“Ɔberɛfɛw 23–29 ‘Hom Nhwehwɛ Ewuradze, na Hom Bɛtsena Ase’: Amos; Obadiah; Jonah” Bra, Bɛka Mo Do—Dze Ma Fie na Asɔr: Ahyɛmu Dadaw 2026 (2026)
“Ɔberɛfɛw 23–29. ‘Hom Nhwehwɛ Ewuradze, na Hom Bɛtsena Ase,’” Bra, Bɛka Mo Do: Ahyɛmu Dadaw 2026
Jonah on the Beach at Nineveh [Jonah Da Nineveh Mpoano], Daniel Lewis yɛɛ nsaano mfonyin no
Ɔberɛfɛw 23–29: “Hom Nhwehwɛ Ewuradze, na Hom Bɛtsena Ase”
Amos; Obadiah; Jonah
Nna Jonah wɔ hɛn mu a ɔrokɔ Tarshish. Nna mfom biara nnyim dɛ ɔrokɔ Tarshish, gye dɛ nna no mu twe fi Nineveh, bea a nna ɔwɔ dɛ Jonah kɔ kɛkã Nyankopɔn n’asɛm. Mber a hɛn no hyiaa ehum kɛse no, nna Jonah nyim dɛ ɔyɛ n’asowadzen ntsi a. Wɔ Jonah ne nhyɛ do no, ne mfɛfo apofo no toow no kyeen po no mu ma ehum no egyaa. Nna ɔyɛ dɛ Jonah n’abrabɔ na no somdwuma aba n’ewiei. Mbom nna Ewuradze mmpa abaw wɔ Jonah ho—dɛmara dɛ nna Ɔmmpa abaw wɔ Nineveh nkorɔfo no ho, Israel fifo ho, anaa hɛn mu biara ho no.
Ntsi no Ɔda ho soma nkɔnhyɛfo—tse dɛ Jonah, Amos, Obadiah, na ndɛ hɛn nkɔnhyɛfo—dze asɛm no dɛ sɛ yenu hɛnho a, ɔronntow hɛn nkyen afebɔɔ. “Esumasɛm” nyinara a Nyankopɔn yi kyerɛ no (hwɛ Amos 3:7), iyi nye dza ɔsom bo dodoodow wɔ mu no mu kor: osian Jesus Christ ntsi, ɔnnkaa ekyir koraa dɛ ebɛsesa. Ɔda ho pɛ dɛ ɔboa hɛn ma yɛdze hɛn ahyɛmudzi a yɛnye No ayɛ no bɔ bra, na Ɔpɛ dɛ ɔma hɛn kwan kor so.
Epɛ nsɛm bio fa nwoma yinom ho a, hwɛ “Amos,” “Obadiah,” na “Jonah” wɔ Kyerɛwsɛm no Kwankyerɛ mu.
Adwenkyerɛ horow ma Adzesũa wɔ Fie na wɔ Asɔr
Amos 3:1–8; 7:10–15
Ewuradze dua No nkɔnhyɛfo do yi nokwar kyerɛ.
Amos 3:3–6 mu no, nkɔhyɛnyi Amos dze mfatoho fa dza yebotum esusu fi sɛnkyerɛdze a yɛtse anaa yehu mu binom too gua: sɛ ogyata, bɔpɔw a, nna oenya afonam; sɛ anoma kɔtɔ efir mu a, nna otwar dɛ efir no esua hɔ ama no. Nyiyimu 7-8 mu no, Amos dze adwen ho nyimdzee yi to nkɔnhyɛfo ho. Ebɛn nkyerɛase na yebotum enya sɛ nkɔnhyɛnyi hyɛ nkɔm a? Ebɛnadze bio na isũa fa nkɔnhyɛfo ho fi Amos 7:10–15 mu?
Ebɛnadze na Ewuradze edua No nkɔnhyɛfo do eyi akyerɛ wo?
