“Ɔbɛsɛ 19–25. ‘Ansaana Moween Wo Yafun mu no, nna Minyim Wo’: Jeremiah 1–3; 7; 16–18; 20,” Bra, Bɛka Mo Do—Dze Ma Fie na Asɔr: Ahyɛmu Dadaw 2026 (2026)

“Ɔbɛsɛ 19–25. ‘Ansaana Moween Wo Yafun mu no, nna Minyim Wo,’” Bra, Bɛka Mo Do: Ahyɛmu Dadaw 2026

Jeremiah, Walter Rane yɛɛ nsaano mfonyin no

Ɔbɛsɛ 19–25: “Ansaana Moween Wo Yafun mu no, nna Minyim Wo”

Jeremiah 1–3; 7; 16–18; 20

Ahyɛse no, Jermiah anndwen dɛ ɔbɛyɛ nkɔnhyɛnyi papa. “Hwɛ, munntum nnkasa,” ɔkasaa tsiae (Jeremiah 1:6). Naaso Ewuradze maa no awerɛhyɛmu dɛ, “Medze me nsɛm mahyɛ w’ano” (nyiyimu 9). Nna Jeremiah tse nkã dɛ ɔyɛ “abofra” a onnyim hwee (nyiyimu 6), mbom Ewuradze kyerɛkyerɛɛ mu dɛ nokwar ara nna ɔayɛ krado kyɛn ma onyim—nna wɔatsew no ho ama ɔfrɛ yi mpo ansaana orifi awotoa mu no (hwɛ nyiyimu 5). Ntsi Jeremiah dze no suro too nkyɛn na ɔgyee ɔfrɛ no. Ɔbɔɔ Jerusalem ahemfo na asɔfo no kɔkɔ dɛ hɔn enyisom krɔnkrɔnyɛ no renngye hɔn. “Abofra” no a ɔdween dɛ onnkotum akasa no bɛtsee Nyankopɔn n’asɛm nka “wɔ [n’]akoma mu dɛ ogya a ɔredzɛw’ na onnkotum ayɛ komm (Jeremiah 20:9).

Jeremiah n’asɛm tse dɛ w’asɛm so. Nna Nyankopɔn nyim wo so, ansaana irifi awotoa mu na osiesiee wo maa wo somdwuma wɔ abrabɔ mu. Dza ɔkã ho no, biribi a Jeremiah dzii kan hunii no kã dɛm somdwuma no ho: wɔroboaboa Nyankopɔn no nkorɔfo ano, nkorkor, dze “[hɔn] aba Zion” (Jeremiah 3:14). Na mpo sɛ innyim adze pɔkyee a ebɛyɛ anaa ebɛkã a, “mma innsuro na mowɔ wo nkyɛn, … ; Ewuradze na ɔse” (Jeremiah 1:8, 19).

Jeremiah nwoma nkyerɛkyerɛmu mu no, hwɛ “Jeremiah” wɔ Bible Dictionary no mu.

Adwenkyerɛ horow ma Adzesũa wɔ Fie na wɔ Asɔr

Jeremiah 1:4–19; 7:1–7; 20:8–9

Wɔfrɛ nkɔnhyɛfo dɛ wɔnkã Nyankopɔn n’asɛm.

Susu ho dɛ erekasa kyerɛ wo nyɛnko bi a ɔnntsee nkɔnhyɛfo hɔnho asɛm da, na isi gyinae dɛ edze Jeremiah ne ɔfrɛ dɛ ɔnyɛ nkɔhyɛnyi ho asɛm no a ɔwɔ Jeremiah 1:4–19 mu no bedzi dwuma akyerɛkyerɛ no. Ebɛnadze na ihu no wɔ nyiyimu yinom mu a ɔkyerɛkyerɛ wo biribi fa Nyankopɔn no nkɔnhyɛfo ho? Ibotum so ahwɛ Jeremiah 7:1–7; 20:8–9 mu na asɔr ndwom bi tse dɛ “We Listen to a Prophet’s Voice,” (Asɔr Ndwom, nkanee 22).

