متّی ۱؛ لُوقا ۱

متّی ایک محصُول لینے والا، یہُودی تھا، جسے یِسُوع نے اپنا رَسُول چنا تھا (دیکھیں متّی ۱۰: ۳)۔ متّی نے اپنی اِنجیل بنیادی طور پر ساتھی یہُودِیوں کے لیے لکھی تھی؛ لہٰذا، اُس نے ممسوح کے بارے میں پرانے عہد نامہ کی پیشنگوئیوں پر زور دینے کا انتخاب کیا جو یِسُوع کی زِندگی اور خدمت کے دوران پوری ہوئی تھیں۔

لُوقا ایک غیر قوم (غیر یہُودی) طبیب تھا جو پَولُس رَسُول کے ساتھ سفر کرتا تھا۔ اُس نے مُنّجی کی موت کے بعد اپنی اِنجیل بنیادی طور پر غیر یہُودی سامعین کے لیے تحریر کی۔ اُس نے یہُودِیوں اور یُونانِیوں دونوں کے مُنّجی کے طور پر یِسُوع مسِیح کی گواہی دی۔ اُس نے مُنّجی کی زِندگی میں پیش آنے والے واقعات کے عینی شاہدین کی کہانیاں درج کیں، اور اُس نے دوسری اناجیل کے مقابلے میں خواتین سے متعلق مزید کہانیاں بھی شامل کیں۔

صدر رسل ایم نیلسن نے وضاحت کی کہ یِسُوع مسِیح کے کفارہ کے لیے ”ایک لافانی ہستی کی ذاتی قربانی درکار تھی جو موت کے تابع نہ تھا۔ پھر بھی اُسے لازماً مرنا تھا اور دوبارہ اپنا جسم مُردوں میں سے جِلانا تھا۔ مُنّجی ہی اِس کام کو پورا کرسکتا تھا۔ اپنی ماں سے اُس نے مرنے کا اِختیار وراثت میں پایا۔ اپنے باپ سے اُس نے موت پر غالب آنے کی قوت حاصل کی“ (”Constancy amid Change،“ انزائن، نومبر ۱۹۹۳، ۳۴)۔

کسی بھی وجہ سے، خُدا کے وقت سے مراد یہ تھی کہ جس نَعمت کی خواہش اِلِیشبع اور زکریاہ نے بہت پہلے کی تھی، کہ اُن کا ایک بچہ ہو، وہ نَعمت اُن کی توقع سے بہت دیر بعد اُنھیں حاصل ہوئی۔ اگر آپ کو کسی نَعمت کا انتظار کرنا پڑے، یا اگر کبھی ایسا لگے کہ خُدا آپ کی دُعائیں سن نہیں رہا ہے تو، اِلِیشبع اور زکریاہ کی کہانی ایک یاد دہانی ہوسکتی ہے کہ اُس نے آپ کو فراموش نہیں کیا ہے۔ اُس نے آپ کے لیے ایک منصوبہ بنایا ہے اور وہ ہمیشہ اپنے راست باز مُقَدَّسین سے کیے گئے اپنے وعدوں کو پورا کرتا ہے۔ جیسا کہ بزرگ جیفری آر ہالینڈ نے وعدہ کیا ہے کہ، ”کچھ نَعمتیں جلد ہی حاصل ہو جاتی ہیں، کچھ دیر بعد، اور کچھ آسمان تک نہیں حاصل ہوتی؛ لیکن جو لوگ یِسُوع مسِیح کی اِنجیل کو خوشی سے قبول کرتے ہیں اُنھیں، وہ ضرور حاصل ہوتی ہیں“ (”An High Priest of Good Things to Come،“ انزائن، نومبر ۱۹۹۹، ۳۸)۔ زکریاہ اور اِلِیشبع کیسے وفادار رہے؟ (دیکھیں لُوقا ۱: ۵–۲۵، ۵۷–۸۰)۔ کیا آپ کو کسی نَعمت کا انتظار ہے؟ جب آپ انتظار کر رہے ہوتے ہیں تو خُداوند آپ سے کیا توقع کرتا ہے؟

