Jesus Christ wɔ Hɛn Abrabɔ ne Finimfin.

Hɛn ɔnnkyebo abrabɔ ankwantu mu no, ɔtɔfabi a yehyia nkodzen horow: yaw dzendzen ɔnam adɔfo hɔn wui, kõ dzen tsia nyarbanyarba, nsisii no bɔr, ayakayakadze no sũahu yaayaw, edwuma ne nhweree, ebusua mu abɛbrɛsɛ horow, kommyɛ su wɔ ankonamyɛ ho, anaa ɔsatu a wɔdze akodze dzi ho nsunsuando yaayaw. Mber a ɔtse dɛm mu no, hɛn akra sũ hwehwɛ guandɔbea. Nokwar mu ara yehwehwɛ dɛ yebohu: Henfa na yebenya asomdwee seradze-dur no? Woana no mu na yɛdze hɛn werɛ bɛhyɛ ma ɔama hɛn akokodur na ahom ma yɛdze edzi nkodzen yinom do konyim? Woana na ɔwɔ abotar, ɔdɔ a otwa ho hyia, na tum nsa a ɔdze bepegya na ɔayge hɛn abamba?

Jesus Christ No dɔ a otsim no yi ɔkra ne nsɛmbisa tsitsir yi a oyi n’enyim wɔ hɛn sum na nkodzen ber mu no ano. Ɔnam No do, na N’asɛmpa a wɔdze asan ananmu aba, ho anohoba nhyira na yenya mbuae a yerohwehwɛ. Ɔnam No werdam afɔrbɔ a ɔmmbɔadze do na yeenya akyɛdze mbordo—dza ɔyɛ enyidado, ayarsa, na Ne daa daa nhyɛdo wɔ hɛn abrabɔ mu ho awerɛhyɛmu. Akyɛdze yi wɔ hɔ ma obiara a ɔdze gyedzi bofua asomdwee na nkwãgye a Ɔdze ma kwa no.

Ewuradze tserɛw Ne nsa mu ma hɛn mu kor biara, ndzeyɛɛ a ɔyɛ No dɔ na ayamuyie su ankasa. Ne nsato ma hɛn no tra ɔfrɛ kɛkɛ; ɔyɛ anohoba krɔkrɔn, a N’adom tum a ɔwɔ hɔ afebɔɔ no hyɛ no dzen. Kyerɛwsɛm mu no, ɔdɔ mu ara, ɔhyɛ hɛn nkuran dɛ:

“Hom nyina hom mbra mo hɔ, hom a hom reyɛ edwuma berɛ na wɔasoa hom dza ɔyɛ dur, na mebɛma hom ahomgye.

“Hom mfa mo kɔndua no nto hom do, na hom nsũa me; osiandɛ modwe na mebrɛ moho adze wɔ akoma mu: na hom benya ahomgye ama hom akra.

“Na mo kɔndua yɛ mberɛw, na m’adzesoa yɛ har.”

Nsato a no mu da hɔ “Hom mbra mo hɔ” na “Hom mfa mo kɔndua” si no pi N’anohoba ne kɛse a ɔyɛ—anohoba kɛse a odzi mu dɛ ɔyɛ No dɔ ho fasusu, a ɔrema hɛn awerɛhyɛmu a ɔyɛ awɔse dɛ: “Hom benya ahomgye.”

Ber a yɛdze enyimpisi hwehwɛ sunsum mu akwankyerɛ no, yɛhyɛ nsakyeree ase a ɔkɔ bun mu ho akwantu tsentsen a ɔhyɛ hɛn dasee dzen. Yerinya ntseasee wɔ mbrɛ Ɔsor Egya na Jesus Christ hɔn dɔ tserɛw na odzi mu ho no, dze enyisɔ, ahobrɛase, na ɔpɛ fofor dɛ yɛbɛnantsew osuanyiyɛ anamɔn kwan no do hyɛ hɛn akoma mã.

President Russell M. Nelson akyerɛkyerɛ dɛ, “Sɛ yɛdze hɛn abrabɔ tsim Nyankopɔn no nkwagye ho nhyehyɛɛ … na Jesus Christ N’asɛmpa no do a, yebotum enya enyigye a dza orisi—anaa dza orinnsi—wɔ hɛn abrabɔ mu no mmfa ho.’’ Enyigye fi No mu ba na osian Ɔno ntsi.”

