“Ɔbɛsɛ 26–Ɔberɛfɛw 1. ‘Mebɛdan Hɔn Nkɔmbɔdzi Ahosɛpɛw’: Jeremiah 31–33; 36–39; Kwadwom 1; 3,” Bra, Bɛka Mo Do—Dze Ma Fie na Asɔr: Ahyɛmu Dadaw 2026 (2026)

“Ɔbɛsɛ 26–Ɔberɛfɛw 1. ‘Mebɛdan Hɔn Nkɔmbɔdzi Ahosɛpɛw,’” Bra, Bɛka Mo Do: Ahyɛmu Dadaw 2026

[Jeremiah Lamenting the Destruction of Jerusalem] Jeremiah Rotwa Jerusalem ne Ɔsɛɛ ho Kwadwom, Rembrandt van Rijn yɛɛ nsaano mfonyin no

Ɔbɛsɛ 26–Ɔberɛfɛw 1: “Mebɛdan Hɔn Nkɔmbɔdzi Ahosɛpɛw”

Jeremiah 31–33; 36–39; Kwadwom 1; 3

Ahyɛse noara Ewuradze frɛɛ Jeremiah dɛ ɔmbɛyɛ nkɔnhyɛnyi no, Ɔkãa kyerɛɛ no dɛ no somdwuma bɛyɛ dɛ “obotutu na [obo]bubu egu famu” (Jeremiah 1:10)—na wɔ Jerusalem no, nna emumuyɛ dɔɔ sõ dɛ wotutu na wobubu gu famu. Naaso nna iyi yɛ Jeremiah no somdwuma ne fã ara—wɔsanee so frɛɛ no dɛ “[onke]si,’’ na “[ɔnkɛ]tsɛw” (Jeremiah 1:10). Ebɛnadze na wobotum esi anaa wɔbɛtsɛw no wɔ amamfo ɔsɛe a ahyɛmudzi nkorɔfo etuatsewfo gyaa no hɔ no mu? Wobisa no bio a, sɛ bɔn anaa abɛbrɛsɛ egya ɔsɛɛ wɔ hɛn abrabɔ mu a, yebesi dɛn asan esi na yɛatsɛw no bio? Nyiano no da “Ɔtsenenee Odubaa” (Jeremiah 33:15), anohoba Messiah no do. Ɔdze “ahyɛmu fofor” ba (Jeremiah 31:31)—dza a ohia dodow kyɛn abowano nokwardzi nyɛe. Otwar dɛ Ne mbra “hyɛ [hɛn] mu,” wɔakyerɛw no wɔ “[hɛn] akoma mu.” Dɛm na n’asekyerɛ nye dɛ Ewuradze “bɛyɛ [hɛn] Nyankopɔn” na hɛn so “yɛayɛ [No] nkorɔfo” (Jeremiah 31:33). Ɔkã abrabɔ no ho, na yɛbɔkɔ do ayɛ mfomdo na yeenya siantsir a yebedzi nkɔmbɔ fi mber to mber. Mbom sɛ yɛyɛ a, Ewuradze bɔ anohoba dɛ, “Mebɛdan hɔn nkɔmbɔdzi ayɛ ahosɛpɛw” (Jeremiah 31:13).

Epɛ Kwadwom no mbobɔdo a, hwɛ “Kwadwom Nwoma” wɔ Kyerɛwsɛm no Kwankyerɛ mu.

Adwenkyerɛ horow ma Adzesũa wɔ Fie na wɔ Asɔr

Jeremiah 31; 33

Ewuradze beyi N’ahyɛmu nkorɔfo efi ndɔmmum mu.

Jeremiah 31; 33 mu no, Ewuradze hun “osukwadwom, na osũ wenwen” (Jeremiah 31:15) a Israelfo no benya wɔ ndɔmmum mu no. Naaso, ɔsanee so maa awerɛkyekyer na enyidado nsɛm. Hwehwɛ ber a ekenkan etsir yinom no. Ebɛn anohoba horow na ihu a ɔfa wo ho?

Jeremiah 31:31–34; 32:37–42

“Wɔbɛyɛ me man, na emi so mayɛ hɔn Nyankopɔn.”

Mpo dɛ nna Israelfo no enndzi hɔn ahyɛmu do no, Jeremiah bɔɔ anohoba dɛ Ewuradze nye hɔn bedzi “ahyɛmu fofor” na “ɔwɔ hɔ daapem” (Jeremiah 31:31; 32:40). Dɛm ahyɛmu no yɛ ebɛnadze? Hwɛ dɛ ebɔhwɛ nhumu wɔ Kyerɛwsɛm no Kwankyerɛ mu, “New and Everlasting Covenant,” Asɛmpa Nwoma Korabea.

