“Ɔberɛfɛw 30–Mumu 6. ‘Mbɔbɔrhu Na Ɔpɛ’: Micah; Nahum; Habakkuk; Zephaniah,” Bra, Bɛka Mo Do—Dze Ma Fie na Asɔr: Ahyɛmu Dadaw 2026 (2026)
“Ɔberɛfɛw 30–Mumu 6. ‘Mbɔbɔrhu na Ɔpɛ,’” Bra, Bɛka Mo Do: Ahyɛmu Dadaw 2026
In the Beginning Was the Word [Ahyɛse no na Asɛm no Wɔ hɔ], Eva Timothy yɛɛ nsaano mfonyin no
Ɔberɛfɛw 30–Mumu 6: “Mbɔbɔrhu na Ɔpɛ”
Micah; Nahum; Habakkuk; Zephaniah
Erekenkan Ahyɛmu Dadaw no taa kyerɛ dɛ erekenkan nkɔnhyɛsɛm afa ɔsɛɛ ho. Nna Ewuradze taa frɛ nkɔnhyɛfo ma wɔbɔ emumuyɛfo no kɔkɔ fa N’atsɛmbu ho. Micah, Nahum, Habakkuk, na Zephaniah hɔn somdwuma no yɛ mfatoho papa. Nkyerɛmu a ɔyɛ hu mu no, nkɔnhyɛfo yinom hyɛɛ nkuropɔn a wɔ dɛm mber no, nna wɔyɛ dɛ hɔn ho yɛ dzen na wɔwɔ tum ho asehwe nkɔm: Nineveh, Babylon, na Jerusalem. Naaso ɔno yɛ mfe mpem mpem a wɔabasen kɔ no. Ebɛnadze ntsi na ɔyɛ mfaso dɛ ebɛkenkan nkɔnhyɛsɛm yinom ndɛ?
Mpo dɛ emumuyɛ ahantanfo nkuropɔn no, wɔsɛɛ hɔn no, emumuyɛ ahantan da ho wɔ hɔ. Yebotum ehu n’ase n’ase bi wɔ hɛnara hɛn akoma mu. Ahyɛmu Dadaw nkɔnhyɛfo yi mbrɛ yebesi botum adan efi bɔn yinom ho kyerɛ. Ibia ɔno nye siantsir kor a yɛda ho kenkan hɔn nsɛm ndɛ. Nna wɔnnyɛ ɔsɛɛ ho nkɔnhyɛfo ara—nna wɔyɛ ɔgye nkɔnhyɛfo. Nsato dɛ yɛmbra Christ hɔ na yenya No bɔnfakyɛ forafora ɔsɛɛ ho nkasaho no mu. Dɛ mbrɛ Micah kã no, Ewuradze n’enyi nngye ho dɛ obobu hɛn fɔ, mbom “mbɔbɔrhu na Ɔpɛ” (Micah 7:18). Tsetse no nna Ewuradze n’akwan nye no, na ɔyɛ N’akwan so ndɛ. “Ne nantsew tse dɛ tsetse dze” (Habakkuk 3:6).
Epɛ nwoma yinom hɔn mboboɔdo a, hwɛ “Micah,” “Nahum,” “Habakkuk,” na “Zephaniah” wɔ Kyerɛwsɛm no Kwankyerɛ no mu.
Adwenkyerɛ horow ma Adzesũa wɔ Fie na wɔ Asɔr
Micah 6:1–8
“Ebɛnadze na Ewuradze rohwehwɛ no wɔ wo hɔ?”
Micah to nsa frɛ hɛn dɛ yensusu dza obotum ayɛ tse dɛ “[ebɛba] Ewuradze enyim, na [ebɔ]kotow … ɔsorsor Nyankopɔn no” (Micah 6:6). Ebɛnadze na nyiyimu 6–8 susu ho kyerɛ wo fa dza ohia ma Ewuradze ber a Oker w’abrabɔ?
San so hwɛ Dale G. Renlund, “Yɛ Tsenenee, Dɔ Ehumbɔbɔr, na Enye Nyankopɔn Nnantsew Ahobrɛadze mu,” Liahona, Ɔberɛfɛw 2020, 109-12.
“Ewuradze ye, ɔyɛ akoban wɔ ɔfona da mu” (Nahum 1:7).
Nahum 1
Ewuradze wɔ tum na ɔsan yɛ mbɔbɔrhufo.
Nna Nahum no somdwuma nye dɛ odzi kan kã Nineveh ɔsɛɛ ho asɛm kyerɛ—ewurkadze ahenman Assyria n’ahenkurow, a nna ɔabɔ Israel apetse na oedzi Judah ewu no. Nahum dze Nyankopɔn n’ebufuw na no tum a onnyi kabea ho asɛm hyɛɛ ase, naaso Ɔsanee so kãa Nyankopɔn n’ehumbɔbɔr na ne papayɛ ho asɛm. Hwehwɛ nyiyimu wɔ tsir 1 a ɔboa wo ma etse suban ahorow yinom kor biara—na Nyankopɔn no su horow so a ihu no ase. Ebɛnadze ntsi na edwen dɛ ohia dɛ ihu ndzɛmba yinom mu kor biara fa Ewuradze ho?
