Hosea 1–6; 10–14; Joel

Hosea ne yer, Gomer, enndzi nokwar amma no, na Nyankopɔn dze awerɛhowdze yi kyerɛkyerɛɛ Israelfo no atsenka a Onya fa hɔnho na wɔnye No ntamu ahyɛmudzi ho. Ber a ekenkan Hosea 1-3 no, dwendwen mbrɛ Ewuradze si hwɛ Ɔnye No nkorɔfo ntamu nkitahodzi no. Enye Ewuradze reyɛ ahyɛmu si dɛn yɛ tse dɛ erehɛn awar mu? Irinnsie w’ahyɛmudzi no si dɛn yɛ tse dɛ erennyɛ nokwafo mma wo hokafo? (hwɛ Hosea 2:5–7, 13). Ebɛnadze na Hosea 2:14–23 kyerɛkyerɛ wo fa Ewuradze no dɔ na n’ehumbɔbɔr ho? Isi dɛn kyerɛ wo dɔ na wo nokwardzi ma No?

Hosea 14 mu no, hwehwɛ anohoba ahomka horow a Ewuradze dze abɔ hɔnnom a wɔsan ba No hɔ no. Kasasin “mapra me yamu madɔ hɔn” n’asɛkyerɛ nye dɛn ma wo? (nyiyimu 4). Ebɛnadze na dua mfatoho a ɔwɔ nyiyimu 5–8 no kyerɛkyerɛ wo fa Ewuradze ne nhyira ho, a nnuho nhyira kã ho? Hwɛ dɛ edze adwontow anaa iritsie asɔr ndwom fa Agyenkwa n’ehumbɔbɔr ho, tse dɛ “Come unto Jesus bɛkã w’adzesũa ho” (Asɔr Ndwom, nkanee 117).

Nna nkorɔfo a wɔwɔ Hosea n’aber do no yɛ mbowa afɔrbɔ, naaso nna wobu mbrasɛm a ohia dodow no do. Edwen ho dɛ Ewuradze “rohwehwɛ ehumbɔbɔr, na nnyɛ okum-afɔr a, na Nyame ho nyimdzee sen ɔhyew-afɔr” n’asekyerɛ nye dɛn ma wo?“ (Hosea 6:6). Edwen ho a tsenenee bɛyɛ tse dɛ fua anaa dɛ ɔbɔsu n’asekyerɛ nye dɛn? (hwɛ Hosea 6:4). Hɛn tseneneeyɛ wɔ dɛ ɔyɛ tse dɛ ebɛnadze? (hwɛ Isaiah 48:18; 1 Nephi 2:9–10).

Ibotum asan so akenkan Matthew 9:10–13; 12:1–8 dze ahwɛ mbrɛ Agyenkwa no sii dze Hosea 6:6 dzii dwuma wɔ No somdwuma mu. Nsɛnsin yinom si dɛn boa wo ma etse Hosea ne nsɛm ase?

Sɛ erekenkan Joel 2:12–13, obotum ayɛ mfaso dɛ ibohu dɛ nna obi rusunsuan n’atar mu no yɛ nkrumsi anaa yawdzi abowano sɛnkyerɛdze. Yɛrusunsuan hɛn akoma mu no si dɛn yɛ soronko fi yerusunsuan hɛn ntar mu ho?

Ebɛn nsɛ na ihu no wɔ hɛn nda na da a Joel hunii no ntamu? (hwɛ nkanka Joel 2:1–2, 11, 18–32). Ebɛnadze na ɔyɛ wo ahomka fa Ewuradze n’anohoba ho wɔ nyiyimu 18-32 mu? Ebɛnadze ntsi na nhyira yinom som bo tsitsir ara ma wo ndɛ?