Ber a ekenkan Jeremiah 31:31–34; 32:37–42 no, dwendwen:

Dza n’ase kyerɛ ma wo dɛ ebɛkã Nyankopɔn n’ahyɛmu nkorɔfo no ho.
Dza n’ase kyerɛ dɛ ebɛma wɔakyerɛw Ne mbra wɔ w’akoma mu.
Dza Ewuradze bɔ ho anohoba sɛ enye No dzi ahyɛmu a.
Mbrɛ enye Nyankopɔn ntamu ahyɛmu nkitahodzi si sesa wo.

Ebɛn anohoba horow na enye Nyankopɔn edzi ber a edze woho ahyɛ ayɛdze krɔnkrɔn horow mu? Oesi dɛn Rehyɛ N’anohoba horow ma wo no mã?

San so hwɛ David A. Bednar, “Abide in Me, and I in You; Therefore Walk with Me’’, Liahona, Esusow Aketseaba 2023, 123–26.

Jeremiah 36

Kyerɛwsɛm no wɔ tum dɛ wɔbɛdan me efi bɔn ho.

Dɛ mbrɛ Jeremiah 36:2–3 kã no, ebɛnadze ntsi na Ewuradze hyɛɛ Jeremiah mbra dɛ ɔnkyerɛw no nkɔnhyɛsɛm no? Ber a ekenkan Jeremiah 36 no, hyɛ nkorɔfo a wodzi do yi hɔn atsenka fa nkɔnhyɛsɛm yinom ho nsew:

Ewuradze (hwɛ nyiyimu 1–3, 27-31)
Jeremiah (hwɛ nyiyimu 4–7, 32)
Baruch (hwɛ nyiyimu 4, 8–10, 14–18)
Jehudi na Ɔhen Jehoiakim (hwɛ nyiyimu 20–26)
Elnathan, Delaiah, na Gemariah (hwɛ nyiyimu 25)

Dwendwen atsenkã a inya wɔ kyerɛwsɛm no ho. Woesi dɛn aboa wo ma adan efi bɔn ho?

Jeremiah 37-39

Si pi wɔ ebɛkã Nyankopɔn no nkɔnhyɛfo do.

Jeremiah 37:1–3, 15–21; 38:1–6, 14–28 mu no, ebɛnadze na ihu dɛ odzi dase dɛ Ɔhen Zedekiah gyee Jeremiah dzii dɛ ɔyɛ Ewuradze no nokwar nkɔnhyɛnyi? Ebɛnadze na ihu dɛ odzi dase dɛ Zedekiah anngye enndzi? Ebɛnadze na isũa fi ntoto ho yi mu? Ber a ekenkan Jeremiah 39 no, dwendwen nsesa a nna nkyɛ ɔbɛba sɛ Zedekiah na no nkorɔfo no dzii nkɔnhyɛnyi no n’ekyir na wosiee Ewuradze ne mbrasɛm a. (Fa dza ɔtoo Zedekiah no toto dza ɔtoo Lehi na n’ebusua no ho wɔ 1 Nephi 1–2.)

Jeremiah 38:6–13; 39:15–18

Mubotum enya akokodur na meegyina ama dza ɔtsen no.

Ɔhen n’apamfo no hun dɛ Jeremiah no nkɔnhyɛsɛm no remma hɔn nsordaafo no nnya pɛ dɛ wɔbɔkõ, ntsi no wɔdze Jeremiah kɔtoo mona fiadze a hɔ yɛ fĩ bi (hwɛ Jeremiah 38:1–4). Jeremiah 38:6–13 mu no, ebɛnadze na okenyan wo fa Ebed-melech Ethiopainyi no mbuae no ho? Hwɛ nhyira so a Ewuradze dze maa Ebed-melech wɔ Jeremiah 39:15–18 mu no.

Ibesi dɛn botum edzi Ebed-melech ne fasusu do?

Jeremiah wɔ Jerusalem, ɔretsen n’abasa kor na ɔdze ne tsir ato kor no mu. — Jeremiah no Sũ

Kwadwom 1; 3

Ewuradze botum agye awerɛhow a midzi osian bɔn ntsi.

Kwadwom nwoma no yɛ awensɛm mboano a Jerusalem na ne temple nsɛɛe ekyir no wɔkyerɛwee. Ebɛnadze ntsi na edwen dɛ ohia dɛ wɔkoraa do? Hwɛ mbrɛ ntotoho a ɔwɔ Kwadwom 1 na 3 no boa wo ma etse awerɛhow kɛse a Israel nyaa no ase. Ebɛn enyidado wɔ Christ mu nsɛm na ihu? (hwɛ nkanka Kwadwom 3:20–33; san so hwɛ Matthew 5:4; James 4:8–10; Alma 36:17–20).

