Ndzɛmba Nyinara ama Hɛn Yieyɛ

Ndɛ yɛ Ebɔbira 6, Jesus Christ dze Ne nda a Odzi Ekyir Asɔr resan ananmu aba ho afahyɛ—na ɔkã Easter hyɛber ho a yɛgye Jesus Christ n’abrabɔ emudzi mu no, No werdam afɔrbɔ, na enyimnyam Wusoɛr no ho dase enyigye mu ara.

China asɛm bi hyɛ ase dɛ banyin bi a ne babanyin kohu pɔnkɔ fɛɛfɛw bi.

Fipamfo no se, “Ne tsir yie i.”

“Banyin no se, “Yɛbɔhwɛ.”

Nkyii babanyin no fi pɔnkɔ no do bɔhwe famu ma odzi dzɛm.

Fipamfo no se, “Ne tsir muo i.”

“Banyin no se, “Yɛbɔhwɛ.”

Nsordaafo a wɔfa nkorɔfo ba na wɔammfa babanyin no a oepira no.

Fipamfo no se, “Ne tsir yie i.”

“Banyin no se, “Yɛbɔhwɛ.”

Wiadze yi a ndzɛmba dandan yi a yɛtaa tse dɛ ehum rohwe hɛn, a yennyim dza ɔbɛba, ɔtɔfabi a oye, na—ɔtaa dɛ—omuo. Naaso, ahohia wiadze yi mu no, “yenyim dɛ hɔn a wɔdɔ Nyankopɔn, ɔdze adze nyina bɔ mu yɛ edwuma ma hɔn yie.” Nokwar, sɛ yɛnantsew tsenenee kwan do na yɛkaa hɛn ahyɛmudzi a, “ ndzɛmba nyina bɔkɔ do yie ama hom yieyɛ.”

Ndzɛmba nyinara ama hɛn yieyɛ.

Anohoba nwanwa! Awerɛkyekyer awerɛhyɛmu a ofi Nyankopɔn Nankasa hɔ! Anwanwadze kwan bi do no, Abɔdze no botae na Nyame No su nye yebohu ahyɛse na ewiei; dze dza oye nyina ma hɛn yieyɛ bɔbɔ adze; na Ɔboa hɛn ma yedua Jesus Christ n’adom na Werdambɔ no do ma hɛnho tsew na yɛyɛ krɔnkrɔn.

Jesus Christ No Werdambɔ botum agye hɛn na wɔapon hɛn efi bɔn ho. Na Jesus Christ so nyim hɛn yaw, amandzehu, yarba biara ara yie, awerɛhow na mpaapaamu. Mber na mfesantsen mu no, No konyimdzi wɔ owu na hɛl do no botum ama ndzɛmba nyina ayɛ yie Ɔboa sa nyia oebubu na ɔapa abaw yarba, siesie onyia no bo efuw na ɔdze nkyekyɛmu ba, kyekye ankonam na nyia ɔwɔ ekyirekyir hɔn werɛ, Ɔhyɛ nyia na onnyim dza ɔbɛba na onndzi mu no nkuran, Ɔyɛ anwanwadze a Nyame nko na Obotum ayɛ.

Yɛtow hallelujah na yɛtsẽa mu hosanna! Yɛdze onnyiewiei tum na papayɛ a ɔmmbɔadze, wɔ Nyame no nkwagye nhyehyɛɛ mu no, ndzɛmba nyina bɔkɔ do yie ama hɛn yieyɛ. Yebotum dze awerɛhyɛmu egyina abrabɔ enyim na yennsuro.

Wogya hɛn nko a, bia yennkohu dza oye ma hɛnankasa. Sɛ “mesan mu yi dza mepɛ a,” meresan mu eyi mankasa m’esintɔ, ahoɔmberɛw mberɛwyɛ. Ewiei no, ama yɛayɛ papa mapã no, otwar dɛ yɛyɛ papa. Osiandɛ obiara nnyi hɔ a ɔyɛ papa, ntsi yɛhwehwɛ emudzi wɔ Jesus Christ mu. Yɛbɛyɛ hɛn nyimpa ban mapã nokwar mu ara no gyedɛ yɛpɔr nyimpa su no gu nkyɛn na yɛbɛyɛ abofra wɔ Nyame enyim.

