Isaiah 50–57

Ɔwɔ mu dɛ Israelfo no dzii mfe pii wɔ ndɔmmum dze—na ɔwɔ mu dɛ nna ndɔmmum no yɛ hɔnara hɔn nsanmuyi bɔn no nsunsuando dze—nna Ewuradze pɛ dɛ wɔdze enyidado hwɛ ndaamba. Ebɛnadze na ihu no wɔ Isaiah ne nsɛm yi mu a ɔma wo enyidado? Nhyehyɛ bi tse dɛ kor yi botum aboa w’adzesũa:

San so hwɛ Mosiah 12:20–24; 15:13–18; 3 Nephi 20:29–46; Nkyerɛkyerɛ na Ahyɛmudzi 113:7–10; Russell M. Nelson, “Embrace the Future with Faith,” Liahona, Ɔberɛfɛw 2020, 73–76.

Etsir kakraabi wɔ kyerɛwsɛm no mu a ɔkã Jesus Christ no ɔpon somdwuma ho asɛm fɛɛfɛɛfɛw yie kyɛn Isaiah 53. Hwɛ dwumadzi horow tse dɛ iyinom ma atse ase yie na edze nkyerɛkyerɛ a tum wɔ mu yinom abɔ bra.

• Dwendwen anaa pɛnsampɛnsa mbrɛ nsɛm na sene si taa kyerɛ ekunyin a wɔgye nkorɔfo mu ho. Fa dɛm mfonyin no to Agyenkwa no ne nkasaho ho wɔ Isaiah 53.

• Ekenkan nyiyimu kor biara ekyir no a, gyina kakra fa dwendwen dza Agyenkwa no hun ho amandze—”yaw,” “awerɛhow,” na “mfomdo” a Ɔsoae— ma nyimpa nyinara na nkanka ma ɔwo. Ibotum dze nkasafua tse dɛ “emi” na “me” ahyɛ ”yɛ” na “hɛn” ananmu ber a ekenkan. Ebɛn atsenka anaa adwendwen na nyiyimu yinom kenyan wɔ wo mu?

• Hwɛ dɛ ebɔhwɛ video “My Kingdom Is Not of This World” (Asɛmpa Nwoma Korabea), na dwendwen mbrɛ nkɔnhyɛsɛm a ɔwɔ Isaiah 53 mu sii hyɛɛ mã. Ebɛn yaw na awerɛhow na Agyenkwa no soa ma wo?

  

  5:25

• Hwehwɛ dza osisii a ɔfa Jesus Christ no Werdambɔ ho mfonyin (hwɛ Gospel Art Book, nkanee 56–60). Nkyii ibotum ahwehwɛ nsɛnsin wɔ Isaiah 53 a ɔkã dza osisii wɔ mfonyin no mu. Ebɛnadze na nkyerɛkyerɛ yinom kenyan wo dɛ yɛ?

San so hwɛ “Behold the Great Redeemer Die,” Asɔr Ndwom, nkanee 191.

Hɛn nyinara yɛwɔ mber bi a yɛtse nka dɛ yɛatwe hɛnho efi Ewuradze nkyɛn osian hɛn bɔn na mberɛwyɛ ntsi. Binom mpo nnyi enyidado dɛ Ɔdze hɔn bɔn bɛkyɛ hɔn da. Isaiah 54 na 57 yɛ etsir akɛse a ebɛkenkan dze asan enya awerɛhyɛmu na nkuranhyɛ wɔ mber a ɔtse dɛm mu. Tsitsir ara wɔ Isaiah 54:4–10; 57:15–19 mu no, ebɛn nkasafua na ɔkyerɛkyerɛ wo atsenka a Agyenkwa no wɔ fa wo ho? Ebɛn nsesã na ɔdze ba w’abrabɔ mu dɛ ibohu ndzɛmba yinom afa No ho?

Elder Dieter F. Uchtdorf kyerɛkyerɛɛ dɛ:

“Ɔmmfa ho mbrɛ hɛn abrabɔ asɛɛ koraa abɛyɛ. Ɔmmfa ho mbrɛ hɛn bɔn esi ayɛ dɛ adaaben, anaa mbrɛ hɛn ayawdzi no bun si tse, anaa yɛayɛ ankonam, woegya hɛn ekyir, anaa mbrɛ hɛn akoma esi ebubu ayɛ. Hɔn mpo a wonnyi enyidado, wɔtse abagura mu, hɔn a woebu awerɛhyɛmu do, wɔatõto hɔn nokwardzi, anaa wɔadan efi Nyame hɔ no, wobotum esiesie hɔn. …

“Asɛmpa no n’enyigyesɛm no nye yi: osian onnyiewiei enyigye ho nhyehyɛɛ a hɛn Ɔsor Egya dɔfo dze ama na odua Jesus Christ n’afɔrbɔ a ɔmmbɔadze da do no, nnyɛ dɛ wobotum apon hɛn efi hɛn asehwe tsebew mu na wɔdze hɛn asan aba tsenenee mu nko, mbom yebotum asan so atra dza ɔdasanyi botum esusu ho na yɛabɛyɛ onnyiewiei nkwa adzedzifo na yeenya Nyame n’enyimnyam a wonnkotum akyerɛ no” (“He Will Place You on His Shoulders and Carry You Home,” Liahona, Esusow Aketseaba 2016, 102).