Alma, ɔnye ne babanyin Helaman rekasa no, paa mu kaa dɛ: “Na afei, O me babanyin Helaman, hwɛ, ewɔ wo mberantsɛber mu, na dɛm ntsi, meserɛ wo dɛ tsie me nsɛm na sũa me; na minyim dɛ obiara a ɔdze no werɛ twer Nyame no ɔbɔboa no wɔ no nsɔhwɛ, nye n’amandzehu, nye n’akotorka mu, na ɔbɛma no do wɔ da a odzi ewiei no mu.”

Helaman, ɔnye ne mba mbanyin rekasa no, kyerɛɛ dɛm onnyiewiei ngyinadoasɛm a ɔfa yɛdze Agyenkwa no risi hɛn abrabɔ ne finimfin ho: “Hom nkaa, hom nkaa dɛ hɛn Pomfo a ɔyɛ Christ, Nyame ne Ba no, no botan no do na ɔwɔ dɛ hom tow hom fapem.”

Matthew 14 mu no, yesũa dɛ ber a Jesus tsee John Onumanyi no wu no, Jesus pɛɛ dɛ ɔbɛyɛ ankonam. Naaso dɔm tutuw kãa no do. Ehumbɔbɔr na ɔdɔ ekenyan no, na ɔamma ne yaw anndan n’enyi ennfi no botae ho no, Jesus gyee hɔn, saa ayarfo a wɔwɔ mu no yar. Ewimbir bɛnee no, esuafo no hyiaa tafɛrbayinmbɔmu a ɔbor hɔn do: dɔmtutuw a edziban kumaa bi wɔ hɔ ma hɔn. Wosusui dɛ nkyɛ Jesus mma dɔm no nkɔ nkɔtɔ edziban, naaso Jesus, Ɔdze dɔ na enyidado kɛse no, kãa kyerɛ esuafo no mbom dɛ wɔmma hɔn edziban.

Ber a esuafo no ridzi eboboo wɔ hɔn mprɛnprɛ tafɛrbayinmbɔmu ho no, Jesus kyerɛɛ Ne gyedzi na dɔ ma N’Egya, na dɔ a otsim ma nkorɔfo no. Ɔkyerɛɛ dɔm no dɛ wɔntsena efuw no do, na Oriyi panoo enum na nam ebien ara no, Ɔsan mu yii dɛ Ɔdze ndaase bɛma N’Egya, Ɔrekaa Nyame No mboa a odzi Ɔno no tumdzi na tum do.

Ɔdze ndaase mae wiei no, Jesus bubuu panoo no, na esuafo no kyɛɛ maa nkorɔfo no. Nwanwa mu ara, edziban no annsõ nko, mbom ɔbuu do, ma nkaa no yɛɛ nkɛntsɛn duebien mã. Mbanyin 5,000, na mbaa na mbofra binom so kã ho na wɔmaa hɔn edziban no.

Dɛm anwanwadze yi kyerɛ adzesũadze kɛsenara: sɛ yehyia tafɛrbanyinmbɔmu horow a ɔyɛ mberɛw dɛ yɛdze hɛn adwendwen nyinaa bɔto hɛnankasa hɛn ɔhaw horow do. Mbom, Jesus Christ yɛɛ fasusu wɔ tum a ɔwɔ iritsim wɔ N’Egya do mu, erema ndaase, na eregye to mu dɛ nnyɛ daa na hɛn nkodzen no mbuae wɔ hɛnankasa hɛn mu, mbom ɔwɔ Nyankopɔn hɔ ho.

Sɛ yehyia nkodzen a, ɔyɛ ntɔyɛɛ dɛ yetsim wɔ nkodzen a yehyia no do. Hɛn nkodzen horow wɔ hɔ ampa na wɔgye hɛn adwen naaso yeridzi do nkonyim nye hɛn botae. Yɛdze Christ reyɛ hɛn adwendwen na ndwuma ne fapem no, yɛdze hɛnho fam No botae na ahom ho. Dɛm nsesã yi nnyi hɛn nkodzen horow no akwa; mbom ɔboa hɛn ma yetum duadua mu a yɛdze ɔsor akwankyerɛ. Dɛm no ntsi yehu mbuae na mboa horow a ofi nyansa a ɔkrɔn mu. Yɛrefa dɛm Christ su adzehwɛ yi ma hɛn nyansa na nhumu ma yɛdan hɛn nsɔhwɛ ma wɔbɛyɛ nkonyimdzi, a ɔkaa hɛn dɛ ma Agyenkwa no dze, ma ɔyɛ dɛ ɔhaw kɛse bi no botum abɛyɛ anamɔn kwan ama sunsum mu mpontu kɛsenara.

