Ieremia 31–33; 36– 36; Te ’Oto ’o Ieremia 1; 3

I roto ia Ieremia 31; 33 ’ua ’ite te Fatu i te « mihi, ’e te ’oto rahi roa » (Ieremia 31:15) tā te ’āti ’Īserā’ela e fa’aruru ’a haere ai rātou i roto i te fa’atītīra’a. Terā rā, ’ua hōro’a ato’a mai ’oia i te mau parau tāmāhanahana ’e te ti’aturira’a. ’A ’imi i te reira ’a tai’o ai ’outou i teie mau pene. E aha te mea tā ’outou e ’ite mai e tano ato’a nō ’outou ?

Noa atu ē, ’ua ’ōfati te ’āti ’Īserā’ela i tā rātou fafaura’a, ’ua tohu ’o Ieremia ē, e fa’ati’a fa’ahou te Fatu i te hō’ē « faufa’a mure ’ore » ’e te « ’āpī » e tōna mau ta’ata (Ieremia 31:31; 32:40). E aha te hō’ē fafaura’a ? E nehenehe e ’imi i te mau mana’o i roto i te Arata’i nō te mau pāpa’ira’a mo’a, «Fafaura’a ’āpī ’e te mure ’ore», Vaira’a buka ’evanelia.

’Ia tai’o ’outou ia Ieremia 31:31–34; 32:37–42, ’a feruri :

• E aha te aura’a nō ’outou ’ia riro ’ei tuha’a nō te nūna’a fafauhia a te Atua.

• E aha te aura’a ’ia pāpa’ihia tāna ture i roto i tō ’outou ’ā’au.

• E aha tā te Fatu e fafau mai ’ia rave ana’e ’outou i te mau fafaura’a e ’ōna.

• Nāhea tō ’outou tā’amura’a fafaura’a e te Fatu e taui ia ’outou.

E aha te mau fafaura’a tā ’outou i rave i mua i te Atua ’a ’āmui ai ’outou i roto i te mau ’ōro’a mo’a ? Nāhea ’ōna e fa’atupu ai i tāna mau fafaura’a ia ’outou ?

Hi’o ato’a David A. Bednar, «’Ei roto ’oe iā’u nei e pārahi ai, ’e ’ei roto vau ia ’oe ; nō reira, ’a haere mai nā muri iho iā’u», Liahona, Mē 2023, 123–26.

Mai te parau a Ieremia 36:2–3, nō te aha te Fatu i fa’aue ai ia Ieremia ’ia pāpa’i i tāna mau parau tohu ? ’Ia tai’o ana’e ’outou ia Ieremia 36, e tāpa’o mai na i te mana’o o te mau ta’ata i muri nei nō ni’a i teie mau parau tohu :

• Te Fatu (hi’o ’īrava 1–3, 27–31)

• Ieremia (hi’o ’īrava 4–7, 32)

• Baruka (hi’o ’īrava 4, 8–10, 14–18)

• Iehudi ’e te ari’i Iehoiakima (hi’o ’īrava 20–26)

• Elanatana, Delaia, ’e ’o Gemaria (hi’o ’īrava 25)

E feruri na e aha tō ’outou mana’o nō ni’a i teie mau pāpa’ira’a mo’a. ’Ua nāhea rātou i te tauturura’a ia ’oe ’ia huritua i te ’ino ?

I roto ia Ieremia 37:1–3, 15–21; 38:1–6, 14–28, e aha te fa’a’itera’a tā ’outou ē ’ite rā, ’ua ti’aturi te ari’i Zedekia ’o Ieremia e peropheta mau ïa nā te Fatu ? E aha te fa’a’itera’a tā ’outou ē ’ite rā, ’aita ’o Zedekia i ti’aturi a’e ? E aha tā ’outou i ’apo mai i roto i teie fa’aaura’a ? ’A tai’o ai ’outou ia Ieremia 39, ’a feruri na i te ta’a-’ē-ra’a mai te mea ’ua pe’e ’e ’ua ha’apa’o Zedekia ’e tōna nūna’a i te mau fa’auera’a a te Fatu. (’A fa’aau i te ’ohipa i tupu i ni’a ia Zedekia ’e te ’ohipa i tupu i ni’a i te ’utuāfare ’o Lehi i roto 1 Nephi 1–2.)

