“Ɔbɛsɛ 12–18. ‘Ɔpomfo No Bɛba Zion’: Isaiah 58–66,” Bra, Bɛka Mo Do—Dze Ma Fie na Asɔr: Ahyɛmu Dadaw 2026 (2026)
“Ɔbɛsɛ 12–18. ‘Ɔpomfo No Bɛba Zion,’” Bra, Bɛka Mo Do: Ahyɛmu Dadaw 2026
Jesus wɔ Nhyiamudan mu wɔ Nazareth, Greg Olsen yɛɛ nsaano mfonyin no
Ɔbɛsɛ 12–18: “Ɔpomfo No Bɛba Zion”
Isaiah 58-66
No somdwuma ahyɛse mu no, Jesus Christ kɔr nhyiamudan bi mu wɔ Nazareth, bea a wɔnyɛɛn No no. Ogyinaa hɔ kenkanee fii kyerɛwsɛm no mu, obueii Isaiah nwoma, na ɔkenkaan dza yenyim no sesei dɛ Isaiah 61:1–2. Nkyii ɔbɔɔ no dawur dɛ, “Ndɛ na kyerɛwsɛm yi aba mu wɔ hom asowa mu.” Nna iyi nye Agyenkwa no ne dawurdɔ tɔɔtseen dɛ Ɔno nye Nyia Ɔasera no Ngo no, a “[ɔbɛsa] akoma a abobɔ yarba” na “[ɔa]paa ɔgye [a]ma ndɔmmum” (hwɛ Luke 4:16–21). Nokwar kyerɛwsɛm yi hyɛɛ mã dɛm da no. Na, tse dɛ Isaiah no nkɔnhyɛsɛm pii so no, ɔasan so rehyɛ mã ndɛ. Agyenkwa no kɔ do sa hɔn a hɔn akoma ebubu na wɔba No hɔ no yarba. Ndɔmmumfo pii da ho wɔ hɔ a wohia ɔgye. Na enyimnyam ndaamba wɔ hɔ a ɔwɔ dɛ yesiesie hɛnho ma—mber a Ewuradze “[bɔbɔ] ɔsorsor fofor na asaase fofor” (Isaiah 65:17) na “[ɔ]bɛma tsenenee na ayɛyi efifir wɔ amanaman nyinara enyim” (Isaiah 61:11). Yɛrekenkan Isaiah no bue hɛn enyiwa wɔ dza Ewuradze ayɛ no dadaw, dza Ɔreyɛ, na dza Ɔbɛyɛ ama No nkorɔfo no ho.
Adwenkyerɛ horow ma Adzesũa wɔ Fie na wɔ Asɔr
Isaiah 58:3–12
Mbuada pegya sunsum mu tum na ohyira nkorɔfo a wɔwɔ hia mu no.
Ebɛnadze ntsi na obi dze ne pɛ nnkedzidzi mber a edziban wɔ hɔ? Ber a isũa Isaiah 58:3–12 no, ibotum adwen wo siantsir a idzi mbuada ho—dɛmara dɛ siantsir a Ewuradze dze mbra yi mae. Nsɛmbisa binom a hom bodwendwen ho nye yi:
-
Ebɛnadze ntsi na ɔtɔfabi a yehu mbuada tse dɛ ɔyɛ adzesoa koraa kyɛn nhyira? (hwɛ Isaiah 58:3–5). Ewuradze ne nkyerɛkyerɛ wɔ tsir yi mu no si dɛn sesa dɛm adzehu no ma wo?
-
“Hom bɛsansan emumuyɛ apɔw no” na “wɔapopɔr kɔndua nhoma no” n’asekyerɛ botum ayɛ dɛn? (Isaiah 58:6). Yeridzi mbuada besi dɛn botum ehyira binom? (hwɛ nyiyimu 7).
-
Iridzi mbuada esi dɛn dze nhyira a wɔakã ho asɛm wɔ Isaiah 58:8–12 abrɛ wo?
N’asɛm “Is Not This the Fast That I Have Chosen?” mu no (Liahona, Esusow Aketseaba 2015, 22–25), President Henry B. Eyring kyɛɛ mfatoho beberee fa mbrɛ ɔnam mbuadadzi na mbuada ayɛyɛdze do woesi ehyira nkorɔfo. Esi dɛn ehu nhyira a ɔsɛ iynom wɔ w’abrabɔ mu?
Hwɛ “Bless Our Fast, We Pray,” Asɔr Ndwom, nkanee 138; Topics and Questions, “Fasting and Fast Offerings,” Asɛmpa Nwoma Korabea so.
