« ថ្ងៃទី២៣–២៩ ខែវិច្ឆិកា ‹ ចូរស្វែងរកព្រះយេហូវ៉ាវិញ នោះឯងរាល់គ្នានឹងរស់នៅ › ៖អេម៉ុស, អូបាឌា, យ៉ូណាស » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ព្រះគម្ពីរសញ្ញាចាស់ ឆ្នាំ២០២៦ ( ឆ្នាំ២០២៦ )

« ថ្ងៃទី២៣–២៩ ខែវិច្ឆិកា ‹ ចូរស្វែងរកព្រះយេហូវ៉ាវិញ នោះឯងរាល់គ្នានឹងរស់នៅ › » ចូរមកតាមខ្ញុំ ៖ ព្រះគម្ពីរសញ្ញាចាស់ ឆ្នាំ២០២៦

Jonah on the Beach at Nineveh [ យ៉ូណាសនៅលើឆ្នេរនៃក្រុងនីនីវេ ] ដោយ ដាណីយ៉ែល ល្វីស

ថ្ងៃទី២៣–២៩ ខែវិច្ឆិកា ៖ « ចូរស្វែងរកព្រះយេហូវ៉ាវិញ នោះឯងរាល់គ្នានឹងរស់នៅ »

អេម៉ុស, អូបាឌា, យ៉ូណាស

យ៉ូណាសនៅលើសំពៅឆ្ពោះទៅកាន់ស្រុកតើស៊ីស ។ គ្មានអ្វីខុសឆ្គងជាមួយនឹងការជិះសំពៅទៅកាន់ស្រុកតើស៊ីសនោះទ លើកលែងតែវានៅឆ្ងាយពីក្រុងនីនីវេ ជាកន្លែងដែលយ៉ូណាស គួរទៅដើម្បីផ្សាយសារលិខិតរបស់ព្រះ ។ នៅពេលសំពៅនោះជួបនឹងព្យុះភ្លៀងធំមួយ នោះយ៉ូណាសបានដឹងថា ព្យុះនោះកើតឡើងដោយសារតែការមិនគោរពប្រតិបត្តិរបស់លោក ។ ដោយការទទូចរបស់យ៉ូណាស នោះពួកអ្នកដើរសំពៅបានបោះលោកចូលទៅក្នុងសមុទ្រដើម្បីបញ្ឈប់ព្យុះនោះ ។ វាទំនងដូចជាចុងបញ្ចប់នៃគម្ពីរយ៉ូណាស និងការងារបម្រើរបស់លោក ។ ប៉ុន្តែព្រះអម្ចាស់មិនបោះបង់យ៉ូណាសទេ—ដូចដែលទ្រង់មិនបានបោះបង់ប្រជាជននៅក្រុងនីនីវេ វង្សអ៊ីស្រាអែល ឬយើងម្នាក់ៗដែរ ។

ដូច្នេះ ទ្រង់បន្តចាត់ព្យាការី— ដូចជា យ៉ូណាស, អេម៉ុស, អូបាឌា និងព្យាការីរបស់យើងនៅសព្វថ្ងៃនេះ—ជាមួយនឹងសារលិខិតថា ប្រសិនបើយើងប្រែចិត្ត យើងនឹងមិនត្រូវបានបោះបង់ចោលជារៀងរហូតឡើយ ។ ក្នុងចំណោម « គំនិតលាក់កំបាំង » ទាំងអស់ដែលព្រះបានបើកសម្ដែង ( សូមមើល អេម៉ុស ៣:៧ ) នេះគឺស្ថិតក្នុងចំណោមរឿងដ៏មានតម្លៃបំផុត ៖ ដោយសារព្រះយេស៊ូវគ្រីស្ទ វាមិនទាន់យឺតដើម្បីផ្លាស់ប្តូរឡើយ ។ ទ្រង់នៅតែចង់ជួយយើងឲ្យរស់តាមសេចក្ដីសញ្ញាដែលយើងបានធ្វើជាមួយទ្រង់ ហើយទ្រង់ស្ម័គ្រព្រះទ័យប្រទានឱកាសម្តងទៀតដល់យើង ។

សម្រាប់អ្វីជាច្រើនទៀតពីគម្ពីរទាំងនេះ សូមមើល « អេម៉ុស » « អូបាឌា » និង « យ៉ូណាស » នៅក្នុងសេចក្ដីណែនាំដល់បទគម្ពីរទាំងឡាយ ។