Habakkuk
Mubotum atwer Ewuradze ne pɛ na Ne mber.
Ɔtɔfabi a nkɔnhyɛfo mpo wɔ nsɛmbisa fa Ewuradze n’akwan ho. Habakkuk, a ɔtsenaa ase wɔ mber a nna emumuyɛ atserɛw wɔ Judah no, dze nsɛmbisa ma Ewuradze hyɛɛ ne nkyerɛwee ase (hwɛ Habakkuk 1:1–4). Ibesi dɛn bɔbɔ Habakkuk ne haw no tɔw? Ebɛn nsɛmbisa a ɔnye no sɛ na nkorɔfo bisa fa Nyankopɔn ho ndɛ? Ana enya atsenka a ɔnye no sɛ pɛn? Ibotum asan so dze n’asɛmbisa atoto bi so a ɔwɔ kyerɛwsɛm mu ho, tse dɛ dza wohu no wɔ Mark 4:37–38 na Nkyerɛkyerɛ na Ahyɛmudzi 121:1–6 mu no.
Ewuradze buaa Habakkuk ne nsɛmbisa no ber a ɔkãa dɛ Ɔbɔsoma Chaldeefo (Babylonfo no) ma wɔatsẽa Judah (hwɛ Habakkuk 1:5–11). Naaso nna Habakkuk da ho haw, osiandɛ nna ɔyɛ dɛ ɔyɛ nsisi dɛ Ewuradze begyina nkyɛn “mber a nna omumuyɛnyi [Babylon] no remen ɔbarimba tseneneneenyi [Judah] no” (hwɛ nyiyimu 12–17). Ebɛnadze na ihu no wɔ Habakkuk 2:1–4 mu a okenyan wo ma etwer Ewuradze mber a ewɔ nsɛmbisa a wonnyii ano no? (san so hwɛ Mark 4:39–40; Nkyerɛkyerɛ na Ahyɛmudzi 121:7–8; “God Will Lift Us Up” [video], Asɛmpa Nwoma Korabea).
God Will Lift Us Up
Tsir 3 yɛ Habakkuk ne ayɛyi na gyedzi ho mpaabɔ. Habakkuk ne ndze wɔ tsir 3 no si dɛn yɛ soronko fi tsir 1 mu dze no ho? Adwenkyerɛ bi nye yi a ɔbɔboa wo ma adwendwen nyiyimu 17–19ho: Kyerɛw honam mu na sunsum mu ndzɛmba Nyankopɔn dze ehyira wo no nkorkor. Nkyii susu ho dɛ ayew honam mu nhyira no. Ebɛn atsenka na obotum ama enya afa nhyira nkaa no ho? Ebɛnadze ntsi na obotum ayɛ dzen dɛ “ibedzi ehurusi wɔ Ewuradze mu” (nyiyimu 18) wɔ nkõdzen ber mu tse dɛ dza wɔakã ho asɛm wɔ nyiyimu 17 no? Dwendwen mbrɛ ibesi benya gyedzi kɛse nara wɔ Nyankopɔn mu, mpo sɛ ɔyɛ dɛ abrabɔ sisi wo a.
San so hwɛ Gerrit W. Gong, “All Things for Our Good,” Liahona, Esusow Aketseaba 2024, 41–44; “Lead, Kindly Light,” Asɔr Ndwom, nkanee 97; Topics and Questions, “Seeking Answers to Questions,” Asɛmpa Nwoma Korabea.“
Sie abotar. Ɔtɔfabi a nna yɛpɛ hɛn nsɛmbisa ne nyiano hɔnara, naaso sunsum mu nhumu gye mber na wonnkotum ahyɛ no. Dɛ mbrɛ Ewuradze kãa kyerɛɛ Habakkuk no, “Tweɔn, na ɔbɛba ampaara” (Habakkuk 2:3).
Zephaniah
“Hom nhwehwɛ Ewuradze, hom asaase do abrɛfo nyina.”
Ber a ekenkan Zephaniah no nkɔnhyɛsɛm no, hwɛ suban horow na su a ogyaa dze kɔr ɔsɛɛ mu no—hwɛ nkanka Zephaniah 1:4–6, 12; 2:8, 10, 15; 3:1–4. Nkyii hwehwɛ nkorɔfo a Nyankopɔn bɔkora hɔn do no hɔn su—hwɛ Zephaniah 2:1–3; 3:12–13, 18–19. Ebɛn nsɛm na etse nkã dɛ Ewuradze wɔ ma wo wɔ nyiyimu yinom mu?
Zephaniah 3:14-20
Ewuradze nye No nkorɔfo bedzi ehurusi wɔ Zion.