Elder Ulisses Soares kãa dɛ “yɛwɔ nkɔnhyɛfo no yɛ Nyankopɔn no dɔ sɛnkyerɛdze” (“Prophets Speak by the Power of the Holy Spirit,” Liahona, Esusow Aketseaba 2018, 99). Hwɛ mbrɛ ibesi ewie asɛntɔw yi: “Minyim dɛ Nyankopɔn dɔ me, osaindɛ Ɔsoma nkɔnhyɛfo a …” Kyerɛwsɛm bi nye yi a wobotum aboa: Deuteronomy 18:18; Ezekiel 3:16–17; Ephesusfo 4:11–14; 1 Nephi 22:2; Nkyerɛkyerɛ na Ahyɛmudzi 21:4–6; 84:36–38; 107:91–92.
Ebɛnadze na ebɛkã akyerɛ obi a ɔtse nkã dɛ nkɔnhyɛfo nnhia ma hɛn ndɛ?
Hwɛ Topics and Questions so, “Prophets,” Asɛmpa Nwoma Korabea.
Amos 4–5
“Hom nhwehwɛ Ewuradze, na hom bɛtsena ase.”
Dɛ mbrɛ Amos 4:6–13 kã no, nna ebɛnadze na Ewuradze n’enyi da kwan dɛ nkyɛ obesi wɔ Israelfo hɔn nsɔhwɛ ekyir no? (san so hwɛ Helaman 12:3). Ber a bia wo nsɔhwɛ mmfi Nyankopɔn hɔ no, ebɛn akwanhorow na wɔdze ama wo ma adan akɔ No hɔ?
Ber a ekenkan Amos 5:4, 14–15 no, dwendwen mbrɛ Ewuradze esi ayɛ wo dom ho. Erohwehwɛ No esi dɛn ama wo nkwa?
Amos 8:11–12
Ewuradze n’asɛm no botum amee wo sunsum mu edzibankɔm na nsukɔm.
Ber a ekenkan Amos 8:11–12 no, dwen siantsir a ɔkɔm yɛ ntõtõho papa ma etse ase a innyi Nyankopɔn n’asɛm ho (Hwɛ John 6:26–35; 2 Nephi 9:50–51; 32:3; Enos 1:4–8 so). Sunsum mu kɔm dze wo a isi dɛn hu?
Nyiyimu yinom botum afa Gyedzi ho Asehwe Kɛse no ho (hwɛ Topics and Questions, “Asehwe,” Asɛmpa Nwoma Korabea). Dɛm sunsum mu “kɔm” no esi dɛn enya nsunsuando wɔ Nyankopɔn ne mba do? Nsanananmu no esi dɛn amee wo sunsum mu kɔm?
Hwɛ “The Great Apostasy” (video), Asɛmpa Nwoma Korabea so.
The Great Apostasy
Obadiah 1:21
Woananom nye “agyefo … wɔ Zion bepɔw do”?
Ɔrekã Obadiah 1:21 asɛm no, President Gordon B. Hinckley kyerɛkyerɛɛ mu dɛ yɛbɛyɛ agyefo wɔ Bepɔw Zion do sɛ yɛgye ayɛdze horow ma ewufo no wɔ temple mu a (hwɛ “Closing Remarks,” Liahona, Ɔberɛfɛw 2004, 105). Ereyɛ dɛm edwuma no si dɛn nye dza—Agyenkwa yɛe maa hɛn no sɛ—sɛ wɔ kwan ketseaba mpo mu a? Ereyɛ edwuma yi esi dɛn aboa wo ma atwe abɛn Agyenkwa no yie?
San so hwɛ “Holy Temples on Mount Zion,” Asɔr Ndwom, nkanee 289.
Jonah 1–4
Ewuradze yɛ mbɔbɔrhufo ma hɔn nyinara a wɔdan ba No hɔ.
