« ថ្ងៃទី៣០ ខែវិច្ឆិកា–ថ្ងៃទី៦ ខែធ្នូ ‹ ទ្រង់សព្វព្រះហឫទ័យនឹងសេចក្តីសប្បុរស › ៖: មីកា; ណាហ៊ុម; ហាបាគុក; សេផានា » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ព្រះគម្ពីរសញ្ញាចាស់ ឆ្នាំ២០២៦ ( ឆ្នាំ២០២៦ )

« ថ្ងៃទី៣០ ខែវិច្ឆិកា–ថ្ងៃទី៦ ខែធ្នូ ‹ ទ្រង់សព្វព្រះហឫទ័យនឹងសេចក្តីសប្បុរស › » ចូរមកតាមខ្ញុំ ៖ ព្រះគម្ពីរសញ្ញាចាស់ ឆ្នាំ២០២៦

កាលដើមដំបូងមានព្រះបន្ទូល ដោយ អ៊ីវ៉ា ធីម៉ូធី

ថ្ងៃទី៣០ ខែវិច្ឆិកា–ថ្ងៃទី៦ ខែធ្នូ ៖ « ទ្រង់សព្វព្រះហឫទ័យនឹងសេចក្តីសប្បុរស »

មីកា; ណាហ៊ុម; ហាបាគុក; សេផានា

ជារឿយៗ ការអានព្រះគម្ពីរសញ្ញាចាស់មានន័យថា បងប្អូនកំពុងអានការព្យាករអំពីការបំផ្លិចបំផ្លាញ ។ ជាញឹកញាប់ ព្រះអម្ចាស់បានហៅពួកព្យាការីឲ្យព្រមានដល់ជនទុច្ចរិតអំពីការជំនុំជម្រះរបស់ទ្រង់ ។ ការងារបម្រើរបស់មីកា, ណាហ៊ុម, ហាបាគុក និងសេផានា គឺជាឧទាហរណ៍ដ៏ល្អមួយ ។ ព្យាការីទាំងនេះបានប្រាប់ជាមុននូវរឿងលម្អិតដ៏គួរឲ្យខ្លាចពីទីក្រុងដែលនឹងត្រូវវិនាស ដែលទីក្រុងទាំងនោះហាក់ដូចជារឹងមាំ និងខ្លាំងក្លានាពេលនោះ រួមមាន ៖ ក្រុងនីនីវេ, ក្រុងបាប៊ីឡូន និងក្រុងយេរូសាឡិម ។ ប៉ុន្តែ រឿងនោះគឺកន្លងទៅជាងរាប់ពាន់ឆ្នាំមកហើយ ។ ហេតុអ្វីវាមានតម្លៃដើម្បីអានពីការព្យាករទាំងនេះនៅសព្វថ្ងៃនេះ ?

ទោះបីជាទីក្រុងដ៏ឆ្មើងឆ្មៃ ហើយទុច្ចរិតទាំងនោះត្រូវបានបំផ្លាញទៅក្តី ក៏អំពើទុច្ចរិតដ៏ឆ្មើងឆ្មៃនៅតែមានដដែល ។ យើងថែមទាំងអាចមើលឃើញដានរបស់វានៅក្នុងដួងចិត្តយើងផងដែរ ។ ព្យាការីក្នុងគម្ពីរសញ្ញាចាស់បង្ហាញពីរបៀបដែលយើងអាចងាកចេញពីអំពើអាក្រក់ទាំងនេះបាន ។ ប្រហែលនោះជាមូលហេតុមួយដែលយើងនៅតែអានប្រសាសន៍របស់ពួកលោកនៅសព្វថ្ងៃនេះ ។ ពួកលោកពុំមែនគ្រាន់តែជាពួកព្យាការីដែលព្យាករតែពីការវិនាសនោះទេ—ពួកលោកក៏ជាព្យាការីនៃការរំដោះផងដែរ ។ ការពិពណ៌នាពីការបំផ្លិចបំផ្លាញរាងចុះថយដោយការអញ្ជើញឲ្យមករកព្រះគ្រីស្ទ ហើយទទួលបានសេចក្តីមេត្តាករុណារបស់ទ្រង់ ។ ដូចដែលមីកាបានលើកឡើងថា ព្រះអម្ចាស់មិនសព្វព្រះទ័យក្នុងការដាក់ទោសយើងនោះទេ ប៉ុន្តែ « ទ្រង់សព្វព្រះហឫទ័យនឹងសេចក្តីសប្បុរសវិញ »( មីកា ៧:១៨ ) ។ នេះគឺជារបៀបរបស់ព្រះអម្ចាស់កាលពីបុរាណ និងជារបៀបរបស់ទ្រង់នៅសម័យនេះ។ « ដំណើររបស់ទ្រង់មានតាំងពីបុរាណមក » ( ហាបាគុក ៣:៦ ) ។

