متّی ۴؛ لُوقا ۴–۵

اپنے مشن کی تیاری کے لیے، یِسُوع ”خُدا کے ساتھ سکونت کرنے کے لیے“ بیابان میں چلا گیا۔ اِس بارے میں سوچیں کہ خُدا کی قربت کو محسوس کرنے کے لیے آپ کیا کرسکتے ہیں۔ یہ آپ کو اُس کام کے لیے کیسے تیار کرتا ہے جو وہ آپ سے کروانا چاہتا ہے؟

بعض اوقات جب لوگ گناہ کرنے کی آزمائش میں پڑتے ہیں تو وہ اپنے آپ کو گناہ گار ٹھہراتے ہیں۔ بلکہ حتیٰ کہ مُنّجی جو”بے گُناہ رہا“ (عبرانیوں ۴: ۱۵)، وہ بھی آزمایا گیا۔ یہ علم بہت تسکین بخش ہے کہ چونکہ مسِیح نے بھی آزمائشوں کا سامنا کیا اور اُن پر غالب آیا، وہ ہماری آزمائشوں کو جانتا ہے جن کا ہم سامنا کرتے ہیں اور اُن پر غالب آنے میں ہماری مدد کرسکتا ہے (دیکھیں عبرانیوں ۲: ۱۸؛ ایلما ۷: ۱۱–۱۲)۔

جب آپ متّی ۴: ۱–۱۱ اور لُوقا ۴: ۱–۱۳ کو پڑھتے ہیں، تو آزمائشوں کا سامنا کرنے میں مدد کے لیے آپ کیا سیکھتے ہیں؟ آپ اپنے خیالات کو اِس طرح کے جدول میں ترتیب دے سکتے ہیں:

مزید دیکھیں ۱ کُرنتھِیوں ۱۰: ۱۳؛ ایلما ۱۳: ۲۸؛ موسیٰ ۱: ۱۰–۲۲۔

اگر آپ سے یہ بیان کرنے کا کہا جائے کہ یِسُوع مسِیح کو زمین پر کیا کرنے کے لیے بھیجا گیا، تو آپ کیا کہیں گے؟ لُوقا ۴ :۱۸–۱۹ میں، مُنّجی نے ممسوح کے بارے میں یسعیاہ کی ایک پیش گوئی کا حوالہ دیتے ہوئے اپنے مشن کے پہلوؤں کو بیان کیا (دیکھیں یسعیاہ ۶۱: ۱–۲)۔ اِن آیات کو پڑھنے سے آپ کو اُس کے مشن کے بارے میں کیا پتہ چلتا ہے؟

اگرچہ یہودیوں کو یسعیاہ کی پیش گوئی کے پورے ہونے کا صدیوں سے انتظار تھا، بہتیروں نے یہ قبول نہ کیا کہ یِسُوع ممسوح تھا جب اُس نے اعلانیہ کہا، ”آج یہ نوِشتہ تُمہارے سامنے پُورا ہُؤا“ (لُوقا ۴: ۲۱)۔ جب آپ لُوقا ۴: ۲۰–۳۰ پڑھیں (مزید دیکھیں مرقس ۶: ۱–۶)، تو خُود کو ناصرت کے لوگوں کی جگہ رکھیں۔ کیا ایسی کوئی چیز ہے جو آپ کو مسِیح کو اپنا ذاتی مُنّجی قبول کرنے سے روک سکتی ہے؟