اِس کہانی میں خُداوند آپ کو مزید اور کیا پیغام دینا چاہتا ہے؟

مریم کی طرح، ہم بعض اوقات یہ جان پاتے ہیں کہ ہماری زِندگی کے لیے خُدا کے منصوبے ہمارے منصوبوں سے بالکل مختلف ہوتے ہیں۔ خُدا کی مرضی کو قبول کرنے کے بارے میں آپ مریم سے کیا سیکھتے ہیں؟ درج ذیل جدولوں میں، فرِشتہ اور مریم کے بیانات لکھیں (دیکھیں لُوقا ۱: ۲۶–۳۸)، ایسے پیغامات کے ساتھ جو آپ کو اُن کے بیانات میں سے ملتے ہیں:

جب آپ متّی ۱: ۱۸–۲۵ میں یُوسُف کی راستباز مثال کے بارے میں پڑھتے ہیں، تو خُدا کی مرضی کو قبول کرنے کے بارے میں آپ کیا سیکھتے ہیں؟ آپ زکریاہ اور اِلِیشبع کے تجربات سے کیا سیکھ سکتے ہیں؟ (دیکھیں لُوقا ۱)۔

مزید دیکھیں مضایاہ ۳: ۱۹؛ لُوقا ۲۲: ۴۲؛ ہیلیمن ۱۰: ۴–۵۔

لُوقا ۱: ۴۶–۵۵ میں مریم کے اِلفاظ نجات دہندہ کے مشن کے پہلوؤں کی پیش گوئی کرتے ہیں۔ آپ مسِیح کے بارے میں مریم کے بیانات سے کیا سیکھتے ہیں؟ اِن آیات کا موازنہ ۱ سموئیل ۲: ۱–۱۰میں حنّاہ کے اِلفاظ اور متّی ۵: ۴–۱۲ میں یِسُوع کی مُبارکبادیوں کے ساتھ کرتے ہوئے نجات دہندہ کی پیش کردہ نَعمتوں کے بارے میں آپ کو مزید کیا بصیرت حاصل ہوتی ہے؟ جب آپ اِس بصیرت پر غور کرتے ہیں تو رُوح آپ کو کیا سِکھاتا ہے؟

جب آپ کا خاندان یِسُوع کا نسب نامہ پڑھتا ہے، تو آپ وضاحت دے سکتے ہیں کہ اُس کا شاہی شجرہ نسب یُوسُف سے ہوتا ہوا پِیچھے داؤد بادشاہ سے جا ملتا ہے۔ یہ نسب نامہ اِس لیے اہم تھا کیوں کہ پیش گوئی کی گئی تھی کہ ممسوح داؤد کی نسل سے ہوگا (دیکھیں یرمیاہ ۲۳: ۵–۶)۔ یہ آپ کی اپنی خاندانی تاریخ پر گفتگو کرنے اور اپنے آباؤ اجداد کے بارے میں کچھ کہانیوں کا اشتراک کرنے کا ایک اچھا موقع ہوسکتا ہے۔ اپنی خاندانی تاریخ کے بارے میں جاننے سے آپ کے خاندان کو کِس طرح برکت ملتی ہے؟

اِن آیات میں بیان کردہ لوگ کیوں خَوف زدہ تھے؟ ہم کِس سبب سے خَوف زدہ ہوتے ہیں؟ خُدا ہمیں ”خَوف نہ کرنے“ کی کِس طرح تلقین کرتا ہے؟

اپنے خاندان کو یہ یقین دلانے میں مدد کے لیے کہ ”جو قَول خُدا کی طرف سے ہے وہ ہرگِز بے تاثِیر نہ ہوگا،“ آپ لُوقا ۱ کا اکٹھے مُطالعہ کرسکتے ہیں اور خُدا کے کئے ہوئے ایسے کاموں کو ڈھونڈ سکتے ہیں جو شاید ناممکن تصور کیے جاتے تھے۔ صحائف یا اپنی زِندگیوں میں سے—وہ اور کون سی کہانیوں کا اشتراک کرسکتے ہیں—جن میں خُدا نے بظاہر ناممکن چِیزوں کو ممکن بنایا؟ Gospel Art Book میں تلاش کرنے سے اُنھیں تجاویز کے بارے میں سوچنے میں مدد مل سکتی ہے۔