គំនិតសម្រាប់ការរៀនសូត្រនៅឯគេហដ្ឋាន និងនៅឯសាសនាចក្រ

អេម៉ុស ៣:១–៨; ៧:១០–១៥

ព្រះអម្ចាស់បើកសម្ដែងសេចក្តីពិតតាមរយៈព្យាការីរបស់ទ្រង់ ។

នៅក្នុង អេម៉ុស ៣:៣–៦ ព្យាការីអេម៉ុសបានបង្ហាញឧទាហរណ៍នៃការសន្និដ្ឋានដែលយើងអាចទាញចេញពីទីសម្គាល់ដែលយើងបានឮ ឬឃើញ ៖ នៅពេលដែលសត្វតោគ្រហឹម វាច្បាស់ជាចាប់បានចំណី ប្រសិនបើបក្សីមួយត្រូវបានចាប់នៅក្នុងអន្ទាក់ ច្បាស់ជាមាននុយនៅទីនោះ ។ នៅក្នុង ខទី ៧–៨ អេម៉ុសបានអនុវត្តតក្កវិជ្ជានេះចំពោះពួកព្យាការី ។ តើយើងអាចសន្និដ្ឋានអ្វីខ្លះ ពេលព្យាការីព្យាករ ? តើបងប្អូនរៀនអ្វីខ្លះទៀតអំពីព្យាការី មកពី អេម៉ុស ៧:១០–១៥ ?

តើព្រះអម្ចាស់បានបើកសម្ដែងអ្វីខ្លះទៅកាន់បងប្អូនតាមរយៈព្យាការីរបស់ទ្រង់ ?

អែលឌើរ អូលីសេស សូរ៉េស បានមានប្រសាសន៍ថា « ការមានព្យាការី គឺជាសញ្ញានៃសេចក្តីស្រឡាញ់របស់ព្រះ » ( « Prophets Speak by the Power of the Holy Spirit » Liahona ខែឧសភា ឆ្នាំ២០១៨ ទំព័រ ៩៩ ) ។ សូមពិចារណាពីរបៀបដែលបងប្អូននឹងបំពេញប្រយោគនេះ ៖ « ខ្ញុំដឹងថា ព្រះស្រឡាញ់ខ្ញុំ ដោយសារទ្រង់ចាត់ព្យាការីដែល … » នេះគឺជាបទគម្ពីរមួយចំនួនដែលអាចជួយ ៖ ចោទិយកថា ១៨:១៨; អេសេគាល ៣:១៦–១៧; អេភេសូរ ៤:១១–១៤; នីហ្វៃទី១ ២២:២; គោលលទ្ធិ និងសេចក្ដីសញ្ញា ២១:៤–៦; ៨៤:៣៦–៣៨; ១០៧:៩១–៩២ ។

តើបងប្អូននឹងនិយាយអ្វីទៅនរណាម្នាក់ដែលមានអារម្មណ៍ថា សព្វថ្ងៃនេះមិនចាំបាច់មានព្យាការីនោះទេ ?

សូមមើលផងដែរ Topics and Questions « Prophets »នៅក្នុងបណ្ណាល័យដំណឹងល្អ ។

អេម៉ុស ៤–៥

« ចូរស្វែងរកព្រះយេហូវ៉ាវិញ នោះឯងរាល់គ្នានឹងរស់នៅ » ។

យោងតាម អេម៉ុស ៤:៦–១៣ តើព្រះអម្ចាស់បានសង្ឃឹមថានឹងមានអ្វីកើតឡើងបន្ទាប់ពីពួកសាសន៍អ៊ីស្រាអែលដកពិសោធន៍ការសាកល្បងទាំងឡាយ ? ( សូមមើលផងដែរ ហេលេមិន ១២:៣ ) ។ ខណៈដែលការសាកល្បងរបស់បងប្អូនអាចនឹងមិនត្រូវបានចាត់មកពីព្រះឡើយ តើវាបានផ្ដល់ឱកាសឲ្យបងប្អូនងាកទៅរកទ្រង់តាមរបៀបណា ?

