Isaiah 13–14; 22; 24–30; 35

Isaiah ne nda mu no, nna Babylon yɛ ahenman kɛse a ne hen wɔ tum. Sesei dze Babylon yɛ tsetse abakɔsɛm. Dɛm a ebɛnadze ntsi na Isaiah n’asɛm ma Babylon, wɔ Isaiah 13–14, no hia ma hɛn ndɛ? Osiandɛ Babylon gyina hɔ ma ahantan, dzifodzepɛ, na bɔn, ndzɛmba a wɔda ho twa hɛnho hyia ndɛ ntsi a. Dwen ngyinahɔmadze yi ho ber a ekenkan Isaiah 13:1–11, 19–22; 14:1–20. Ibotum ahwɛ nsɛmbisa tse dɛ iyinom:

• Ebɛn asɛfo na ihu no wɔ Babylon hen n’ahantan na Satan n’ahantan ntamu? (hwɛ Isaiah 14:4–20; Moses 4:1–4). Ebɛn kɔkɔbɔ na ihu ma woho wɔ nyiyimu yinom mu?

• Agyenkwa no si dɛn ma “ahomgye fi wo yaw mu, na wo suro mu”? (Isaiah 14:3).

Isaiah ne nkyerɛkyerɛ no taa kã Agyenkwa no somduwma, No werdam afɔrbɔ, Wusoɛr, a Mbae a Otsĩa Ebien no kã ho no ho asɛm. No somdwuma fã bɛn na ekaa ber a ekenkan nyiyimu yinom no: Isaiah 22:22–23; 24:21–23; 25:6–8; 26:19; 28:16? Ebɛn nsɛnsin binom so na ihu a ɔbɔ wo nkaa fa Agyenkwa no ho?

N’ehumbɔbɔr mu no, Ewuradze somaa Isaiah dɛ ɔnkɔbɔ ahyɛmu nkorɔfo no kɔkɔ dɛ wɔreman efi No hɔ. Hwɛ sɛ ibotum ehu sunsum mu kɔkɔbɔ sɛnkyerɛdze fa iyi ho wɔ Isaiah 24:5; 29:13; 30:8–12. Ebɛnadze ntsi na suban na ndzeyɛe yinom yɛ sunsum mu esian?

Ɔbɔbɔ kɔkɔ wɔ eredan efi Ewuradze ho ho nsunsuando no ho no, Isaiah dze ntotoho nwanwa dzii dwuma. Ber a isũa no, bisa woho mbrɛ eredan efi Ewuradze ho si tse dɛ:

• Asaase a ɔda hɔ pan, afõ (Isaiah 24:1–12).

• Wɔnam nsã do abow (Isaiah 28:7–8).

• Ɔkɔm na nsukɔm (Isaiah 29:7–10).

• Afasu a oebubu anaa sɛn a wɔabobɔ (Isaiah 30:13–14).

Dɛn ntsi na ohia dɛ yɛbɛn Ewuradze?

Ana ayew biribi a edween ho dɛ nnkohu no bio da? Anaa ibia biribi buii, na ɔhaaw wo dɛ wonnkotum esiesie da. Sɛ yɛdan fi Ewuradze hɔ a, Satan pɛ dɛ yɛdwen dɛ yennkotum asan hɛn ekyir da anaa wɔasa hɛn yarba bio. Naaso, Isaiah kãa ahobowdze a Ewuradze bɛyɛ dze aboa hɛn ma yɛasan akɔ No hɔ. Ebɛnadze na isũa fi Isaiah 29:13–24; 30:18–26; 35 mu fa Ewuradze, No dɔ, na No tum ho? Ibia ibotum ahwehwɛ asɛnsin wɔ nsɛmfua yinom mu a ɔma wo enyidado ber a ihia ayarsa. Ibotum asan so ahwɛ Akyerɛbaa Amy A. Wright n’asɛm, “Christ Heals That Which Is Brokenmu,” (Liahona, Esusow Aketseaba 2022, 81–84).

Kwan kor a Ewuradze da No tum na n’ehumbɔbɔr edzi nye odua N’asɛmpa ne Nsanananmu do. Nsɛnsin beberee wɔ Isaiah 29 mu a ne nsɛdo wɔ dza osisii wɔ Nsanananmu no mu. Mfatoho:

• Fa Isaiah 29:11–12 toto 2 Nephi 27:6–26 na Joseph Smith—Abakɔsɛm 1:63–65 ho.

• Fa Isaiah 29:13–14 toto Nkyerɛkyerɛ na Ahyɛmudzi 4 na Joseph Smith—Abakɔsɛm 1:17–19 ho.

• Fa Isaiah 29:18–24 toto Mormon Nwoma ne dzin krataafa no ho.