Ɔbɛyɛ ahomka dɛ ebɛkenkan dza Moroni kãa fa Joel 2 ho mber a ɔkɛseraa Joseph Smith wɔ afe 1823 mu no (hwɛ Joseph Smith—Abakɔsɛm 1:41). Nkɔnhyɛsɛm a wɔwɔ Joel 2:28–32 mu no risi dɛn hyɛ mã wɔ hɛn nda mu? (san so hwɛ Ndwuma 2:1–21). Edwen ho a Ewuradze “[bo]hue [No] sunsum egu adasa nyina do” n’asekyerɛ nye dɛn? Joel 2:28

Ibotum adwendwen nsɛm yinom fi President Russell M. Nelson ne nsɛm mu: “nda a ɔreba mu no, yennkotum atsena ase sunsum mu a Sunsum Krɔnkrɔn ne bambɔ, n’akwankyerɛ, na ne daa daa nhyɛdo nnkã ho” (“Revelation for the Church, Revelation for Our Lives,” Liahona, Esusow Aketseaba 2018, 96). Ebɛnadze ntsi na nyikyerɛ hia tsitsir ma hɛn sunsum mu asetsena?

Ebɛnadze na ibotum ayɛ sɛ etse nkã dɛ sunsum no runnhue nngu wo do a? Mfatoho bi a obotum aboa nye yi. Ebɛnadze na nkorɔfo a wɔwɔ kyerɛwsɛm yinom no mu yɛe dze nyaa Ewuradze no sunsum ma ohuee guu hɔn do no?

• Mosiah 4:1–3, 19–20; 18:7–11

• Helaman 6:34–36

• Nkyerɛkyerɛ na Ahyɛmudzi 19:37–41

Ber a ekenkan nsɛm yinom fi Elder David A. Bednar hɔ no, dwendwen ho dɛ etse dɛ Sunsum Krɔnkrɔn no ruhue gu wo do wɔ wo daa daa abrabɔ mu n’asekyerɛ nye dɛn:

“Yɛtaa ma ɔyɛ dzen ma hɛn dɛ yebenya hɛnankasa hɛn nyikyerɛ. Dɛm no mekyerɛ dɛ ahyɛmudzi anohoba no nye dɛ ber a yedzi hɛn ahyɛmudzi horow nyi no, aber nyina yebenya Sunsum Krɔnkrɔn no ma ɔayɛ hɛn daa daa nyɛnko. Naaso yɛkã ho asɛm na yɛhwɛ no tse dɛ ma yerudua No Sunsum do atse Ewuradze ne ndze no yɛ adze bi a ɔnntaa nnsi. … Otwar dɛ [Susum No] nye hɛn tsena mber nyinara. Nnyɛ mber ketseaba biara, naaso sɛ nyimpa reyɛ n’afamudze a oye mapã a—onnhia dɛ ibedzi mu—na mbom sɛ emi na ɔwo reyɛ dza oye mapã na yɛrennyɛ mfomdo a ɔyɛ dzen a, nkyii na hɛn enyi bɛda Sunsum Krɔnkrɔn no kwan dɛ ɔbɛyɛ hɛn kwankyerɛfo. …

“… Ɔyɛ dɛ yɛgye dzi dɛ Sunsum Krɔnkrɔn no yɛ nwanwa na kɛse na mpofirmu, mber a ɔyɛ komm na ketseaba na mber rokɔ no ɔba nkakrankakra” (“Elder David A. Bednar Discussion” [evening with a General Authority, Kwakwar 7, 2020], broadcasts.ChurchofJesusChrist.org).

Hwɛ Gary E. Stevenson, “Promptings of the Spirit,” Liahona, Ɔberɛfɛw 2023, 42–45; “Enemy Territory” (video), Asɛmpa Nwoma Korabea so.

3:38

• Hosea nwoma mu no, Ewuradze dze Ɔno na no nkorɔfo ntamu ahyɛmudzi totoo awar ho. Hom bosũa efi ntõtõho yi mu no, ɔwo na wo mbofra no botum ahwɛ ayefor na ayefor kun hɔn mfonyin na wɔakã ho asɛm afa mbrɛ Ɔsor Egya si pɛ dɛ kun na yer hwɛ hɔnho. Boa wo mbofra ma wɔnhwehwɛ nsɛmfua wɔ Hosea 2:19–20 mu a ɔkã mbrɛ Ewuradze si hu hɛn ho asɛm. Yebesi dɛn botum akyerɛ Ewuradze dɛ yɛdɔ No na yɛbɛyɛ anokwafo ama No?