Hu nkorɔfo no ekyerɛkyerɛ hɔn no. “Iruhu nkorɔfo a ekyerɛkyerɛ hɔn no na ereper dɛ ebɛtse dza ɔwɔ hɔn akoma mu ase no kã ereyɛ Christ saso kyerɛkyerɛnyi ho. … Ibotum ahwehwɛ mbrɛ wosi sũa adze yie papaapa. Ibotum ebisa nsɛm, etsie ahwɛyie mu ara, na ahwɛ. Ne nyinara no, ibotum abɔ mpaa dze enya ntseasee a Sunsum no nko botum dze ama. Mbrɛ ihu nyimpa yie no, mbrɛ ibotum aboa no yie ma oenya nankasa ne nkyerɛase na tum wɔ Jesus Christ n’asɛmpa mu a. Prɛko pɛr a atse nyimpa no no nsukɔm ase no, Sunsum no botum akyerɛkyerɛ wo mbrɛ ibesi bɔboa dze Agyenkwa no no nkwa nsu amee no” (Teaching in the Savior’s Way, 13).
Isaiah 58:13–14
Iridzi Ewuradze nyi wɔ Ahomgyeda no dze enyigye ba.
Ana Ahomgyeda no yɛ “enyigyedze” ma wo? Ber a isũa Isaiah 58:13–14 no, hwɛ mbrɛ ibesi botum enya enyigye yie wɔ Ewuradze ne da mu. Mfatoho, ibeyi dɛ “[nnkɛyɛ] wo pɛ ho edwuma wɔ [Ne] da krɔnkrɔn no mu” n’asekyerɛ botum ayɛ dɛn? Ebɛn nsonsonee na ɔda “[eregye] w’enyi wɔ Ewuradze mu” na “[ereyɛ] woara wo kwan do adze” ntamu?
San so hwɛ Russell M. Nelson, “The Sabbath Is a Delight,” Liahona, Esusow Aketseaba 2015, 129–32.
Isaiah 59:9-21; 61:1–3; 63:7–9
Jesus Christ nye m’Agyenkwa na Pomfo.
Isaiah 58–66 wɔ nsɛm beberee fa Jesus Christ no werdam somdwuma no ho. Hwehwɛ nsɛm no ber a irusũa adze no. Tsitsir ara, hyɛ edzin horow na nkasafua a wɔdze dzii dwuma kãa Agyenkwa no ho asɛm no nsew. Mfatoho:
-
Ebɛn nkenyan na inya fa “odzimafo” no ho asɛm wɔ Isaiah 59:16-21 mu? Agyenkwa no si dɛn dzi tsebew a wɔkã ho asɛm wɔ nyiyimu 9–15 mu no do?
-
Mber a Jesus Christ bɔɔ dawur kyerɛɛ nkorɔfo a wɔwɔ Nazareth dɛ Ɔno nye Messiah no, Ɔserɛe kãa fi Isaiah 61:1–3 mu (hwɛ Luke 4:16–21; hwɛ video “Jesus Declares He Is the Messiah” no, Asɛmpa Nwoma Korabea so). Agyenkwa no esi dɛn ehyira ɔwo na binom wɔ akwan a wɔakã ho asɛm wɔ nyiyimu yinom mu no? Oesi dɛn ama abɔtsir dze ahyɛ nso ananmu?
3:24Jesus Declares He Is the Messiah
-
Ebɛn “Ewuradze n’adɔyɛ” na ibotum “abɔ dzin”? (hwɛ Isaiah 63:7-9).
-
Ebɛn nsɛm bi so fa Agyenkwa no ho na ihu no wɔ Isaiah 58-66 mu?
Hwɛ Mosiah 3:7; Nkyerɛkyerɛ na Ahyɛmudzi 133:46–53 so.
A Gift of Light [Kan Akyɛdze bi], Eva Timothy yɛɛ nsaano mfonyin no
Isaiah 60; 62
“Ewuradze bɛyɛ ɔdomankoma kan ama wo.”
Isaiah 60 na 62 kã kan na sum ho asɛm, enyiwa na iruhu ho asɛm dze kyerɛkyerɛ mbrɛ Jesus Christ n’asɛmpa no behyira wiadze wɔ nda a odzi ewiei mu. Hwehwɛ adwenkyerɛ yinom wɔ Isaiah 60:1–5, 19–20; 62:1–2mu. Ber a ekenkan etsir yinom no, dwendwen mbrɛ Nyankopɔn esi roboaboa Ne mba ano efi sum mu aba Ne kan mu ho. W’asɛdze wɔ edwuma yi mu nye dɛn?
San so hwɛ 1 Nephi 22:3–12; 3 Nephi 18:24; Nkyerɛkyerɛ na Ahyɛmudzi 14:9; Bonnie H. Cordon, “That They May See,” Liahona, Esusow Aketseaba 2020, 78–80.
Isaiah 64:1–5; 65:17–25; 66
Christ bedzi hen wɔ asaase do Mfe Apem no mu.
