Hosea 1–6 ; 10–14 ; Ioela

’Ua tāiva te vahine a Hosea, ’o Gomera, iāna ’e ’ua fa’a’ite te Atua i teie ’ohipa ’oto i tupu, nō te ha’api’i i te mau ’āti ’Īserā’ela i te mea tāna e putapū nei nō rātou ’e nō tā rātou mau fafaura’a ’e ’ōna. ’A tai’o ai ’outou te Hosea 1–3, ’a feruri nāhea te Fatu i te fa’ariro i tōna aura’a ’e tōna nūna’a o te fafaura’a. Nāhea te ravera’a i te fafaura’a ’e te Fatu e riro ai mai te tomora’a i roto i te fa’aipoipora’a ? Nāhea te ’ōfatira’a i teie fafaura’a e riro ai mai te vai ha’apa’o-’ore-ra’a i te hoa fa’aipoipo ? (hi’o Hosea 2:5–7, 13). E aha tā te Hosea 2:14–23 e ha’api’i nei ia ’outou nō ni’a i te here ’e te aroha o te Fatu ? Nāhea ’outou ’ia fa’a’ite iāna i tō ’outou here ’e tō ’outou parauti’a ?

I roto te Hosea 14, ’a ’imi mai i te mau parau fafau nehenehe e rave rahi tā te Fatu i rave i te feiā e ho’i mai iāna ra. E aha te aura’a nō ’outou te parau « e aroha noa atu ia rātou » ? (’īrava 4). E aha tā te mau fa’aaura’a i te mau rā’au tupu i roto te mau ’īrava 5–8 e ha’api’i nei ia ’outou nō te mau ha’amaita’ira’a a te Fatu, e tae noa atu te mau ha’amaita’ira’a nō te tātarahapa ? ’Ei tuha’a nō tā ’outou ’imira’a māite, ’a feruri i te hīmene ’aore rā e fa’aro’o i te hō’ē hīmene nō ni’a te aroha o te Fa’aora, mai te « Haere mai ia Iesu » (Te mau Hīmene, N 56).

Tē pūpū nei te mau ta’ata i te ’anotau o Hosea i te mau tusia ’ānimara, terā rā tē ’ōfati nei rātou i te mau fa’auera’a faufa’a roa a’e. I tō ’outou mana’o e aha te aura’a te parau « hina’aro ho’i au [te Fatu] i te aroha ’eiaha te tusia ; ’e te ’ite i te Atua ’eiaha te mau tusia tā’auahi » ? (Hosea 6:6). I tō ’outou mana’o e aha te aura’a, ’ia riro te parauti’a mai te hō’ē ata ’aore rā mai te hupe ? (hi’o Hosea 6:4). Mai te aha ra te huru tō tātou parauti’a ? (hi’o Isaia 48:18 ; 1 Nephi 2:9–10).

E nehenehe ato’a ’outou e tai’o te Mataio 9:10–13 ; 12:1–8 nō te hi’o mai, mea nāhea tō te Fa’aora fa’a’ohipara’a te Hosea 6:6 i te roara’a o tāna misiōni. Nāhea teie mau tuha’a ’īrava i te tauturu ia ’outou ’ia māramarama i te mau parau a Hosea ?

Ma te tai’ora’a te Ioela 2:12–13, e mea maita’i ’ia ’ite ē te pāhaera’a ’aore rā te tūmutura’a i tōna ’ahu e tāpa’o nō rāpae te reira nō te ’oto ’aore rā te tātarahapa. E aha te ta’a-’ē-ra’a i roto i te hahaera’a i tō tātou ’ā’au ’e te pāhaera’a i tō tātou ’ahu ?

E aha te mau tū’atira’a tā ’outou e ’ite nei i rotopū i tō tātou nei ’anotau ’e te ’anotau tā Ioela i tohu ? (hi’o ta’a ’ē Ioela 2:1–2, 11, 18–32). E aha tā ’outou e fa’ahiahia nei i roto i te mau ha’amaita’ira’a i fafauhia e te Fatu i roto te mau ’īrava 18–32 ? Nō te aha teie mau ha’amaita’ira’a e riro ai e mea faufa’a ta’a ’ē mau i teie mahana ?