Yɛtwer Nyame na yɛwɔ gyedzi wɔ No mu no, nsɔhwɛ na atseetsee no wobotum atsew ho ama hɛn yieyɛ. Joseph, wɔtɔɔn no kɔr dɔnkɔyɛ mu wɔ Egypt, ekyir no ɔgyee n’ebusua na no nkorɔfo. Nkɔnhyɛnyi Joseph Smith ne Liberty efiadze ndae mu no kyerɛkyerɛɛ no dɛ “dɛm ndzɛmba yinom nyina bɛma wo ntɔhunii, na ɔbɛyɛ wo mfaso.” Yɛdze gyedzi robɔ bra no, nsɔhwɛ na afɔrbɔ horow a nkyɛ hɛn ankasa yɛnnkɛsaan mu eyi dabiarada no botum aboa hɛn na binom wɔ akwan a yennkotum esusu ho dabiarada.

Yɛtow gyedzi na awerɛhyɛmu wɔ Ewuradze mu dɛ ndzɛmba nyina botum akɔ do yie ama hɛn yieyɛ ber a yenya onnyiewiei nhumu; yɛtse ase dɛ hɛn nsɔhwɛ no “ɔrennkyɛr”; na yeehu dɛ hɛn atseetsee no wobotum atsew ho ama hɛn mfaso; na yeehu dɛ akwanhyia, mpofirmu owu, nyarba dzendzen na nyarba horow kã ɔnnkyebo abrabɔ ho, na yenya awerɛhyɛmu dɛ: hɛn Ɔsor Egya dɔfo mma nsɔhwɛ dɛ Ɔdze retsẽa anaa Orubua hɛn atsɛn. Ɔremma obi a obisa paanoo ɔbo anaa ɔwɔ ama obi obisa esunam.

Sɛ nsɔhwɛ ba a, ɔtaa dɛ dza yehwehwɛ kɛse nye obi a obetsie hɛn na ɔbɛtsena hɛn nkyɛn. Ber no mu no, nsɛnhun nyiano nnkotum aboa, mbrɛ wɔpɛ dɛ wɔdze kyekye hɛn werɛ biara mpo no. Ɔtɔfabi a yɛhwehwɛ obi a ɔnye hɛn bedzi yaw, nye hɛn esũ, na ɔama hɛn kwan ma yɛakã hɛn yaw, abagura, ɔtɔfabi a ebufuw mpo mu, na Ɔnye hɛn agye ato mu dɛ ndzɛmba binom wɔ hɔ a yennyim.

Sɛ yɛwɔ awerɛhyɛmu wɔ Nyankopɔn na No dɔ ma hɛn a, hɛn akoma bubui ne kɛse tse dɛn ara mpo a, ewiei no, ɔbɛyɛ edwuma ama hɛn yieyɛ.

Mekaa da no a metsee kaar akwanhyia a m’adɔfo wɔ mu. Mber a ɔtsetse dɛm mu no, awerɛhow na gyedzi mu no, yebotum ara nye Job akã dɛ, “Ewuradze dze mae, na Ewuradze afa kɔ; nhyira nkã Ewuradze ne dzin.”

Asɔrtɔw ne nyina mu no, bɛyɛ stake na mansin horow 3,500 na ward na nkorbata horow 30,000 no ma guandɔbew na bambɔ. Naaso hɛn stake na ward horow mu no, ebusua ebusua anokwafo pii hyia ɔhaw a ɔyɛ dzen, wonyim mpo dɛ ndzɛmba nyina bɔbɔ mu ayɛ edwuma ama hɛn yieyɛ (naaso wonnyim mbrɛ obesi bɛyɛ).

Huddersfield, England mu no, wohuun dɛ Onuabanyin Samuel Bridgstock wɔ kokoram yarba a ɔyɛ dzen, ɔkã mber kakra ara a wɔrebɛfrɛ stake president fofor no. Ne yarba a ɔyɛ dzen mu no, obisaa ne yer, Anna, siantsir a ɔwɔ dɛ ɔkɔ kokoamu mpɛnsapɛnsamu no mpo.

Akyerɛbaa Bridgstock see dɛ, “Osiandɛ wɔrebɛfrɛ wo dɛ stake president.”