សម្រាប់ទិដ្ឋភាពទូទៅស្តីពីគម្ពីរទាំងនេះ សូមមើល « មីកា » « ណាហ៊ុម » « ហាបាគុក » និង « សេផានា » នៅក្នុងសេចក្តីណែនាំដល់បទគម្ពីរទាំងឡាយ ។

គំនិតសម្រាប់ការរៀនសូត្រនៅឯគេហដ្ឋាន និងនៅឯសាសនាចក្រ

មីកា ៦:១–៨

« តើព្រះយេហូវ៉ាសព្វព្រះហឫទ័យឲ្យឯងប្រព្រឹត្តដូចម្តេច ? »

មីកាអញ្ជើញយើងឲ្យស្រមៃថា តើវាអាចមានសភាពដូចម្ដេចក្នុងការ « ចូលទៅចំពោះព្រះយេហូវ៉ា ហើយក្រាប … នៅមុខព្រះដ៏ខ្ពស់ » ( មីកា ៦:៦ ) ។ តើ ខទី ៦–៨ ផ្តល់យោបល់ដល់បងប្អូនអំពីអ្វីខ្លះ ដែលមានសារៈសំខាន់ចំពោះព្រះអម្ចាស់ នៅពេលទ្រង់វាយតម្លៃជីវិតរបស់បងប្អូន ?

សូមមើលផងដែរ ឌែល ជី រិនឡាន់ « Do Justly, Love Mercy, and Walk Humbly with God » Liahona ខែវិច្ឆិកា ឆ្នាំ២០២០ ទំព័រ ១០៩–១១២ ។

ជញ្ជាំងថ្មនៃបន្ទាយ — « ព្រះយេហូវ៉ាទ្រង់ល្អ ទ្រង់ជាទីពឹងមាំមួននៅគ្រាលំបាក » ( ណាហ៊ុម ១:៧ ) ។

ណាហ៊ុម ១

ព្រះអម្ចាស់មានទាំងព្រះចេស្ដា និងសេចក្ដីមេត្តាករុណា ។

បេសកកម្មរបស់ណាហ៊ុមគឺដើម្បីប្រាប់ទុកជាមុនអំពីការបំផ្លិចបំផ្លាញនៃក្រុងនីនីវេ—ជារាជធានីនៃស្រុកអាសស៊ើរដែលជាចក្រភពដ៏ឃោរឃៅ ដែលបានធ្វើឲ្យសាសន៍អ៊ីស្រាអែលបែកខ្ញែកគ្នា និងបានធ្វើបាបសាសន៍យូដាយ៉ាងឃោរឃៅ ។ ណាហ៊ុមបានចាប់ផ្ដើមដោយរៀបរាប់ពីសេចក្ដីក្រោធខឹង និងព្រះចេស្ដាដ៏គ្មានគូផ្ទឹមរបស់ព្រះ ប៉ុន្តែលោកក៏បានថ្លែងអំពីសេចក្ដីមេត្តាករុណា និងសេចក្ដីល្អរបស់ព្រះដែរ ។ សូមរកមើលខគម្ពីរនៅក្នុង ជំពូក ១ ដែលជួយបងប្អូនឲ្យយល់ដឹងពីគុណលក្ខណៈទាំងនេះនីមួយៗ—និងគុណលក្ខណៈផ្សេងទៀតអំពីព្រះដែលបងប្អូនសម្គាល់ឃើញ ។ ហេតុអ្វីបានជាបងប្អូនគិតថា វាមានសារៈសំខាន់ដើម្បីដឹងរឿងទាំងនេះអំពីព្រះអម្ចាស់ ?

