Come, Follow Me
Mumu 21–27. “Yɛatweɔn No, na Ɔbɛgye Hɛn Nkwa”: Borɔnya

“Mumu 21–27. ‘Yɛatweɔn No, na Ɔbɛgye Hɛn Nkwa’: Borɔnya,” Bra, Bɛka Mo Do—Dze Ma Fie na Asɔr: Ahyɛmu Dadaw 2026 (2026)

“Mumu 21–27. ‘Yɛatweɔn No, na Ɔbɛgye Hɛn Nkwa,” Bra Bɛka Mo Do: Ahyɛmu Dadaw 2026

Abɔdomaba Jesus a ɔada

Na Wɔawo Ɔba Ama Hɛn, Simon Dewey yɛɛ nsaano mfonyin no

Mumu 21–27: “Yɛatweɔn No, na Ɔbɛgye Hɛn Nkwa”

Borɔnya

Ahyɛmu Dadaw no wɔ enyiber ɔtweɔn ho sunsum. Dɛm kwan mu no, ɔnye Borɔnya ber sɛ kakra. Ɔdze Adam na Eve hyɛ ase no, Ahyɛmu Dadaw patriarchfo, nkɔnhyɛfo, awensɛm kyerɛwfo, na nkorɔfo no hwɛɛ nda apapa kwan, a enyidado ahyɛ mu mã ma Messiah no ne nkenyan na ɔgye. Na ɔtaa dɛ nna Isarelfo no hia dɛm enyidado no—sɛ nna wɔwɔ ndɔmmum mu wɔ Egypt anaa Babylon anaa hɔnara hɔn bɔn anaa etuatsew afa hɔn ndɔmmum o. Ne nyinara mu no, nkɔnhyɛfo bɔɔ hɔn nkaa dɛ Messiah bi, Ɔgyefo bi, bɛba “[a]bɔbɔ fahodzi dawur [a]kyerɛ ndɔmmumfo” (Isaiah 61:1).

Dɛm enyidado no hyɛɛ ase dɛ ɔreba mu mber a wɔwoo Jesus Christ wɔ Bethlehem. Wɔwoo Israel Ɔgyefo kɛse no wɔ beebi a mbowa da na wɔdze no too mbowa edzidzidaka mu (hwɛ Luke 2:7). Eso nna Ɔnyɛ tsetse Israelfo no hɔn Ɔgyefo ara. Ɔbae bɛgyee wo—dɛ ɔasɔw wo yaw, ɔabɔsoa w’awerɛhow, woepira no wɔ wo mbrato ntsi, ama wɔdze Ne mbaa ano etum asa wo yarba (hwɛ Isaiah 53:4–5). Iyi nye siantsir a enyigye ɔtweɔn hyɛ Borɔnya mã dodoodow mpo besi ndɛ. Messiah no baa mfe 2,000 a abasen kɔ no, na Ɔda ho ba hɛn abrabɔ mu mber biara a yɛhwehwɛ No no.

adzesũa sɛnkyerɛdze

Adwenkyerɛ horow ma Adzesũa wɔ Fie na wɔ Asɔr

seminary sɛnkyerɛdze
Midzi ehurusi wɔ mo Pomfo mu.

Yenyim Borɔnya dɛ ɔyɛ enyigye ber osian enyigye a Jesus Christ dze ba wiadze no ntsi. Mfeha mfeha ansaana wɔwoo Agyenkwa no, Ahyɛmu Dadaw nkɔnhyɛfo no so tsee enyigye dɛmara ber a wɔkãa Messiah a ɔreba no ho asɛm no. Kenkan nsɛnsin a odzi do no bi, na dwen siantsir a nkyɛ wɔbɔsom bo ama nkorɔfo a nna wɔrohwɛ Agyenkwa no no somdwuma enyi kwan ho asɛm: Ndwom 35:9; Isaiah 25:8–9; 44:21–24; 51:11; Zephaniah 3:14–20; Moses 5:5–11. Ebɛnadze ntsi na nsɛnsin yinom som bo ma wo? Siantsir bɛn na kyerɛwsɛm yinom dze ma ma ɔyɛ enyigye?

San so hwɛ Dallin H. Oaks, “Good Tidings of Great Joy” (First Presidency Christmas devotional, Mumu 4, 2022), Asɛmpa Nwoma Korabea; “Joy to the World,” Asɔr Ndwom, nkanee 201.

nworaba hyɛɛn wɔ anafua wimu

Sɛnkyerɛdze botum aboa me ma maakaa Jesus Christ.

Amambra pii a ɔbata Borɔnya ho no botum enya sɛnkyerɛdze nkyerɛase a ɔkyerɛ hɛn kɔ Christ nkyɛn. Ber a isũaa Ahyɛmu Dadaw afe yi no, bia ebohu Agyenkwa no no ho sɛnkyerɛdze pii. Wɔakyerɛw kakra wɔ ase ha. Hwɛ dɛ ibosũa iyinom na akyerɛw dza wɔkyerɛkyerɛ wo fa No ho no.

  • Nworaba (Nkanee 24:17; Matthew 2:2; Nyikyerɛ 22:16).