Wo nsusui mu no, ebɛnadze ntsi na “ahobowdze” na “anwanwadze” (Isaiah 29:14) yɛ nkasafua apapa a wɔdze kã Ewuradze a ɔresan N’asɛmpa no anananmu no ho asɛm. Ibesi dɛn botum aboa ma nkɔnhyɛsɛm fa Nsanananmu ho no ahyɛ mã? Epɛ adwenkyerɛ a, hwɛ Elder Gerrit W. Gong n’asɛm “All Nations, Kindreds, and Tongues mu,” (Liahona, Ɔberɛfɛw 2020, 38–41).

San so hwɛ “The Restoration of the Fullness of the Gospel of Jesus Christ: A Bicentennial Proclamation to the World {Jesus Christ N’Asɛmpa no ne Mãhyɛ ne Nsanananmu no: Mfe Ahaebien Dawurbɔ a wɔdze ma Wiadze]’’ (Asɛmpa Nwoma Korabea); “The Morning Breaks,” Asɔr Ndwom, nkanee 1.

• Ibesi dɛn bɔboa wo mbofra ma woehu Agyenkwa no wɔ Isaiah ne nkyerɛwee mu? Ibotum aboa hɔn ma woehu nsɛnsin a ɔbɔ hɔn No ho nkaa wɔ Isaiah 14:3; 25:8; mu anaa 28:16. Wobotum asan so dze nyiyimu yinom fi Isaiah mu ato nyiyimu binom so a wɔkyerɛkyerɛ Agyenkwa no ho nsɛm ho, tse dɛ Matthew 11:28–30; 1 Corinthfo 15:53–57; Helaman 5:12. Ebɛn ndzɛmba akɛse na Ewuradze ayɛ ama hɛn?

• Wɔabɔ mu akenkan Isaiah 25:8–9 ekyir no, hom botum ahwɛ Agyenkwa a ɔwɔ Gethsemane, mbeamudua do, na No Wusoɛr ekyir ho mfonyin. Ma wo mbofra no nkã dza orisi wɔ mfonyin no mu ho asɛm na siantsir a wɔdɔ Jesus na “hɔn enyi gye wɔ no nkwagye mu” (nyiyimu 9).

• Ibotum asan mu eyi na akã akyerɛ mbofra no afa awerɛhow a etsee mber a obi a edɔ no fii mu no. Gye awerɛkyekyer a inyae osian Jesus Christ ntsi ho dase. Bia wo mbofra no botum adorɔw enyim bi a orusu na nkyii wɔapepa nyinsuwa no ber a wɔbɔ mu kenkan Isaiah 25:8 no.

• Ana ɔwo na wo mbofra enya ahotɔ dabew fi ehum mu anaa nwin wɔ ɔhyew ber mu ho nhyira sũahu da? Anaa enya edziban papa bi edzi mber a nna ɔkɔm dze wo? Kã suahu horow yinom ho asɛm ber a ekenkan Isaiah 25:4–6. Jesus si dɛn tse dɛ ndzɛmba yinom?

• Ber a enye wo mbofra kenkan Isaiah 29:14 no, enye hɔn nkyɛ nkasafua a n’asekyerɛ yɛ adze kor noara dɛ “ahobowdze” ɔnye “anwanwadze.” Ma wɔmboa wo na hwehwɛ ndzɛmba anaa mfonyin a ogyina hɔ ma Ewuradze n’ahobowdze wɔ nda a odzi ekyir no mu. Mormon Nwoma no bi, temple mfonyin, anaa Enyido-Adzehu a Odzi Kan (kor wɔ n’apɔwdo n’apɔwdo yi n’ahyɛse no) botum akã iyinom ho. Nkyii wo mbofra no botum asan mu eyi adze bi na wɔakyɛ siantsir a ɔyɛ ahobowdze ma hɔn.

• Ndwom fa asɛmpa ne Nsanananmu ho no botum nye Isaiah 29akɔ yie, tse dɛ “On a Golden Springtime” (Children’s Songbook, 88). Na bia wankasa wo sũahu botum aboa mbofra no ma wɔatse dza nsanananmu ase kyerɛ. Mfatoho, ɔwo na wo mbofra no botum akasa afa biribi a eyewee na mbrɛ isii hunii no ho asɛm. Boa wo mbofra no ma wɔmfa iyi ntoto asɛmpa ne Nsanananmu no ho. Dɛ mbrɛ Isaiah 29:13–15 kã no, ebɛnadze ntsi na yehia Nsanananmu? Ebɛn ahobowdze na Ewuradze reyɛ dze N’asɛmpa no asan ananmu? (hwɛ dapɛn yi no dwumadzi krataafa).