشتراک کریں۔ آپ جدید کلیسیائی تاریخ میں سے اُن مُعجِزوں کی کچھ مثالوں کا اشتراک کرسکتے ہیں جن کے بارے میں آپ نے مشاہدہ کیا یا پڑھا ہے۔

محصول لینے والوں اور گنہگاروں کے ساتھ، جنہیں دُوسروں نے دھتکارا تھا مُنّجی کے رویے سے ہم کیا سیکھ سکتے ہیں؟ دُوسرے لوگوں کے ساتھ تعامل کرتے ہوئے ہم اُس کے نمونہ کی کیسے پیروی کرسکتے ہیں؟

اِنجیل کو پھیلانے کے لیے مزید مزدُوروں کو بھیجنے کی مُنّجی کی مِنّت کو سمجھنے میں آپ اپنے خاندان کی کِس طرح مدد کرسکتے ہیں؟ آپ نہایت آسان کام سے شروع کرسکتے ہیں جیسا کہ کسی ایسی تفویض پر اکٹھے کام کرنا جسے ختم کرنے کے لیے ایک شخص کو کافی زیادہ وقت درکار ہو، مثلاً عشائیہ کے بعد کچن کی صفائی کرنا۔ اِنجیل کا پیغام پھیلانے کے لیے ہم کیا کر سکتے ہیں؟

کیا یہ کہانی خوفزدہ ہونے کی صورت میں خاندانی اَرکان کی مدد کرسکتی ہے؟ شاید وہ آیت ۳۹ پڑھ سکتے ہیں اور ایسے تجربات کا اشتراک کرسکتے ہیں جب مُنّجی نے پریشانی یا خوف کے وقت اِطمینان محسوس کرنے میں اُن کی مدد کی۔