Nsɛm ho Hia

Enuanom, nkyerɛbaa, na adɔfo a hom wɔ wiadze nyina mu, ɔyɛ me enyimnyamhyɛ dɛ merebɛkasa akyerɛ etsiefo dɔm kɛse yi, hom mu dodowara yɛ hɛn Asɔrmba, na dodowara so yɛ anyɛnkofo na ehyiadzi yi dawurbɔ n’etsiefo afoforfo. Akwaaba!

Amandzɛɛbɔ a yɛkyɛ fi asɛnkãdaka yi do no nsɛm na wɔdze kã. Wɔkã no Ngyiresi Borɔfo kasa mu na wɔakyerɛ ase akɔ kasa ahorow bɛyɛ 100 mu. Ber biara ne fapem yɛ kor noara. Nsɛm. Na nsɛm no ho hia ara yie. Hom mma menkã no bio. Nsɛm ho hia!

Hɔn nye hɛn nkitahodzi ho botantsim; wɔkyerɛ hɛn gyedzi, ɔbra pa su, na hɛn gyinabew. Ɔtɔfabi a yɛkã nsɛm; mber binom so mu no yetsie. Nsɛm bɔ kwan. Wɔdze hɛn adwendwen, atsenkã, na sũahu ahorow, papa anaa bɔn no to gua.

Ɔyɛ yaw dɛ, nsɛm botum ayɛ dza wɔanndwen ho, wɔkã no ɔhardo, na ɔyɛ ahorba. Yɛakã ma epue no, yennkotum eyi asan ekyir. Wotum pira, wɔatsẽa, woetwitwa nyimpa egu famu, na woegya ɔsɛɛ ndzeyɛɛ mpo. Wobotum ahom hɛn do duduudur.

N’afã so no, nsɛm botum edzi konyimdzi ho afahyɛ, ayɛ enyidado na nkuranhyɛ. Wobotum ekenyan hɛn ma yɛadwen ho bio, yɛayɛ no fofor, na yɛasesa hɛn kwan. Nsɛm botum ebue hɛn adwen mu ama nokwar.

Ɔno ntsi, na dza odzi kan na ohia kɛse no, Ewuradze ne nsɛm ho hia no.

Mormon Nwoma mu no, nkɔnhyɛnyi Alma na no nkorɔfo wɔ tsetse America no hyiaa ɔkõ a ɔmmbɔadze a wɔnye hɔn a wommbu Nyame n’asɛm, epirim hɔn akoma, a wɔasɛɛ hɔn amambra no kõe. Nkyɛ anokwafo botum akõ, naaso Alma tuu fo dɛ, “Na afei, sɛ wɔkã asɛm no a onya tum kɛse bi wɔ nkorɔfo no do ma ogya hɔn ma wɔyɛ dza ɔtsen—nyew, onya tum kɛse wɔ dɔm no hɔn adwen do sen nkrantsee, anaa adze biara a oesi hɔn do pɛn—dɛm ntsi Alma hun dɛ obeye dɛ wɔdze Nyame n’asɛm no nokwar no bedzi dwuma ahwɛ.’’

“Nyame n’asɛm bor dza yɛbɛkã nyinara do. Dɛmara na wɔayɛ fitsi asaase no Mbɔe ber a Ewuradze kasaa see dɛ” “Ekan mbra: na ekan bae.”

Fi Agyenkwa hɔ no na awerɛhyɛmu nsɛm yi baa wɔ Ahyɛmu Fofor no mu: “Ɔsor nye asaase botwa mu akɔ na me nsɛm dze, orunntwa mu.”

Na iyi, “Sɛ obi dɔ me a, obesie m’asɛm na m’Egya bɔdɔ no, na yɛbɛba ne nkyɛn, na yɛbɛyɛ hɛn tsenabew wɔ ne nkyɛn.”

Na fi Mary, Jesus ne maame hɔ no, na ahobrɛadze dasegye yi bae: “Hwɛ Ewuradze afonaba nye me, ɔnyɛ hɔ mma me dɛ mbrɛ w’asɛm se.”

Yɛregye Nyame n’asɛm edzi na yesie no bɔtwe hɛn abɛn No yie. President Russell M. Nelson abɔ anohoba dɛ, “Sɛ hom bosũa Ne nsɛm a, hom botum abɛyɛ tse dɛ Ɔno no bɛyɛ kɛse.