  • Oguanhwɛfo (Ndwom 23; Luke 15:4–7; John 10:11)

  • Eguambaa (Genesis 22:8; Exodus 12:5; 1 Peter 1:18–20).

  • Nsu (Exodus 17:1–6; Jeremiah 2:13; Ezekiel 47:1–12; John 4:7–14).

  • Ɔbotan (1 Samuel 2:2; 2 Samuel 22:2–3; Ndwom 118:22–23; Isaiah 28:16; Ephesusfo 2:20).

  • Nkorbata (Isaiah 11:1–2; Jeremiah 23:5; 33:15).

  • Kan (Ndwom 27:1; Isaiah 9:2; 60:19; Micah 7:8; John 8:12).

Ebɛn nsɛnkyerɛdze bi so, nsɛnsin, na nsɛm na ehu wɔ kyerɛwsɛm mu a ɔgye Jesus Christ ho dase?

San so hwɛ 2 Nephi 11:4; Mosiah 3:14–15; Moses 6:63; “Types or Symbols of Christ” na “Jesus Christ,” beenu no nyina wɔ Kyerɛwsɛm no Kwankyerɛ no mu (Asɛmpa Nwoma Korabea).

“Wɔbɛfrɛ No Ɔwanwanyi.”

Edzin na nsabran asorɔtow pii na wɔdze frɛ Jesus Christ. Hwehwɛ nsabran wɔ nyiyimu a odzi do no mu: Ndwom 23:1; 83:18; Isaiah 7:14; 9:6; 12:2; 63:16; Amos 4:13; Zechariah 14:16; Moses 7:53. Ebɛn nsabran bi so na ibotum adwen ho? W’enyi mpo botum agye dɛ ebɛkyerɛw Jesus Christ ho nsabran a ihu no wɔ Borɔnya asɔr ndwom mu no nkorkor. Nsabran kor biara si dɛn nya nhyɛdo wɔ kwan a edwen fa no ho no do?

Hwɛ dɛ ibeyi Agyenkwa no ne nsabran anaa n’asɛdze bi a ɔbɔboa wo ma akaa No wɔ afe a ɔreba no nyina mu.

San so hwɛ Quentin L. Cook, “Personal Peace in Challenging Times,” Liahona, Ɔberɛfɛw. 2021, 89–92; “Hark! The Herald Angels Sing,” Asɔr Ndwom, naknee 209.

Epɛ bi akã ho a, hwɛ bosoom yi Liahona na For the Strength of Youth dawurbɔ nkrataa mu.

mbofra ɔfã sɛnkyerɛdze

Adwenkyerɛ horow ma Erekyerɛkyerɛ Mbofra

Ahyɛmu Dadaw no kyerɛkyerɛ me Jesus ho asɛm.

  • Ɔwo na wo mbofra no wɔ Borɔnya afɛɛfɛdze a wobotum dze edzi dwuma ahyɛ nkɔmbɔdzi fa Jesus Christ ho asɛm ase. Bia hom botum akã mbrɛ Borɔnya nworaba, kandzea, anaa akyɛdze bi si bɔ hɛn Agyenkwa no ho nkaa ho asɛm. Nkyii hom botum ahwehwɛ kyerɛwsɛm a odzi do no kor anaa ebien mu dze enya biribi a obotum ayɛ Jesus Christ ho sɛnkyerɛdze: Genesis 22:8; Nkanee 24:17; Ndwom 23:1; 27:1. Bia wo mbofra no botum esuo mfonyin anaa afɛɛfɛdze bi a ɔnye nyiyimu kor biara a wɔkenkan no nam mu wɔ sor. Jesus si dɛn yɛ tse dɛ eguambaa, oguanhwɛfo, anaa kan? Hwɛ dɛ hom bɔbɔ mu atow Borɔnya ndwom bi tse dɛ “Stars Were Gleaming” (Children’s Songbook, 37).

  • Ibotum asan so ahwɛ mfonyin a ɔwɔ n’apɔwdo n’apɔwdo yi n’ekyir no ber a ekenkan Isaiah 9:6 kyerɛ hɔn. Bisa wo mbofra ma wɔntsen hɔn nsa wɔ abɔdomaba Jesus do sɛ wɔtse asɛnsin no “wɔawo ɔba” a. Gye wo dasee dɛ nna nkɔnhyɛfo a wɔwɔ Ahyɛmu Dadaw mu no nyim dɛ wɔbɔwo Jesus.

  • Ber a eyɛ ahoboa dɛ ibosũa Jesus Christ n’abrabɔ ho asɛm wɔ Ahyɛmu Fofor mu afe a ɔtoa do no no, hwɛ dɛ enye wo mbofra no bɔbobɔ dza woesũa afa No ho no do afe yi mu wɔ Ahyɛmu Dadaw mu no. Ibotum abobɔ n’apɔwdo n’apɔwdo a wɔwɔ adzesũa mboa yi mu no na ankoankor adzesũa nkyerɛwee biara ɔboa wo ma ekaa dza esũa no. Mbofra nkakramba botum enya mu mfaso ber a wɔrohwɛ Old Testament Stories mu anaa mfonyin a ɔwɔ Bra, Bɛka Mo Do mu. Ebɛn nkɔnhyɛsɛm anaa nsɛm na ɔda edzi? Ebɛnadze na yeesũa afa Agyenkwa no ho?

