Ma Awofo—Irisiesie Wo Mbofra ma Abrabɔ Mber Nyina wɔ Nyankopɔn N’Ahyɛmu Anamɔnkwan no do

Nephi kyerɛkyerɛɛ dɛ “abow kor a ɔsɛ dɛ [yɛdze] hɛn” ahyɛmu anamɔnkwan mu no “nye nnuho na nsu mu enuma” (2 Nephi 31:17). Wo mbɔdzembɔ dɛ ebɔboa wo mbofra ma wɔayɛ ahoboa ama enuma na pisi no botum dze hɔn anan etsim dɛm anamɔnkwan no do yie. Mbɔdzembɔ yinom hyɛ ase ber a erekyerɛkyerɛ gyedzi wɔ Jesus Christ mu na nnuhu ho nsɛm. Erekyerɛkyerɛ mbrɛ yesi kenyan hɛn enuma ahyɛmudzi ber a yedzi sacrament no dapɛn biara no kã ho.

Adzesũa ho mboa a obotum aboa wo nye yi: 2 Nephi 31; Friend dawurbɔ krataa soronko dze a ɔkã enuma ho nsɛm; Topics and Questions, “Baptism,” Asɛmpa Nwoma Korabea.

• Ber biara a inya sũahu bi a ɔhyɛ wo gyedzi wɔ Ɔsor Egya na Jesus Christ mu dzen no, enye w’abofra no nkyɛ. Boa hɔn ma wɔntse ase dɛ gyedzi yɛ biribi a obotum akɔ do enyin ahyɛ dzen wɔ w’abrabɔ mu nyina. Ebɛn ndzɛmba binom na w’abofra botum ayɛ dze enya gyedzi a ɔyɛ dzen wɔ Jesus Christ mu ana woenuma no?

• Sɛ w’abofra yɛ nsanmuyi a omuo a, kasa fa nnuho akyɛdze ho enyigye mu ara. Na sɛ eyɛ nsanmuyi a omuo a, kyɛ enyigye a ɔba ber a inu woho wɔ wo bɔn ho da biara no. Gye dase dɛ osian dɛ Jesus Christ hun amandze na Owui maa hɛn bɔn ntsi, yebotum enu hɛnho daa daa, na yeenya tum dze asesã. Sɛ w’abofra hwehwɛ wo bɔnfakyɛ a, fa kyɛ kwa na enyigye mu ara.

• Kã w’enuma ho nsɛm kyerɛ w’abofra. Fa mfonyin horow kyerɛ na kyɛ wo nkaadze. Kã atsenkã a inyae ho nsɛm, mbrɛ irisie wo enuma ahyɛmudzi no aboa wo ma ehu Jesus Christ yie, na mbrɛ w’ahyɛmudzi no kɔ do hyira w’abrabɔ. Hyɛ wo mbofra no nkuran ma wombisa nsɛmbisa.

• Sɛ wɔreyɛ enuma wɔ w’ebusua anaa wo ward mu a, enye w’abofra no nkɔ nkɔhwɛ. Hom mbɔ mu nkasa mfa dza ɔwo na w’abofra no hunii na wɔtsee ho nkã. Sɛ ɔbɛyɛ yie a, enye nyimpa a worunuma no no nkasa na bisa nsɛmbisa tse dɛ dza odzi do yinom: “Isii dɛn bɔɔ adwenpɔw yi? Isii dɛn yɛɛ ahoboa?”

• Ber biara a ibohu dɛ w’abofra reyɛ biribi a ɔbɔɔ ho anohoba dɛ ɔbɛyɛ no, kamfo no nokwar mu ara. Kyerɛ ma onhu dɛ yerisie dza yɛahyɛ dɛ yɛbɛyɛ no boa hɛn ma yɛyɛ ahoboa dɛ yebesie ahyɛmudzi a yɛyɛ ber a wonuma hɛn no. Ebɛnadze na yɛbɔ ho anohoba ma Nyame ber a wonuma hɛn no? Ebɛnadze na Ɔdze bɔ hɛn anohoba? (Hwɛ Mosiah 18:8–10, 13.)