Epɛ a ibotum asan so akyerɛkyerɛ wo nyɛnko no ndɛ nkɔnhyɛnyi tseasefo no no ho asɛm. Ana biribi wɔ nyiyimu yinom mu a obotum aboa? Mfatoho, ebɛnadze na hɛn da nkɔnhyɛfo “tutu” anaa [wo]bubu gu famu”? Ebɛnadze na “[wo]si” na “[wɔ]tsɛw]”? (Jeremiah 1:10). Esi dɛn ebohu ama woho dɛ Nyankopɔn na ɔfrɛɛ hɛn nkɔnhyɛnyi tseasefo no?

San so hwɛ Gyedzi ho Nsɛmpɔw 1:6, 9; “Why Do We Have Prophets?” (video), ChurchofJesusChrist.org.

Jeremiah 1:5

Nyankopɔn nyim me ansaana wɔrobɔwo me.

Ebɛnadze na Jeremiah sũaa faa nankasa no ho wɔ Jeremiah 1: 5mu? Dɛ nkɔnhyɛnyi fofor a wɔafrɛ no no, ebɛnadze ntsi na dɛm asɛm no behia ama no dɛ obohu?

Dodowara a Jeremiah sũaa faa nankasa noho wɔ Jeremiah 1: 5 mu no san so yɛ nokwar fa wo ho. Nna Nyankopɔn nyim wo, ansaana wɔrowo wo na osiesiee wo maa wo asodzii tsitsir horow bi. Ibosũa bio afa w’abrabɔ ho ansaana wɔrowo wo no, kenkan Alma 13:1–4; Nkyerɛkyerɛ na Ahyɛmudzi 138:53–56; na Abraham 3:22–23. Ibotum akyerɛw nokwar horow a ibohu no nkorkor. Ebɛnadze ntsi na asɛm yi ohia ma wo dɛ ibohu?

Epɛ dɛ isũa mbrɛ nokwar yinom sii nyaa nsunsuando wɔ Elder Ahmad S. Corbitt n’abrabɔ do ho asɛm a, sũa n’asɛm “You Can Gather Israel!” (Liahona, Esusow Aketseaba 2021, 63–63). Iruhu w’abrabɔ ansaana ereba asaase do ho asɛm no si dɛn nya nsunsuando wɔ kwan a ebɔ wo bra wɔ ɔnnkyebo abrabɔ do?

Dza President Russell M. Nelson kãe faa w’abrabɔ ansaana ereba asaase do ho nye yi:

“Wo Ɔsor Egya nyim wo mber tsenstennten. Ɔwo, dɛ Ne babanyin anaa babasia no, Ɔsaan mu yii wo dɛ ebɛba asaase do wɔ mber pɔkyee yi mu, ma abɛyɛ baanodzinyi wɔ N’edwuma kɛse mu wɔ asaase do. Wɔsaan mu yii wo nnyɛ wo nyimpadua su ntsi mbom wo sunsum mu suban ntsi, tse dɛ ɔkokodurfo, akokodur, akoma mu nokwardzi, nokwar ho nsukɔm, nyansa ho kɔm, na pɛ dɛ ebɔsom binom ntsi a.

“Inyaa suban yinom bi ansaana ereba asaase do. Nkaa no ibotum enya no wɔ asaase do ber a ewɔw do hwehwɛ” (“Decisions for Eternity,” Liahona, Ɔberɛfɛw 2013, 107).

Dwen gyinabew horow bi ho a ibotum ehyia a obehia dɛ ekaa nokwar horow yinom fa w’abrabɔ ansaana ereba asaase do ho. Ebɛnadze na ibotum ayɛ dze abɔ woho nkaa fa nokwar horow yinom ho?

San so hwɛ Russell M. Nelson,”Decisions for Eternity,” Liahona, Ɔberɛfɛw 2013, 106–9; Topics and Questions, “Hunsie,” “Abrabɔ Ansaana Yɛreba Ɔnnkyebo Asetsena yi mu,” Asɛmpa Nwoma Korabea.

wɔ bankum, nyimpa a ogyina esupi pan kɛse bi mu; wɔ nyimfa, awor bi — Jeremiah 2:13 mu no, Ewuradze dze no nkorɔfo no hɔn sunsum mu tsebew no totoo “esupi bobɔe” ho na ɔdze Nankasa noho totoo “nkwa nsu no nsunyiwa” ho.

Jeremiah 2; 7

“Wɔapow emi a meyɛ nkwa nsu no nsunyiwa no.”

