“Fankwa 28–Ɔbɛsɛ 4. ‘Hom Nkyekye Me Man Werɛ’: Isaiah 40–49,” Bra, Bɛka Mo Do—Dze Ma Fie na Asɔr: Ahyɛmu Dadaw 2026 (2026)
“Fankwa 28–Ɔbɛsɛ 4. ‘Hom Nkyekye Me Man Werɛ,’” Bra, Bɛka Mo Do: Ahyɛmu Dadaw 2026
Healing The Blind Man [Wɔresa Onyifuranyi no Yarba],, Carl Heinrich Bloch yɛɛ nsaano mfonyin no, ɔwɔ Frederiksborg Museum of National History
Fankwa 28–Ɔbɛsɛ 4: “Hom Nkyekye Me Man Werɛ”
Isaiah 40–49
“Awerɛkyekyer” nye kasafua a odzi kan wɔ Isaiah tsir 40. Asɛm fofor na ɔdze hyɛ ase, ntsĩmu fofor wɔ nkɔnhyɛnyi no n’asɛm mu. Isaiah n’ahyɛse nkyerɛwee no bɔɔ Israel na Judah kɔkɔ fa ɔsɛɛ na ndɔmmum a ɔbɛba osian hɔn bɔn ntsi. Mbom ekyir nkɔnhyɛsɛm yinom baa dɛ ɔbɛkyekye Jewfo no hɔn werɛ wɔ ndaamba bɔbor mfe 150 mu—ekyir no a wɔsɛɛ Jerusalem na temple no na wɔdze nkorɔfo no kɔr ndɔmmum wɔ Babylon no. Naaso, nkɔnhyɛsɛm yinom, kɔ ekyirkyir ndaamba kyɛn Israelfo no a wodzii nkõgu na wonyaa abagura no mpo. Wɔkasa kyerɛ hɛn so, a ɔtɔfabi a nna yɛtse nkã dɛ yeedzi nkõgu, yeenya abagura, na mpo yɛayew no.
Isaiah ne nsɛm dze ma no nkorɔfo na hɛn no da famu: “Mma Nnsuro” (Isaiah 43:1). Enyidado wɔ hɔ. Ewuradze no werɛ mmfir wo, na Ɔwɔ tum wɔ gyinabew horow a ɔyɛ dɛ nntum nnhyɛ do no do. Ana nnyɛ Ewuradze, a “ɔbobɔɔ ɔsorsor” no (Isaiah 42:5), ɔwɔ tum kyɛn Babylon, kyɛn bɔn, kyɛn adze biara a ɔafa wo ndɔmmum no? Ɔtotɔ serɛ dɛ “San bra me nkyɛn,” “na mapon wo” (Isaiah 44:22). Obotum asa wo yarba, esiesie wo, ahyɛ wo dzen, dze wo bɔn akyɛ wo, na ɔakyekye wo werɛ—wo gyinabew mu no, dza ihia biara no, dze apon wo.
Adwenkyerɛ horow ma Adzesũa wɔ Fie na wɔ Asɔr
Isaiah 40–49
Jesus Christ botum akyekye mo werɛ na Ɔama me enyidado.
Mber a nna Israelfo wɔ ndɔmmum mu no, pii na wɔdwendwenee sɛ wɔayew hɔn gyinabew koraa dɛ Nyankopɔn n’ahyɛmudzi nkorɔfo a ɔasan mu eyi hɔn a. Ber a ekenkan Isaiah 40–49 no, hwehwɛ nsɛnsin a bia otumii maa awerɛkyekyer na enyidado. Asɛnsin biara a ibohu no, dwendwen ho na kyerɛw dza Ewuradze repɛ akã akyerɛ wo wɔ nyiyimu yinom mu. Kakra wɔ ha a ibotum dze ahyɛ ase:
-
40: 11, 29–31:
-
41:10–13, 17–18:
-
42:6–7:
-
43:1–7, 25:
-
44:1–4, 21–24:
-
46:3–4:
-
49:7–16:
Ebɛnadze na etse nkã dɛ Ewuradze pɛ dɛ ihu fa No ho?
Ibotum ehu dɛ asɔr ndwom “How Firm a Foundation” (Asɔr Ndwom, nkanee 85) no dze Isaiah ne nsɛm wɔ Isaiah 41:10; 43:2–5; 46:4 dzi dwuma. Hwɛ dɛ ebɔtow anaa ibetsie asɔr ndwom yi, a erohwehwɛ nsɛdo a ɔda nsɛm na nyiyimu yinom fi Isaiah no ntamu. Ewuradze esi dɛn ahyɛ anohoba horow yinom mã wɔ w’abrabɔ mu?
Hwɛ Patrick Kearon, “He Is Risen with Healing in His Wings: We Can Be More Than Conquerors,’’ Liahona, Esusow Aketseaba 2022, 37–40 so.