Nna Nineveh yɛ Israel ne tamfo a ɔayɛ atsenkã wɔ ne yerɛwyerɛwyɛ na etsiɔdzen ho. Jonah dze, nna ɔnngye nndzi dɛ wɔayɛ krado dɛ wobonu hɔn ho. Ɔbɛyɛ enyika dɛ edze Jonah no suban (hwɛ Jonah 1; 3–4) bɔtoto Alma na Mosiah ne mbambanyin no hɔn atsenka ho (hwɛ Mosiah 28:1–5; Alma 17:23–25). Ebɛnadze na isũa fi Jonah 3 mu a okenyan wo ma enye nkorɔfo a mpo ɔyɛ wo dɛ wɔnnyɛɛ krado dɛ wobonu hɔn ho kyɛ asɛmpa no?
Ber a ekenkan Jonah nwoma no, hwehwɛ Ewuradze n’ehumbɔbɔr ne mfatoho. Etse nka dɛ ebɛnadze ntsi na Jonah “ammpɛ koraa” na “nobo fuwii” (Jonah 4:1) mber a Ewuradze tserɛɛw ehumbɔbɔr maa Nineveh nkorɔfo no? Etse nka dɛ ebɛnadze na nna Ewuradze robɔ mbɔdzen akyerɛkyerɛ no wɔ tsir 4 mu? Dwendwen mbrɛ esi enya N’ehumbɔbɔr wɔ w’abrabɔ mu ho. Ebɛnadze na isũa fi Jonah hɔ a obotum aboa wo ma ayɛ mbɔbɔrhufo yie?
Adwenkyerɛ horow ma Erekyerɛkyerɛ Mbofra
Osiandɛ Kwesida yi nye bosoom yi ne Kwesida a otsĩa enum no ntsi, wɔhyɛ Primary akyerɛkyerɛfo no nkuran dɛ wɔmfa adzesũa dwumadzi horow a ɔwɔ “Abɔekyir B: Irisiesie Mbofra ma Abrabɔ Mber Nyina wɔ Nyankopɔn N’Ahyɛmu Anamɔnkwan no do” no ndzi dwuma.
Amos 3:7
Nkɔnhyɛfo yɛ Jesus Christ n’asomafo.
-
Ebɔboa wo mbofra ma wɔatse Amos 3:7 ase no, ibotum awasa asɛm tsiabaa bi akyerɛ hɔn mu kor na aserɛ no ma ɔnye mbofra nkaa no akyɛ asɛm no. Ɔsomafo a ɔwɔ dwumadzi yi mu no si dɛn tse dɛ nkɔnhyɛnyi? Ebɛnadze ntsi na Ewuradze ma hɛn nkɔnhyɛfo?
-
Epɛ dɛ isũa bio fa dza nkɔnhyɛfo yɛ ho a, ɔwo na wo mbofra no botum ahwehwɛ nsɛm a ɔnnkyɛree fi Asɔr no ne mprɛmprɛ President hɔ mu. Hom botum so atow ndwom bi tse dɛ “Follow the Prophet’’ (Children’s Songbook, 110–11). Hom nye homho nkyɛ siantsir a hom saan mu yii dɛ hom bɛka Nyankopɔn no nkɔnhyɛnyi no do.
Boa mbofra no ma wonsũa kyerɛwsɛm ngu hɔn tsir mu. Elder Richard G. Scott kãa dɛ: “Irusũa kyerɛwsɛm egu wo tsir mu dze anyɛnkofa fofor ba. Ɔtse dɛ irukopue nyimpa fofor bi a obotum aboa wo wɔ hia ber mu do, ɔma nkenyan na awerɛkyekyer, na ɔyɛ nkuranhyɛ fibea ma nsesa a wohia” (“The Power of Scripture,” Ensign, Ɔberɛfɛw 2011, 6). Ama wɔaboa wo mbofra ma woesũa Amos 3:7, ne fã bi anaa ne nyinara egu hɔn tsir mu no, ibotum akyerɛw ato hɔ na wɔabɔ mu esi do akã. Nkyii ibotum apepa anaa ahata nkasafua kakra do nkakrankakra kɛpem dɛ mbofra no botum akã nyiyimu no nyina efi hɔn tsir mu.
