Daniel 1–7

Sɛ yɛkã a, hɛn nyinara yɛtse Babylon. Yɛtaa hyia nsɔhwɛ dɛ yengyaa hɛn suban gyinapɛn mu na yɛndan mfi gyedzi wɔ Christ mu ho. Ber a ekenkan Daniel 1, 3, na 6 no, hyɛ akwanhorow a wɔhyɛɛ Daniel, Shadrach, Meshach, na Abed-nego dɛ wɔnyɛ ndzɛmba a nna wonyim dɛ ɔyɛ bɔn no nsew. Wosii dɛn maa tsebea horow yinom no mbuae? (hwɛ Daniel 1:10–13; 3:15–18; 6:10). Ebɛn nsunsuando na hɔn gyedzi no dze bae? Ebɛnadze na isũa fi sũahu yinom mu a obotum aboa wo ma sɛ ihyia ɔkõtsia a edze wo werɛ bɛhyɛ Ewuradze mu? San so hwɛ nsɛmbisa a odzidzi do no:

• Ebɛn mber na atse nkã dɛ wɔrehyɛ wo ma ayɛ biribi a inyim dɛ ɔyɛ bɔn? Ewuradze esi dɛn ehyira wo wɔ irisie Ne mbrasɛm ho?

• Na sɛ wo gyedzi ammfa anwanwadze a erohwehwɛ no ammba ɛ? (mfatoho, hwɛ Alma 14:8–13). Ogyina dza ekenkan wɔ Daniel 3:13–18 do no, edwen ho a ebɛn nyiano na nkyɛ Shadrach, Meshach, na Abed-nego dze bɛma? Hɔn fasusu no besi dɛn botum enya nsunsuando wɔ mbrɛ isi hu wo nsɔhwɛ do?

• Wo tsenenee nsanmuyi besi dɛn botum egya binom ma woenya gyedzi kɛsenara wɔ Ewuradze mu? (hwɛ Daniel 2:47; 3:28–29). Dwendwen nsunsuando a wo nsanmuyi horow no renya wɔ binom do ho.

Hwɛ Dieter F. Uchtdorf, “Be Not Afraid, Only Believe,” Liahona, Ɔberɛfɛw 2015, 76–79 so.

Ɔnam nyikyerɛ do no, Daniel hun dɛ Nebuchadnezzar n’adaasõ no dzii kan kãa ndaamba wiadze ahenman ho asɛm, dɛmara dɛ Nyankopɔn ne ndaamba ahenman no, a “wɔrennsɛɛ no da” ho asɛm (Daniel 2:44). “Asɔr no nye nda a odzi ekyir ahenman a wɔhyɛɛ ho nkɔm no,” Elder D. Todd Christofferson kyerɛkyerɛe, “nnyɛ nyimpa na ɔyɛe mbom ɔsor Nyankopɔn na ɔkyekyeree na obepirepirew dɛ ɔbo a ‘wɔnndze nsa twae fii bepɔw no mu tsewee’ ahyɛ asaase no mã (“Why the Church,” Liahona, Ɔberɛfɛw 2015, 111). Dwen Nyankopɔn ne nda a odzi ekyir ahenman ho ber a ekenkan ɔbo no no ho asɛm wɔ Daniel 2:34–35, 44–45. W’asɛdze nye dɛn wɔ eroboa ma nkɔnhyɛsɛm yi aba mu mu?

San so hwɛ “Hark, All Ye Nations!,” Asɔr Ndwom, nkanee 264; “God Gave Them Knowledge” (video), ChurchofJesusChrist.org.

13:49

Ber a ehwehwɛ Daniel 2:1–15 mu no, hwɛ dɛ nkyɛ ebɛn atsenka na ibenya sɛ ihun woho wɔ Daniel ne gyinabew mu a. Ebɛnadze na Daniel yɛe? (hwɛ Daniel 2:16-18). Ebɛnadze na isũa fi Daniel 1:17 mu fa mbrɛ Nyankopɔn sii siesie Daniel ho? Ebɛnadze na ibotum esũa efi Daniel ne nsɛm na ndzeyɛe mu ekyir no a onyaa Ewuradze no mboa no? (hwɛ Daniel 2:19–30).

Agyenkwa no no somdwuma ber mu no, Jewfo no pii hwɛɛ dzin “nyimpa Ba” a ofi Daniel 7:13 mu no dɛ ɔkyerɛ Messiah a ɔreba no. Ebɛnadze na isũa fa Messiah no ho fi Daniel 7:13–14 mu? (Hwɛ Moses 6:57 so).

Nna Agyenkwa no taa frɛ noho dɛ “nyimpa Ba.” Hwɛ dɛ ebɔhwehwɛ mfatoho bi mu: Matthew 25:31; Mark 9:31; 10:45. Ebɛnadze na Ɔrekyerɛkyerɛ fa Noho wɔ nyiyimu yinom mu? Mark 14:61–64 mu no, Jesus dze dzin yi dzii dwuma wɔ da a odzi ewiei wɔ Ne ɔnnkyebo abrabɔ mu. Hyɛ nkorɔfo a wɔtsee Ne dawurbɔ no hɔn ndzeyɛɛ no nsew. Daniel no nkɔnhyɛsɛm fa Nyimpa Ba no ho no esi dɛn enya nsunsuando wɔ w’atsenka fa dza ɔtoo No no do wɔ Mark 15?