នៅពេលបងប្អូនអាន អេម៉ុស ៥:៤, ១៤–១៥ សូមពិចារណាពីរបៀបដែលព្រះអម្ចាស់មានសេចក្ដីមេត្តាចំពោះបងប្អូន ។ តើការស្វែងរកទ្រង់បានធ្វើឲ្យបងប្អូនមានជីវិតដោយរបៀបណា ?

អេម៉ុស ៨:១១–១២

ព្រះបន្ទូលនៃព្រះអម្ចាស់អាចបំពេញសេចក្ដីស្រេកឃ្លានខាងវិញ្ញាណបាន ។

នៅពេលបងប្អូនអាន អេម៉ុស ៨:១១–១២ សូមគិតពីហេតុផលដែលគ្រោះទុរ្ភិក្សគឺជាការប្រៀបធៀបដ៏ល្អសម្រាប់ការរស់នៅដោយគ្មានព្រះបន្ទូលរបស់ព្រះ ( សូមមើលផងដែរ យ៉ូហាន ៦:២៦–៣៥; នីហ្វៃទី ២ ៩:៥០–៥១; ៣២:៣; អេណុស ១:៤–៨ ) ។ តើបងប្អូនដឹងដោយរបៀបណានៅពេលបងប្អូនមានសេចក្ដីស្រេកឃ្លានខាងវិញ្ញាណ ?

ខគម្ពីរទាំងនេះក៏អាចអនុវត្តចំពោះការក្បត់សាសនាដ៏ធំផងដែរ ( សូមមើល Topics and Questions « Apostasy » បណ្ណាល័យដំណឹងល្អ ) ។ តើ « គ្រោះទុរ្ភិក្ស » ខាងវិញ្ញាណបានប៉ះពាល់ដល់បុត្រាបុត្រីរបស់ព្រះយ៉ាងដូចម្ដេច ? តើការស្ដារឡើងវិញបានជួយបំពេញសេចក្ដីស្រេកឃ្លានខាងវិញ្ញាណរបស់បងប្អូនយ៉ាងដូចម្ដេច ?

សូមមើលផងដែរ « The Great Apostas » ( វីដេអូ ) នៅលើបណ្ណាល័យដំណឹងល្អ ។

អូបាឌា ១:២១

តើនរណាជា « ពួកអ្នកសង្គ្រោះ …ឯភ្នំស៊ីយ៉ូន » ?

ដោយយោងទៅ អូបាឌា ១:២១ ប្រធាន ហ្គរដុន ប៊ី ហ៊ិងគ្លី បានពន្យល់ថា យើងក្លាយជាអ្នកសង្គ្រោះនៅលើភ្នំស៊ីយ៉ូន នៅពេលយើងទទួលពិធីបរិសុទ្ធសម្រាប់អ្នកស្លាប់នៅក្នុងព្រះវិហារបរិសុទ្ធ ( សូមមើល « Closing Remarks » Liahona ខែវិច្ឆិកា ឆ្នាំ២០២៤ ទំព័រ ១០៥ ) ។ ទោះបីជាតាមរបៀបដ៏តូចមួយក្តី—តើការធ្វើកិច្ចការនោះស្រដៀងគ្នា—នឹងអ្វីដែលព្រះអង្គសង្រ្គោះធ្វើចំពោះយើងយ៉ាងដូចម្ដេច ? តើការធ្វើកិច្ចការនេះបានជួយបងប្អូនឲ្យមានអារម្មណ៍ខិតទៅជិតព្រះយេស៊ូវគ្រីស្ទដោយរបៀបណា ?