• Kã mbrɛ woesi wo pi na abɛyɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo asɔrba esi ehyira wo ho nsɛm. Mfatoho, erosom binom na binom rosom wo no esi dɛn ama aabɛn Ɔsor Egya na Jesus Christ ara yie? Boa w’abofra no ma ɔnndwen akwan horow a ɔdze bɔsom na ɔahyɛ binom dzen dɛ ɔyɛ Asɔrba. Boa hɔn so ma wɔntse na wonhu enyigye a ofi som mu ba.

• Sɛ ɔwo na w’abofra no bɔ mu nya sunsum sũahu bi (tse dɛ wɔ asɔrfi, ber a wɔbɔ mu kenkan kyerɛwsɛm no, anaa ber a wɔrosom obi), kã sunsum mu atsenka anaa nkenyan biara a ewɔ no ho asɛm. Ma w’abofra no nkyɛ n’atsenkã. Hyɛ akwan ahorow a Sunsum no botum nye nkorɔfo akasa no nsew, a kwan a Ɔnye ɔwo wankasa kasa kã ho. Boa w’abofra ma onhu na ɔnkyɛ mber a bia orinya Sunsum Krɔnkrɔn ne nhyɛdo ho sũahu.

• Hom mbɔ mu nhwɛ video kakra ara yie wɔ Asɛmpa Nwoma Korabea mboano mu a ne dzin dze “Hear Him!” Hom mbɔ mu nkasa mfa akwan horow a Ewuradze n’asomfo fa do tse Ne ndze. Ma w’abofra no ndorɔw mfonyin anaa ɔnyɛ video wɔ mbrɛ osi tse Agyenkwa no Ne ndze ho.

• Ma sacrament no nyɛ enyigye mber na krɔnkrɔn mber wɔ w’ebusua mu. Enye w’abofra no nkyɛ mbrɛ isi tsim wɔ Jesus Christ do sacrament ber mu no. Boa w’abofra no ma ɔnyɛ nhyehyɛɛ bi mfa nkyerɛ dɛ sacrament no yɛ krɔnkrɔn ma no. Mfatoho, yeritsie sacrament mpaabɔ mu nsɛmfua no botum aboa hɛn ma yɛakaa hɛn enuma ahyɛmudzi no.

• Friend dawurbɔ nkrataa pii a wɔdze epue gua do no wɔ nsɛm, kodzisɛm, na dwumadzi horow a ɔboa mbofra ma wɔyɛ ahoboa ma enuma na pisi. Ma w’abofra nsan mu inyi binom ma hom nkenkan na ɔnye wo inya ho enyigye. (Hwɛ collection “Preparing for Baptism” no wɔ Asɛmpa Nwoma Korabea mbofra ɔfã so.)

Asɔfodzi no nye tumdzi na tum a Nyankopɔn dze hyira Ne mba. Nyankopɔn N’asɔfodzi no wɔ asaase do ndɛ wɔ Jesus Christ N’asɔr a ɔwɔ hɔ ma Nda a Odzi Ekyir Ahotseweefo no mu. “Asɔrmba nyinara a wosie hɔn ahyɛmudzi no—mbaa, mbanyin na mbofra—wɔdze Nyankopɔn n’asɔfodzi tum no hyira hɔn wɔ hɔn efiefi dze ahyɛ hɔnho na hɔn ebusua ebusua dzen” (General Handbook: Serving in The Church of Jesus Christ of Latter-day Saints, 3.6, Asɛmpa Nwoma Korabea). Tum yi bɔboa asɔrmba wɔ Nyame no nkwagye na nkwagye ntowdo edwuma ho wɔ hɔn ankorankor abrabɔ na hɔn ebusua ebusua mu (hwɛ General Handbook, 2.2).

Sɛ mbanyin na mbaa som wɔ Asɔr ɔfrɛ horow mu a, wɔdze asɔfodzi tumdzi yɛ, wɔ hɔn a wokitsa asɔfodzi nsaafee no hɔn kwankyerɛ ase. Ɔsor Egya Ne mba nyinara—Ne mbabanyin na Ne mbabaa—wobehyira hɔn ber a wɔba bɛtse N’asɔfodzi no ase yie.

Ɔnam asɔfodzi tumdzi do na yegye ayɛdze horow. “Asɔrmba mbanyin a wɔfata dua asɔfodzi a wɔdze ma na asɔfohyɛ kɔ asɔfodzi dzibew do dze gye asɔfodzi tumdzi” (General Handbook, 3.4). Hɔn a wokitsa asɔfodzi dzibew horow no obi a okitsa asɔfodzi nsaafee a wɔdze yɛ asɔfodzi ayɛdze horow no botum ama hɔn kwan.

