متّی ۱۰–۱۲؛ مرقس ۲؛ لُوقا ۷؛ ۱۱

متّی ۱۰ میں دی گئی ہدایت یِسُوع کے اپنے رَسُولوں کے لیے تھی، لیکن ہم سب بھی خُداوند کے کام میں شامل ہیں۔ مسِیح نے اپنے رَسُولوں کو اُن کے کارِ تبلیغ کی تکمیل میں مدد کے لیے کون سا اِختیّار بخشا؟ جس کام کی بُلاہٹ آپ کو سونپی گئی ہے اُس کام کے لیے آپ اُس کے اِختیّار تک کیسے رسائی حاصل کرسکتے ہیں؟ (دیکھیں ۲ کُرنتھِیوں ۶: ۱–۱۰؛ عقائد اور عہود ۱۲۱: ۳۴–۴۶)۔

جب آپ اُس حُکم کو پڑھتے ہیں جو مسِیح نے اپنے رَسُولوں کو دیا، تو آپ کو اُس کام کے بارے میں تاثرات مِل سکتے ہیں جو خُداوند آپ سے کروانا چاہتا ہے۔ درج ذیل خاکہ آپ کو اپنے خیالات کو منظم کرنے میں مدد فراہم کرسکتا ہے:

خُداوند جانتا تھا کہ اُس کے شاگِردوں پر ظلم و ستم ڈھایا جائے گا اور اُن سے اِیمان کے بارے میں پوچھا جائے گا—ایسا ہی کچھ آج کے شاگِرد بھی تجربہ کرسکتے ہیں۔ لیکن اُس نے شاگِردوں سے وعدہ کیا کہ وہ رُوح کے ذریعہ جان لیں گے کہ کیا بولنا ہے۔ کیا آپ نے کبھی اِس خدائی وعدے کی تکمیل کا اپنی زندگی میں تجربہ کیا ہے، شاید تب جب آپ نے اپنی گواہی کا اشتراک کیا ہو، کسی کو برکت دی ہو، یا کسی سے گفتگو کی ہو؟ اپنے تجربات کا اشتراک کسی عزیز کے ساتھ کرنے یا اِنھیں روز نامچے میں تحریر کرنے کے بارے میں غور فرمائیں۔

مزید دیکھیں لُوقا ۱۲: ۱۱–۱۲؛ عقائد اور عہود ۸۴: ۸۵۔

بزرگ ڈی ٹاڈ کرسٹوفرسن نے سِکھایا: ”مجھے یقین ہے کہ جب آپ نے یِسُوع مسِیح کی اِنجیل کو قبول کیا اور اُس کے ساتھ عہد میں داخل ہوئے تو آپ میں سے بہتیروں کو باپ اور ماں، بھائیوں اور بہنوں نے مسترد اور بے دخل کردیا ہو گا۔ کسی نہ کسی طرح سے، مسِیح سے آپ کی اعلیٰ محبّت کے لیے اُن رشتوں کی قربانی درکار تھی جو آپ کو پیارے تھے، اور آپ نے بہت سے آنسو بہائے ہیں۔ پھر بھی آپ اپنی بے تخفیف محبّت کے باعث، اپنے آپ کو خُدا کے بیٹے سے شرمندہ نہ ہوتے ہوئے، اِس صلیب کے نیچے قائم ہیں“ (”Finding Your Life،“ انزائن، مارچ ۲۰۱۶، ۲۸)۔

نجات دہندہ کی پیروی کرنے کے لیے عزیز تعلقات کو کھونے کی اِس آمادگی کے ساتھ ایک وعدہ وابستہ ہے کہ ”جو کوئی میری خاطِر اپنی جان کھوتا ہے اُسے بَچائے گا“ (متّی ۱۰: ۳۹)۔

