Isaiah 1–12

Agyenkwa no kyerɛkyerɛɛ dɛ, “na ndzɛmba a [Isaiah] kãa ho nsɛm nyina ayɛ hɔ, na ɔbɛyɛ hɔ so, mpo dɛ mbrɛ nsɛm a ɔkãa no tse” (3 Nephi 23:3). Ber a isũa Isaiah nwoma no, hwɛ yɛ nkɔnhyɛsɛm horow nhyehyɛɛ a edze etsir tse dɛ iyinom: Isaiah ne da, Agyenkwa no ɔnnkyebo somdwuma, na Nda a odzi ekyir no. Hyɛ no nsew dɛ Isaiah no nkɔnhyɛsɛm pii no hyɛ mã wɔ akwan beberee mu (hwɛ Kyerɛwsɛm no Kwankyerɛ, “Isaiah”).

President Dallin H. Oaks kyerɛkyerɛɛ dɛ “Nkɔnhyɛsɛm bebereebe a ɔyɛ dɛ ne mãhyɛ yɛ dza ɔdɔɔ sõ no hyɛ Isaiah nwoma no mu mã. Kor yɛ dɛ Isaiah ne da mu nkorɔfo ho asɛm anaa mbasantsen a wɔreba no hɔn gyinabew horow ho asɛm. Nkyerɛase bi so, ɔtaa yɛ sɛnkyerɛdze, yɛ dɛ ɔkã dza osisii wɔ mber mu, mber a wɔsɛɛ Jerusalem na wɔbɔɔ no nkorɔfo apetse wɔ Nyankopɔn ne Ba ne mbeamuduabɔ ekyir no. Nkyerɛase bi so da ho anaa nkɔnhyɛsɛm kor noara ne mãhyɛ yɛ dɛ ɔfa dza obesisi wɔ Agyenkwa ne Mbae a Otsĩa Ebien no ho. Nokwar dɛ nkɔnhyɛsɛm yinom pii wɔ nkyerɛase ahorow no hyɛ hia a ohia dɛ yɛhwehwɛ hɛn nyikyerɛ fi Sunsum krɔnkrɔn no hɔ ma ɔaboa hɛn ma yɛakyerɛ mu” (“Scripture Reading and Revelation,” Ensign, Sanda 1995, 8).

Tse dɛ mber nyinara mu nkɔnhyɛfo no, Isaiah kɔr do bɔɔ nkorɔfo no kɔkɔ fa hɔn sunsum mu tsebea ho. Ber a ekenkan Isaiah 1; 3; 5, hwehwɛ nsɛnsin a ɔkã mbrɛ nna nkorɔfo no hɔn sunsum mu atsetsena si tse ho asɛm (hwɛ, mfatoho, Isaiah 1:2–4, 21–23; 3:9, 16–17; 5:11–12, 20–23). Ebɛn haw a wɔsɛ na ihu no wɔ hɛn mber yi mu? Ibotum asan so ahwehwɛ nyiyimu a ɔbɔ kɔkɔ fa Israelfo hɔn sunsum mu tsebea no nsunsuando ho (tse dɛ Isaiah 1:7; 3:17–26; 5:5–7, 13–15).

Dza ɔkã kɔkɔbɔ ho no, Isaiah maa enyidado ho nsɛm wɔ ɔpon a ɔnam Agyenkwa no do ho (hwɛ, mfatoho, Isaiah 1:16–19, 25–27; 3:10; 4). Ebɛnadze na isũa fa Ewuradze ho fi nsɛm yinom mu? Ewuradze ne nsɛm wɔ nyiyimu yinom mu si dɛn yɛ soronko fi dza Satan pɛ dɛ yɛgye dzi ho?

Tse dɛ Isaiah no, ndɛ nkɔnhyɛfo bɔ hɛn bɔn na no nsunsuando ho kɔkɔ, na wɔma hɛn enyidado nsɛm a ɔnam Jesus Christ do. Ebɛn mfatoho na ibotum adwendwen ho? Bia ebɛpɛ dɛ ebɔhwehwɛ asɛm bi mu fi wiadze mfɛndzanan ehyiadzi a ɔabasen kɔ mu, dze ahwehwɛ kɔkɔbɔ na anohoba a wɔtsetse dɛm.

Isaiah no nkɔnhyɛsɛm mu pii wɔ asekyerɛ soronko ma hɛn nda yi. Ibohu no, hwehwɛ ndaamba-kãbea nyɛe (tse dɛ “bɛyɛ” anaa “bɔkɔ”). Mfatoho, hwehwɛ nyɛe yinom ber a ekenkan Isaiah 2; 4; 11–12. Ibotum mpo abɔ mbɔdzen dze ndɛ-kãbea nyɛe (tse dɛ yɛ anaa rokɔ) ahyehyɛ ananmu. Ebɛn nkɔnhyɛsɛm na ɔyɛ nkenyan tsitsir ara ma wo? Ebɛnadze na isũa fi nkɔnhyɛsɛm yinom mu fa Zion, worisi temple, na Israel mboaboano ho?

Isaiah 2:2–3 hia tsitsir ara ma Latter-day Saintfo. Nkɔnhyɛsɛm yinom esi dɛn rehyɛ mã? Ebɛnadze na isũa fa Ewuradze “n’akwan” na “n’atsempɔn” ho wɔ Ne fie mu? (nyiyimu 3).

San so hwɛ Isaiah 5:26; ”Bepɔw Tsentsen no Do,” Asɔr na Mbofra Ndwom, nkanee 30.