សូមមើលផងដែរ « Holy Temples on Mount Zion » Hymns ល.រ. ២៨៩ ។

យុវវ័យមួយក្រុមនៅខាងក្រៅព្រះវិហារបរិសុទ្ធ

យ៉ូណាស ១–៤

ព្រះអម្ចាស់មានសេចក្ដីសប្បុរសដល់មនុស្សទាំងអស់ ដែលងាកមករកទ្រង់ ។

ក្រុងនីនីវេគឺជាមារសត្រូវនៃសាសន៍អ៊ីស្រាអែលដែលត្រូវបានគេស្គាល់ដោយសារតែភាពសាហាវឃោរឃៅរបស់វា ។ ចំពោះយ៉ូណាស វាហាក់ដូចជាមិនពិតទេដែលពួកគេត្រៀមខ្លួនដើម្បីប្រែចិត្ត ។ វាអាចគួរឲ្យចាប់អារម្មណ៍ដើម្បីប្រៀបធៀបឥរិយាបថរបស់យ៉ូណាស ( សូមមើល យ៉ូណាស ១; ៣–៤ )ទៅនឹងអារម្មណ៍របស់អាលម៉ា និងពួកបុត្រារបស់ម៉ូសាយ ( សូមមើល ម៉ូសាយ ២៨:១–៥; អាលម៉ា ១៧:២៣–២៥ ) ។ តើបងប្អូនបានរៀនអ្វីខ្លះមកពី យ៉ូណាស ៣ ដែលបំផុសគំនិតបងប្អូនឲ្យចែកចាយដំណឹងល្អ ទោះជាជាមួយនឹងមនុស្សដែលហាក់ដូចជាមិនទាន់បានត្រៀមខ្លួនដើម្បីផ្លាស់ប្ដូរក្ដី ?

នៅពេលបងប្អូនអានគម្ពីរយ៉ូណាស សូមរកមើលគំរូនៃសេចក្ដីមេត្តាករុណារបស់ព្រះអម្ចាស់ ។ ហេតុអ្វីបងប្អូនមានអារម្មណ៍ថាយ៉ូណាសបាន « ទំនាស់ចិត្ត » និង « ខឹង » ( យ៉ូណាស ៤:១ ) នៅពេលព្រះអម្ចាស់បានប្រទានសេចក្ដីមេត្តាករុណាដល់ប្រជាជនក្រុងនីនីវេ ? តើបងប្អូនគិតថា ព្រះអម្ចាស់កំពុងព្យាយាមបង្រៀនលោកអំពីអ្វីខ្លះនៅក្នុង ជំពូក ៤ ? សូមពិចារណាពីរបៀបដែលបងប្អូនធ្លាប់ដកពិសោធន៍នូវសេចក្ដីសប្បុរសនោះក្នុងជីវិតរបស់បងប្អូន ។ តើបងប្អូនរៀនអ្វីខ្លះមកពីយ៉ូណាស ដែលវាអាចជួយបងប្អូនឲ្យមានសេចក្ដីសប្បុរសកាន់តែខ្លាំង ?

គំនិតសម្រាប់បង្រៀនកុមារ

ពីព្រោះថ្ងៃអាទិត្យនេះ ជាសប្ដាហ៍ទីប្រាំនៃខែនេះ គ្រូបង្រៀនអង្គការបឋមសិក្សាត្រូវបានលើកទឹកចិត្តឲ្យប្រើប្រាស់សកម្មភាពរៀននៅក្នុង « ឧបសម្ព័ន្ធ ខ ៖ ការរៀបចំកុមារឲ្យនៅលើផ្លូវនៃសេចក្តីសញ្ញារបស់ព្រះពេញមួយជីវិត » ។

អេម៉ុស ៣:៧

ពួកព្យាការីគឺសារទូតរបស់ព្រះយេស៊ូវគ្រីស្ទ ។

ដើម្បីជួយកូនៗបងប្អូនឲ្យយល់ អេម៉ុស ៣:៧ បងប្អូនអាចខ្សឹបសារលិខិតសាមញ្ញមួយទៅកាន់ពួកគេម្នាក់ ហើយសុំឲ្យពួកគេចែកចាយសារលិខិតនោះជាមួយកូនៗផ្សេងទៀត ។ តើសារទូតនៅក្នុងសកម្មភាពនេះដូចគ្នានឹងព្យាការីយ៉ាងដូចម្ដេច ? ហេតុអ្វីបានជាព្រះអម្ចាស់ប្រទានព្យាការីដល់យើង ?
ដើម្បីរៀនបន្ថែមទៀតអំពីអ្វីដែលព្យាការីធ្វើ បងប្អូន និងកូនៗបងប្អូនអាចពិនិត្យមើលឡើងវិញនូវ សារលិខិតថ្មីៗមកពីប្រធានបច្ចុប្បន្នរបស់សាសនាចក្រ ។ បងប្អូនក៏អាចច្រៀងជាមួយគ្នានូវបទចម្រៀងដូចជាបទ « ធ្វើតាមព្យាការី » ( សៀវភៅចម្រៀងកុមារ ទំព័រ ៥៨–៥៩ ) ។ សូមចែកចាយជាមួយគ្នាអំពីមូលហេតុដែលបងប្អូនជ្រើសរើសធ្វើតាមព្យាការីរបស់ព្រះ ។