ہم سب بوجھ سے دبے ہُوئے ہیں—کچھ ہمارے اپنے گناہوں اور غلطیوں کے نتیجے میں، کچھ دُوسروں کے انتخاب کی وجہ سے، اور کچھ جو کسی کی غلطی نہیں ہیں بلکہ صرف زمین پر زندگی کا حصّہ ہیں۔ ہماری جدوجہد کی وجوہات سے قطع نظر، یِسُوع ہم سے التماس کرتا ہے کہ ہم اُس کے پاس جائیں تاکہ بوجھ اٹھانے اور آرام پانے میں وہ ہماری مدد کرے (مزید دیکھیں مضایاہ ۲۴)۔ بزرگ ڈیوڈ اے بیڈنار نے سِکھایا، ”مُقدّس عہود باندھنے اور اُن پر قائم رہنے سے ہم خُداوند یِسُوع مسِیح کا جُوا اپنے اُوپر اُٹھا لیتے ہیں“ (”Bear Up Their Burdens with Ease،“ انزائن یا لیحونا، مئی ۲۰۱۴، ۸۸)۔ اِس کو ذہن میں رکھتے ہوئے، اِن آیات میں نجات دہندہ کے اِلفاظ کو بہتر طور پر سمجھنے کے لیے درج ذیل جیسے سوالات پر غور و فکر کریں: ”میرے عہود کیسے مجھے نجات دہندہ کا جُوا اپنے اُوپر اُٹھانے کی اجازت دیتے ہیں؟“ ”مسِیح کی طرف رُجُوع لانے کے لیے مجھے کیا کرنے کی ضرورت ہے“ یا ”کِن معنوں میں نجات دہندہ کا جُوا ملائِم اور اُس کا بوجھ ہلکا ہے؟“

پڑھتے وقت آپ کے ذہن میں اور کون سے سوالات آتے ہیں؟ اُن کو قلمبند کریں اور اِس ہفتے صحائف اور انبیاء کے کلام میں سے جوابات تلاش کریں۔ آپ کو اپنے چند سوالات کے جوابات اوپر درج کیے گئے بزرگ ڈیوڈ اے بیڈنار کے پیغام میں سے مِل سکتے ہیں۔

کیا آپ اپنے آپ کو اِن آیات کی کہانی میں دیکھ پاتے ہیں جب نجات دہندہ شمعُون فرِیسی کے گھر گیا؟ کیا آپ نے کبھی شمعُون کی مانند محسوس کیا ہے؟ یِسُوع مسِیح کے ساتھ فروتنی اور محبّت کا اظہار کرنے والی عورت کی مثال کی پیروی آپ کیسے کرسکتے ہیں؟ کیا آپ نے کبھی اُس شفقت اور رحمت کا تجربہ حاصل کیا ہے جس کا اظہار نجات دہندہ نے عورت کے ساتھ کیا تھا؟ آپ اِن آیات سے کیا سیکھتے ہیں کہ معافی کِس طرح نجات دہندہ سے ہماری محبّت کو تقویت بخشتی ہے؟

حالیہ مجلسِ عامہ کے پیغامات پر غور کرتے ہوئے، ہم جدید دور کے رَسُولوں کی مشورت کو بطور خاندان قبول کرنے اور اُس پر عمل کرنے کے لیے کون سے اقدام اٹھاتے ہیں؟ اُن کی مشورت کی پیروی کرنے سے ہم کیسے یِسُوع مسِیح کے قریب تر ہو جاتے ہیں؟

آپ اپنے خاندان سے کسی بھاری چیز کو کھینچنے کی کوشش کرنے کا کہیں، پہلے خود اور پھر کسی کی مدد سے، ایسا کرنے سے آپ اِن آیات میں نجات دہندہ کی تعلیمات کو تصور کرنے میں اُن کی مدد کر سکتے ہیں۔ ہم کون سے بوجھ اُٹھاتے ہیں؟ مسِیح کا جُوا اپنے اُوپر اُٹھا لینے سے کیا مراد ہے؟ اِس خاکہ سے وابستہ تصویر آپ کو یہ واضح کرنے میں مدد دے سکتی ہے کہ جُوا کیا ہوتا ہے۔

سَبت کے دِن ہم کیسے ”نیکی کر“ سکتے ہیں؟ (متّی ۱۲:۱۲)۔ سَبت کے دِن نجات دہندہ ہمیں کِس طرح سے شِفا بخش سکتا ہے؟