Isaiah kãa da bi ho asɛm mber a “werɛ [b]efir nkan no fona no” (Isaiah 65:16). Ber a nkɔnhyɛsɛm yi wɔ mãhyɛ beberee no, wɔ no nokwar mãhyɛ nkyerɛase mu no, mbrɛ ana dɛm da no rebɛba a—mber a Jesus Christ bɛsan no. Isaiah kãa ndaamba da yi ho asɛm wɔ Isaiah 64:1–5; 65:17–25; 66. Hwɛ mpɛn dodow a ɔdze kasafua tse dɛ “ehurusi” dzii dwuma. Ebɛnadze ntsi na Agyenkwa no ne mbae da no bɛyɛ ehurusi da ama wo? Ebɛnadze na ibotum ayɛ dze ayɛ ahoboa ama Ne mbae no?
San so hwɛ Gyedzi ho Nsɛmpɔw 1:10; Russell M. Nelson, “The Future of the Church: Preparing the World for the Savior’s Second Coming,” Ensign, Ebɔbira, 2020, 13-17.
Epɛ bi akã ho a, hwɛ bosoom yi Liahona na For the Strength of Youth dawurbɔ nkrataa mu.
Adwenkyerɛ horow ma Erekyerɛkyerɛ Mbofra
Isaiah 58:6–11
Mbuada hyira emi na binom a wɔwɔ hia mu no.
-
Ibia kwan a oye papaapa a edze bɛhyɛ wo mbofra nkuran ma woedzi mbuada—sɛ wɔayɛ krado—nye ebɔboa hɔn ma wɔatse Ewuradze no botae ma mbra yi ase. Hwɛ dɛ hom bɛkenkan Isaiah 58:6–11 abɔ mu dze ehu nyiano ma nsɛmbisa yinom: Ebɛnadze ntsi na yedzi mbuada? Yesi dɛn dzi mbuada? Ibotum ahwɛ “Akɔnkye, Kyen Kɔm” wɔ Kyerɛwsɛm no Kwankyerɛ mu so.
-
Sɛ enya mbuadadzi ho sũahu mfaso a, nye wo mbofra no nkyɛ. Ibotum ebisa hɔn mbrɛ wobesi bɛkyerɛkyerɛ siantsir a Ewuradze dze mbra yi maa hɛn mu akyerɛ hɔn nyɛnko bi.
Isaiah 58:13–14
Ahomgyeda no botum ayɛ enyigyedze ama me.
-
Akenkan Isaiah 58:13–14 ekyir no, ibotum akyerɛ dapɛn no mu nda wɔ akyerɛnda [calendar] do, na ato nsa afrɛ wo mbofra ma wɔnye wo akã nda no. Sɛ ikodu Ahomgyeda do a, bisa hɔn ma wɔmfrɛ da no “enyigyedze.” Kã kyerɛ hɔn siantsir a Ahomgyeda no yɛ enyigyedze ma wo.
-
Hom nye homho nkyɛ akwan bi so a hom botum “bɛgye [hɔn] enyi wɔ Ewuradze mu” wɔ Ahomgyeda no. Bia wo mbofra no botum adorɔw hɔn adwenkyerɛ horow na wɔdze egu “Ahomgyeda enyigyedze adaka mu.” Nkyii, sɛ wohia adwenkyerɛ horow afa ndzɛmba a wɔbɛyɛ no Ahomgyeda no a, wobotum atwe adwenkyerɛ bi efi adaka no mu.
Our Light [Hɛn Kan], Dan Wilson yɛɛ nsaano mfonyin no
Isaiah 60:1–3
Agyenkwa no tse dɛ kandzea ma me.
-
Ibotum ato nsa afrɛ wo mbofra no ma woemua hɔn enyiwa ber a ekenkan Isaiah 60:1-3. Bisa hɔn ma wombue hɔn enyiwa sɛ wɔtse kasafua “kan” a, na wommua no bio sɛ wɔtse kasafua “sum” a. Kyerɛkyerɛ mu dɛ Jesus Christ na N’asɛmpa no tse dɛ kan bi a ɔboa hɛn ma yehun hɛn kwan san kɔ Ɔsor Egya hɔ.
Isaiah 65:17–25
Sɛ Jesus ba bio a, Ɔdze asomdwee na enyigye bɛba.
-
Isaiah 65:17–25 kyerɛ dza asaase no bɛyɛ sɛ Agyenkwa no ba bio a. Ber a enye wo mbofra no kenkan nyiyimu yinom no, boa hɔn ma wɔnhwehwɛ mbrɛ abrabɔ besi ayɛ soronko wɔ “asaase fofor” a Isaiah kãa ho asɛm no mu. Ebɛnadze ntsi na iyi bɛyɛ “ahomka na ehurusi daa daa” mber? (nyiyimu 18).
-
Hom so botum abɔ mu atow ndwom a ɔfa Mbae a Otsĩa Ebien no ho, tse dɛ “When He Comes Again” (Asɛmpa Nwoma Korabea). Hom nye homho nkyɛ dza hɔn enyi da ho kwan wɔ Agyenkwa no ne mbae ho. Ebɛnadze na yebotum ayɛ dze esiesie hɛn ho ama dɛm da no?
Epɛ bi akã ho a, hwɛ bosoom yi Friend dawurbɔ krataa mu.