ហាបាគុក

ខ្ញុំអាចទុកចិត្តលើព្រះទ័យរបស់ព្រះអម្ចាស់ និងកាលវេលារបស់ទ្រង់ ។

ពេលខ្លះសូម្បីតែពួកព្យាការីក៏មានសំណួរអំពីរបៀបរបស់ព្រះអម្ចាស់ដែរ ។ ហាបាគុកដែលរស់នៅគ្រានៃការរីករាលដាលដ៏ធំនៃសេចក្ដីទុច្ចរិតនៅស្រុកយូដា បានចាប់ផ្ដើមកំណត់ត្រារបស់លោកជាមួយនឹងសំណួរទៅកាន់ព្រះអម្ចាស់ ( សូមមើល ហាបាគុក ១:១–៤ ) ។ តើបងប្អូននឹងសង្ខេបពីកង្វល់របស់ហាបាគុកយ៉ាងដូចម្ដេច ? តើមនុស្សសួរសំណួរស្រដៀងនេះអ្វីខ្លះអំពីព្រះនាពេលបច្ចុប្បន្ន ? តើបងប្អូនធ្លាប់មានអារម្មណ៍ស្រដៀងគ្នានេះដែរឬទេ ? ពួកគេក៏អាចប្រៀបធៀបសំណួររបស់លោក ទៅនឹងសំណួរផ្សេងទៀតនៅក្នុងព្រះគម្ពីរបានផងដែរ ដូចជាបទគម្ពីរនៅក្នុង ម៉ាកុស ៤:៣៧–៣៨ និង គោលលទ្ធិ និងសេចក្ដីសញ្ញា ១២១:១–៦ ។

ព្រះអម្ចាស់បានតបទៅនឹងសំណួររបស់ហាបាគុក ដោយមានបន្ទូលថា ទ្រង់នឹងចាត់សាសន៍ខាល់ដេ ( ពួកបាប៊ីឡូន ) ឲ្យដាក់ទោសដល់សាសន៍យូដា ( សូមមើល ហាបាគុក ១:៥–១១ ) ។ ប៉ុន្តែហាបាគុកនៅតែខ្វល់ក្នុងចិត្ត ពីព្រោះវាហាក់ដូចជាអយុត្តិធម៌ ដោយសារព្រះអម្ចាស់ឈរចាំមើល « កាលដែលពួកអ្នក [ បាប៊ីឡូន ] អាក្រក់លេបមនុស្ស [ សាសន៍យូដា ] ដែលសុចរិតជាងខ្លួនបាត់ទៅដូច្នេះ » ( សូមមើល ខទី ១២–១៧ ) ។ តើបងប្អូនរកឃើញអ្វីខ្លះនៅក្នុង ហាបាគុក ២:១–៤ ដែលបំផុសគំនិតបងប្អូនឲ្យទុកចិត្តលើព្រះអម្ចាស់ ពេលដែលបងប្អូនមានសំណួរដែលគ្មានចម្លើយនោះ ?( សូមមើលផងដែរ ម៉ាកុស ៤:៣៩–៤០; គោលលទ្ធិ និងសេចក្ដីសញ្ញា ១២១:៧–៨; « God Will Lift Us Up » [វីដេអូ], បណ្ណាល័យដំណឹងល្អ ) ។