• Hosea 10:12 fa adzedua, bu ber, mber, na nsutɔree ho dze to nsa frɛ hɛn dɛ yɛnhwehwɛ Ewuradze. Ber a ekenkan nyiyimu yi, ebɛn adwenkyerɛ a ɔyɛ mfaso na ekaa a obotum ekenyan mbofra no ma wɔahwehwɛ No? Mfatoho, bia wo mbofra no botum adorɔw watse na wɔakyerɛw akwan horow a wobotum ahwehwɛ Ewuradze wɔ mber horow wɔ da mu ne nyina mu. Ndwom tse dɛ “Anytime, Anywhere’’ (Asɛmpa Nwoma Korabea) botum aboa wo ber a ekyerɛkyerɛ dɛ aber nyina yɛ mber papa dɛ ehwehwɛ Ewuradze.

• Anaa wo mbofra no botum ayɛ ndzeyɛe a ɔnnyɛ dzen ma ɔnye nyiyimu no afa, tse dɛ iripetuw dɛ eretsɛw eduaba, eretsetsew nduadzewa, anaa igyina nsutɔree mu. Boa wo mbofra ma wɔmfa eretsɛw eduaba na irubu edziban papa ntoto abrabɔ tsenenee na irinya Ewuradze ne nhyira ho. Nkyii hom botum akã nhyira a Ewuradze atɔ egu hom do ho asɛm ber a hom abɔ mbɔdzen dɛ hom bɔhwehwɛ No akyerɛ hom ho.

• Ama eetsi nokwar a ɔwɔ Hosea 13:4 mu dɛ Agyenkwa biara nnyi hɔ gyedɛ Jesus Christ mu no no, ibotum dze nyimpa beberee a Jesus kã ho hɔn mfonyin akyerɛ wo mbofra no. Wo mbofra no botum ayɛ no nkokor atsen hɔn nsa wɔ nyimpa a ɔwɔ tum dɛ ɔgye hɛn nkwa fi bɔn na owu mu no do. Gye wo dase fa Jesus Christ na No Werdambɔ no ho.

• Wo mbofra botum ahwehwɛ nkasafua wɔ Hosea 13:4, 14 mu a ɔkã Jesus Christ no ho asɛm. Ebɛnadze na nsɛm yinom kyerɛkyerɛ hɛn fa No ho? Hwɛ dɛ ebɔboa wo mbofra no ma wɔdze Kyerɛwsɛm no Kwankyerɛ no edzi dwuma dze ahwehwɛ kyerɛwsɛm bi so a ɔkyerɛkyerɛ dɛ Jesus nye hɛn Agyenkwa na Pomfo. Hom nye homho nkyɛ atsenka a wonya fa Jesus Christ no ho.

• Ibia ibotum aboa wo mbofra no ma wɔatse Joel 2:28–29 ase ber a wohue nsu bi na wɔdze toto dza ɔpetse anaaa ɔsosɔ mu kor ho. Sunsum no “bohue egu” hɛn do n’asekyerɛ botum ayɛ ebɛnadze?

• Ber a hom bɔ mu kenkan Joel 2:28–29 no, ibotum ato nsa afrɛ wo mbofra no ma wɔdze hɔn mu biara ne dzin ahyehyɛ nsɛnsin “hom mbambanyin,” na “hom mbabaa” ananmu. Nkyii boa hɔn ma wɔnhwehwɛ kyerɛwsɛm tse dɛ John 14:16; Moroni 10:5; Nkyerɛkyerɛ na Ahyɛmudzi 42:17 mfa nhu mbrɛ Sunsum no besi botum aboa hɔn no.