Alma kakraba n’asɛm wɔ Mormon Nwoma no mu no ma hɛn mfatoho pɔkyee a ɔfa ɔpon na nsunsuando tsitsir a ɔwɔ edze wo bra ne fapem risi Christ do. Ahyɛse no, nna Alma kõ tsia Ewuradze N’Asɔr no, a ogyaa dodowara ma wofii tseneenee anamɔn kwan no do. Naaso, ɔsor mboa, a bɔfo ne nserae kã ho no nyaan no fii no bɔn ho.

No sum kebii ber mu, a no bɔn retseetsee no na ɔreper dɛ obenya kwan efi no sunsum mu amandzehu mu no, Alma kaa n’egya ne nkyerɛkyerɛ fa Jesus Christ na No Werdambɔ tum no ho. Ɔdze akoma a orusũ ma ɔpon no, onuu no ho nokwar mu na ɔtotɔe serɛɛ Ewuradze N’ehumbɔbɔr. Dɛm mber tsitsir yi mu a ogyaa biribiara mu na ɔdze Christ yɛɛ n’adwendwen ne fapem na nokwar mu ara ɔhwehwɛɛ N’ehumbɔbɔr no kenyann nsakyeree soronko. Bɔn no nkɔnsɔnkɔnsɔn duudur na abawgura yewee na dɛwdzi na asomdwee atsenkã mbordo hyɛɛ ananmu.

Jesus Christ nye hɛn enyidado na mbuae ma ɔbra ne yaw kɛsenara. Ɔnam N’afɔrbɔ do no, Otuaa hɛn bɔn kaw na ɔdze hɛn berɛ—yaw, nsisii, awerɛhow, na suro—too no ho do na Ɔdze bɔn kyɛ na Ɔsa hɛn yar sɛ yɛdze hɛn werɛ hyɛ No mu na yɛhwehwɛ dɛ yɛsakyer hɛn abrabɔ bɛyɛ papa a. Ɔyɛ hɛn yarsafo, Ɔrekyekye hɛn werɛ na Oesiesie hɛn akoma ɔnam No dɔ na tum do, dɛ mbrɛ Ɔsaa dodowara yarba ber a ɔwɔ asaase yi do no. Ɔno nye nkwa nsu no, Ɔdze no dɔ na ayamuyie a ɔmmbɔadze da rehyɛ hɛn akra n’ehiadze horow kɔ bun mu mã. Iyi tse dɛ anohoba a Ɔdze bɔɔ Samarianyi ɔbaa no wɔ nsubura no ho, Ɔrema nsu a ɔpem kɔ onnyiewiei nkwa mu.”

Megye dase ahobrɛase mu dɛ Jesus Christ tse ase, dɛ Ɔhwɛ N’Asɔr krɔnkrɔn yi do. Megye dase dɛ Ɔyɛ wiadze yi Agyenkwa, Asomdwee Hen, Ahemfo Hen, Ewuranom Wura, wiadze no Pomfo. Misi no tadua dɛ yɛwɔ N’adwen na N’akoma mu aber biara. Dza odzi iyi ho dase nye dɛ, Ɔdze N’Asɔr asan ananmu aba nda a odzi ekyir yi na Ɔafrɛ President Russell M. Nelson dɛ No nkɔnhyɛni na Asɔr no ne President dɛm aber yi. Minyim dɛ Ɔdze No nkwa mae ama yeenya onnyiewiei nkwa.

Ber a yɛper dɛ yɛdze no besi hɛn abrabɔ ne finimfin no, yenya nyikyerɛ, N’asomdwee fua hɛn, na No werdambɔ a ɔmmbɔadze ma hɛn bɔnfakyɛ na ayarsa ho kwan. No mu na yenya ahom dze dzi konyim, akokodur a wɔdze per kɔ kan, na asomdwee a ɔbor ntseasee nyinaa do, Yɛmper daa daa dɛ yɛbɔtwe abɛn No, ndzepa nyinara farbaa, enyidado kandzea wɔ hɛn akwantu kɔ hɛn Ɔsor Egya N’enyim. Jesus Christ ne dzin krɔnkrɔn no mu, amen.