ជំពូក ៣ គឺជាការអធិស្ឋានរបស់ហាបាគុកអំពីការសរសើរ និងសេចក្ដីជំនឿ ។ តើសំឡេងរបស់ហាបាគុកនៅក្នុង ជំពូក ៣ ខុសពី ជំពូក ១យ៉ាងដូចម្ដេច ? នេះជាគំនិតមួយដើម្បីជួយបងប្អូនជញ្ជឹងគិតពី ខទី ១៧–១៩ ៖ ធ្វើបញ្ជីអំពីពរជ័យខាងសាច់ឈាម និងខាងវិញ្ញាណដែលព្រះបានប្រទានដល់បងប្អូន ។ បន្ទាប់មកសូមស្រមៃថា បងប្អូនបានបាត់បង់ពរជ័យខាងសាច់ឈាម ។ តើរឿងនោះអាចធ្វើឲ្យបងប្អូនមានអារម្មណ៍យ៉ាងដូចម្ដេច អំពីពរជ័យផ្សេងទៀត ? ហេតុអ្វីបានជាវាអាចជាការលំបាកក្នុងការ « អររីករាយដោយសារព្រះយេហូវ៉ា » ( ខទី ១៨ ) ក្នុងពេលមានការលំបាកដូចដែលបានពិពណ៌នានៅក្នុង ខទី ១៧ ? សូមពិចារណាពីរបៀបដែលបងប្អូនអាចអភិវឌ្ឍសេចក្ដីជំនឿដ៏អស្ចារ្យជាងនេះលើព្រះ ទោះជាពេលដែលជីវិតទំនងជាមានភាពអយុត្តិធម៌ក្ដី ។

សូមមើលផងដែរ ហ្គើរីត ដបុលយូ ហ្គង « គ្រប់អ្វីៗទាំងអស់សម្រាប់សេចក្ដីល្អដល់យើង » លីអាហូណា ខែឧសភា ឆ្នាំ២០២៤ ទំព័រ ៤១–៤៤; « ដើរតាមពន្លឺ » ទំនុកតម្កើងល.រ. ៤៦; ប្រធានបទ និង សំណួរ « ការស្វែងរកចម្លើយចំពោះសំណួរ » បណ្ណាល័យដំណឹងល្អ ។

មានចិត្តអត់ធ្មត់ ។ ពេលខ្លះ យើងចង់បានចម្លើយចំពោះសំណួររបស់យើងភ្លាមៗ ប៉ុន្តែការយល់ដឹងខាងវិញ្ញាណត្រូវការពេលវេលា ហើយមិនអាចបង្ខំបានឡើយ ។ ដូចដែលព្រះអម្ចាស់មានបន្ទូលប្រាប់ហាបាគុកថា « ចូររង់ចាំចុះ ដ្បិតនឹងមកជាពិត ឥតរារង់ឡើយ » ( ហាបាគុក ២:៣ ) ។

សេផានា

« អស់អ្នករាបសានៅផែនដី ចូរស្វែងរកទ្រង់ » ។

នៅពេលបងប្អូនអានការព្យាកររបស់សេផានា សូមកត់សម្គាល់ពីឥរិយាបថ និងអាកប្បកិរិយាដែលបានដឹកនាំទៅរកការបំផ្លិចបំផ្លាញ—ជាពិសេស សូមមើល សេផានា ១:៤–៦, ១២; ២:៨, ១០, ១៥; ៣:១–៤ ។ បន្ទាប់មក សូមរកមើលបុគ្គលិកលក្ខណៈរបស់ប្រជាជនដែលព្រះនឹងរក្សាទុក—សូមមើល សេផានា ២:១–៣; ៣:១២–១៣, ១៨–១៩ ។ តើបងប្អូនមានអារម្មណ៍ថា ព្រះអម្ចាស់មានព្រះរាជសារអ្វីខ្លះដល់បងប្អូននៅក្នុងខគម្ពីរទាំងនេះ ?

សេផានា ៣:១៤–២០

ព្រះអម្ចាស់នឹងអរព្រះទ័យជាមួយប្រជាជនរបស់ទ្រង់នៅក្រុងស៊ីយ៉ូន ។

បន្ទាប់ពីអាន សេផានា ៣:១៤–២០ រួចសូមមើលថា តើមានវិធីប៉ុន្មានដែលបងប្អូនអាចបំពេញប្រយោគនេះ ៖ « ចូរអរសប្បាយ ហើយរីករាយឲ្យអស់អំពីចិត្ត »ដោយសារ … ហេតុអ្វីវាសំខាន់ចំពោះបងប្អូនដើម្បីដឹងអំពីហេតុផលទាំងនេះដើម្បីអរសប្បាយ ? បងប្អូនអាចប្រៀបធៀបខគម្ពីរទាំងនេះទៅនឹងបទពិសោធន៍ដែលបានរៀបរាប់នៅក្នុង នីហ្វៃទី ៣ ១៧ ហើយពិចារណាពីព្រះទ័យរបស់ព្រះយេស៊ូវគ្រីស្ទចំពោះរាស្ត្រទ្រង់—រួមទាំងបងប្អូនផងដែរ ។