Ahyɛse no wɔmaa no afe kor anaa ebien a ɔdze bɛtsena ase, sesei President Bridgstock (a ɔwɔ ha ndɛ no) ɔwɔ ne mfe anan a ɔdze rosom mu. Onya nda papa na nda a ɔyɛ dzen. Ne stake dze gyedzi ntomu, ɔsom, na ayamuyie roboa. Ɔnnyɛ mberɛw, naaso ne yer na n’ebusua dze gyedzi, enyisɔ robɔ bra, na awerɛhow a yɛtse ase a wɔwɔ ho awerɛhyɛmu dɛ obodua Jesus Christ no Werdambɔ a ɔsan ananmu ba no abɛyɛ enyigye a onnyiewiei.

Sɛ yɛyɛ komm, yebue hɛn akoma mu, na yedze obu a, bia yebotum enya fɛɛfɛw, botae, na ahyɛmu mbɛkãho ho asomdwee a Ewuradze dze ma no. Mber krɔnkrɔn yinom mu no, bia Ɔbɛma yɛahwɛ onnyiewiei nokwar kɛse no a hɛn daa daa abrabɔ hyɛ mu no ho kakrabaa, bea a akwan nketsenketse bɔmu yɛ edwuma ma amafo na agyefo hɔn yieyɛ.

Rebekah, me asɛmpakã dwuma president a odzi kan ne babaa, kyɛɛ mbrɛ Ewuradze sii buaa n’awerɛkyekye mpaabɔ ho a ɔdze mpofirmu kwan a Ɔdze yii obi fofor ne mpaabɔ ano.

Adzesaa ewimbir bi, Rebecca a ɔregyam ne maame a ndaasa yi otwaa mu no, nyaa nkenyan pefee dɛ ɔnkɔtɔ petrol ngu ne kaar mu. Ber a odur station hɔ no, ohyiaa basia panyin bi a ɔreper agye ahom a ɔdze mframapa tank kɛse bi. Ekyir no, Rebecca tumii dze ne maame ne mframapa efir dwɛdwɛabaa maa basia no. Akyerɛbaa yi kãa no enyisɔ mu ara dɛ, “Edze me fahodzi asan ama me.” Ndzɛmba bɔmu yɛ edwuma ma hɛn yieyɛ ber a yɛsom dɛ mbrɛ Jesus Christ bɛyɛ no.

Egya a wɔmaa no ne babanyin a oedzi-kyerɛkyerɛnyi mfe no dwuma dɛ adamfo a wɔrosom kyerɛkyerɛɛ mu dɛ, “Erosom nye yɛba bɛyɛ anyɛnkofo a wotum twer hɛn, sunsum mu aserafo akandzifo kyɛn yɛyɛ fipamfo a yɛdze anondze kɛma ara. Ahyɛmu mbɛkã ho wɔ Jesus Christ mu kyekye werɛ, ma nkitahodzi, ɔtsew ho

Esian yayaw ber mpo mu no, sunsum mu ahoboa botum akaa hɛn dɛ ber a yenyaa atsenkã dɛ yɛayɛ mberɛw koraa na ankonam no nna hɛn Ɔsor Egya nyim. Mfatoho, ebusua bi a hɔn abofra a wɔbɛfaa no kɔɔr asopitsi ekyir no wonyaa awerɛkyekyer ber a wɔkaa dɛ nna Sunsum Krɔnkrɔn no awasa dza obesi.

Ɔtɔfabi a onnyiewiei nokwar kɛse no a Ewuradze ma hɛn kwan ma yenya ho atsenkã no, ebusua a wɔwɔ ntwamutam ekyir no kã ho. Akyerɛbaa bi nyaa enyigye wɔ ne nsakyeree a ɔdze baa Jesus Christ n’asɛmpa a wɔdze asan ananmu aba no mu. Nna asɛmkɛse ebien akã n’abrabɔ—ɔhwɛɛ nsuhɛn akwanhyia bi na ne maame a okum nankasa noho ma ofii nsa yayaayaw.

Naaso akyerɛbaa yi hyɛɛ no nsu ho suro do ara ma onyaa nsumuhyɛ enuma. Na dza ɔbɛyɛɛ n’enyigye da kɛse no, nye dɛ ɔrohwɛ obi a, ɔyɛ ngyinahɔmanyi ma ne maame a oewu, worunuma no wɔ temple. Akyerɛbaa no kãa dɛ “temple enuma no maa me maame ayarsa, a ɔmaa me fahodzi. Ɔno nye da odzi kan a menyaa asomdwee fitsi ber a me maame wui no.”

Hɛn ndwom krɔnkrɔn no dze N’awerɛhyɛmu no gyegye dɛ ndzɛmba nyina botum akɔ do yie ama hɛn yieyɛ.