Ama eesũa asɔfodzi ho nsɛm bi akã ho no, hwɛ Russell M. Nelson, “Spiritual Treasures,” Liahona, Ɔberɛfɛw 2019, 76–79; Russell M. Nelson, “The Price of Priesthood Power,” Liahona, Esusow Aketseaba 2016, 66–69; “Priesthood Principles,” tsir 3 wɔ General Handbook mu.

• Ma asɔfodzi ayɛdze horow no nkã w’ebusua abrabɔ ho aber nyina. Mfatoho, boa w’abofra ma ɔnyɛ sunsum mu ahosiesie nkɔ sacrament dapɛn biara. Hyɛ w’abofra nkuran ma ɔnhwehwɛ asɔfodzi nhyira ber a ɔyar anaa ohia awerɛkyekye anaa kwankyerɛ. Ma ɔnyɛ wo suban dɛ ebɛkyerɛ akwan a Ewuradze rudua No tum do dze rihyira w’ebusua.

• Ber a hom bɔ mu kenkan kyerɛwsɛm no, hwehwɛ akwan horow a edze bɛpɛnsampɛnsa mbrɛ Nyame si dua No tum do dze hyira nkorɔfo mu mu. Kyɛ wankasa wo sũahu horow wɔ ber a Nyankopɔn edua N’asɔfodzi do ehyira wo. Epɛ nhyira a yedua asɔfodzi mu yenya fi Nyankopɔn hɔ ho mfatoho a, hwɛ General Handbook, 3.2, 3.5.

• Kyerɛkyerɛ w’abofra dɛ enuma ekyir no, obotum enya asɔfodzi no tum ber a osie enuma ahyɛmudzi no. Hom mbɔ mu mbobɔ President Russell M. Nelson n’asɛm “Spiritual Treasures” do (Liahona, Ɔberɛfɛw 2019, 76–79). Kã kyerɛ w’abofra no mbrɛ asɔfodzi ayɛdze horow esi dze Nyankopɔn no tum aba w’abrabɔ mu. Epɛ akwan binom a wɔakyerɛw no nkorkor a Nyankopɔn no tum si hyira hɛn a, hwɛ General Handbook, 3.5.

• Hom mpɛnsampɛnsa asɛmbisa no “Ewuradze n’akowaa no tse dɛn?” mu. Hom mbɔ mu nkenkan Nkyerɛkyerɛ na Ahyɛmudzi 121:36–42, na hom nhwehwɛ nyiano no. Ber biara a ehyɛ no nsew dɛ w’abofra (anaa obi fofor) dze fapem anaa su yi a ɔwɔ nyiyimu yinom mu robɔ bra no, da no edzi.

• Sɛ ɔwo anaa w’abofra dze nsaafee bue abow anaa wɔdze kenyan hɛn a, fa mber kakra ara fa dɛm nsaafee no toto nsaafee no a asɔfodzi baanodzifo kitsa no ho. (Ama eehu asɔfodzi nsaafee ne nkyerɛase no, hwɛ General Handbook, 3.4.1). Ebɛnadze na asɔfodzi nsaafee “bue” anaa “okenyan” ma hɛn? Hwɛ Gary E. Stevenson, “Where Are the Keys and Authority of the Priesthood?,’’ Liahona, Esusow Aketseaba 2016, 29–32; “Where Are the Keys?” (video), Asɛmpa Nwoma Korabea so.

  

  2:51

Temple horow kã Ɔsor Egya Ne nhyehyɛɛ ma Ne mba ho. Ewuradze ne fie mu no, yɛnye Ɔsor Egya dzi ahyɛmu krɔnkrɔn ber a yɛyɛ ayɛdze krɔnkrɔn horow, a ne nyina tsen kɔ Jesus Christ do. Ɔsor Egya ama kwan a Ne mba nyina botum edzi ahyɛmu horow na wɔayɛ ayɛdze krɔnkrɔn, a nkorɔfo a wɔanngye no wɔ abrabɔ yi mu kã ho. Afe n’ahyɛse a w’abofra bedzi mfe 12, nna ɔasõ dɛ wonuma na wosi no pi wɔ temple mu ma ewuakɔr (hwɛ 1 Corinthfo 15:29 so).

