“Fankwa 7–13. ‘Ɔno na Ɔbɛkyerɛ Wo W’akwan’: Mbɛbusɛm 1–4; 15–16; 22; 31; Ɔsɛnkafo 1–3; 11–12,” Bra, Bɛka Mo Do—Dze Ma Fie na Asɔr: Ahyɛmu Dadaw 2026 (2026)
“Fankwa 7–13. ‘Ɔno Na Ɔbɛkyerɛ Wo W’akwan,’” Bra, Bɛka Mo Do: Ahyɛmu Dadaw 2026
Jesus with Children [Jesus nye Mbofra], Dilleen Marsh yɛɛ nsaano mfonyin no
Fankwa 7–13: “Ɔno Na Ɔbɛkyerɛ Wo W’akwan”
Mbɛbusɛm 1–4; 15–16; 22; 31; Ɔsɛnkafo 1–3; 11–12
Ibotum adwen Mbɛbusɛm nwoma no ho dɛ nyansa afotu mboano fi awofo adɔfo hɔ (hwɛ Mbɛbusɛm 1:8). N’asɛm tsitsir nye dɛ sɛ ehwehwɛ nyansa a—tsitsir ara Nyankopɔn ne nyansaa a—abrabɔ bɔkɔ yie. Na Ɔsɛnkafo nwoma no na ɔtoa Mbɛbusɛm do, a ɔyɛ dɛ ma ɔkã dɛ, “Ɔnnyɛ mberɛw dɛm.” Asɛmpakãnyi a wɔkãa n’asɛm wɔ Ɔsɛnkafo mu no hun dɛ “[ɔ]dze [n’]akoma maa dɛ obohu nyansa” mbom ɔkɔr do hun “aahowko” na “ɔdɔr awerɛhow” (Ɔsɛnkafo 1:17–18). Akwan ahorow mu no, nwoma no bisa dɛ, “Ana nokwar mfaso botum awɔ wiadze a biribiara yɛ egyangyandze, ɔnnkyɛr, na onnsi pi mu a?’’
Naaso, ber a nwoma ebien no hwɛ abrabɔ no fi nhumu nsonsonee mu no, wɔkyerɛkyerɛ nokwar horow a wɔsɛ. Ɔsɛnkafo no paa mu kã dɛ: “Asɛm no n’ewiei nye yi: “Suro Nyankopɔn, na dzi ne mbrasɛm do: na iyiara nye nyimpa no dwuma nyina” (Ɔsɛnkafo 12:13). Iyi nye fapem noara a wohu no wɔ Mbɛbusɛm nyina mu no: “Fa wo werɛ nyina hyɛ Ewuradze mu” (Mbɛbusɛm 3:5; san so hwɛ nyiyimu 7). Ber a yɛtwer na yɛkã Ewuradze Jesus Christ do no—sɛ aber nyina abrabɔ enndzi mu mpo a—aber nyina no abrabɔ yɛ yie.
Epɛ nwoma yinom hɔn mbobɔdo a, hwɛ “Mbɛbusɛm nwoma” na “Ɔsɛnkafo” wɔ Kyerɛwsɛm no Kwankyerɛ mu.
Adwenkyerɛ horow ma Adzesũa wɔ Fie na wɔ Asɔr
Mbɛbusɛm 1–4; 15–16; Ɔsɛnkafo 1–3; 11–12
“Kyɛn w’aso ma nyansa.”
Nyansa ho nhumu ahyɛ Mbɛbusɛm na Ɔsɛnkafo nwoma no mu mã. Hwɛ dɛ ebɛhyɛ kasafua “nyansa” no nsew na nkasafua a ɔfa ho, tse dɛ “nyimdzee” na “ntseasee,” sɛ ihu hɔn wɔ Mbɛbusɛm 1–4; 15–16; Ɔsɛnkafo 1–3; 11–12 mu a. Etsir yinom si dɛn nya nsunsuando wɔ kwan a edwen fa nyansa ho do? Ogyina dza ibohu do no, ibesi dɛn bɛkã nyansa a “Ewuradze dze ma” no ho asɛm? (Mbɛbusɛm 2:6). Ebɛn nhyira na ofi Nyankopɔn ne nyansaa mu ba?