Bea kɛsɛɛ a nna Israelfo tse no, nna nkorɔfo siee nsu a ɔsom bo wɔ asaasetsir mu nsu korabew a wɔfrɛ no esupi mu. Edwen ho “esupi bobɔe” a wɔbɔɔ dzin wɔ Jeremiah 2:13 mu no ne sɛnkyerɛdze botum ayɛ ebɛnadze? Ebɛnadze ntsi na eregye nsu efi nsunyiwa mu no beye akyɛn ebɛdan esupi? Ebɔpow “nkwa nsu nsunyiwa” no n’asekyerɛ nye dɛn? Ber a ekenkan Jeremiah 2 na 7 no, hwɛ mbrɛ nna nkorɔfo no risi pow Ewuradze no nkwa nsu no (hwɛ, mfatoho, Jeremiah 2:26–28; 7:2–11). Ebɛnadze ntsi na “nkwa nsu” yɛ sɛnkyerɛdze papa ma dza Agyenkwa no dze ma wo no? Dwen mbrɛ irisi rinya nkwa nsu no ho.

Wɔkãa Jeremiah 7 kyerɛɛ nkorɔfo a nna wɔrehɛn “Ewuradze fie … akɔsɔr Ewuradze no,” naaso nna hɔn ndzeyɛe mmfata hɔn abowano nokwardzi (hwɛ nyiyimu 2–11). Ebɛn nsɛm na etse nkã dɛ bia Ewuradze wɔ ma wo wɔ nyiyimu 21–23 mu?

Fa adzesũa ndzɛmba dzi dwuma. Ewuradze no nkɔnhyɛfo taa dze sunsum mu nokwar horow dze toto ndzɛmba a yenyim ho. Hwɛ dɛ ebɛyɛ dɛmara ber a isũa na ekyerɛkyerɛ asɛmpa no. Mfatoho, ibohu Jeremiah 2:13 no, ibotum dze nsu egu kyɛnse a apae anaa abobɔ mu anaa anom nsu efi nsunyiwa a wɔnom mu nsu mu. Jesus si dɛn yɛ tse dɛ “nkwa nsunyiwa”? (Jeremiah 2:13). Yesi dɛn nom nsu fi No nkwa nsu no mu?

Jeremiah 3:14–18; 16:14–21

Ewuradze bɔboaboa No nkorɔfo ano.

Jeremiah 16:14–15 mu no, Jeremiah dze Israel mboaboano wɔ nda a odzi ekyir mu no totoo Israel hɔn Otukɔ fi Egypt no ho. W’adwenkyerɛ mu no, ebɛnadze ntsi na mboaboano no behia koraa ama Nyankopɔn no nkorɔfo akyɛn Otukɔ no?

Ebɛnadze na Jeremiah 3:14–18; 16:14–21 susu ho fa mbrɛ mboaoboano no si kɔ do ho no?

N’asɛm “Hope of Israel mu no, President Russell M. Nelson, tse dɛ Jeremiah no, kyerɛkyerɛɛ dɛ Israel mboamboano no “nye adze a ohia koraa a ɔrokɔ do wɔ asaase do ndɛ” (wiadze nyina mu mbabun mpaabɔsom, Obiradzi 3, 2018, Asɛmpa Nwoma Korabea). Kenkan anaa tsie asɛm yi, na hwɛ sɛ ibotum ehu (a) mbrɛ President Nelson si kyerɛkyerɛ Israel mboamboano no mu, (b) mbrɛ osi kã no ho hia ho asɛm, na (c) na mbrɛ ibesi botum akã mboaboano no ho.

Epɛ bi akã ho a, hwɛ bosoom yi Liahona na For the Strength of Youth dawurbɔ nkrataa mu.

Adwenkyerɛ horow ma Erekyerɛkyerɛ Mbofra

Jeremiah 1:5

Nna Ɔsor Egya nyim me ansaana wɔrobɔwo me.