E riro e mea fa’ahiahia mau ’ia tai’o i te mea tā Moroni i parau nō ni’a te Ioela 2, ’a fārerei ai ’oia ia Iosepha Semita i te matahiti 1823 (hi’o Iosepha Semita—’Ā’amu 1:41). Nāhea i tō ’outou mana’o te mau tohura’a i roto te Ioela 2:28–32 e tupu ai i tō tātou nei ’anotau ? (hi’o ato’a Te mau ’Ohipa 2:1–21). I tō ’outou mana’o e aha te aura’a « e nīni’i [te Fatu] i [tōna] Vārua i ni’a i te mau ta’ata ato’a » ? (Ioela 2:28).

E nehenehe ’outou e feruri māite i teie mau parau a te peresideni Russell M. Nelson : « i te mau mahana i muri nei, e’ita tātou e ora i te pae vārua mai te peu ’aita te mana arata’i, te fa’atere, te tāmāhanahana tāmau o te Vārua Maita’i » (« Heheura’a nō te ’Ēkālesia, heheura’a nō tō tātou orara’a », Liahona, Mē 2018, 96). Nō te aha e mea faufa’a rahi te heheura’a nō tō ’outou oraora pae vārua ?

E aha tā ’outou e nehenehe e rave mai te mea tē mana’o ra ’outou ē, ’aita ’outou e fa’ari’i ra i taua nīni’ira’a ra ? Teie te tahi mau hi’ora’a e nehenehe e tauturu ’ia ’outou. E aha tā te mau ta’ata i rave i roto i teie mau pāpa’ira’a mo’a, nō te fa’ari’i i te hō’ē nīni’ira’a o te Vārua o te Fatu ?

• Mosia 4:1–3, 19–20 ; 18:7–11

• Helamana 6:34–36

• Te Ha’api’ira’a Tumu ʼe te mau Fafaura’a 19:37–41

’A tai’o ai ’outou i teie mau parau a Elder David A. Bednar, ’a feruri e aha te aura’a nō ’outou ’ia putapū i te nīni’ira’a a te Vārua Maita’i i roto i tō ’outou orara’a i te mau mahana ato’a :

« Pinepine tātou i te ha’afifi ia tātou nō te fa’ari’i i te heheura’a nō tātou iho. Tā’u e hina’aro nei e parau, te parau fafau o te fafaura’a ’oia ho’i, mai te mea e fa’atura tātou i tā tātou mau fafaura’a, e nehenehe te Vārua Maita’i e vai noa mai ia tātou ra nō te riro ’ei hoa tāmau nō tātou. Terā rā tē paraparau nei tātou nō te reira ’e tē fa’ariro nei tātou i te reira mai te huru ra, te fa’aro’ora’a i te reo o te Fatu nā roto i tōna Vārua ’ua riro ’ei ’ohipa varavara […] E ti’a i te [Vārua] ’ia vai mai ia tātou ra i te mau taime ato’a. ’Eiaha i te mau tētoni ato’a, terā rā mai te mea e rave te ta’ata mai tāna e nehenehe mau—’aita ’outou e tītauhia ’ia maita’i roa—mai te mea rā e rave ’outou ’e ’o vau nei mai tā tātou e nehenehe mau ’e ’aita tātou i rave i te hara rahi, e nehenehe ïa tātou e ti’aturi i te Vārua Maita’i nō te arata’i ia tātou […]

« […] Tē ti’aturi nei paha tātou ē e mea māere te Vārua Maita’i, e mea fa’ahiahia ’e inaha, i reira ra e mea hau ’oia, te ha’iha’i ’e te rahi i te roara’a o te tau » (« Elder David A. Bednar discussion » [’āru’i ’e te hō’ē huimana fa’atere rahi, 7 nō Fepuare 2020], broadcasts.ChurchofJesusChrist.org).

Hi’o ato’a Gary E. Stevenson, « Te mau muhumuhu a te Vārua », Liahona, Novema 2023, 42–45 ; « Enemy Territory [Pae o te ’ēnemi] » (video), Vaira’a buka ’evanelia.

3:38

• I roto i te buka a Hosea, tē fa’aau nei te Fatu i tāna mau fafaura’a ’e tōna mau ta’ata i te hō’ē fa’aipoipora’a. Nō te ha’api’i mai nā roto mai i teie fa’aaura’a, e nehenehe ’outou ’e tā ’outou mau tamari’i e hi’o i te hōho’a nō te vahine ’e te tāne fa’aipoipo ’e e ’āparau, nāhea te Metua i te ao ra e hina’aro i te tāne ’e te vahine ’ia aupuru i te tahi ’e te tahi. Tauturu i tā ’outou mau tamari’i ’ia ’ite mai i te mau ta’o i roto te Hosea 2:19–20 ’o tē fa’ata’a nei, i te mea tā te Fatu e putapū nei nō tātou. Nāhea tātou ’ia fa’a’ite i te Fatu ē, ’ua here tātou iāna ’e e vai ha’apa’o maita’i tātou iāna ?

