Amosa ; Obadia ; Iona

I roto te Amosa 3:3–6, ’ua vauvau mai te peropheta Amosa i te mau hi’ora’a o te mau fa’aotira’a ’o tā tātou e nehenehe e huti mai nā roto mai i te mau tāpa’o ’o tā tātou e fa’aro’o ’aore rā e hi’o : ’ia ’ū’uru ana’e te liona, ’ua haru mai ïa ’oia i te ’īna’i ; mai te mea ’ua mau te hō’ē manu i roto i te here pata, mea pāpū tē vai ra ïa te ’āinu i reira. I roto i te mau ’īrava 7–8, ’ua fa’a’ohipa Amosa i teie huru ferurira’a i te mau peropheta. E aha te mau fa’aotira’a tā tātou e nehenehe e huti mai ’ia tohu ana’e te hō’ē peropheta ? E aha atu ā tā ’outou i ha’api’i mai nō ni’a i te mau peropheta nā roto mai i te Amosa 7:10–15 ?

E aha tā te Fatu i heheu mai ia ’outou nā roto mai i tāna mau peropheta ?

’Ua parau Elder Ulisses Soares ē « tē vai ra te mau peropheta e tāpa’o ïa nō te here o te Atua » (« Tē parau nei te mau peropheta nā roto i te mana o te Vārua Maita’i », Liahona, Mē 2018, 99). ’A feruri nā nāhea ’outou ’ia fa’aoti i teie pereota : « ’Ua ’ite au ’ua here te Atua iā’u, nō te mea ’ua tono mai ’oia i te mau peropheta ’o te… » Teie te tahi mau pāpa’ira’a mo’a ’o tē nehenehe e tauturu : Deuteronomi 18:18 ; Ezekiela 3:16–17 ; Ephesia 4:11–14 ; 1 Nephi 22:2 ; Te Ha’api’ira’a Tumu ’e te mau Fafaura’a 21:4–6 ; 84:36–38 ; 107:91–92.

E aha tā ’outou e parau atu i te hō’ē ta’ata e mana’o nei ē, ’aita te mau peropheta e tītauhia i teie mahana ?

’A hi’o ato’a Tumu parau ’e uira’a, « Peropheta » Vaira’a buka ’evanelia.

’Ia au te Amosa 4:6–13, e aha tā te Fatu e tīa’i nei e tupu i muri a’e i tō te mau ’āti ’Īserā’ela fa’arurura’a i te mau tāmatara’a ? (hi’o ato’a Helamana 12:3). Noa atu e ’ere tā ’outou mau tāmatara’a i te mea tonohia mai e te Atua, nāhea te reira e hōro’a mai ia ’outou i te rāve’a ’ia fāriu atu iāna.

’A tai’o ai ’outou te Amosa 5:4, 14–15, ’a feruri e mea nāhea tō te Fatu arohara’a ia ’outou. Nāhea te ’imira’a iāna e hōpoi mai i te ora ia ’outou ?

’A tai’o ai ’outou te Amosa 8:11–12, ’a feruri nō te aha te o’e i riro ai ’ei hō’ē fa’aaura’a maita’i nō te ora ’aita te parau a te Atua (hi’o ato’a Ioane 6:26–35 ; 2 Nephi 9:50–51 ; 32:3 ; Enosa 1:4–8). Nāhea ’outou e ’ite ai tē po’ia ra ’outou i te pae vārua ?

E tano ato’a teie mau ’īrava nō te Tāivara’a Rahi (hi’o Tumu parau ’e uira’a, « Tāivara’a », Vaira’a buka ’evanelia). Nāhea teie « o’e » pae vārua i te fa’atupu mai i ni’a i te mau tamari’i a te Atua ? Nāhea te fa’aho’i-fa’ahou-ra’a mai i te ha’amāhara’a i tō ’outou po’ia pae vārua ?

Hi’o ato’a « The Great Apostasy [Te Tāivara’a Rahi] » (video), Vaira’a buka ’evanelia.

16:36

Nō ni’a te Obadia 1:21, ’ua fa’ata’a mai te peresideni Gordon B. Hinckley ē e riro mai tātou ’ei mau fa’aora i ni’a i te mou’a nō Ziona, ’ia fa’ari’i ana’e tātou i te mau ’ōro’a nō te feiā pohe i roto i te hiero (hi’o « Mau parau ’ōpanira’a », Liahona, Novema 2004, 105). Nāhea teie ’ohipa e tū’ati ai—mai te mea noa e fāito ha’iha’i—i te mea tā te Fa’aora i rave nō tātou ? Nāhea teie ’ohipa i te tauturura’a ia ’outou ’ia ’ite i tō ’outou ha’afātatara’a atu i te Fa’aora ?

Hi’o ato’a « Tē ’ana’ana mai nei te hiero nō Ziona », Te mau Hīmene, N 174.

’Ua riro Ninive ’ei ’oire ’enemi nō ’Īserā’ela tei mātauhia nō tōna ha’avī ’ū’ana ’e te aroha ’ore. Nō Iona, e mea pāpū ’ore ē ’ua ineine rātou nō te tātarahapa. E mea maita’i paha ’ia fa’aau i te huru o Iona (hi’o Iona 1 ; 3–4) i te mau nīno’a mana’o o Alama ’e te mau tamāroa a Mosia (hi’o Mosia 28:1–5 ; Alama 17:23–25). E aha tā ’outou i ha’api’i mai nā roto mai te Iona 3 ’o tē fa’auru ia ’outou ’ia fa’a’ite i te ’evanelia, noa atu i te feiā e au ra ’aita i ineine nō te taui ?