Ibobue nokwar ehiasɛm a wɔkyerɛkyerɛɛ no wɔ Jeremiah 1:5 mu enyi no, ibotum dze abɔdomaba bi no mfonyin akyerɛ wo mbofra no (anaa, sɛ ɔbɛyɛ yie a, hom botum ahwɛ wo mbofra no hɔn mbɔdomamba ber mu mfonyin). Bisa wo mbofra no sɛ nna wonyim bea a nna wɔtse ansaana wɔrobɔwo hɔn a. Hom so botum abɔ mu atow ndwom a ɔkyerɛkyerɛ fa hɛn abrabɔ ansaana yɛreba asaase do no, tse dɛ “I Lived in Heaven” (Children’s Songbook, 4).
Sɛ wo mbofra no bɛpɛ dɛ wosũa bi kã ho a, ibotum aboa hɔn ma wɔahwehwɛ “Abrabɔ Ansaana Yɛreba Ɔnnkyebo Asetsena yi mu” wɔ Kyerɛwsɛm no Kwankyerɛ no mu. Wobotum ahwehwɛ nyiano ama “woana,” “mber bɛn,” na “ebɛnadze” nsɛmbisa afa abrabɔ ansaana yɛreba asaase do ho.

Jeremiah 1:4–19

Wɔfrɛ nkɔnhyɛfo dɛ wɔnkã Nyankopɔn ne nsɛm.

Hwɛ dɛ edze nkɔhyɛnyi tseasefo no mfonyin anaa nkɔnhyɛfo fi kyerɛwsɛm no mu hɔn mfonyin bɛkyerɛ (ibotum enya bi wɔ Asɔr dawurbɔ nkrataa mu, Gospel Art Book, na Bra, Bɛka Mo Do mu). Bisa wo mbofra no dza wonyim fa nkɔnhyɛfo yinom ho.
Ebɛkyerɛkyerɛ afa dza nkɔnhyɛfo yɛ ho no, ibotum eyiyi nyiyimu bi a ɔbɛyɛ mfaso efi Jeremiah 1 mu, tse dɛ nyiyimu 5, 7, 10, na 19. Wo mbofra no kor biara botum eyi nyiyimu no mu kor, ɔakenkan, na ɔakyɛ biribi a oesũa fa nkɔnhyɛfo ho.

Jeremiah 16:14–16

Mubotum aboa Ɔsor Egya ne mba ma wɔasan aba No hɔ.

Ber a ekenkan Jeremiah 16:16 no, wo mbofra no botum epetuw dɛ “worunu” anaa “wɔreyɛ ha” ahwehwɛ ndzɛmba wɔ dan no mu. President Russell M. Nelson dze apofo na abɔmbɔfo wɔ nyiyimu yi mu no atoto asɛmpasomafo hɔn ho (hwɛ “The Gathering of Scattered Israel,” Liahona, Ɔberɛfɛw 2006, 81). Ebɛnadze na asɛmpasomafo yɛ? Yebesi dɛn botum aboa ma “woenu” na “wɔatwe” Israel a wɔapetse no? (hwɛ “A Message for Children from President Russell M. Nelson” [video], ChurchofJesusChrist.org).

3:30
Video: A Message for Children from President Russell M. Nelson

Jeremiah 18:1-6

Mubotum ama Ewuradze akyerɛ m’abrabɔ kwan, tse dɛ ɔwemfo ɔsɛn awendɛtse.

Ebɔhwehwɛ nyiyimu yinom mu no, ibotum apɛnsampɛnsa mu anaa akyerɛ mbrɛ wosi yɛ ɔsɛn (hwɛ mfonyin a ɔwɔ n’apɔdo yi n’ewiei no). Ebɛn asɛm na Ewuradze wɔ ma hɛn wɔ Jeremiah 18:1–6 mu? Ebɛyɛ awendɛtse wɔ Ewuradze ne nsamu n’asekyerɛ nye dɛn? (San so hwɛ Isaiah 64:8). Epɛ asɛm fofor bi a ɔdze hɛn toto awendɛtse ho a, hwɛ Elder Richard J. Maynes’s n’asɛm “The Joy of Living a Christ-Centered Life” (Liahona, Ɔberɛfɛw 2015, 27–30).

Epɛ bi akã ho a, hwɛ bosoom yi Friend dawurbɔ krataa mu.

nsa rowen ɔsɛn wɔ hwiir do — “Hwɛ, mbrɛ awendɛtse tse wɔ ɔwemfo nsamu no, mbrɛ hom tse wɔ me nsamu ara nye no, Israel fifo” (Jeremiah 18:6).

Primary dwumadzi krataafa: Mubotum aboa Ɔsor Egya ne mba ma wɔasan aba No hɔ — “Hwɛ, mbrɛ awendɛtse tse wɔ ɔwemfo nsamu no, mbrɛ hom tse wɔ me nsamu ara nye no, Israel fifo” (Jeremiah 18:6).