Amos 8:11–12
Asɛmpa ne Nsanananmu no dze gyedzi ho asehwe kɔm no baa ewiei.
-
To nsa frɛ wo mbofra no dɛ wompetuw dɛ kɔm dze hɔn ber a ekenkan Amos 8:11–12. Nyankopɔn n’asɛm ho kɔm dze hɛn no tse dɛn? Bia wo mbofra no botum epetuw dɛ wodzidzi ber a hom nye hom ho kyɛ hom kyerɛwsɛm a hom pɛ no bi.
-
Ibotum dze Kyerɛwsɛm no Kwankyerɛ, “Apostasy” (Asɛmpa Nwoma Korabea), anaa “After the New Testament” (wɔ New Testament Stories mu, 167–70) edzi dwuma dze aboa wo mbofra no ma wɔatse “ɔkɔm” a ofi Gyedzi ho Asehwe Kɛse no mu bae na mbrɛ Nsanananmu no sii dze baa ewiei ase. Hom nye homho nkyɛ siantsir a hom enyi sɔ dɛ Ewuradze dze N’asɛmpa no saan ananmu wɔ hɛn nda mu no.
2:52After the New Testament
Jonah 1–3
Ewuradze bɔboa me ma metsie No, mpo sɛ ɔyɛ dzen a.
-
Ebɔboa wo mbofra ma woesũa Jonah n’asɛm no, ibotum ahwehwɛ “Jonah the Prophet” mu wɔ Old Testament Stories mu; (hwɛ dapɛn yi ne dwumadzi krataafa so). Nkyii ibotum ebisa dɛ:
-
Ebɛnadze na osii mber a Jonah enntsie Ewuradze? (hwɛ Jonah 1:14-17).
-
Ebɛnadze na Jonah yɛe dze nuu noho? (hwɛ Jonah 1:10–12; 2:1–4, 9; 3:1–4).
-
Ebɛnadze na osii mber a Jonah yɛɛ setsie? (hwɛ Jonah 3:5).
2:30Jonah the Prophet
-
-
Ɔbɛyɛ wo mbofra no enyigye dɛ wɔbɛkã Jonah n’asɛm no anaa wɔreyɛ ho ɔyɛkyerɛ. Hom nye homho nkyɛ mber bi a nna Ewuradze pɛ dɛ hom yɛ adze bi a nna ɔyɛ dzen ma hom ho sũahu. Osii dɛn boaa wo ma eyɛɛ setsie ma No?
Jonah 1–4
Ewuradze yɛ ehumbɔbɔr ma hɔn nyinara a wɔdan ba No hɔ.
-
Bia wo mbofra botum epetuw dɛ wɔreyɛ Jonah mpɛnsampɛnsamu afa no sũahu ho. Ebɛn nsɛmbisa na wɔbebisa no? Hyɛ hɔn nkuran ma wombisa nsɛmbisa mfa nhwehwɛ dza Jonah sũae faa Ewuradze ho. Ebɛn asɛm na Jonah botum akã, mfatoho, afa Ewuradze n’ehumbɔbɔr ho? (hwɛ, mfatoho, Jonah 2:7–10; 3:10; 4:2).
Christ and the Palsied Man [Christ na Banyin no a Ɔyar Mbubui Yarba no], J. Kirk Richards, yɛɛ nsaano mfonyin no
-
Boa wo mbofra no ma wɔndwen mber a Agyenkwa no kyerɛɛ ehumbɔbɔr maa binom ho mfatoho, tse dɛ Mark 2:3–12; Luke 23:33–34; na John 8:1–11. Ɔwo na wo mbofra no botum ahwehwɛ mfatoho yinom ho mfonyi. Ebɛn akwanhorow na yɛwɔ dɛ yɛbɛyɛ mbɔbɔrhufo ama binom?
Epɛ bi akã ho a, hwɛ bosoom yi Friend dawurbɔ krataa mu.