’A tai’o ai ’outou te Iona, ’a ’imi i te mau hi’ora’a nō te aroha o te Fatu. Nō te aha i tō ’outou mana’o, ’ua « au ’ore » ’e ’ua « riri roa » Iona (Iona 4:1), ’a fa’a’ite ai te Fatu i te aroha i te mau ta’ata nō Ninive ? I tō ’outou mana’o e aha tā te Fatu e tāmata nei i te ha’api’i iāna i roto te pene 4 ? ’A feruri e mea nāhea tō ’outou tāmatara’a i tōna aroha i roto i tō ’outou orara’a. E aha tā ’outou i ’apo mai nā roto mai ia Iona, ’o tē nehenehe e tauturu ia ’outou ’ia aroha rahi atu ā ’outou ?

• Nō te tauturu i tā ’outou mau tamari’i ’ia māramarama te Amosa 3:7, e nehenehe ’outou e muhumuhu i te hō’ē poro’i ’ōhie i te hō’ē o rātou, ’e e ani iāna ’ia fa’a’ite i te poro’i i te tahi atu mau tamari’i. Nāhea te ve’a i roto i teie ’ātivite i te riro mai te hō’ē peropheta ? Nō te aha te Fatu i hōro’a mai ai ia tātou te mau peropheta ?

• Nō te ’apo hau atu ā nō ni’a i te mea tā te mau peropheta e rave nei, e nehenehe ’outou ’e tā ’outou mau tamari’i e hi’o fa’ahou i te mau a’ora’a tei a’ohia iho nei e te peresideni o te ’Ēkālesia. E nehenehe ato’a ’outou e hīmene i te hō’ē hīmene mai te « Suis les prophètes » (Chants pour les enfants, 58–59). ’A fa’a’ite i te tahi ’e te tahi nō te aha ’outou i mā’iti ai i te pe’e i te peropheta a te Atua.

• ’A ani i tā ’outou mau tamari’i ’ia fa’ahua po’ia ’a tai’o ai ’outou te Amosa 8:11–12. Mai te aha tō tātou huru ’ia po’ia ana’e tātou i te parau a te Atua ? Penei a’e e nehenehe tā ’outou mau tamari’i e fa’ahua tāmā’a, ’a fa’a’ite ai ’outou i te tahi ’e te tahi i tā ’outou mau pāpa’ira’a mo’a au roa a’e.

• E nehenehe ’outou e fa’a’ohipa i te Arata’i nō te mau pāpa’ira’a mo’a, « Tāivara’a » (Vaira’a buka ’evanelia), ’aore rā « I muri a’e i te Faufa’a ’Āpī » (i roto Te mau ’ā’amu o te Faufa’a ’Āpī, 167–70), nō te tauturu i tā ’outou mau tamari’i ’ia māramarama i te « o’e », ’o tei tae mai nā roto mai i te Tāivara’a Rahi ’e nāhea te reira i te hopera’a ma te fa’aho’i-fa’ahou-ra’a mai. ’A fa’ata’a i te tahi ’e te tahi i te mau tumu nō reira ’outou i māuruuru ai i te Fatu i te fa’aho’i-fa’ahou-ra’a mai i tāna ’evanelia i tō tātou nei ’anotau.

  

  2:52

• Nō te tauturu i tā ’outou mau tamari’i ’ia ’apo mai i te ’ā’amu o Iona, e nehenehe ’outou e hi’o fa’ahou « Iona te peropheta » i roto Te mau ’ā’amu o te Faufa’a Tahito ; hi’o ato’a te ’api fa’ana’anataera’a nō teie hepetoma). E nehenehe ’outou e ui atu :

  • E aha tei tupu i te taime ’a ’ore ai Iona i ha’apa’o i te parau a te Fatu ? (hi’o Iona 1:4–17).

  • E aha tā Iona i rave nō te tātarahapa ? (hi’o Iona 1:10–12 ; 2:1–4, 9 ; 3:1–4).

  • E aha te ’ohipa i tupu ’a ha’apa’o ai Iona ? (hi’o Iona 3:5).

  

  2:30

• E au paha tā ’outou mau tamari’i e fa’ati’a fa’ahou i te ’ā’amu o Iona ’aore rā e ha’uti ta’ata ’ora. ’A fa’a’ite i te tahi ’e te tahi i te tahi mau ’itera’a, ’a hina’aro ai te Fatu ’ia rave ’outou i te hō’ē ’ohipa e mea fifi roa nō ’outou. Nāhea ’oia i te tauturura’a ia ’outou ’ia ha’apa’o i tāna parau ?

• Penei a’e e nehenehe tā ’outou mau tamari’i e fa’ahua uiui ia Iona nō ni’a i te ’ohipa tei tupu iāna. E aha te mau uira’a tā rātou e ui atu iāna ? ’A fa’aitoito ia rātou ’ia ui i te mau uira’a nō te ’ite mai i te mea tā Iona i ’apo mai nō ni’a i te Fatu. E aha tā Iona e nehenehe e parau mai, ’ei hi’ora’a, nō te aroha o te Fatu ? (hi’o, ’ei hi’ora’a, Iona 2:7–10 ; 3:10 ; 4:2).

• ’A tauturu i tā ’outou mau tamari’i ’ia feruri i te mau hi’ora’a, ’a fa’a’ite ai te Fa’aora i te aroha ia vetahi ’ē, mai te Mareko 2:3–12 ; Luka 23:33–34 ; ’e Ioane 8:1–11. E nehenehe ’outou ’e tā ’outou mau tamari’i e ’imi mai i te mau hōho’a nō teie mau hi’ora’a. E aha mau rāve’a tā tātou e vai ra nō te riro ’ei ta’ata aroha ia vetahi ’ē ?