• Tē fa’atoro nei Hosea 10:12 i te ueuera’a huero, i te ’ō’otira’a, i te taime ’e i te ua, nō te ani manihini ia tātou ’ia ’imi i te Fatu. ’A tai’o ai ’outou i teie ’īrava, e aha te mau mana’o ano’ite e tae mai i te ferurira’a, ’o tē nehenehe e fa’auru i te mau tamari’i ’ia ’imi iāna ? ’Ei hi’ora’a, penei a’e e nehenehe tā ’outou mau tamari’i e pāpa’i hōho’a i te hō’ē uati rahi, ’e e pāpa’i i te mau rāve’a e nehenehe ai rātou e ’imi i te Fatu i te mau taime ta’a ’ē o te mahana.

• ’Aore rā e nehenehe tā ’outou mau tamari’i e rave i te mau ’ohipa ’ōhie e tano i te ’īrava, ma te fa’ahua i te tanura’a i te mau huero, te tāpūra’a i te mau pota, ’aore rā te ti’ara’a i raro a’e i te ua. Tauturu i tā ’outou mau tamari’i ’ia fa’aau i te tanura’a i te huero ’e te ’ō’otira’a i te mā’a maita’i i te orara’a parauti’a ’e i te fa’ari’ira’a i te mau ha’amaita’ira’a a te Fatu. I muriiho e nehenehe ’outou e fa’ati’a i te tahi ’e te tahi nō te mau ha’amaita’ira’a tā te Fatu i nīni’i mai i ni’a ia ’outou ’a tāmata ai ’outou i te ’imi iāna.

• Nō te ha’apāpū i te parau mau i roto te Hosea 13:4 ē, ’aita e Fa’aora ’ē atu maori rā ’o Iesu Mesia, e nehenehe ’outou e fa’a’ite i tā ’outou mau tamari’i i te mau hōho’a nō te mau ta’ata e rave rahi, tae noa atu tō Iesu. E nehenehe tā ’outou mau tamari’i e fa’atoro i tō rātou rima i ni’a i te ta’ata e mana tōna nō te fa’aora ia tātou i te hara ’e i te pohe. ’A fa’a’ite i tō ’outou ’itera’a pāpū nō Iesu Mesia ʼe tāna tāra’ehara.

• E nehenehe tā ’outou mau tamari’i e ’imi mai te mau ta’o i roto te Hosea 13:4, 14 ’o tē fa’ata’a nei ia Iesu Mesia. E aha tā teie mau ta’o e ha’api’i nei ia tātou nōna ? ’A feruri i te tauturu i tā ’outou mau tamari’i ’ia fa’a’ohipa te Arata’i nō te mau pāpa’ira’a mo’a nō te ’ite mai i te tahi atu mau pāpa’ira’a mo’a ’o tē ha’api’i ē ’o Iesu tō tātou Fa’aora ’e te Tāra’ehara. ’A fa’a’ite i te tahi ’e te tahi i te mea tā ’outou e putapū nei nō Iesu Mesia.

• E nehenehe paha ’outou e tauturu i tā ’outou mau tamari’i ’ia māramarama te Ioela 2:28–29, ma te vaiihora’a ia rātou ’ia māni’i i te pape ’e i muri iho e fa’aau i te reira i te hō’ē tōpatara’a ’aore rā i te hō’ē tahera’a pape. E aha te aura’a nō te parau e « nīni’ihia mai » te Vārua i ni’a iho ia tātou ?

• ’A tai’o ’āmui ai ’outou te Ioela 2:28–29, e nehenehe ’outou e ani i tā ’outou mau tamari’i ’ia pāpa’i i te mau i’oa o vetahi nō te mono i te mau pereota « tā ’outou mau tamari’i tamāroa » ’e « te mau tamāhine ». I muri iho ’a tauturu ia rātou ’ia ’imi i te mau pāpa’ira’a mo’a mai te Ioane 14:16 ; Moroni 10:5 ; Te Ha’api’ira’a Tumu ’e te mau Fafaura’a 42:17 nō te ’ite mai nāhea te Vārua e nehenehe ai e tauturu ia rātou.