متّی ۳؛ مرقس ۱؛ لُوقا ۳

اناجیل کے مصنفین میں سے، ہم مرقس کے بارے میں بہت کم جانتے ہیں۔ ہم جانتے ہیں کہ وہ پَولُس، پطرس اور کئی دوسرے مبلغین کا مبلغ ساتھی تھا۔ بائِبل مُقَدَّس کے بہت سے دانشوروں کا خیال ہے کہ پطرس نے مرقس کو مُنّجی کی زندگی کے واقعات کو قلمبند کرنے کی ہدایت کی۔ مرقس کی اِنجیل ممکنہ طور پر دیگر تینوں سے پہلے لکھی گئی تھی۔

یُوحنّا بپتِسمہ دینے والے کا مشن لوگوں کے دِلوں کو مُنّجی کو قُبُول کرنے اور مزید اُس کی مانند بننے کے لیے تیار کرنا تھا۔ اُس نے ایسا کیسے کیا؟ اُس نے اعلان کیا، ”تَوبہ کرو“ (متّی ۳: ۲)۔ اُس نے مسِیح کو قُبُول کرنے کے لیے تَوبہ کرنے کی اہمیت پر زور دینے کے لیے پھَل اور گیہُوں جیسی شبیہوں کا استعمال کیا (دیکھیں لُوقا ۳: ۹، ۱۷)۔

آپ یُوحنّا بپتِسمہ دینے والے کی خدمت سے متعلق بیانات میں سے اور کون سی شبیہیں تلاش کرتے ہیں؟ صحائف میں اِن پر نشان لگانے یا اِن سے متعلق تصاویر اپنے روز نامچے میں بنانے کے بارے میں غور فرمائیں۔ یہ آیات تَوبہ کے عقیدہ اور ضرورت کے بارے میں کیا تعلیم دیتی ہیں؟

سَچّی تَوبہ ”خُدا کے بارے میں، اپنے خود کے بارے میں، اور دُنیا کے بارے میں ایک تازہ جائزہ لینے کے لیے ذہنی تبدیلی ہے۔ … [اِس کا مطلب] اپنے دِل اور مرضی کو خُدا کی طرف مائل کرنا ہے“ (Bible Dictionary، ”Repentance)۔ لُوقا ۳: ۷–۱۴ میں، یُوحنّا نے مسِیح کو قُبُول کرنے کے لیے لوگوں کو کون سی تبدیلیاں کرنے کی دعوت دی ہے؟ یہ مشورت آپ پر کیسے لاگو ہوتی ہے؟ آپ اپنی سَچّی تَوبہ کا اظہار کیسے کرسکتے ہیں؟ (دیکھیں لُوقا ۳: ۸)۔

فرِیسِی ایک ایسی یہُودی مذہبی جماعت کے رکن تھے جو موسیٰ کی شَرِیعَت کی سختی سے پیروی کرنے پر فخر کرتے تھے۔ اُن کا رجحان مذہب کو فقط زائد رسمی روایات تک محدود کرنا تھا۔ صدُوقِی ثروت مند یہُودی طبقہ تھا جو امتیازی مذہبی اور سیاسی اثر و رسوخ کا حامل تھا۔ وہ قِیامت کے عقیدے پر یقین نہیں رکھتے تھے۔ دونوں گروہ خُدا کی شَرِیعَت کی اصل تعلیم سے بھٹک گئے تھے، اور اُن کے بہت سے اراکین نے خُدا کے نبی، یُوحنّا بپتِسمہ دینے والے کے پیغام کو قُبُول کرنے سے انکار کردیا تھا۔

مزید دیکھیں متّی ۲۳: ۲۷؛ یُوحنّا ۱: ۱۹–۲۴۔

جب آپ نے بپتِسمہ لیا تھا، آپ نے مُنّجی کی مثال کی پیروی کی تھی۔ مُنّجی کے بپتِسمہ کے اِن بیانات سے آپ جو کچھ سیکھتے ہیں اُس کا موازنہ اپنے بپتِسمہ کے دوران ہونے والے واقعات کے ساتھ کریں۔

نیفی نے مُنّجی کے بپتِسمہ کے بارے میں کچھ اہم تعلیمات درج کیں۔ ۲ نیفی ۳۱ میں اُس کے اِلفاظ آپ کو کیا سِکھاتے ہیں؟ اپنے بپتِسمے کے تجربے کو روز نامچے میں قلمبند کرنے پر غور کریں۔

مزید دیکھیں یُوحنّا ۱: ۳۲–۳۳؛ مضایاہ ۱۸: ۸–۱۱؛ عقائد اور عہود ۱۳: ۱؛ ۲۰: ۳۷، ۶۸–۷۴۔

بائبل متعدد ایسے شواہد پر مشتمل ہے جو اِس بات کا ثبوت دیتے ہیں کہ خُدائی اَرکان تین الگ ہستیاں ہیں۔ مثال کے طور پر، مُنّجی کے بپتِسمہ کا بیان اِس عقیدے کی تائید کرتا ہے کہ خُدا باپ، یِسُوع مسِیح، اور رُوحُ الُقدس تین الگ ہستیاں ہیں۔ خُدا باپ نے آسمان سے بات کی، اور جب وہ بپتِسمہ لے رہا تھا تو رُوحُ الُقدس (ایک کبوتر کی صورت میں) مُنّجی پر اُترا۔ یہاں چند دیگر ایسے صحائف بھی پیش کیے گئے ہیں جو اِسی حقیقت کی تعلیم دیتے ہیں: پیدائش ۱: ۲۶–۲۷؛ متّی ۱۷: ۱–۵؛ یُوحنّا ۱۷: ۲۰–۲۳؛ اعمال ۷: ۵۵–۵۶؛ اور عقائد اور عہود ۱۳۰: ۲۲۔

یُوحنّا بپتِسمہ دینے والا ہارونی کہانت کا حامل تھا۔ اُس کے بارے میں مُطالعہ کرتے ہوئے ہم ہارونی کہانت کے بارے میں کیا سیکھ سکتے ہیں؟ یُوحنّا کی مثال سے ہارونی کہانت کے حاملین کو اپنے فرائض کی ادائیگی میں کِس طرح سے مدد مِل سکتی ہے؟ (مزید دیکھیں عقائد اور عہود ۱۳: ۱؛ ۲۰: ۴۶–۶۰۔)

بپتِسمہ اور رُوحُ القُدس کی نَعمت کے بارے میں خاندانی اَرکان کو تعلیم دینے کے لیے، اُن کو کوئی گندی چِیز دکِھانے اور پھر اُسے پانی سے دھونے کو کہنے پر غور کریں۔ یہ سرگرمی بپتِسمہ کی نمائندگی کیسے کرتی ہے؟ پھر خاندانی اَرکان کو آگ کی تطہیری خصوصیات میں سے چند کے بارے میں بات کرنے کو کہیں۔ رُوحُ القُدس کی نَعمت کو ”آگ کے بپتِسمہ“ کے طور پر کیوں بیان کیا گیا ہے؟

ہم نے کب محسوس کیا ہے کہ خُدا ہم سے خُوش ہے؟ خُدا کو خُوش کرنے کے لیے ہم بطور خاندان کیا کر سکتے ہیں؟