• Hom ntaa nkɔ Ewuradze ne fie dɛ mbrɛ hom gyinabew bɛma ho kwan. Kasa kyerɛ w’abofra fa siantsir a erokɔ na mbrɛ temple no si boa wo ma inya atsenka dɛ abɛn Ɔsor Egya na Jesus Christ ara yie.

• Bobɔ do na hom mbɔmu mpɛnsampɛnsa temple recommend nsɛmbisa no mu. Ibotum ehu no wɔ krataafa 36–37 wɔ For the Strength of Youth: A Guide for Making Choices mu. Enye w’abofra nkasa mfa dza ɔkɔ do wɔ temple recommend mpɛnsampɛnsamu mu. Kyɛ siantsir a ewɔ temple recommend no hia kɛse ma wo no.

• Hom mbɔ mu nkenkan Malachi 4:6. Kasa fa mbrɛ hom akoma besi botum adan akɔ hom ewuakɔr do. Hom mbɔ mu nhwehwɛ ebusua abakɔsɛm mu mfa nsũa hom ewuakɔr ho nsɛm bi nkã ho wɔ FamilySearch.org. Hom nhwehwɛ ewuakɔr a ohia dɛ wonuma na wosi hɔn pi. Ward temple ebusua abakɔsɛm boafo bi botum aboa wo.

• Hom mbɔ mu mbobɔ dza ɔboa adzesũa a ɔwɔ mboano a ne tsir dze “Temple” wɔ Asɛmpa Nwoma Korabea mbofra ɔfã mu no do. (San so hwɛ “Preparing Your Child for Temple Baptisms and Confirmations” wɔ ChurchofJesusChrist.org do.)

Patriarch nhyira botum ayɛ kwankyerɛ, awerɛkyekyer, na nkenyan fibea. Ankorankor afotu ma hɛn a ofi Ɔsor Egya hɔ wɔ mu na ɔboa hɛn ma yɛtse hɛn onnyiewiei su na botae ase. Boa w’abofra ma ɔnyɛ ahoboa mfa ngye patriarch nhyira ber a erekyerɛkyerɛ hɔn patriarch nhyira no ho mfaso na no krɔnkrɔn su ho asɛm.

Epɛ dɛ isũa no yie a, hwɛ Topics and Questions, “Patriarchal Blessings,” Asɛmpa Nwoma Korabea.

• Enye w’abofra nkyɛ ɔwoara eregye patriarch nhyira ho sũahu. Ibotum akyɛ ndzɛmba tse dɛ mbrɛ isii yɛɛ ahoboa dɛ ebɛgye, mbrɛ woesi aboa wo ma aabɛn Nyankopɔn yie, na mbrɛ Ɔkɔ do dua nhyira yi do ma wo kwankyerɛ. Ibotum so ama w’abofra no nye ebusua mu mba binom a wɔagye hɔn patriarch nhyira no akasa.

• Hom mbɔ mu mbobɔ Elder Randall K. Bennett’s ne kasaa Your Patriarchal Blessing—Inspired Direction from Heavenly Father na Elder Kazuhiko Yamashita ne kasaa “When to Receive Your Patriarchal Blessing do” (Liahona, Esusow Aketseaba 2023, 42–43, 88–90). Hom nye homho nkyɛ dza hom esũa fi nsɛm yinom mu a ɔfa siantsir a Ɔsor Egya pɛ dɛ yɛgye patriarch nhyira ho. Ama eesũa kwan a wɔfa do gye patriarch nhyira no, hwɛ General Handbook, 18.17.

• Sɛ ewɔ ewuakɔr a wɔgyee hɔn patriarch nhyira a, bia ɔbɛyɛ nkenyan dɛ enye w’abofra no bɛkenkan no mu bi. Ama ebisa ewuakɔr hɔn nhyira no, hɛn mu wɔ ChurchofJesusChrist.org, click Tools a ɔwɔ screen no sor enyimfa no, na yi Patriarchal Blessing [Patriarch Nhyira].

• W’abofra agye ne patriarch nhyira ekyir no, to nsa frɛ ebusua mu ba biara a ɔwɔ hɔ no ma ɔnkyerɛw n’atsenkã na ɔnye w’abofra no nkyɛ.