សូមជួយកូនៗឲ្យទន្ទេញចាំបទគម្ពីរទាំងឡាយ ។ អែលឌើរ រីឆាដ ជី ស្កត ៖ « ដើម្បីទន្ទេញចាំបទគម្ពីរមួយ គឺត្រូវបង្កើតមិត្តភាពមួយថ្មី ។ វាគឺដូចជាការរកឃើញនូវបុគ្គលថ្មីម្នាក់ដែលអាចពឹងពាក់បាននៅពេលត្រូវការ វាផ្ដល់នូវការបំផុសគំនិត និងការលួងលោមព្រមទាំងជាប្រភពនៃការជំរុញទឹកចិត្តដើម្បីធ្វើការផ្លាស់ប្ដូរដែលចាំបាច់ » ( « The Power of Scripture » Ensign ខែវិច្ឆិកា ឆ្នាំ២០១១ ទំព័រ ៦ ) ។ ដើម្បីជួយកូនៗបងប្អូនឲ្យទន្ទេញចាំគ្រប់ ឬផ្នែកមួយនៃ អេម៉ុស ៣:៧ បងប្អូនអាចសរសេរវា និងថាវាឡើងវិញរួមគ្នា ។ បន្ទាប់មក សូមលុប ឬគ្របម្ដងពីរបីពាក្យ រហូតទាល់តែកូនៗបងប្អូនអាចថាឡើងវិញនូវខគម្ពីរទាំងមូលចេញមកពីការចងចាំ ។

អេម៉ុស ៨:១១–១២

ការស្ដារឡើងវិញនៃដំណឹងល្អបានបញ្ចប់អំណត់ដែលជាការក្បត់សាសនា ។

សូមអញ្ជើញកូនៗបងប្អូនឲ្យធ្វើជាឃ្លាននៅពេលបងប្អូនអាន អេម៉ុស ៨:១១–១២ ។ តើវាមានអារម្មណ៍យ៉ាងណានៅពេលយើងស្រេកឃ្លានព្រះបន្ទូលរបស់ព្រះ ? ប្រហែលជាកូនៗបងប្អូនអាចធ្វើជាញ៉ាំអាហារនៅពេលបងប្អូនចែកចាយជាមួយគ្នានូវបទគម្ពីរដែលបងប្អូនចូលចិត្ត ។
បងប្អូនអាចប្រើសេចក្ដីណែនាំដល់បទគម្ពីរទាំងឡាយ « សេចក្ដីក្បត់សាសនា » ( បណ្ណាល័យដំណឹងល្អ ) ឬ « ជំនាន់ក្រោយព្រះគម្ពីរសញ្ញាថ្មី » ( នៅក្នុង ដំណើររឿងព្រះគម្ពីរសញ្ញាថ្មី ទំព័រ ១៦៧–១៧៩ )ដើម្បីជួយកូនៗបងប្អូនឲ្យយល់ពី« គ្រោះទុរ្ភិក្ស »ដែលកើតចេញពីការក្បត់សាសនាដ៏ធំ និងរបៀបដែលវាបានបញ្ចប់ដោយការស្ដារឡើងវិញ ។ សូមចែកចាយជាមួយគ្នានូវហេតុផលដែលបងប្អូនមានអំណរគុណដែលព្រះអម្ចាស់បានស្ដារដំណឹងល្អរបស់ទ្រង់ឡើងវិញនៅក្នុងជំនាន់របស់យើង ។