Fa kyerɛwsɛm bi kã ho dzi dwuma. Ɔtɔfabi a yebotum atse Ahyɛmu Dadaw ase yie sɛ yɛdze nyiyimu fi Mormon Nwoma mu dze kã hɛn adzesũa ho a. Mfatoho, Mormon Nwoma nkɔnhyɛfo Nephi na Jacob nyaa Isaiah ne nkyerɛwee a nna ɔwɔ ayewa mprɛtse no do ho kwan (hwɛ 1 Nephi 19:22–23, na wɔdze nkɔnhyɛsɛm yinom dzii dwuma dze kyerɛkyerɛɛ Agyenkwa no ho asɛm. Ama eesũa mbrɛ Nephi na Jacob sii dze Isaiah 48–49 too hɔn nkorɔfo ho no, hwɛ 1 Nephi 22. Bia dɛm no bɔboa wo ma edze etsir yinom ato wankasa w’abrabɔ ho.
Yeritsie Ewuradze no, yebotum enya “asomdwee … dɛ esutsen” (Isaiah 48:18).
Isaiah 40–49
“Ɔwo nye m’akowaa.”
Isaiah 40–49 nyina mu no Ewuradze kasa fa No “nkowaa” na “N’adasefo” ho. Nsɛm yinom botum afa Jesus Christ ho (hwɛ Isaiah 42:1–7), Israel fifo ho (hwɛ Isaiah 45:4), na Ɔhen Cyrus ho, a ɔmaa Jewfo no kwan ma wɔsanee kɔr Jerusalem na wokesii temple no bio (hwɛ Isaiah 44:26–28; 45:1–4). Ibotum asan so ahwɛ mbrɛ nsɛnsin no si fa wo ho dɛ Ewuradze n’akowaa na dasefo. Mfatoho, dwendwen nsɛmbisa tse dɛ iyinom ho:
Isaiah 40:1–3, 9–11; 43:9–12. Ebɛn kwan do na eyɛ Jesus Christ ne dasefo? Dɛ eyɛ Ne dasefo no ebɛn “asɛmpa” na ibotum akyɛ? Ibotum esusu dɛ wɔafrɛ wo dɛ gyina dɛ dasefo wɔ asɛndzibea asɛm mu. Asɛndzii yi mu no, wɔdze afɔdzi ato Jesus Christ do dɛ ɔkãa asɛm a wɔkyerɛɛw no wɔ Isaiah 43:11no. Dasedzi bɛn na ibotum agye dze aboa Jesus n’asɛm no? Ebɛn adanse na ɔwɔ w’abrabɔ mu a edze bɔto gua?
Isaiah 41:8–13; 42:6; 44:21. Ebɛnadze na Ewuradze afrɛ wo dɛ yɛ? Hwɛ Asɔr ɔfrɛ dɛmara dɛ akwanhorow dɛ edze som No. Oesi dɛn “ahyehyɛ” anaa Oesiesie wo ma abɛyɛ N’akowaa? Osi dɛn boa wo ber a esom?
Isaiah 49:1–9. Ebɛn nsɛm na ihu no wɔ nyiyimu yinom mu a obotum aboa mber a wo mbɔdzembɔ na som yɛ dɛ “adzehun na egyangyandze”? (nyiyimu 4)
Isaiah 40:3–8, 15-23; 42:15–16; 47:7–11
Nyankopɔn no tum yɛ kɛsenara kyɛn wiadze tum.
Isaiah sii do bɔɔ no nkorɔfo no nkaa wɔ Nyankopɔn no tum a onnyi kãbea ho, mpo sɛ edze toto wiadze eyinyandze tum a otwaa hɔnho hyiae no ho. Hwehwɛ nsɛm yi ber a ekenkan Isaiah 40:3–8, 15–23; 42:15–16; na 47:7–11 (hyɛ no nsew dɛ tsir 47 no wɔkae kyerɛɛ Babylon, Israel no ndɔmmumfanyi). Ebɛnadze na nsɛnsin yinom kyerɛkyerɛ wo fa wiadze ndzɛmba ho? Ebɛnadze na wɔkyerɛkyerɛ wo fa Nyankopɔn ho? Dwendwen siantsir a asɛm yi bɔsom bo ama Jewfo a nna wɔwɔ ndɔmmum no. Ebɛnadze ntsi na ɔsom bo ma wo?
Isaiah 48:10; 49:13–16
Ewuradze botum edua m’ahohiahia mu atsew mo ho.
Ber a ekenkan Isaiah 48:10 no, dwendwen ɔwoara wo “ahohiahia fononoo” ho. Ewuradze risi dɛn “anan” wo? Isaiah 49:13–16 si dɛn boa wo ber ihu wo ahohiahia ho amandze?
San so hwɛ “The Refiner’s Fire” (video), Asɛmpa Nwoma Korabea.
The Refiner's Fire
Epɛ bi akã ho a, hwɛ bosoom yi Liahona na For the Strength of Youth dawurbɔ nkrataa mu.