San so hwɛ Matthew 7:24–27; 25:1-13.
Boa adzesũafo ma wɔnkyɛ dza worusũa no. “Ma adzesũafo akwanhorow ma wɔnye hɔnho nkyɛ dza worusũa fa Agyenkwa no na N’asɛmpa no ho. Ereyɛ iyi no bɔboa hɔn ma wɔatse nokwar horow a wɔakyerɛkyerɛ hɔn no ase na wɔada no edzi. Ɔbɔboa hɔn so ma woenya ahotodo wɔ hɔn ahom mu dɛ wɔbɛkyɛ nokwar horow no wɔ gyinabew binom so mu” (Teaching in the Savior’s Way, 26). Mfatoho, ibotum ato nsa afrɛ adzesũafo ma wɔakyerɛw nhwehwemu bi fi Mbɛbusɛm anaa Ɔsɛnkafo mu a wohu nhumu fa Nyankopɔn ne nyansaa ho ato hɔ. Nkyii to nsa frɛ adzesũafo ma wɔnkasa mfa dza woesũa no ho.
Mbɛbusɛm 1:7; 2:5; 3:7; 15:33; 16:6; 31:30; Ɔsɛnkafo 12:13
“Mma nnyɛ wankasa w’enyiwa do onyansafo: suro Ewuradze.”
Ngyinado kor so a yehu no wɔ Mbɛbusɛm na Ɔsɛnkafo nyina mu nye “suro Ewuradze.” Hwehwɛ asɛnsin yi ber a ekenkan. Edwen ho a suro Ewuradze n’asekyerɛ nye dɛn? Hwehwɛ nhumu wɔ Elder David A. Bednar n’asɛm, “Therefore They Hushed Their Fears mu,” (Liahona, Esusow Aketseaba 2015, 46–49). Suro Ewuradze si dɛn yɛ soronko fi suro nkaa no ho?
San hwɛ Mbɛbusɛm 8:13.
Mbɛbusɛm 3:5–7; 4
“Fa wo werɛ nyina hyɛ Ewuradze mu”.
Ibesi dɛn bɔbɔ mbɔdzen adɛfɛdɛfɛw obi dɛ oye dɛ “[yɛdze] [hɛn] werɛ [bɛ]hyɛ Ewuradze mu” kyɛn dɛ “[yɛbɔ]twer … [hɛn]ankasa hɛn ntseasee”? (Mbɛbusɛm 3:5). Ebɛn ntotoho anaa adzesũadze na edze bedzi dwuma? Ber a edwendwen Mbɛbusɛm 3:5–7 ho no, dwen akwanhorow a ibotum dze ewie nsɛntɔw tse dɛ iyinom: Edze wo werɛ rɛhyɛ Ewuradze mu no tse dɛ … Yɛrotwer hɛnankasa hɛn ntseasee tse dɛ …
Ebɛnadze ntsi na nyansa innyim dɛ yɛbɔtwer hɛnankasa hɛn ntseasee? Esi dɛn ehu dɛ Ewuradze yɛ nokwarfo?
Ɔno mpo no, ɔtɔfabi a otum yɛ dzen ma hɛn dɛ yɛdze hɛn werɛ bɛhyɛ Ewuradze mu. Ebɛnadze ntsi na ɔba no dɛm? Elder Gerrit W. Gong susu siantsir bi dze kã afotu a ɔyɛ mfaso ho, wɔ “Trust Again mu” (Liahona, Ɔberɛfɛw 2021, 97–99). Ebɛn nsɛm anaa nkyerɛkyerɛ na ihu no wɔ asɛm yi mu a obotum aboa obi a ma ɔasan dze no werɛ ahyɛ Ewuradze mu bio?