2:52
After the New Testament

យ៉ូណាស ១–៣

ព្រះអម្ចាស់នឹងជួយខ្ញុំឲ្យគោរពតាមទ្រង់ ទោះបីជានៅពេលមានការលំបាកក្ដី ។

ដើម្បីជួយកូនៗបងប្អូនរៀនពីដំណើររឿងរបស់យ៉ូណាស បងប្អូនអាចមើលឡើងវិញនូវ« ព្យាការីយ៉ូណាស »នៅក្នុង ដំណើររឿងព្រះគម្ពីរសញ្ញាចាស់ សូមមើលទំព័រសកម្មភាពសម្រាប់សប្ដាហ៍នេះផងដែរ ) ។ បន្ទាប់មកបងប្អូនអាចសួរ ៖
- តើមានអ្វីបានកើតឡើង នៅពេលដែលយ៉ូណាសពុំបានគោរពតាមព្រះអម្ចាស់ ? ( សូមមើល យ៉ូណាស ១:៤–១៧ ) ។
- តើយ៉ូណាសបានធ្វើអ្វីខ្លះដើម្បីប្រែចិត្ត ? ( សូមមើល យ៉ូណាស ១:១០–១២; ២:១–៤, ៩; ៣:១–៤ ) ។
- តើមានអ្វីបានកើតឡើង នៅពេលយ៉ូណាសបានគោរពតាម ? ( សូមមើល យ៉ូណាស ៣:៣–៥ ) ។
2:30
Jonah the Prophet
កូនៗបងប្អូនអាចនឹងចូលចិត្តការនិទានឡើងវិញនូវដំណើររឿងអំពីយ៉ូណាស ឬការសម្ដែងរឿងនេះ ។ សូមចែកចាយជាមួយគ្នានូវបទពិសោធន៍មួយចំនួន នៅពេលព្រះអម្ចាស់ចង់ឲ្យបងប្អូនធ្វើអ្វីមួយដែលពិបាកសម្រាប់បងប្អូន ។ តើទ្រង់បានជួយបងប្អូនឲ្យគោរពតាមទ្រង់ដោយរបៀបណា ?

យ៉ូណាស ១–៤

ព្រះអម្ចាស់មានសេចក្ដីសប្បុរសដល់មនុស្សទាំងអស់ ដែលងាកមករកទ្រង់ ។

ប្រហែលជាកូនៗបងប្អូនអាចធ្វើដូចជាពួកគេកំពុងសម្ភាសយ៉ូណាសអំពីបទពិសោធន៍របស់លោក ។ តើពួកគេនឹងសួរលោកនូវសំណួរអ្វីខ្លះ ? សូមលើកទឹកចិត្តពួកគេឲ្យសួរសំណួរដើម្បីរកមើលអ្វីដែលយ៉ូណាសបានរៀនអំពីព្រះអម្ចាស់ ។ ឧទាហរណ៍ តើយ៉ូណាសអាចនឹងនិយាយអ្វីខ្លះអំពីសេចក្ដីមេត្តាករុណារបស់ព្រះអម្ចាស់ ? ( ឧទាហរណ៍ សូមមើល យ៉ូណាស ២:៧–១០; ៣:១០; ៤:២ ) ។

ព្រះយេស៊ូវកំពុងឈោងទៅរកបុរសម្នាក់ត្រូវបានគេដាក់ចុះតាមដំបូល — Christ and the Palsied Man[ ព្រះគ្រីស្ទ និងមនុស្សស្លាប់ដៃជើង ] ដោយ ជេ ខឺក រីឆាដ

សូមជួយកូនៗបងប្អូនឲ្យគិតអំពីគំរូទាំងឡាយ នៅពេលព្រះអង្គសង្គ្រោះបានបង្ហាញសេចក្ដីមេត្តាករុណាចំពោះអ្នកដទៃទៀត ដូចជា ម៉ាកុស ២:៣–១២; លូកា ២៣:៣៣–៣៤ និង យ៉ូហាន ៨:១–១១ ។ បងប្អូន និងកូនៗបងប្អូនអាចស្រាវជ្រាវរករូបភាពអំពីគំរូទាំងនេះ ។ តើយើងមានឱកាសអ្វីខ្លះដើម្បីមានសេចក្ដីមេត្តាករុណាចំពោះអ្នកដទៃ ?

សម្រាប់គំនិតបន្ថែម សូមមើលទស្សនាវដ្តី ប្រិយមិត្ត ប្រចាំខែនេះ ។

យ៉ូណាសត្រូវបានគេទម្លាក់ពីទូកទៅក្នុងសមុទ្រ ជាកន្លែងដែលស្រមោលត្រីធំមើលសឹងតែមិនឃើញ — យ៉ូណាស និងត្រីបាឡែន ដោយ ខេវីន ខាឌីន

ទំព័រសកម្មភាពសម្រាប់អង្គការបឋមសិក្សា ៖ ព្រះអម្ចាស់នឹងជួយខ្ញុំឲ្យគោរពតាមទ្រង់ ទោះបីជានៅពេលមានការលំបាកក្ដី — យ៉ូណាស និងត្រីបាឡែន ដោយ ខេវីន ខាឌីន