Dɛmara dɛ wokyiir Jesus dɛ ɔbɔɔ dawur dɛ Ɔno nye “nyimpa Ba no,” ɔwo so botum ehyia atseetsee dɛ ebɔ nokwar no dawur. Fa nkɔnhyɛsɛm wɔ Daniel 7:13–14 toto anohoba horow ho wɔ Nkyerɛkyerɛ na Ahyɛmudzi 121:29, 46.

San so hwɛ Nkyerɛkyerɛ na Ahyɛmudzi 49:6; Kyerɛwsɛm no Kwankyerɛ, “Son of Man,” Asɛmpa Nwoma Korabea.

• Ama aboa wo mbofra ma woesũa efi nkenyan nsɛm a ɔwɔ Daniel nwoma mu no, ibotum ahwehwɛ dza osisii wɔ Daniel 1, 3, na 6 mu no ho mfonyin (hwɛ dapɛn yi dwumadzi krataafa anaa Gospel Art Book, nkanee 23, 25, 26). Nkyii ibotum ebutuwbutuw mfonyin no na ato nsa afrɛ abofra bi ma ɔadan kor na ɔakã asɛm a ogyina hɔ dze ma no. (Epɛ mboa a, hwɛ “Daniel and His Friends,” “Shadrach, Meshach, and Abed-nego,” na “Daniel and the Lions’ Den” wɔ Old Testament Stories mu, 154–56, 160–62, 163–65.)

  

  1:39

  

  1:39

  

  1:45

• Boa wo mbofra no ma wɔndwen gyinabew horow a wobotum ahyɛ hɔn dɛ wɔnyɛ nsamuyi bɔn ho, tse dɛ wɔdze yɛɛ Daniel na n’anyɛnkofo no wɔ Daniel 1, 3, na 6. Hom nye homho nkyɛ mbrɛ woesi ehyira hom dɛ wɔyɛ nsanmuyi a ɔtsen mpo wɔ mber a nna ɔyɛ dzen mu. Hom so botum abɔ mu atow ndwom a ɔfa asɛntsir yi ho, tse dɛ “Choose the Right” (Asɔr Ndwom, nkanee 239).

• Erekenkan Daniel na n’anyɛkofo a wɔropow ɔhen no no bɔnam na wenyin no hɔn ho asɛm no botum ekenyan nkɔmbɔdzi fa Ɔsor Egya n’apɔwmudzen mbra a ɔdze ama hɛn ndɛ no ho (hwɛ Nkyerɛkyerɛ na Ahyɛmudzi 89). Bia ibotum ahwehwɛ nhyira a Daniel na n’anyɛnkofo no nyae na edze atoto anohoba nhyira a ɔwɔ Enyansasɛm no mu no ho (hwɛ Daniel 1:15–17 na Nkyerɛkyerɛ na Ahyɛmudzi 89:18–21).

• Ber a enye wo mbofra kenkan Daniel 2:31–35, 44–45 no, ibotum ato nsa afrɛ hɔn ma wɔadorɔw Nebuchadnezzar n’adaasõ ho mfonyin. Boa hɔn ma wɔntse ase dɛ ɔbo no a ɔwɔ adaasõ no mu no gyina hɔ ma Jesus Christ N’Asɔr a ɔwɔ hɔ ma Nda a Odzi Ekyir Ahotseweefo. Ebɛnadze na yesũa fa Asɔr no ho fi adaasõ yi mu? Wo mbofra no botum abobɔ ndzɛmba a Ɔsor Egya yɛe dze sii N’Asɔr wɔ nda a odzi ekyir mu no edzin. Sɛ wohia mboa, ibotum dze dza osisii wɔ Asɔr no ne Nsanananmu mu ho mfonyin akyerɛ (hwɛ Gospel Art Book, nkanee 90–95).

• Ebɛnadze ntsi na nna mpaabɔ ma Ɔsor Egya hia dodow ma Daniel? Bia ɔwo na wo mbofra botum akasa afa dɛm asɛmbisa no ho ber a wɔbɔ mu kenkan Daniel 6 no. Nkyii hom botum nye homho akyɛ siantsir a erobɔ mpaa hia ma wo. Ɔbɛyɛ wo mbofra no enyigye dɛ wɔbɔdorɔw hɔnankasa hɔnho a wɔrobɔ mpaa wɔ gyinabew asorɔtow mu. Wobotum dze hɔn adorɔw no akyerɛkyerɛ hɔnho nkorkor dɛ yebotum abɔ mpaa ama Ɔsor Egya a ɔmmfa ho bea a yɛwɔ anaa dza yehia.