’Ua mana’o te mau ra’atira a ari’i ē, tē tūrorirori rā te mau tohura’a a Ieremia i tā rātou mau fa’ehau ’ia ’aro, nō reira ’ua tā’uehia Ieremia i roto i te fare ’auri reporepo (hi’o Ieremia 38:1–4). I roto ia Ieremia 38:6–13, e aha te mea tā ’outou e fa’ahiahia nei nō ni’a i te pāhonora’a a Ebed-melech the Etiopia ? ’A hi’o ato’a i te ha’amaita’ira’a tā te Fatu i hōro’a ia Ebed-melech i roto ia Ieremia 39:15–18.

Nāhea ’outou e pe’e i te hi’ora’a ’o Ebed-melech ?

Te Buka Te ’oto ’o Ieremia ’o te hō’ē ïa ha’aputura’a pehepehe tei pāpa’ihia i muri a’e i te ha’amoura’ahia ’o Ierusalema ’e tōna hiero. Nō te aha ’outou e mana’o ai e mea faufa’a ’ia fa’aherehere i teie mau pehepehe ? ’A feruri e aha tā te mau fa’ahōho’ara’a i roto i Te ’oto ’o Ieremia 1 ’e 3 e tauturu nei ia ’outou ’ia māramarama i te ’oto rahi tā ’Īserā’ela i fa’ari’i. E aha te mau parau poro’i nō te tīa’ira’a i te Mesia tā ’outou e ’ite nei ? (hi’o atu Te ’oto ’o Ieremia 3:20–33; hi’o ato’a Mataio 5:4; Iakobo 4:8–10; Alama 36:17–20).

’Ua fa’ahiti te peresideni M. Russell Ballard i te tahi mau ’ohipa o te nehenehe e ha’amo’e i teie tīa’ira’a, ’e ’ua hōro’a mai ’oia i te parau a’o i reira e ’itehia ai te tīa’ira’a :

« E ’ite paha te tahi pae o tātou i tō tātou orara’a ma te au ’ore, te ’ino’ino ’e te ’oto. E rave rahi ’o tē fāri’i i te mana’o ha’aparuparu nō te ’aro i te ’ino e tupu ra i te rahi i roto i te ao nei. Tē vai nei te tahi pae o tē māuiui nei nō te mau melo o te ’utuāfare ’o tei fa’ahorohia i te muriavai ’e te ’ōpape pūai ’e te hutu pūai nō te ha’aparuparura’a o te mau mea faufa’a ’e te morohira’a o te mau hīro’a morare […] E rave rahi o tei fa’aoti e fāri’i i te ’ino ’e te taehae o te ao nei ’ei mau mea tātā’ī-’ore. ’Ua fa’aru’e rātou te ti’aturira’a […]

« […] ’Ua mo’e paha i te tahi pae o tātou te ti’aturira’a nō te hara ’e te ’ōfatira’a ture. E nehenehe te hō’ē ta’ata e utuhi-hōhonu-hia i roto i te mau haere’a o te ao nei, e’ita ’oia e ’ite i te hō’ē ’ūputa ’e e’ita e ti’aturi fa’ahou. Tā’u pi’ira’a i te feiā ato’a o tei topa i roto i teie herepata a te ’enemi, ’eiaha roa e fa’aru’e ! Noa atu te huru pe’ape’a o te mau mea e tupu nei ’aore rā e tupu atu, ’ia ti’aturi mai ’outou iā’u, e nehenehe ā tā ’outou e fa’ari’i i te ti’aturira’a. I te mau taime ato’a » («The Joy of Hope Fulfilled», Ensign, Novema 1992, 31–32).

Hi’o ato’a «’A haere mai ’outou te feiā ’oto», Te mau Hīmene, N° 55.