Nyankopɔn pɛ dɛ Ɔdze “tum a ofi sor” kyɛ, anaa Ɔdze hyira, Ne mba nyina (Nkyerɛkyerɛ na Ahyɛmudzi 95:8). Yɛkɔ temple kɛgye hɛnankasa hɛn endowment mpɛn kor pɛr, mbom ahyɛmu a yɛnye Nyankopɔn dzi na sunsum nhyira a Ɔdze ma hɛn no dɛ ɔkã endowment no ho no, botum ehyira hɛn da biara wɔ hɛn abrabɔ mu.

• Fa temple mfonyin san wo fie. Kã atsenka a inya wɔ Ewuradze fie ho sũahu kyerɛ w’abofra. Taa kasa fa wo dɔ ma Ewuradze na Ne fie na ahyɛmudzi a edzi no wɔ hɔ ho. Hwehwɛ akwan horow a enye w’abofra no bɔkɔ temple akɛyɛ enuma na pisi ama hom ewuakɔr.

• Hom mbɔ mu nhwehwɛ temples. ChurchofJesusChrist.org mu. Hom mbɔ mu nkenkan nkyerɛwee tse dɛ “About the Temple Endowment” na “Prepare for the House of the Lord.” Ma w’abofra no mbisa nsɛmbisa biara a ɔwɔ fa temple ho. Ama eenya kwankyerɛ wɔ dza ibotum akã no temple abowano no, hwɛ Elder David A. Bednar n’asɛm no “Prepared to Obtain Every Needful Thing” (Liahona, Esusow Aketseaba 2019, 101–4; hwɛ nkanka ɔfã no a ne tsir yɛ “Home-Centered and Church-Supported Learning and Temple Preparation”).

• Ber a ɔwo na w’abofra yɛ ayɛdze binom so anaa wɔhwɛ bi (tse dɛ sacrament anaa ayarsa nhyira) no, hom mfa mber kakra mpɛnsampɛnsa ngyinahɔmadze a ɔwɔ ayɛdze no mu mu. Ebɛnadze na ngyinahɔmadze no gyina hɔ ma? Wosi dɛn gye Jesus Chirst ho dase? Iyi botum aboa w’abofra ma ɔayɛ ahoboa adwendwen temple ayɛdze ne ngyinahɔmadze ho ntseasee ho, a no so gye Jesus Christ ho dase.

• Boa w’abofra no ma ɔnhyɛ no nsew mbrɛ worisie enuma ahyɛmu no a wɔakã ho asɛm wɔ Mosiah 18:8–10, 13 (san so hwɛ nyiyimu 8–9, a ɔkã dɛm ahyɛmudzi n’aba ho asɛm). Boa w’abofra no so ma ɔnhyɛ no nsew mbrɛ Ewuradze rihyira hɔn. Hyɛ w’abofra no n’awerɛhyɛmu dzen dɛ obotum esie ahyɛmudzi no.

• Taa bue w’akoma mu na enye no nkasa mfa mbrɛ wo temple ahyɛmudzi ma wo kwankyerɛ wɔ wo nsanmuyi ho na ɔboa wo ma ebɛn Jesus Christ yie. Ibotum edze General Handbook, 27.2, abobɔ ahyɛmu a yedzi no wɔ temple mu no do. Sɛ agye wo endowment a, kã kyerɛ wo mbofra mbrɛ temple garment no si boa wo ma ekaa w’ahyɛmudzi a enye Jesus Christ edzi no (hwɛ “Sacred Temple Clothing” [video], Asɛmpa Nwoma Korabea; Anette J. Dennis, “Put Ye On the Lord Jesus Christ,” Liahona, Esusow Aketseaba 2024, 10–13).

  

  4:12

Elder David A. Bednar kyerɛkyerɛɛ dɛ: “Adze kor a ohia papaapa a ibotum ayɛ dze ayɛ ahoboa ma asɛmpakã dwuma ho ɔfrɛ nye ebɛyɛ asɛmpasomafo koraa ansaana akɔ asɛmpakã. … Asɛm a ohia no nnyɛ erokɔ asɛmpakã, mbom, asɛm a ohia nye yɛbɛyɛ asɛmpasomafo na yɛrosom hɛn abrabɔ nyina mu a yɛdze hɛn akoma, ahom, adwen, na ahoɔdzen. … Hom reyɛ ahoboa ama abrabɔ nyina mu asɛmpasomafo edwuma” (“Becoming a Missionary,” Liahona, Ɔberɛfɛw 2005, 45–46). Sũahu horow a w’abofra no nya ber a ɔbɛyɛ asɛmpasomafo no bɔboa no daapem, nnyɛ mber no a wɔsom dɛ asɛmpasomafo no nko.