សម្រាប់គំនិតបន្ថែម សូមមើលទស្សនាវដ្តី លីអាហូណា និង ដើម្បីកម្លាំងនៃយុវជន ប្រចាំខែនេះ ។

គំនិតសម្រាប់បង្រៀនកុមារ

មីកា ៥:១

ព្រះយេស៊ូវគ្រីស្ទបានប្រសូតនៅភូមិបេថ្លេហិម ។

កូនៗបងប្អូនប្រហែលជាមិនដឹងនោះទេថា វាជាការព្យាកររបស់មីកា ដែលបានជួយពួកហោររកឃើញព្រះឱរសយេស៊ូវនៅបេថ្លេហិម ។ ដោយប្រើ មីកា ៥:២ និង ម៉ាថាយ ២:១–៦ ប្រហែលជាកូនៗបងប្អូនអាចសម្ដែងនូវបទពិសោធន៍របស់ពួកគេឡើងវិញ ។ បន្ទាប់មក បងប្អូនអាចនិយាយអំពីមូលហេតុដែលការប្រសូតរបស់ព្រះយេស៊ូវមានសារៈសំខាន់ខ្លាំងណាស់ រហូតដល់ពួកហោរាបានដឹងអំពីការណ៍នេះជាច្រើនឆ្នាំមុនទ្រង់ប្រសូត ។

ហោរាបីនាក់កំពុងសម្លឹងមើលផ្កាយថ្មី — បុត្របរិសុទ្ធប្រសូតហើយ ដោយ ដាណា វូដ

ណាហ៊ុម ១:៧

« ព្រះយេហូវ៉ាទ្រង់ល្អ ទ្រង់ជាទីពឹងមាំមួននៅគ្រាលំបាក » ។

បន្ទាប់ពីបានអាន ណាហ៊ុម ១:៧ កូនៗបងប្អូនអាចសង់ ឬគូរ « ទីពឹងមាំមួយ » ឬបន្ទាយដ៏សាមញ្ញ ( មានរូបភាពមួយនៅក្នុងគម្រោងមេរៀននេះ ) ។ តើមូលហេតុមួយចំនួនអ្វីខ្លះ ដែលមនុស្សអាចត្រូវការបន្ទាយមួយ ? តើអ្វីទៅដែលធ្វើឲ្យគ្រារបស់យើងក្លាយជា « គ្រាលំបាក » ? តើព្រះយេស៊ូវគ្រីស្ទប្រៀបបាននឹងទីពឹង មាំមួនចំពោះយើងយ៉ាងដូចម្ដេច ?

ហាបាគុក ២:៣

ព្រះនឹងបំពេញការសន្យារបស់ទ្រង់ជានិច្ច ។

ដើម្បីណែនាំ ហាបាគុក ២:៣ បងប្អូននិងកូនៗបងប្អូនអាចនិយាយអំពីអ្វីដែលល្អៗ ប៉ុន្តែបន្ទាប់ពីយើងរង់ចាំ—ដូចជាផ្លែឈើដែលត្រូវទុំ ឬម្សៅនំដែលត្រូវដុត ។ តើនឹងមានអ្វីកើតឡើង ប្រសិនបើយើងបានព្យាយាមទទួលទានផ្លែឈើ ឬម្សៅនំមុនពេលវាឆ្អិន ឬទុំនោះ ? បន្ទាប់មក បងប្អូនអាចនិយាយអំពីព្យាការីហាបាគុក ដែលចង់ដឹងថា តើពេលណាព្រះអម្ចាស់នឹងបញ្ឈប់អំពើទុច្ចរិតក្នុងលោកិយ ។ សូមអានចម្លើយរបស់ព្រះអម្ចាស់នៅក្នុង ហាបាគុក ២:៣ ។ បងប្អូនអាចជួយកូនៗបងប្អូនគិតអំពីអ្វីដែលព្រះបានសន្យា ។ ជាមួយនឹងឧទាហរណ៍នីមួយៗ បងប្អូនអាចនិយាយជាមួយគ្នា « ចូររង់ចាំចុះ ដ្បិតនឹងមកជាពិត ឥតរារង់ឡើយ » ។