Dɛ mbrɛ asɔr ndwom bi se no, ana yɛmmpɛ dɛ, “yɛyɛ nhyira na krɔnkrɔn—yie, Agyenkwa, tse dɛ Ɔwo”?

Muhu m’enyi do mfonyin a aberantsɛba Joseph Smith ebu nkotodwe na ɔretse n’Egya a ɔwɔ Sor ne nsɛm: “[Joseph,] Iyi nye Mo Dɔba. Tsie No!”

“Yetsie No” wɔ kyerɛwsɛm nsɛm mu, naaso ana yɛma wɔtsena krataafa no do ara, anaa yehu hu No dɛ Ɔno na Ɔrekasa kyerɛ hɛn a? Ana yɛsesã?

“Yetsie” no wɔ ankorankor nyikyerɛ na nkenyan a ofi sunsum Krɔnkrɔn no hɔ, wɔ mpaabɔ nyiano mu, na dɛm mber no a Jesus Christ nko na, Orudua No Werdambɔ no tum no do, Obotum epegya hɛn adzesoa, na Ɔama hɛn bɔnfakyɛ na asomdwee, na Oefua hɛn wɔ “no ɔdɔ abasa no mu.”

Otsĩa ebien, nkɔnhyɛfo nsɛm ho hia.

Nkɔnhyɛfo gye dase dɛ Jesus Christ yɛ krɔnkrɔn. Wɔkyerɛkyerɛ hɛn N’asɛmpa na wɔkyerɛ No dɔ ma hɛn nyina. Megye dase dɛ hɛn nkɔnhyɛnyi tseasefo, President Russell M. Nelson, tse na ɔkã Ewuradze n’asɛm.

President Nelson wɔ ne kasa kwan. Ɔakã dɛ, “Yɛnnantsew wɔ ahyɛmu anamɔn kwan no do,” “Hom mboa Israel ano,” “Hom mma Nyame ndzi nyim,” “Hom nkyekyer ntseasee bregye horow,” “Ma ndaase,” “Tow wo gyedzi wɔ Jesus Christ mu,” “Wankasa kora wo dasegye do,” na “Bɛyɛ siesiefo.”

Ndaansa yi ara mpo, ɔase hɛn dɛ “yendwen celestial adwen.” Ɔkãa dɛ, “sɛ biribi rekyer w’adwen a, dwen celestial adwen!” Sɛ nsɔhwɛ to wo a, dwen celestial adwen! Sɛ abrabɔ anaa dɔfo bi bu wo enyimtsia a, dwen celestial adwen! Sɛ obi wu mpofirmu wu a, dwen celestial adwen!Sɛ abrabɔ mu nkõdzen hyɛ wo do a, dwen celestial adwen! … Ber a edwen celestial adwen no, nkakrankakra, w’akoma sesã, … ibohu nsɔhwɛ na dza otsia wɔ kan fofor mu, … [na] wo gyedzi mu bɔtow.”

Sɛ yɛdwen celestial adwen a, yehu “ndzɛmba ho nsɛm dɛ mbrɛ wɔtse pɛpɛɛpɛr, na … mbrɛ wɔbɛyɛ pɛpɛɛpɛr.” Wiadze yi mu adwensɛɛ na wentwiwentwi ayɛ adzesoa no, hɛn nyina yehia dɛm nhumu no.

Elder George Albert Smith, ansaana ɔrebɛyɛ Asɔr no ne President koraa no, kasae faa yɛrema nkɔnhyɛnyi no tsĩpia na yɛreyɛ aso ama ne nsɛm. Ɔkãa dɛ: “Asɛdze a yɛfa to hɛn do ber a yɛma hɛn nsa do … yɛ adze krɔnkrɔn mapã. … Ɔkyerɛ … dɛ yebegyina n’ekyir, yɛbɔbɔ mpaa ama no; … na yɛabɔ mbɔdzen dɛ yɛbɛyɛ n’ahyɛdze dɛ mbrɛ ma Ewuradze bɛkyerɛ.” Anaaso dɛ, yɛdze nkɔnhyɛnyi n’asɛm bedzi dwuma enyiberdo.