Isaiah 6 mu no, Isaiah kãa ne frɛ a ɔdze bɛyɛɛ nkɔnhyɛnyi no ho asɛm. Ber a ekenkan tsir yi, ebɛn nkenyan na inya fa Isaiah no sũahu ho? Tsir yi si dɛn nya nhyɛdo wɔ kwan a edwendwen fa Ewuradze, No nkɔnhyɛfo, na edwuma a wɔafrɛ hɔn dɛ wɔnyɛ no ho no?

Isaiah no somdwuma ber mu no, Israel nye Syria kɔbɔɔ mu ama ɔabɔ noho ban etsia Assyria. Nna Israel na Syria pɛ dɛ wɔhyɛ Ahaz, Judah hen, ma ɔkã hɔnho. Naaso Isaiah hyɛɛ nkɔm dɛ dɛm nkabɔmu no nnkɛyɛ yie na otuu Ahaz fo dɛ ɔmfa no werɛ nhyɛ Ewuradze mu (Isaiah 7:7–9; 8:12–13).

Ber a Isaiah tuu Ahaz fo no, ɔkãa nkɔnhyɛsɛm beberee a wɔayɛ atsenkã, tse dɛ dza yehu no wɔ Isaiah 7:14; 8:13–14; 9:2, 6–7 mu no Adze biara a nna nkɔnhyɛsɛm yi ase kyerɛ ma Ahaz no, wɔfa Jesus Christ ho pefee (san so hwɛ Matthew 1:21–23; 4:16; 21:44; Luke 1:31–33). Ebɛnadze ntsi na “Immanuel’’ yɛ dzin papa ma Agyenkwa no? (hwɛ Matthew 1:23). Oesi dɛn ayɛ “Ɔpamfo” anaa “Asomdwee Hen” ama wo? (Isaiah 9:7). Ebɛnadze bio na isũa fa Agyenkwa no ho fi nyiyimu yinom mu?

• Isaiah 1:2–4 mu no, ɔwo na wo mbofra no botum ahwehwɛ siantsir a nna Ewuradze n’enyi nngye nkorɔfo no ho. Hyɛ ntotoho fa mbowa ho wɔ nyiyimu 3 no nsew—woana nye hɛn “wura”? Yesi dɛn kyerɛ dɛ yenyim No?

• Ama hom eehu Isaiah 1:16–18 no, ɔwo na wo mbofra no botum ahwɛ biribi kɔkɔɔ na biribi a ɔyɛ fufuw krɔngyenn. Anaa ibia hom botum ayɛ edwuma abɔ mu ahor biribi. Sunsum mu no hɛnho si dɛn nntsew? Jesus si dɛn boa hɛn ma hɛnho tsew? Ebɛnadze na yesũa fa Agyenkwa no ho fi nyiyimu yinom mu? Enye wo mbofra no nkyɛ w’atsenka fa Jesus Christ ho na dza Ɔayɛ ama wo no ho.

• Isaiah hun mber bi a “Ewuradze fi bepɔw” no bɔtwe nkorɔfo fi “amanaman” ma ɔapem aba ho (Isaiah 2:2). Ibesi dɛn botum aboa wo mbofra ma woenya enyigye afa wɔrokɔ Ewuradze fie ho? Ibotum ato nsa afrɛ hɔn ma wɔadorɔw hɔn fie. Nkyii hom botum abɔ mu akenkan Isaiah 2:2, na ato nsa afrɛ hɔn ma wɔadorɔw “Ewuradze fi,” a ɔyɛ temple ho mfonyin. Hom mbɔ mu nkenkan Isaiah 2:3. To nsa frɛ hɔn ma wɔmfa nkorɔfo pii a wɔrekɔ temple, a hɔn ebusua ebusua kã ho nka hɔn mfonyin no ho.

• Hom botum asan so abɔ mu akenkan Isaiah 2:2–3 na hom ahwehwɛ biribi a okenyan ɔwo na wo mbofra dɛ wɔnkɔ temple. Nkyii, hom abɔ mu akenkan Isaiah 2:4 ekyir no, hom botum apɛnsampɛnsa mbrɛ temple no si dze asomdwee brɛ hɔn mu. Hwɛ dɛ wɔbɔtow ndwom a ɔfa temple ho, tse dɛ “I Love to See the Temple” (Children’s Songbook, 95). Boa wo mbofra ma wɔnhwehwɛ nsɛmfua wɔ ndwom no mu a ɔkyerɛkyerɛ dza temple no yɛ na dza yɛyɛ wɔ hɔ.

• Ibobue Isaiah no nkɔnhyɛsɛm fa Christ ho enyi no, ɔwo na wo mbofra no botum akã nkorɔfo, tse dɛ president, bishop, anaa kyerɛkyerɛnyi hɔn edzin ho asɛm. Ebɛnadze na edzin yinom kã fa nkorɔfo yinom ho? Boa wo mbofra ma wɔnhwehwɛ edzin ahorow fa Jesus Christ ho wɔ Isaiah 7:14 na 9:6–7 (san so hwɛ dapɛn yi dwumadzi krataafa). Ebɛnadze na edzin yinom kyerɛkyerɛ fa No ho? Ebɛnadze bio na yesũa fa Jesus Christ no ho fi nyiyimu yinom mu?

• Ibotum so nye wo mbofra no akyɛ “Isaiah the Prophet” (wɔ Old Testament Stories mu, 150–51). Ɔyɛ a na egyina kakra na ebisa dza nna Isaiah nyim fa Jesus Christ ho mfe pii ansaana wɔwoo No. Nkyii ibotum dze Matthew 1:21–23; Luke 1:31–33 edzi dwuma akasa afa mbrɛ Isaiah no nkɔnhyɛsɛm wɔ Isaiah 7:14; 9:6–7 mu no sii hyɛɛ mã.

  

  1:18