Ama eesũa bi akã ho no, hwɛ Russell M. Nelson, “Preaching the Gospel of Peace,” Liahona, Esusow Aketseaba 2022, 6–7; Gary E. Stevenson, “Love, Share, Invite,” Liahona, Esusow Aketseaba 2022, 84–87; “Adjusting to Missionary Life,” Asɛmpa Nwoma Korabea.

• Yɛ nhwɛdo wɔ mbrɛ wobesi bɛkyɛ asɛmpa no wɔ akwan a ɔyɛ ɔwoara wo su do. Aber biara yɛ krado dɛ kwan a ibenya biara no enye binom bɛkyɛ w’atsenkã wɔ Ɔsor Egya na Agyenkwa no ho na nhyira horow a inya fi Agyenkwa no n’asɛmpa a wɔdze asan ananmu aba na dɛ eyɛ N’Asɔrba no. To nsa frɛ binom ma wɔnkã w’ebusua ho mbra Asɔr na ebusua dwumadzi horow.

• Hwehwɛ kwan a w’ebusua benya nye asɛmpasomafo no enya nkitahodzi. To nsa frɛ hɔn ma wɔnkyerɛkyerɛ w’anyɛnkofo, anaa ma wɔmbɛkyerɛkyerɛ nkorɔfo adze wɔ wo fie. Bisa asɛmpasomafo no fa hɔn sũahu a worinya ho na mbrɛ asɛmpakã som roboa hɔn ma wɔatwe abɛn Jesus Christ yie. Bisa hɔn so dza wɔyɛe (anaa hɔn yamu a nkyɛ wɔyɛe) dze yɛɛ ahoboa dɛ wɔbɛyɛ asɛmpasomafo.

• Sɛ esom asɛmpakã a, taa bue w’ano kã wo sũahu ho asɛm. Anaa to nsa frɛ anyɛnkofo anaa ebusua mu mba a wɔsoom asɛmpakã ma wɔnkasa mfa hɔn dze ho. Ibotum so akasa afa akwan horow a enye binom akyɛ asɛmpa no wɔ w’abrabɔ nyina mu. Boa w’abofra ma ɔndwen akwan horow a obotum akyɛ asɛmpa no.

• Ma w’abofra no akwan horow ma ɔnkyerɛkyerɛ w’ebusua no asɛmpa fapem horow no. W’abofra no botum esũasũa dɛ ɔnye binom rekyɛ ne gyedzi. Mfatoho, hom botum apɛnsampɛnsa nsɛmbisa tse dɛ “Yebesi dɛn beyi Mormon Nwoma no n’enyim akyerɛ obi a ɔnntsee ne nkã da?” anaa “Yebesi dɛn akã Agyenkwa noho hia a ohia ho nsɛm akyerɛ obi a ɔnnyɛ Christianyi?” (Hwɛ Ahmad S. Corbitt, “Do You Know Why I as a Christian Believe in Jesus Christ?,” Liahona, Esusow Aketseaba 2023, 119–21.)

• Boa w’abofra no ma ber a ɔnye nkorɔfo rekasa no ɔayɛ no ahotɔ mu ara. Ebɛn akwan pa binom na wɔdze hyɛ nkɔmbɔdzi ase? Hyɛ w’abofra no nkuran ma onsũa mbrɛ wosi tsie dza binom rekã, wonya dza ɔwɔ hɔn akoma mu ho ntseasee, na wɔnkyɛ asɛmpa no nokwar horow a obotum ehyira hɔn abrabɔ.

• Hwehwɛ akwan horow ma w’abofra ma onsũa amambra na gyedzi binom so ho nsɛm. Boa hɔn ma wonhu na wɔmfa obu mma fapem pa na nokwar a ɔwɔ binom hɔn gyedzi mu.

Temple mu no, wobotum awar kun na yer ama mbersantsen. Iyi si wɔ ayɛdze bi a wɔfrɛ no “temple nsɔwano” mu. Mpo dɛ wo babaa anaa wo babanyin nnyae ndur ayɛdze yi ho dze, naaso ndzɛmba nkakramba, a ɔyɛ mberɛw, ndzɛmba a hom bɔ mu kɔ do yɛ dɛm mfe no mu no, botum aboa hɔn ma wɔayɛ ahoboa ama nhyira nwanwa yi.