President M. Russell Ballard kãa gyinabew beberee a ɔbɛma binom nnkenya enyidado ho asɛm, na ɔmaa afotu faa bea a ibohu enyidado wɔ:

“Hɛn mu binom bohu dɛ atseetsee, enyimguase, na awerɛhow ayɛ adzesoa wɔ hɛn abrabɔ mu. Pii na wonnhu dza wɔnyɛ wɔ basabasa a ɔyɛ dɛ ɔrokɔ do wɔ wiadze mu no. Binom dzi yaw wɔ ebusuafo a wɔrobor sian famu ntsɛntsɛm wɔ nsudzen a worigyaa ndzepa mu mu na wɔrebrɛ suban pa gyinapɛn adze mu. … Pii na mpo woegyaa hɔnho mu dze agye wiadze ne emumuyɛ na ewudzi ato mu dɛ wonnkotum ayɛ no yie. Hɔn enyidado asa. …

“… Hɛn mu binom hɛn enyidado nyinara asã osian bɔn na mbrato ntsi. Nyimpa bi botum dze noho nyinara ahyɛ wiadze akwanhorow bi mu ara ma onnhu kwan a obefi mu epue na n’enyidado nyinara asa. Montotɔserɛ ma hɔn nyinara a wɔahwe ɔsɛɛfo no n’efir yi mu no nye dɛ mma wɔmpa aba dabiarada! Ɔmmfa ho ma ndzɛmba ayɛ anaa atseetsee a iribenya no si tse, meserɛ gye me dzi, aber nyina ibotum enya enyidado. Always” (“The Joy of Hope Fulfilled,” Ensign, Ɔberɛfɛw 1992, 31–32).

San so hwɛ “Come, Ye Disconsolate,’’ Asɔr Ndwom, nkanee 115.

Boa binom ma wɔmfa hɔnara hɔn adzesũa asodzi no nto hɔn do. Ɔtɔfabi a ɔyɛ dɛ kwan a ɔyɛ mberɛw nye dɛ ebɛkã akyerɛ adzesũafo no ara dza yɛdwen dɛ ɔwɔ dɛ wohu. Naaso, kwan a ɔyɛ mberɛw koraa no nnyɛ kwan papa aber nyina. Elder David A. Bednar kyerɛkyerɛɛ dɛ: “Onnyi dɛ hɛn botae yɛ dɛ ‘Ebɛn asɛm na menkã nkyerɛ hɔn?’ Mbom, nsɛmbisa a ɔwɔ dɛ yebisa hɛnho nye dɛ ‘Ebɛnadze na mubotum ato nsa afrɛ hɔn ma wɔayɛ? Ebɛn nkenyan nsɛmbisa na mubotum ebisa a, sɛ wɔwɔ pɛ dɛ wobobua a, ɔbɛhyɛ ase ato nsa afrɛ Sunsum Krɔnkrɔn no ma ɔaba hɔn abrabɔ mu?’” (evening with a General Authority, Kwakwar 7, 2020, broadcasts.ChurchofJesusChrist.org; san so hwɛ Teaching in the Savior’s Way, 25). Akwan ahorow pii wɔ hɔ a wɔdze boa adzesũafo ma wɔdze hɔn adzesũa asodzi to hɔn do. Mfatoho, wɔ n’apɔwdo n’apɔwdo yi mu no, wɔto nsa frɛ adzesũafo dɛ wɔnhwehwɛ, wɔndwendwen ho, wɔnkyerɛw adze nkorkor, wɔnhwɛ mfonyin, wɔmfa hɔnho nhyɛ adze adzesũa mu, na wɔnkyɛ na wɔmfa dza wosũa no mbɔ bra.

Adwenkyerɛ horow ma Erekyerɛkyerɛ Mbofra

Jeremiah 31:3

Ɔsor Egya na Jesus Christ “dze ɔdomankoma dɔ” dze dɔ me.

Ber a enye wo mbofra kenkan Jeremiah 31:3 no, wobotum aboa ma wɔahwehwɛ ndzɛmba (anaa ndzɛmba ho mfonyin) a ɔkyɛr, tse dɛ dadze sika, na dza ɔnnkyɛr so, tse dɛ eduaba bi. Ibotum akã dza “ɔdomankoma” n’ase kyerɛ ho asɛm na wɔnye homho akyɛ mbrɛ woesi atse Ɔsor Egya ne “ɔdomankoma dɔ” nka. Hom botum so abɔ mu atow ndwom bi tse dɛ “God Is Watching Over All” (Children’s Songbook, 229).