مزید دیکھیں مضایاہ ۳: ۵–۱۲۔

صدر عزرا ٹافٹ بینسن نے سِکھایا، ”ایسے مرد و زن جو اپنی زندگیوں کو خُدا کی طرف مائل کرتے ہیں وہ جانیں گے کہ وہ اُن کی زندگیوں کو اُن کی اپنی کوشش کے برعکس بہت زیادہ نمایاں طور پر پھلدار بنا سکتا ہے“ (Teachings of Presidents of the Church: Ezra Taft Benson [۲۰۱۴]، ۴۲)۔ پطرس اور اُس کے ساتھی ماہی گِیروں کے ساتھ بھی ایسا ہی ہوا۔ یِسُوع نے اُن کی یہ جاننے میں مدد کی کہ وہ مَچھلِیوں کے شِکار سے کہیں زیادہ بڑا کام کرسکتے ہیں—وہ ”آدم گِیر“ بن سکتے ہیں (متّی ۴: ۱۹؛ مزید دیکھیں لُوقا ۵: ۱۰)۔ اِس کو سمجھنے میں اُن کی مدد کے لیے، یِسُوع نے ایسے تجربات استعمال کیے جن سے وہ واقف تھے۔

آپ نے کب محسوس کیا ہے کہ مُنّجی آپ کو اپنی پیروی کرنے کے لیے بُلا رہا ہے؟ آپ خُداوند کو کیسے ظاہر کروا سکتے ہیں کہ آپ ”سب کُچھ [چھوڑ کر]“ (لُوقا ۵: ۱۱) اُس کی پیروی کریں گے؟ متّی ۴: ۱۸–۲۲؛ لُوقا ۵: ۱–۱۱ کو پڑھتے ہوئے اِن سوالات پر غور کریں۔

مزید دیکھیں ”Come, Follow Me،“ گیت، نمبر ۱۱۶۔

اِس سے پیشتر کہ وہ مخالف سے آزمایا جاتا یِسُوع نے روزہ رکھا۔ روزے کی طاقت سے متعلق ہم اِس حوالہ سے کیا بصیرت حاصل کرسکتے ہیں؟ آپ خاندانی اَرکان کو روزہ رکھنے کے تجربات کا اشتراک کرنے کی دعوت دے سکتے ہیں۔ شاید آپ کا خاندان ایک خاص مقصد کے لیے دُعاگو ہو کر اکٹھے روزہ رکھنے کا ارادہ کرسکتا ہے۔

جب شیطان نے مسِیح کو پتھّر کو روٹِی میں تبدیل کرنے کی ترغیب دی، تو اُس نے یہ کہہ کر مسِیح کی الہٰی شناخت کو للکارا کہ، ”اگر تُو خُدا کا بَیٹا ہے“ (متّی ۴: ۳، italics added)۔ شیطان کیوں کوشش کرتا ہے کہ ہم اپنی الہٰی شناخت پر شک کریں؟ وہ ایسا کیسے کرتا ہے؟ (مزید دیکھیں موسیٰ ۱: ۱۰–۲۳۔)

یِسُوع کی جسمانی اور رُوحانی آزمائش کے بعد، اُس کا دھیان یُوحنّا بپتسمہ دینے والے کی طرف مائل ہوا، جو قید خانہ میں تھا: ”اور اب یِسُوع کو معلوم تھا کہ یُوحنّا پکڑوا دِیا گیا تھا، اور اُس نے فرِشتوں کو حُکم دیا، اور دیکھو، وہ آ کر اُس [یُوحنّا] کی خِدمت کرنے لگے“ (ترجمہ برائے جوزف سمتھ، متّی ۴: ۱۱)۔ ہم اپنے بجائے پہلے دُوسروں کے بارے میں سوچنے کی مسِیح کی مثال پر عمل کرتے ہوئے کِس طرح برکت پاتے ہیں؟ ہم اُس کے نمونہ کی کیسے پیروی کرسکتے ہیں؟

کیا ہم کسی ایسے شخص کو جانتے ہیں جو شکستہ دل کا مالک ہو یا جسے ”رہائی“ کی ضرورت ہے؟ (لُوقا ۴: ۱۸)۔ مُنّجی کی شفا اور نجات پانے میں ہم دُوسروں کی کیسے مدد کر سکتے ہیں؟ آپ یہ بھی گفتگو کرسکتے ہیں کہ ہیکل کی رسوم کو انجام دینے سے ”قَیدیوں کی رہائی“ میں کِس طرح مدد ملتی ہے (لُوقا ۴: ۱۸)۔