Borɔnya amambra botum akyerɛ hɛn akɔ Jesus Christ hɔ.

  • Nna Israel ebusua ebusua wɔ amambra, tse dɛ Apaho na afahyɛ binom so, a nna botae no nye dɛ ɔkyerɛ hɔn akoma na adwen kɔ Ewuradze hɔ (hwɛ Exodus 12). Ebɛn amambra bi so na ɔwo na wo mbofra dzi no Borɔnya ber a ɔboa hom ma hom tsim Jesus Christ do? Ebɛn amambra na inyim ho asɛm fi w’ebusua abakɔsɛm mu? Ibotum nye wo mbofra no apɛnsampɛnsa amambra bi a epɛ dɛ ehyɛ ase mu. Adwenkyerɛ bi botum akã ho dɛ erosom obi a ɔwɔ hia mu, eresan mu eyi biribi a edze bɛma dɛ “akyɛdze” ma Agyenkwa no, eroto nsa afrɛ nyɛnko bi ma ɔnye wo ahwɛ President a Odzi Kan na n’Apamfo hɔn Borɔnya mpaabɔsom (broadcasts.ChurchofJesusChrist.org), ebɛkyerɛw woara wo Borɔnya ndwom, anaa ebɔhwehwɛ biribi ayɛ dze akyɛ Christ n’awoo ho asɛm.

Fie mu no, adzesũa na abrabɔ wɔnntsetsew mu. “Kyerɛwsɛm no ho ba hia wɔ fie ntsɛmara. Hɔ no nkorɔfo a enye hɔn rusũa asɛmpa no nye nkorɔfo no a enye hɔn bɔbɔ ho bra—dabiara. Nokwar, mber dodowara no, yɛdze asɛmpa no robɔ bra no nye mbrɛ yesi sũa asɛmpa no. Ntsi no ber a isũa na ekyerɛkyerɛ asɛmpa no wɔ fie no, hwehwɛ akwanhorow a edze dza irusũa no bɛkã dza ereyɛ no ho. Wo fie no, ma asɛmpa a no nyɛ biribi a eper dɛ edze bɔbɔ bra, nnyɛ biribi a ekã ho asɛm ara” (Teaching in the Savior’s Way, 31).

Jesus Christ N’awoe ho mfonyin

Jesus N’Awoe No, Ethan Brown yɛɛ nsaano mfonyin no

Ɔsor Egya dze Ne Ba akyɛdze maa me dɛ ɔmbɛyɛ m’Agyenkwa.

  • Ibesi dɛn botum aboa wo mbofra ma wɔatse Christ n’awoe ho obu na enyigye nkã? Hom botum ahwɛ video “The Christ Child” no (Asɛmpa Nwoma Korabea) anaa wɔabɔ mu akenkan Matthew 1:18–25; 2:1–12; Luke 1:26–38; 2:1–20. Abofra kor biara botum asan mu eyi nyimpa kor fi video anaa kyerɛwsɛm asɛm no mu na ɔakã mbrɛ dɛm nyimpa no n’atsenka fa Agyenkwa no ho si tse. Nkyii hom botum nye homho akyɛ hom ankasa hom atsenka fa No ho ho.

    17:57

    The Christ Child

  • Bia ɔwo na wo mbofra botum akã akyɛdze a edze ama anaa enya mfe a wɔabasen kɔ a ɔdze enyigye abrɛ wo ho asɛm. Nkyii hom botum abɔ mu akenkan Isaiah 25:9 na wɔakã siantsir a idzi ehurusi dɛ Ɔsor Egya maa hɛn Agyenkwa ho asɛm. Ebɔboa wo mbofra ma wɔatse Jesus Christ n’asɛdze ase yie dɛ hɛn Agyenkwa no, to nsa frɛ hɔn ma wɔnkenkan Isaiah 25:8–9; 53:3–5; na Hosea 13:14. Ebɛnadze na kyerɛwsɛm yinom kyerɛkyerɛ hɛn fa mbrɛ Ewuradze si gye hɛn ho?

  • Hom botum asan so abɔ mu atow Borɔnya ndwom tse dɛ “Away in a Manger” (Children’s Songbook, 42-43) anaa “O Little Town of Bethlehem” (Asɔr Ndwom, nkanee 208). Boa wo mbofra ma wɔnhwehwɛ nsɛnsin wɔ ndwom no mu a ɔboa hɔn ma wohu dɛ Ɔsor Egya na Jesus Christ dɔ hɔn.

Epɛ bi akã ho a, hwɛ bosoom yi Friend dawurbɔ krataa mu.

Jesus Christ N’awoe

The Nativity, N. C. Wyeth yɛɛ nsaano mfonyin no

Primary dwumadzi krataafa: Ahyɛmu Dadaw no kyerɛkyerɛ me Jesus ho asɛm.