Mbɛbusɛm 3:6 na Mbɛbusɛm 4 dze abrabɔ toto “ananmɔnkwan” anaa “kwan” ho. Edwen ho a ma Ewuradze “[n]kyerɛ wo w’akwan” n’asekyerɛ nye dɛn? (Mbɛbusɛm 3:6). Ebɛnadze na ihu wɔ tsir 4 mu a ɔboa wo ma “[e]taataa w’ananmɔn pɛpɛɛpɛr”? (nyiyimu 26). Mfatoho, ebɛnadze na nyiyimu 11–12 na 18–19 kyerɛkyerɛ fa iridzi kwan a ɔtsen do ho nhyira ho? Nyiyimu 26–27 n’asekyerɛ nye ebɛnadze ma wo?
San so hwɛ 2 Nephi 31:18–21; “Lord, I Would Follow Thee,” Asɔr Ndwom, nkanee 220.
Mbɛbusɛm 15; 16:24–32
“Nyiano bɔkɔɔ pa ebufuw.”
Adwenkyerɛ bi a ɔwɔ Mbɛbusɛm 15–16 mu no botum ekenyan wo ma etu kwan a enye binom nya nkitahodzi ho mpon, nkanka adɔfo. Mfatoho, dwen mber tsitsir ho a “nyiano bɔkɔɔ” boaa wo ma “[epaa] ebufuw” (Mbɛbusɛm 15:1).
Ibotum asan so adwen mber bi a Agyenkwa no yɛɛ nkyerɛkyerɛ a ɔwɔ Mbɛbusɛm 15:1–4, 18 mu ho fasusu (hwɛ Mark 12:13–17; John 8:1–11). Ibesi dɛn botum edzi Ne fasusu do ber a enye binom nya nkitahodzi?
Afotu a ɔwɔ Mbɛbusɛm 15; 16:24–32 no besi dɛn botum afa ndɛ abaefor nkitahodzi ho? Hwɛ sɛ ibotum ehu nyiyimu wɔ etsir yinom mu a ibotum asan akã no dɛ afotu afa social media anaa text do nkitahodzi ho.
San so hwɛ Neil L. Andersen, “Following Jesus: Being a Peacemaker,” Liahona, Esusow Aketseaba 2022, 17–20; Ronald A. Rasband, “Words Matter,” Liahona, Esusow Aketseaba 2024, 70–77; For the Strength of Youth: A Guide for Making Choices (2022), 11–12.
Ɔbaa Nokwafo, Woana Benya? II, Louise Parker yɛɛ nsaano mfonyin no
Mbɛbusɛm 31:10–31
“Ɔbaa a osuro Ewuradze no, wɔkamfo no.”
Mbɛbusɛm 31:10–31 kã “ɔbaa nokwafo” anaa ɔbaa a ɔwɔ sunsum mu ahoɔdzen, ahom, na nhyɛdo kɛse ho asɛm. Ibotum abɔ mbɔdzen dze ɔwoara wo nsɛmfua abɔ dza nyiyimu yinom kor biara kã fa mbaa anokwafo ho no tɔw. Su yinom mu hendze na ibotum esũasũa?
Ɔsɛnkafo 1–3; 12
Ɔnnkyebo abrabɔ yi nnkyɛr.
Ebɛnadze ntsi na ɔsom bo ma wo dɛ ebɛkaa dɛ wiadze yi mu no dodowara, dɛ mbrɛ Ɔsɛnkafo 1–2 si no tadua no yɛ “egyangyandze” (anaa ɔnnkyɛr na ɔtaa dɛ no ho nnhia)? Ebɛnadze na ihu no wɔ Ɔsɛnkafo 12 mu a ɔma nkwa som bo a onnyiewiei?
Epɛ bi akã ho a, hwɛ bosoom yi Liahona na For the Strength of Youth [Ma Mbabun Enya Ahoɔdzen] dawurbɔ nkrataa mu.