ហាបាគុក ២:១៤

ខ្ញុំអាចជួយបំពេញផែនដីជាមួយនឹងការចេះដឹងអំពីព្រះយេស៊ូវគ្រីស្ទ ។

ដើម្បីឆ្លុះបញ្ចាំងពី ហាបាគុក ២:១៤ បងប្អូន និងកូនៗបងប្អូនអាចបំពេញដប ឬធុងផ្សេងទៀតជាមួយនឹងរូបភាព ឬពាក្យដែលតំណាងឲ្យអ្វីៗដែលព្រះយេស៊ូវបានធ្វើ ឬបង្រៀន ។ តើយើងអាចជួយបំពេញពិភពលោកនេះជាមួយនឹងចំណេះដឹងរបស់ព្រះអម្ចាស់ដោយរបៀបណា ?
បងប្អូនក៏អាចបង្ហាញផែនទីពិភពលោកទៅកូនៗបងប្អូន ( សូមមើល ផែនទីប្រវត្តិសាសនាចក្រ ល.រ. ៧ « ផែនទីនៃពិភពលោក » ) ។ សូមជួយពួកគេឲ្យស្វែងរកកន្លែងដែលពួកគេរស់នៅ និងកន្លែងទាំងឡាយដែលពួកអ្នកផ្សព្វផ្សាយសាសនាដែលពួកគេស្គាល់បានបម្រើ ។ បងប្អូនក៏អាចច្រៀងចម្រៀងមួយបទរួមគ្នាអំពីការចែកចាយដំណឹងល្អដូចជាបទ « យើងនឹងនាំការពិតទ្រង់ដល់លោកិយ » ( សៀវភៅចម្រៀងកុមារ ទំព័រ ៩២–៩៣ ) ។ តើយើងអាចប្រាប់អ្នកដទៃអ្វីខ្លះ អំពីព្រះយេស៊ូវគ្រីស្ទ ?

សេផានា ៣:១៤–២០

ព្រះយេស៊ូវគ្រីស្ទអរសប្បាយនឹងអស់អ្នកដែលដើរតាមទ្រង់ ។

នៅក្នុង សេផានា ៣:១៤–២០ កូនៗបងប្អូនអាចរកមើលអ្វីមួយដែលធ្វើឲ្យពួកគេចង់ « ច្រៀង … អរសប្បាយ ហើយរីករាយឲ្យអស់អំពីចិត្ត » ។ ប្រហែលជាបងប្អូនអាចច្រៀងទំនុកតម្កើង ឬចម្រៀងដ៏រីករាយមួយចំនួនជាមួយគ្នា ហើយនិយាយអំពីអំណរដែលបងប្អូនរកឃើញនៅក្នុងដំណឹងល្អនៃព្រះយេស៊ូវគ្រីស្ទ ។

សម្រាប់គំនិតបន្ថែម សូមមើលទស្សនាវដ្តី ប្រិយមិត្ត ប្រចាំខែនេះ ។

ព្រះយេស៊ូវកំពុងញញឹមដាក់កុមារមួយក្រុម — ហើយទ្រង់បានយកកូនក្មេងរបស់ពួកគេម្ដងម្នាក់ៗ ដោយ ខេស៊ី ឆាល

ទំព័រសកម្មភាពសម្រាប់អង្គការបឋមសិក្សា ៖ ចូរស្វែងរកទ្រង់ — ហើយទ្រង់បានយកកូនក្មេងរបស់ពួកគេម្ដងម្នាក់ៗ ដោយ ខេស៊ី ឆាល