Dɛ mekã nkɔnhyɛfo, adzehufo, na nyikyerɛfo 15 a hɛn wiadze nyina mu Asɔr no maa hɔn tsĩpia ndeda no, mepɛ dɛ menye hom kyɛ mo sũahu horow a ɔfa erema nkɔnhyɛnyi tsĩpia na irufua ne nsɛm. Nna ɔtse dɛ nkɔnhyɛnyi Jacob dze no a, ɔkãa no dɛ, “Maatse Ewuradze so ne ndze a ɔrekã asɛm kor noara kyerɛ me.”

Ndaasa Ɔbɛsɛ yi, emi na me yer, Melanie nna yɛwɔ Bangkok, Thailand, ber a mereyɛ ahoboa ekotu dza ɔbɛyɛ Asɔr no temple a otsĩa 185 no ahyɛ Nyame nsa. Emi no, nna dwuma yi bor mo do na ɔyɛ ahobrɛase dze so. Iyi nye Asia Anaafo-anee asaase a opuw ba po mu no ne temple a odzi kan. Hɔn a wɔawea ara yie na wɔyɛɛ ho nhyehɛɛ—ɔtoado esia, na ɔwɔ sorɔnsorɔm akron, “okũakua enyim” dɛ ɔbɛyɛ Ewuradze ne fie. Abosoom pii mu na modwendween tu hyɛ Nyame nsa som no ho. Dza ɔdaa me kra na m’adwen do nye dɛ ɔman no na temple no wɔda nkɔnhyɛfo na asomafo hɔn abaw mu. President Thomas S. Monson na ɔdze temple no ho amandzɛɛbɔ too gua na President Nelson no tu hyɛ Nyame nsa som no.

Nna mayɛ tu hyɛ Nyame nsa mpaabɔ ho ahoboa abosoom pii. Wɔakyerɛ dɛm nsɛm krɔnkrɔn no ase akɔ kasa ahorow 12 mu. Nna yɛayɛ krado. Anaa dɛm na modwenee.

Anafua no ansaana tu hyɛ Nyame nsa som no, mosoɛree wɔ nda mu a, menyaa atsenkã dzendzen fa tu hyɛ Nyame nsa mpaabɔ no ho. Mobɔɔ mbɔdzen dɛ medze nkenyan no bɔto nkyɛn, rodwen dɛ mpaabɔ no da yie. Naaso Sunsum no enngyaa me. Menyaa atsenkã dɛ nsɛm bi nnyi mu, na ɔnam ɔsor nhyehyɛɛ do ɔbaa mo hɔ wɔ nyikyerɛ mu, na medze nsɛm yinom hyɛɛ ɔdze rokɔ mpaabɔ no ewiei: “Ama yɛaadwen celestial adwen, yɛama Sumsum no eedzi nyim wɔ hɛn abrabɔ mu, na yɛabɔ mbɔdzen ayɛ esiesiefo aber nyina.” Nna Ewuradze rekãa me dɛ menyɛ aso mma hɛn nkɔnhyɛnyi tseasefo no: “Dwen celestial adwen!,” “ma Sunsum no ndzi nyim,” “bɔ mbɔdzen dɛ ebɛyɛ siesiefo.” Nkɔnhyɛnyi n’asɛm hia ma Ewuradze na hɛn so.

Otsĩa ebiasa, na dɛm ntsi ohia papaapa no, nye hɛnankasa hɛn nsɛm. Gye me dzi dɛ, hɛn wiadze a emoji-ahyɛ mu mã no, hɛn nsɛm ho hia.

Hɛn nsɛm botum agye abamba anaa wɔahyɛ ebufuw, enyigye anaa tsirmɔdzen, tsema anaa woebu enyimtsia. Ber no mu ayɛ dzen no, nsɛm botum awɔ na wɔamem yayaayaw akɔ ɔkra no bun mu—na wɔakã hɔ. Hɛn nsɛm a ɔwɔ internet do, text, social media, anaa tweet horow nya hɔnara hɔn nkwa. Ntsi hom nyɛ ahwɛyie wɔ dza hom kã na mbrɛ hom dze kã ho. Hɛn ebusua ebusua mu no, nkanka yɛnye kunom, nyernom, na mba no, hɛn nsɛm botum akã hɛn abɔmu anaa ɔdze ekã bɔto hɛn ntamu.

Hom ma munsusu kasasin tsiabaa ebiasa a yebotum dze edzi dwuma eyiyi dza ɔyɛ dzen na nsonsonee mu bɔr no, na woepegya, na wɔama hɛn awerɛhyɛmu wɔ hɛnho nkorkor mu:

“Meda wo ase.”