Jeremiah 31:31–34; 32:38–41

Nyankopɔn bɔboa me ma mesie m’ahyɛmudzi.

Wo mbofra no enyi botum agye dɛ wɔbɔdorɔw akoma wɔ krataa sin bi do na nkyii wɔakyerɛw ndzɛmba a woesũa efi Jeremiah 31:31–34 mu fa enye Nyankopɔn ridzi ahyɛmu ho wɔ akoma no mu. Epɛ a ibotum ahwehwɛ ahyɛmudzi a wɔyɛ wɔ enuma ber (hwɛ Mosiah 18:10, 13) na hom mpɛnsampɛnsa dza n’ase kyerɛ dɛ wɔbɛkyerɛw anohoba horow yinom wɔ hɔn akoma mu mu.

Jeremiah 36:1-4

Kyerɛwsɛm no yɛ Nyame N’asɛm.

Dapɛn yi dwumadzi krataafa botum aboa wo mbofra no ma woesũa Jeremiah, Baruch, na ɔhen no hɔn ho asɛm (hwɛ Jeremiah 36). Wobotum asan so ayɛ nyɛe a ɔnye nkasafua a ɔwɔ Jeremiah 36:4–10 kɔ do, tse dɛ erekyerɛw nwoma bi mu (hwɛ nyiyimu 4) na erekenkan kyerɛwsɛm no kyerɛ nkorɔfo no (hwɛ nyiyimu 8, 10).
Ɔwo na wo mbofra no botum ahwɛ mbofra buukuu bi na kyerɛwsɛm no kor na wɔakã siantsir a mbuukuu yinom yɛ soronko ho asɛm. Ebɛnadze na ɔma kyerɛwsɛm no yɛ soronko? Obotum ayɛ nkenyan dɛ hom nye hom ho bɛkyɛ kyerɛwsɛm nsɛnsin a ɔyɛ soronko ma hom.

Jeremiah 38:6–13

Mubotum egyina ama dza ɔtsen no.

Ibotum dze mfonyin a ɔwɔ n’apɔwdo n’ewiei no aboa wo mbofra no ma woehu Ebed-melech n’asɛm no wɔ Jeremiah 38:6–13. Ibia ibotum aboa hɔn ma wɔahwehwɛ nyiyimu a Ebed-melech yɛɛ biribi akokodur mu dze boaa Ewuradze no nkɔnhyɛnyi. Ebɛnadze na yebotum ayɛ dze akyerɛ dɛ yenyim dɛ Nyankopɔn na ɔfrɛɛ hɛn ndɛ nkɔnhyɛnyi no?

Kwadwom 1:1–2, 16; 3:22–26

Agyenkwa no maa ɔyɛɛ yie dɛ mibenya mo bɔn ho bɔnfakyɛ.

Ibeyi Kwadwom enyi no, ibia ebɛpɛ dɛ ekyerɛkyerɛ mu kyerɛ wo mbofra no dɛ osiandɛ Israelfo no ennu hɔnho ntsi, wɔsɛɛ Jerusalem na temple no. Hom botum nye homho akyɛ atsenka a nkyɛ hom botum enya sɛ nna hom tse dɛm mber no mu a (hwɛ Kwadwom 1:1–2, 16). Nkyɛ nsɛm no a ɔwɔ Kwadwom 3:22–26 besi dɛn botum ama wo enyidado?
Hom botum asan so akã mber a idzii awerɛhow fa nsanmuyi bɔn a eyɛɛ ho asɛm akyerɛ hom ho. Ebɛnadze na yehu wɔ Kwadwom 3:22–26 mu a ɔboa hɛn ma yɛtse bɔnfakyɛ a Jesus Christ dze ma no ase?

Epɛ bi akã ho a, hwɛ bosoom yi Friend dawurbɔ krataa mu.

Jeremiah a wɔdze ntampehoma rotwe no efi mona fiadze hɔ — I Will Surely Deliver Thee (Jeremiah 39:18) [Na Nkwa na Mebɛgye Wo (Jeremiah 39:18)], Eva Timothy yɛɛ nsaano mfonyin no

Primary dwumadzi krataafa: Kyerɛwsɛm no yɛ Nyame N’asɛm — I Will Surely Deliver Thee (Jeremiah 39:18) [Na Nkwa na Mebɛgye Wo (Jeremiah 39:18)], Eva Timothy yɛɛ nsaano mfonyin no