• ’A tai’o ai ’outou ia Ieremia 31:3 e tā ’outou mau tamari’i, e nehenehe rātou e tauturu ia ’outou ’ia ’imi mai i te mau tao’a (’aore rā, te mau hōho’a nō taua mau tao’a) e maorori’ihia teie ’ohipa, mai te hō’ē ānei toata ’auri, ’e te tahi paeha’a mā’a hotu. E nehenehe ’outou e paraparau nō ni’a i te aura’a o te parau ra « mure ’ore » ’e ’ia fa’a’ite atu i te tahi ’e te tahi e mea nāhea tō ’outou ’itera’a i te « here mure ’ore » ’o te Metua i te ao ra. E nehenehe ato’a ’outou e hīmene ’āmui i te hō’ē hīmene mai te «God Is Watching Over All» (Children’s Songbook, 229).

• E au paha tā ’outou mau tamari’i ’ia pāpa’i hōho’a i te hō’ē māfatu i ni’a i te hō’ē ’api parau ’e i muri iho e pāpa’i i roto i te reira i te mau mea tā rātou i ha’api’i mai nō roto mai ia Ieremia 31:31–34 nō ni’a i te ravera’a i te mau fafaura’a e te Atua. E hina’aro paha ’outou e hi’o fa’ahou i te fafaura’a tā rātou i rave i te bāpetizora’a (hi’o Mosia 18:10, 13) ’e e ’āparau e aha te aura’a ’ia pāpa’ihia teie mau fafaura’a i roto i tō rātou ’ā’au.

• E nehenehe te ’api ’ohipara’a nō teie hepetoma e tauturu i tā ’outou mau tamari’i ’ia ha’api’i mai nō ni’a ia Ieremia, Baruka, ’e te ari’i (hi’o Ieremia 36). E nehenehe ato’a rātou e rave i te mau ’ohipa e tū’ati i te mau parau i roto ia Ieremia 36:4–10, mai te pāpa’ira’a i roto i te hō’ē buka (hi’o ’īrava 4) ’e te tai’ora’a i te mau pāpa’ira’a mo’a i te mau ta’ata (hi’o ’īrava 8, 10).

• E nehenehe ’outou ’e tā ’outou mau tamari’i e hi’o i te buka a te mau tamari’i ’e i te hō’ē buka pāpa’ira’a mo’a ’e ’ia paraparau nō ni’a i te ta’a-’ē-ra’a o teie mau buka. E aha tē fa’ata’a ’ē nei te mau pāpa’ira’a mo’a ? E fa’auru paha te fa’a’itera’a i te tahi ’e te tahi i te tahi mau ’īrava pāpa’ira’a mo’a tā ’outou i au maita’i na.

• E nehenehe ’outou e fa’a’ohipa i te hōho’a i te hope’a o teie arata’i ha’api’ira’a nō te tauturu i tā ’outou mau tamari’i ’ia hi’o i te ’ā’amu ’o Ebed-melech i roto ia Ieremia 38:6–13. Penei a’e e nehenehe ’outou e tauturu ia rātou ’ia ’imi i te hō’ē ’īrava i reira tō Ebed-melech ravera’a i te hō’ē ’ohipa itoito nō te tauturu i te peropheta a te Fatu. E aha tā tātou e nehenehe e rave nō te fa’a’ite ē, ’ua ’ite tātou ē, ’ua pi’i-mau-hia tō tātou peropheta i teie mahana e te Atua ?

• Nō te fa’a’itera’a i Te ’oto ’o Ieremia, e nehenehe ’outou e fa’ata’a i tā ’outou mau tamari’i ē, nō te mea ’aita te ’āti ’Īserā’ela i tātarahapa, ’ua ha’amouhia Ierusalema ’e te hiero. E nehenehe ’outou e fa’a’ite i te tahi ’e te tahi i tō ’outou mana’o ’āhiri ’outou tē ora ra i te reira tau (hi’o Te ’Oto ’o Ieremia 1:1–2, 16). Nāhea te parau poro’i i roto i Te ’Oto ’o Ieremia 3:22–26 i te hōro’a mai ia rātou i te ti’aturira’a ?

• E nehenehe ’outou e parau i te tahi ’e te tahi nō ni’a i te mau taime ’oto ai ’outou nō te hō’ē mā’itira’a tano ’ore tā ’outou i rave. E aha tā tātou e ’ite nei i roto i Te ’Oto ’o Ieremia 3:22–26 ’o tē tauturu ia tātou ’ia māramarama i te fa’a’orera’a hara a Iesu Mesia tāna ē pūpū mai nei ?