Mormon Nwoma no yɛ adanse a yebotum esuo mu wɔ hɛn nsamu dɛ Jesus nye Christ no na Nyankopɔn hyɛ No nkɔnhyɛ horow no mã. Nkɔnhyɛfo a woekenyan hɔn a wohun hɛn nda yi mu no kyerɛwee, Mormon Nwoma no dze ɔyɛkyerɛ a ɔrokɔ do hyɛ ase—ebusua a wɔdze nsonsonee a ɔdɔ bun mu ridzi esi. Naaso, sɛ yesũa na yɛdwendwen 1 Nephi 1 dze kesi Moroni 10 ho a, wɔtwe hɛn kɔ Jesus Christ hɔ a yɛdze dasegye a osi pi dɛ dza osii hɔ aber no botum ehyira hɛn wɔ ha ndɛ.

Ber a Ewuradze dua No nkɔnhyɛnyi tseasefo do dze Ewuradze fie dodow bɛn mbea a yɛwɔ no, temple nhyira reyɛ edwuma abɔ mu ama hɛn yieyɛ. Yedua ahyɛmu na ayɛdze do ba Nyankopɔn hɛn Egya na Jesus Christ hɔ na yenya onnyiewiei nhumu wɔ ɔnnkyebo abrabɔ ho. Nkorkor, dzin kor, dzin kor, yɛma ebusua mu mba adɔfo, hɛn ewuakɔr no bɔmu ber a yɛma ayɛdze krɔnkrɔn na ahyɛmu nhyira horow wɔ Ewuradze no nhwɛdo dɛ Bepɔw Zion agyefo no.

Ber a temple rebɛn hɛn wɔ mbea pii no, temple afɔrbɔ a yebotum ama nye yɛbɛtaa ahwehwɛ Ewuradze fie ne krɔnkrɔnyɛ no. Mfe pii mu no, yesie sika, yɛayɛ nhyehyɛɛ, na yɛabɔ afɔr dze aba temple. Sesei, dɛ mbrɛ gyinabew bɛma ho kwan no, yɛserɛ hom ntaa mpo mbra Ewuradze hɔ wɔ Ne fi krɔnkrɔn no mu. Ma temple sɔr na som a itaa yɛ no nhyira, ɔmbɔ wo ho ban na onkenyan ɔwo na w’ebusua—ebusua no a ewɔ no na ebusua ibenya na dabi ibɛba abɛyɛ no.

Bio, mbrɛ wo gyinabew bɛma ho kwan no, yɛserɛ susu dɛ ibenya wankasa wo temple ntar. Nana basia bi a ofi ebusua ahobrɛadzefo mu no kãa dɛ dza ɔrohwehwɛ kɛse wɔ wiadze yi mu, nye obenya nankasa ne temple atar. Ne nana babanyin no kãa dɛ, “Grandma wɔsaa dɛ, “Mobosom wɔ m’ankasa me temple atar mu, na muwu ekyir no, wobesie me wɔ mu.’” Na ber a mber no bae no, wɔyɛe maa no.

Dɛ mbrɛ President Russell M. Nelson, kyerɛkyerɛ no “Biribiara a yɛgye dzi na anohoba biara a Nyankopɔn dze abɔ ama Ne ahyɛmu mba no hyia mu wɔ temple”

Mber yi mu na mfesantsen no, abɔdze no mbɔe na Nyankopɔn Nankasa No su nye Ɔdze ndzɛmba nyina bɔbɔ mu ayɛ edwuma ama hɛn yieyɛ.

Iyi nye Ewuradze n’onnyiewiei botae no. Ɔyɛ n’onnyiewiei nhumu. Ɔyɛ n’onnyiewiei anohoba.

Ber a abrabɔ akyer do, na tsirmpɔw nnyɛ pefee, ber a epɛ dɛ ibɔ bra yie naaso innyim mbrɛ ibesi bɛyɛ no, yɛserɛ bra Nyankopɔn hɛn Egya na Jesus Christ hɔ. Nya awerɛhyɛmu dɛ Wɔtse ase, Wɔdɔ wo, na Wɔpɛ ndzɛmba nyina ma wo yieyɛ. Midzi dase dɛ Wɔyɛ, a ɔmmbuadze daapem, wɔ Jesus Christ ne dzin krɔnkrɔn no mu, amen.