San so hwɛ Patrick Kearon, “God’s Intent Is to Bring You Home,” Liahona, Esusow Aketseaba 2024, 87–89.

Ma mbasantsen pii no, wohu Israel dɛ Nyankopɔn n’ahyɛmu nkorɔfo. Naaso, aber nyina Nyankopɔn dze ɔman bɔbor kor ara akã ne nhyehyɛɛ ho dɛ, “obiara a nsukɔm dze no” ɔto nsa frɛ no dɛ “[ɔ]mbra … esu no ho” (Isaiah 55:1). Kaa iyi ber a ekenkan Isaiah 55 na 56, na dwendwen ho dɛ yɛbɛyɛ Nyankopɔn no nkorɔfo n’asekyerɛ nye dɛn? Ebɛn asɛm na Nyankopɔn dze ma hɔnnom a wɔtse nkã dɛ “[wɔ]atsew [hɔn ho] efi” No ho? (Isaiah 56:3). Hwɛ dɛ ebɛhyɛ nyiyimu a wɔkã hɔnnom a “wosuo m’ahyɛmudzi mu pintsinn” no hɔn suban na ndzeyɛe ho asɛm no nsew (hwɛ Isaiah 56:4–7).

• Obotum ayɛ enyigye ama wo mbofra no dɛ wɔbɔhwehwɛ nsɛnsin tse dɛ “nyan,” “gyina,” na “fa w’ahoɔdzen hyɛ” wɔ Isaiah 51:9, 17; 52:1–2, 9 na nkyii wɔbɛyɛ nsɛnsin no nyɛe. Wɔayɛ ekyir no, hom botum akasa afa dza n’ase kyerɛ dɛ nyan, gyina, na fa sunsum mu ahoɔdzen hyɛ ho asɛm. Ebɛnadze na Ewuradze reserɛ hɛn dɛ yɛnyɛ no wɔ nyiyimu yinom mu?

• Wo mbofra no botum so akenkan Isaiah 51:1, 4, 7 na wɔahwehwɛ nyia a Ewuradze rekasa kyerɛ no na dza Ɔpɛ dɛ ɔyɛ. “Hom nyɛ aso” mma Ewuradze n’asekyerɛ nye dɛn? Yebesi dɛn botum akyerɛ Ewuradze dɛ “[yɛyɛ] aso” ama No?

• Ɔwo na wo mbofra botum ahwɛ mfonyin beberee a ɔkyerɛ Jesus Christ n’amandzehu na no wu (hwɛ, mfatoho, Gospel Art Book, nkanee 56, 57, 58). Nkyii hom botum abɔ mu akenkan Isaiah 53:3–6, 9 na wɔahwehwɛ nkasafua a ɔkã dza orisi wɔ mfonyin no mu ho asɛm. Boa wo mbofra ma wɔntse ase dɛ Isaiah kyɛɛ nokwar yinom mfeha pii ansaana worisisi. Ebɛnadze ntsi na obehia ama nkorɔfo dɛ wobedzi kan bohu ndzɛmba yinom mfe pii ana? (hwɛ Alma 39:15–19).

• Wɔakenkan efi Isaiah 53:4 mu no dɛ, “Ɔasɔw hɛn yaw, na Ɔasoa hɛn awerɛhow” no, wo mbofra no botum abɔ mbɔdzen ama adze a ɔyɛ dur bi do (anaa woepetuw dɛ wɔrema adze a ɔyɛ dur bi do). Kasa fa mbrɛ “yaw” na “awerɛhow” anaa yawdzi botum ayɛ dɛ ɔyɛ dur anaa ɔyɛ dzen dɛ ebɔsoa. Ebɛnadze ntsi na Jesus soaa hɛn “yaw,” “awerɛhow,” na “emumuyɛ,” anaa bɔn? (san so hwɛ Alma 7:11–12).

• Ama akyerɛkyerɛ wo mbofra afa Isaiah 55:6 ho no, ibotum dze Jesus no mfonyin esuma beebi wɔ dan no mu. Ibotum ato nsa afrɛ wo mbofra ma wɔahwehwɛ mfonyin no na wɔakã kwan kor a wobotum “ahwehwɛ … Ewuradze ber a wobohu no.” Ndwom tse dɛ “Seek the Lord Early” (Children’s Songbook, 108) botum ama hɔn adwenkyerɛ. Nkyii ibotum ama mbofra no kor dze mfonyin no esuma na woesi dwumadzi no do bio.

• Wɔakenkan Isaiah 55:9 ekyir no, obotum ayɛ enyigye ama wo mbofra no dɛ wobegyina egua do na wɔakã mbrɛ isi hu ndzɛmba wɔ kwan soronko do sɛ “[e]krɔn” a. Anaa wobotum adorɔw dza Isaiah 55:9 n’asekyerɛ ma hɔn ho mfonyin. Hom botum apɛnsampɛnsa Ewuradze n’akwan bi a ɔkrɔn kyɛn hɛn akwan mu. Mfatoho, N’akwan a ɔdze hwɛ adzebɔnyɛfo nye ebɛn? (hwɛ Mark 2:15–17). N’akwan a ɔdze dzi binom enyim kan nye ebɛn? (hwɛ Matthew 20:25–28). Enye wo mbofra no nkyɛ mbrɛ esi esũa dɛ edze wo werɛ bɛhyɛ Ewuradze n’akwan na n’adwen a ɔkrɔn mu no.