• Hom mbɔ mu nkenkan “Ebusua no: Dawurbɔ a Wɔdze ma Wiadze” (Asɛmpa Nwoma Korabea). Ebɛnadze na dawurbɔ no kyerɛkyerɛ fa ebusua abrabɔ mu enyigye ho na fa awar a wɔkɔ do yie no ho? Enye w’abofra no, hom nsan mu nyi fapem horow a wɔakyerɛw no nkorkor wɔ dawurbɔ no mu na wonsũa. Hom botum ahwehwɛ kyerɛwsɛm no mu enya fapem horow a ɔfa ho wɔ Kyerɛwsɛm no Kwankyerɛ mu. Hom botum so ayɛ botae dɛ hom dze fapem no bedzi dwuma emudzi mu wɔ hɔn ebusua mu. Ber a hom dzi dwuma wɔ hom botae ho no, hom mpɛnsampɛnsa wɔdze dɛm fapem no robɔ bra no no nsunsuando wɔ ebusua abrabɔ do.

• Enye w’abofra no, kenkan President Dieter F. Uchtdorf n’asɛm no “In Praise of Those Who Save” (Liahona, Esusow Aketseaba 2016, 77–80). Sɛ ikodu ɔfã no a ne tsir dze “A Society of Disposables,” bia ebɔhwehwɛ ndzɛmba wɔ wo fie a wotum tow gu na ndzɛmba binom so wɔnntow nngu. Kasa fa mbrɛ isi hwɛ ndzɛmba do yie sɛ epɛ dɛ wɔkyɛr mber tsentsen a. Ebɛnadze na iyi susu kyerɛ hɛn wɔ mbrɛ ɔsɛ dɛ yesi hwɛ hɛn awar na ebusua nkitahodzi do? Ebɛnadze bio na yesũa fi President Uchtdorf n’asɛm mu a ɔfa mbrɛ Agyenkwa no botum aboa hɛn ma yɛakyekyer awar na ebusua ebusua a ɔyɛ dzen?

• Bue w’akoma mu ma w’abofra fa ndzɛmba a ɔwo na wo hokãfo rusũa afa irinya onnyiewiei awar a Christ wɔ ne finimfin na akwan horow a erobɔ mbɔdzen etu ho mpon. Sɛ ɔwo na wo hokãfo wɔasɔw hɔn ano wɔ temple mu a, yɛ fasusu ma w’abofra wɔ mbrɛ irisi bɔ wo mbɔdzen dɛ ibesie w’ahyɛmudzi a enye Ewuradze ayɛ no. Kã kyerɛ w’abofra no mbrɛ irisi robɔ mbɔdzen ayɛ Ɔsor Egya na Agyenkwa no wo nkitahodzi ne fapem na mbrɛ Worisi roboa wo (hwɛ Ulisses Soares, “In Partnership with the Lord,” Liahona, Ɔberɛfɛw 2022, 42–45).

• Ber a wohia dɛ wɔbɔ ebusua adwenpɔw no, hom nyɛ ebusua baguabɔ na mpɛnsampɛnsamu. Yɛ ahwɛyie dɛ woetsie ebusua mu ba biara n’adwenkyerɛ na ɔsom hɔn bo. Fa dɛm mpɛnsampɛnsamu yi yɛ kwan a edze bɛkyerɛ ebusua nkitahodzi pa na ayamuyie, sɛ mpo obiara nnhu adze wɔ kwan kor noara do mpo a. (Hwɛ M. Russell Ballard, “Family Councils,” Liahona, Esusow Aketseaba 2016, 63–65.)

• Sɛ adwen a ɔnnsaa anaa wentwiwentwi wɔ ebusua no mu a, kyerɛ abotar na ayamuhyehye su. Boa w’abofra ma onhu mbrɛ wosi resiesie wentwiwentwi wɔ Christ su akwan do no, botum aboa hɔn ma wɔayɛ ahoboa ama awar pa. Hom mbɔ mu nkenkan Nkyerɛkyerɛ na Ahyɛmudzi 121:41–42, na kasa fa mbrɛ fapem a ɔwɔ nyiyimu yinom mu no wobesi botum dze ato awar ho.