“Maanyɛ no yie.”

Na “Modɔ wo.”

Mma hom mmfa ahobrɛadze kasasin yinom nnsie ntweɔn ber nwanwa bi anaa ɔsɛɛ da kɛse bi. Hom ntaa nkã na nokwar mu ara, osiandɛ ɔkyerɛ obu ma nkaafo. Kasa reyɛ kwa, mma ndzi dɛm nhwɛdo no ekyir.

Yebotum akã “meda ase” wɔ lift mu, wɔ ahɛngyinabea, wɔ guamu, wɔ ɔfese, wɔ bea a wɔasɔw do tsentsen, anaa akyerɛ hɛn fipamfo na anyɛnkofo. Yebotum akã “Mannyɛ no yie” ber a yɛfom, yɛannkɔ nhyiamu bi, hɛn werɛ fir awoda, anaa yehu obi ne yaw. Yebotum akã “Modɔ wo,” na dɛm nsɛm no dze amandzɛɛbɔ yi nam, “Morodwen woho.” “Wo ho adze hia me,” “Ɔwo ntsi na mowɔ ha,” anaa “Ɔwo nye me biribiara.”

Menkyɛ mankasa me mfatoho bi. Kunom, hom ntsie. Nkyerɛbaa, iyi bɔboa hom so. Ansaana merebɛyɛ edwuma ama Asɔr no me mber nyina no, nna metaa tu kwan ma m’edwuma no. Nna mber pii na midzi no wɔ wiadze ekyirekyir no. Da no ewiei no, bea a mowɔ biara no, daa me frɛ fie. Sɛ me yer, Melanie, fa foon no na yedzi nkyia a, aber biara hɛn nkɔmbɔdzi no gya hɛn ma yɛkã “Modɔ wo.” Da biara no, dɛm nsɛm no yɛɛ sekyɛ maa me kra na me ndzeyɛɛ; wɔyɛɛ bambɔ wɔ ɔbɔnfo ne nhyehyɛɛ ho. “Melanie, modɔ wo” kãa awerɛhyɛmu a ɔsom bo a ɔda hɛn ntamu ho asɛm.

Nna President Thomas S. Monson ɔtɔ dɛ ɔkã dɛ, “Anan wɔ hɔ a yebosuo mu egyina, nsa a yebosuo mu, adwen a yɛbɛhyɛ no nkuran, akoma a yebekenyan, na akra a yebɛgye hɔn.”. Yɛrekã “meda ase,” “mannyɛ no yie,” “Modɔ wo” no bɛyɛ dɛm ara.

Enuanom na nkyerɛbaa, nsɛm ho hia.

Mobɔ anohoba dɛ sɛ “yɛmee wɔ Christ ne nsɛm” a ogya kɔ nkwagye mu a, hɛn nkɔnhyɛnyi ne nsɛm a ɔma hɛn kwankyerɛ na ɔhyɛ hɛn nkuran, na hɛn ankasa hɛn nsɛm a ɔkyerɛ hɛn nyimpa ban na dza ɔsom bo ma hɛn a, ɔsor tum no bohue egu hɛn do. “Christ ne nsɛm no bɛkã ndzɛmba nyinara a ɔsɛ dɛ hom yɛ akyerɛ hom.” Yɛyɛ Ɔsor Egya ne mba na ɔyɛ hɛn Nyankopɔn, na N’enyi da hɛn kwan dɛ yɛdze “abɔfo takyerɛma bɛkasa” a yɛdze Sunsum Krɔnkrɔn no tum.

Modɔ Ewuradzi Jesus Christ. Ahyɛmu Dadaw mu nkɔnhyɛnyi Isaiah ne nsɛm mu no, Ɔno nye Ɔpamfo Nwanwanyi, Onyame Katakyi, Ɔdomankoma Egya, Asomdwee Hen.” Na dɛ ma Ɔsomafo John ma ɔdaa edzi pefee no, Jesus Christ Nankasa nye, “Asɛm no.”

Iyi ho na megye dase dɛ Ɔsomafo a wɔafrɛ no aba Ewuradze no som krɔnkrɔn no—dɛ membɛkã N’asɛm no—na wɔafrɛ me dɛ mingyina dɛ dasegyefo soronko mma No. Ewuradze Jesus Christ Ne dzin krɔnkrɔn no mu, amen.