Akenkan Zephaniah 3:14–20 ekyir no, hwɛ akwanhorow pii mu a ibotum dze ewie asɛntɔw yi: “Ma w’enyi ngye na fa w’akoma nyina dzi ehurusi” osiandɛ … Ebɛnadze ntsi na ohia ma wo dɛ ibohu afa siantsir yinom a ɔwɔ dɛ idzi ehurusi ho? Ibotum dze nyiyimu yinom atoto sũahu horow a wɔakã ho asɛm wɔ 3 Nephi 17 mu na adwendwen mbrɛ Jesus Christ n’atsenka tse wɔ No nkorɔfo ho—a ekã ho.
Epɛ bi akã ho a, hwɛ bosoom yi Liahona na For the Strength of Youth dawurbɔ nkrataa mu.
Adwenkyerɛ horow ma Erekyerɛkyerɛ Mbofra
Micah 5:2
Wɔwoo Jesus Christ wɔ Bethlehem.
-
Bia wo mbofra no nnyim dɛ nna ɔyɛ Micah no nkɔnhyɛsɛm na ɔboaa Enyansafo no ma wohun abɔdomaba Jesus wɔ Bethlehem. Edze Micah 5:2 na Matthew 2:1–6 ridzi dwuma no, bia wo mbofra no botum asan ayɛ hɔn sũahu no ho ɔyɛkyerɛ. Nkyii hom botum akã siantsir a nna Jesus n’awoo no hia dodoodow dɛ nna nkɔnhyɛfo nyim ho asɛm mfe pii ansaana Wɔwoo no.
The Holy Child Is Born, Dana Wood yɛɛ nsaano mfonyin no
Nahum 1:7
“Ewuradze ye, ɔyɛ akoban wɔ ɔfona da mu.”
-
Akenkan Nahum 1:7 ekyir no, wo mbofra no botum esi anaa wɔadorɔw “akoban” a ɔnnyɛ dzen anaa abankɛse (ne mfonyin kor wɔ n’apɔwdo n’apɔwdo yi mu). Ebɛn siantsir bi ntsi na nkorɔfo botum ehia abankɛse? Ebɛnadze na ɔma hɛn da yɛ “ɔfona da”? Jesus Christ si dɛn tse dɛ akoban ma hɛn?
Habakkuk 2:3
Nyankopɔn bɛhyɛ n’anohoba horow no mã aber nyina.
-
Ibobue Habakkuk 2:3 enyi no, ɔwo na wo mbofra no botum akã ndzɛmba a ɔyɛ papa gyedɛ yɛatweɔn ewie nko ho asɛm—tse dɛ eduaba a ohia dɛ ɔber anaa mbɔrmon a ohia dɛ wɔtõ. Ebɛnadze na obesi sɛ yɛbɔ mbɔdzen dzi eduaba anaa mbɔrmon ansaana wɔayɛ yie a? Nkyii hom botum akã nkɔnhyɛnyi Habakkuk, a nna ɔpɛ dɛ ohu mber a Ewuradze bɛma emumuyɛdze wɔ wiadze mu egyaa ho asɛm. Kenkan Ewuradze ne nyiano wɔ Habakkuk 2:3 mu. Ibotum aboa wo mbofra ma wɔadwen ndzɛmba a Nyankopɔn abɔ ho anohoba ho. Mfatoho kor biara no, hom botum abɔ mu akã dɛ, “Tweɔn; na ɔbɛba ampaara.”
Habakkuk 2:14
Mubotum aboa dze Jesus Christ no ho nyimdze ahyɛ asaase do mã.
-
Ebɛkyerɛ Habakkuk 2:14 no, ɔwo na wo mbofra no botum dze mfonyin anaa nkasafua a ogyina hɔ ma ndzɛmba Jesus yɛe anaa ɔkyerɛkyerɛɛ ahyɛ bɔdambɔ anaa kyɛnse bi mã. Yebesi dɛn botum aboa ma yɛdze Ewuradze no ho nyimdzee ahyɛ wiadze no mã?
-
Ibotum asan so dze wiadze mfonyin akyerɛ wo mbofra no (hwɛ Church History Maps, nkanee 7, “Map of the World”). Boa hɔn ma wɔnhwehwɛ bea a wɔtse na mbeambea a asɛmpasomafo a wonyim hɔn no asom wɔ. Hom botum so abɔ mu atow ndwom a ɔfa erekyɛ asɛmpa no ho, tse dɛ “We’ll Bring the World His Truth” (Children’s Songbook, 172–73). Ebɛn asɛm na yebotum akã akyerɛ binom fa Jesus Christ ho ?
Zephaniah 3:14-20
Jesus Christ nye hɔn a wɔkã No do no dzi ehurusi.
-
Zephaniah 3:14–20 mu no, wo mbofra no botum ahwehwɛ biribi a ɔma wɔpɛ dɛ “[wɔ]tow ndwom, … [ɔ]ma [hɔn] enyi ngye na [wɔdze hɔn] akoma nyina dzi ehurusi.” Ibia hom botum abɔ mu atow asɔr ndwom a ɔyɛ enyigye anaa ndwom bi na wɔakã enyigye a wonya no wɔ Jesus Christ n’asɛmpa mu ho asɛm.
Epɛ bi akã ho a, hwɛ bosoom yi Friend dawurbɔ krataa mu.