Adwenkyerɛ horow ma Erekyerɛkyerɛ Mbofra
Isaiah 40:3–5
Mubotum aboa abɔ “Ewuradze no kwan.”
-
Dwen akwanhorow bi ho a edze bɛkyerɛkyerɛ dza n’ase kyerɛ dɛ “hom mbɔ … Ewuradze no kwan,” dɛ mbrɛ wɔakã ho asɛm wɔ Isaiah 40:3–5 no. Mfatoho, ɔwo na wo mbofra no botum atsentsen biribi a ɔakyeakyea, esiesie famu a ndzɛmba petse hɔ, anaa wɔabɔ kwan wɔ abo daadze mu. Ibotum so dze John Onumanyi na Joseph Smith hɔn mfonyin akyerɛ (hwɛ Gospel Art Book, nkanee 35, 87). Wosii dɛn bɔɔ kwan ma Ewuradze ne mbae? (hwɛ Luke 3:2–18; Nkyerɛkyerɛ na Ahyɛmudzi 135:3). Yebesi dɛn botum aboa? Iyi botum ayɛ kwan a edze bɛkasa afa mbrɛ hɔn a wokitsa Aaron Asɔfodzi no boa bɔ kwan ma Ewuradze ho (hwɛ Nkyerɛkyerɛ na Ahyɛmudzi 84:26-28).
Isaiah 43:10
Mubotum ayɛ Ewuradze ho dasefo.
-
Hom abɔ mu akenkan Isaiah 43:10 ekyir no, hom botum akasa afa dza ebɛyɛ dasefo n’asekyerɛ ho asɛm. Hom nye homho nkyɛ ndzɛmba bi a hom enya ho sũahu a hom botum ayɛ ho “dasefo”—mfatoho, edziban a asɔ ahwɛ, bea bi a akɔ hɔ da, anaa obi a hom nyim no. Ebɛyɛ Ewuradze ho dasefo n’asekyerɛ nye dɛn? Ebɛn asɛm na yebotum akã afa No ho akyerɛ nkorɔfo?
Isaiah 44:3–4; 45:8
Ewuradze “bohue” Ne nhyira egu mo do.
-
Hom akenkan nyiyimu yinom ewie no, wo mbofra no botum dze nsu egugu eduaba bi do na wɔakã nhyira a Ewuradze ehue egu hɔn do ho asɛm. Ebɛn asɛm na obesi edauba no do sɛ yegugu do nsu a? Ewuradze ne nhyira esi dɛn aboa hɛn ma yeenyin?
Hɛn “tseneneeyɛ [botum] ayɛ dɛ po asorɛkye” (Isaiah 48:18).
Isaiah 48:17–18
Yerisie Nyankopɔn ne mbrasɛm dze asomdwee ba.
-
Esutsen anaa po asorɛkye mfonyin anaa video horow botum aboa wo mbofra ma wɔdze hɔn enyiwa esusu dza ɔwɔ Isaiah 48:18 (tse dɛ mfonyin a ɔwɔ n’apɔwdo yi mu no). Wo mbofra no hɔn enyi botum agye dɛ wɔrototo hɔn nsa na hɔn abasa tse dɛ esutsen na po asorɛkye. Asomdwee besi dɛn botum ayɛ tse dɛ esutsen? Tseneneeyɛ besi dɛn botum ayɛ tse dɛ asorɛkye? Kasa fa mbrɛ irisie Nyankopɔn ne mbrasɛm no esi aboa wo ma atse asomdwee nkã tse dɛ esutsen anaa ahyɛ dzen tse dɛ asorɛkye dzendzen ho asɛm.
-
Hom mbɔ mu ntow ndwom a ɔfa mbrasɛm no ho, tse dɛ “Keep the Commandments” (Children’s Songbook, 146-47). Ebɛnadze na ndwom yi kyerɛkyerɛ fa siantsir a ɔwɔ dɛ yesie Nyankopɔn ne mbrasɛm ho?
Isaiah 49:14–16
Ewuradze no werɛ nnkefir me da.
-
Isaiah 49:14–16 botum ayɛ awerɛkyekyer kɛse ama wo mbofra no mfe pii a ɔbɛba. Ber a ekenkan nyiyimu 14 no, ibotum akasa afa dza obotum ama nkorɔfo atse nka dɛ wɔnnkaa hɔn anaa wɔapow hɔn ho asɛm. Yesi dɛn hu dɛ Ewuradze no werɛ mmfir hɛn?
-
Ibobue nyiyimu 15–16 enyi no, ibotum ebisa wo mbofra no obi a hɔn werɛ nnkefir no da ho asɛm, tse dɛ busuanyi bi anaa nyɛnko. Dɛ mbrɛ Isaiah 49:15–16 kã no, ebɛnadze ntsi na Ewuradze no werɛ nnkefir hɛn da? Nkyii hom botum nye homho akyɛ hom atsenka fa Jesus Christ ho.
Epɛ bi akã ho a, hwɛ bosoom yi Friend dawurbɔ krataa mu.