Adwenkyerɛ horow ma Erekyerɛkyerɛ Mbofra
Mbɛbusɛm 1:7; 2:5; 15:33; 16:6; Ɔsɛnkafo 12:13
“[Ibo]suro Nyankopɔn” n’ase kyerɛ dɛ ebɔdɔ na ayɛ setsie ama No.
-
Ama wɔaaboa wo mbofra no ma wɔatse nsɛnsin a ɔfa irusuro Nyankopɔn ho no, ibotum dze nkasafua tse dɛ enyidzi, ɔdɔ, anaa setsie ahyɛ kasafua “suro” ananmu (san so hwɛ Hebrewfo 12:28). Iyi si dɛn nya nsunsuando wɔ kwan a yɛdwen fa nyiyimu yinom ho do? Yebesi dɛn akyerɛ dɛ yesuro Ewuradze?
Mbɛbusɛm 3:5–7
Mubotum dze mo werɛ nyina ahyɛ Ewuradze mu.
-
Ɔwo na wo mbofra botum ayɛ ndzeyɛe ma ɔnye Mbɛbusɛm 3:5–7 afa, tse dɛ hom dze hom nsa reyɛ akoma, hom rotwer wɔ hom afã do, hom renantsew wɔ hom ananmu, na hom rekyerɛ hom enyiwa. Yesi dɛn kyerɛ dɛ yɛdze hɛn werɛ nyina hyɛ Jesus Christ mu?
-
Ama aakyerɛ dza “mma nntwer wankasa wo ntsesaee” (Mbɛbusɛm 3:5) n’ase kyerɛ no, hwɛ na to nsa frɛ wo mbofra ma wɔntwer biribi dzendzen, tse dɛ afasu. Nkyii wobotum abɔ mbɔdzen atwer biribi a ɔnnyɛ dzendzen, tse dɛ mena. Anaa wobotum abɔ mbɔdzen dɛ wɔdze dua anaa akyerɛwdua bɔtwer ndzɛmba bi a hɔn ntsimii nnyɛ pɛ, tse dɛ buukuu anaa krataa sin bi. Ebɛnadze ntsi na ohia dɛ “yɛbɔtwer Ewuradze” (nyiyimu 5) na nnyɛ “hɛnara hɛn ntseasee”?
Learning to Trust the Lord [Irusũa dɛ Edze Wo Werɛ Bɛhyɛ Ewuradze mu], Kathleen Peterson yɛɛ nsaano mfonyin no
Mbɛbusɛm 15:1, 18
Mubotum akã kasapa.
-
Bia ɔwo na wo mbofra botum adwen gyinabew ahorow a ɔwo anaa hɔn hɔn bo botum efuw ho. Hom mbɔ mu nkenkan Mbɛbusɛm 15:1, na boa wo mbofra no ma wɔmfa nyiyimu yi nto gyinabew horow a wɔdwen ho no ho. Bia wobotum esũasũa “nyiano bɔkɔɔ.” Ndwom a ɔfa ayamuyie ho, tse dɛ “Love Is Spoken Here” (Children’s Songbook, 190-91), botum ahyɛ fapem yi mu dzen.
-
Ama hom eesũa ebɛfa “ebufuw nyaa” (Mbɛbusɛm 15:18) n’asekyerɛ no, ɔwo na wo mbofra no botum akyɛ mber a ɔwo (anaa obi a inyim no) no bo fuwii na mbom ɔfaa dɛ ɔbɛyɛ ayamuyie. Boa wo mbofra no ma wɔndwen ndzɛmba ho a yebotum ayɛ ntsɛm dɛ yɛbɛyɛ sɛ “yɛfa ebufuw nyaa” a. Mfatoho, yebotum ayɛ ntsɛm adwen Jesus ho, dze ebisa Ɔsor Egya hɔ mboa, dze adwen Primary ndwom ho, anaa, sɛ ɔbɛyɛ yie a, yɛanantsew efi hɔ.
Epɛ bi akã ho a, hwɛ bosoom yi Friend dawurbɔ krataa mu.