« ថ្ងៃទី៧–១៣ ខែធ្នូ ‹ បរិសុទ្ធដល់ព្រះយេហូវ៉ា » ៖ ហាកាយ ១–២; សាការី ១–៤; ៧–១៤ › ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ព្រះគម្ពីរសញ្ញាចាស់ ឆ្នាំ២០២៦ ( ឆ្នាំ២០២៦ )

« ថ្ងៃទី៧–១៣ ខែធ្នូ ‹ បរិសុទ្ធដល់ព្រះយេហូវ៉ា › » ចូរមកតាមខ្ញុំ ៖ ព្រះគម្ពីរសញ្ញាចាស់ ឆ្នាំ២០២៦

ព្រះវិហារបរិសុទ្ធ ឡាអ៊ីអេ ហាវ៉ៃ

ថ្ងៃទី៧–១៣ ខែធ្នូ ៖ « បរិសុទ្ធដល់ព្រះយេហូវ៉ា »

ហាកាយ ១–២; សាការី ១–៤; ៧–១៤

បន្ទាប់ពីការជាប់ក្នុងសេវកភាពអស់ជាច្រើនទសវត្សរ៍មក សាសន៍អ៊ីស្រាអែលមួយក្រុមដែលប្រហែលជារួមទាំងព្យាការីហាកាយ និងសាការីដែរ ត្រូវបានគេអនុញ្ញាតឲ្យត្រឡប់ទៅក្រុងយេរូសាឡិមវិញ ។ មនុស្សមួយចំនួននៅក្នុងក្រុមនេះនៅចងចាំពីទិដ្ឋភាពរបស់ព្រះវិហារបរិសុទ្ធ មុនពេលដែលក្រុងនេះត្រូវបានបំផ្លាញ ។ ចំពោះអស់អ្នកដែលឆ្ងល់ថា តើព្រះវិហារបរិសុទ្ធនឹងមានលក្ខណៈដូចជា « ព្រះវិហារនេះតាមសិរីល្អជាន់ដើម » ( ហាកាយ ២:៣ ) ម្ដងទៀតឬទេ នោះហាកាយបានថ្លែងពាក្យលើកទឹកចិត្តរបស់ព្រះអម្ចាស់ថា ៖ « ព្រះយេហូវ៉ាទ្រង់មានព្រះបន្ទូលថា ចូរឯងរាល់គ្នាមានកម្លាំង ហើយធ្វើការទៅ ដ្បិតយើងនៅជាមួយនឹងឯង … កុំខ្លាចឡើយ » ។ « យើងនឹងបំពេញវិហារនេះ ដោយសិរីល្អ … ហើយយើងនឹងឲ្យមានសេចក្តីសុខសាន្តនៅទីនេះផង »( ហាកាយ ២:៤–៥, ៧, ៩ ) ។

ប៉ុន្តែវាមិនមែនគ្រាន់តែជាព្រះវិហារបរិសុទ្ធដែលចាំបាច់ត្រូវសង់ឡើងវិញនោះទេ ។ រាស្រ្តរបស់ព្រះត្រូវបានបំផ្លាញខាងវិញ្ញាណតាមរបៀបជាច្រើន ។ ហើយការស្ថាបនារាស្រ្តដ៏បរិសុទ្ធឡើងវិញ គឺត្រូវការលើសពីការកាត់ និងរៀបឥដ្ឋដើម្បីសង់ព្រះវិហារបរិសុទ្ធទៅទៀត ។ វាមានន័យថាការពិពណ៌នា « បរិសុទ្ធដល់ព្រះយេហូវ៉ា » ត្រូវតែឆ្លាក់មិនត្រឹមតែនៅលើជញ្ជាំងព្រះវិហារបរិសុទ្ធ ឬនៅក៏នៅលើ « ចង្ក្រង់សេះ » និង « គ្រប់ទាំងភាជនៈនៅក្រុងយេរូសាឡិម » ប៉ុណ្ណោះទេ ( សាការី ១៤:២០–២១ ) ។ វាក៏ត្រូវតែឆ្លាក់នៅលើគ្រប់ដួងចិត្តផងដែរ ។

សម្រាប់ទិដ្ឋភាពទូទៅស្ដីពីគម្ពីរហាកាយ និងសាការី សូមមើល « ហាកាយ » និង « សាការី » នៅក្នុងសេចក្ដីណែនាំដល់បទគម្ពីរទាំងឡាយ ។

គំនិតសម្រាប់ការរៀនសូត្រនៅឯគេហដ្ឋាន និងនៅឯសាសនាចក្រ

ហាកាយ ១; ២:១–៩

« ចូរឯងរាល់គ្នាពិចារណាផ្លូវប្រព្រឹត្តរបស់ខ្លួនចុះ » ។

មានកិច្ចការសំខាន់ជាច្រើនដើម្បីស្ថាបនាឡើងវិញនៅឯក្រុងយេរូសាឡិម ។ ប៉ុន្តែបន្ទាប់ពីប្រហែលជា ១៥ ឆ្នាំបានកន្លងផុតទៅ ចាប់តាំងពីសាសន៍អ៊ីស្រាអែលបានត្រឡប់មកវិញ ព្រះអម្ចាស់មិនសព្វព្រះទ័យទេ ដែលការសង់ព្រះវិហារបរិសុទ្ធមិនទាន់ជាអាទិភាពនៅឡើយ ( សូមមើល ហាកាយ ១:២–៥; សូមមើលផងដែរ អែសរ៉ា ៤:២៤ ) ។ នៅពេលបងប្អូនអាន ហាកាយ ១; ២:១–៩, សូមពិចារណាសំណួរដូចទាំងនេះ ៖

តើមានផលវិបាកអ្វីដែលពួកសាសន៍អ៊ីស្រាអែលប្រឈមមុខដោយសារពួកគេមិនបានបញ្ចប់ការសាងសង់ព្រះវិហារបរិសុទ្ធ ?
តើពរជ័យអ្វីខ្លះដែលព្រះអម្ចាស់បានសន្យាដល់ពួកគេ ប្រសិនបើពួកគេបានបញ្ចប់ការសាងសង់ដំណាក់របស់ព្រះនោះ ?
តើអ្វីជាសាររបស់ព្រះអម្ចាស់ចំពោះបងប្អូននៅក្នុង ហាកាយ ១:៥–៧ ? តើបងប្អូនអាចសម្របអាទិភាពរបស់បងប្អូនតាមព្រះអម្ចាស់ដោយរបៀបណា ? តើនៅពេលណាដែលបងប្អូនបានទទួលពរជ័យសម្រាប់ការដាក់ព្រះជាមុនក្នុងជីវិតរបស់បងប្អូន ?

ពួកបរិសុទ្ធថ្ងៃចុងក្រោយនៅសម័យដើមបានប្រឈមមុខនឹងស្ថានភាពស្រដៀងគ្នានេះនឹងពួកសាសន៍អ៊ីស្រាអែលនៅសម័យហាកាយ ( សូមមើល គោលលទ្ធិ និងសេចក្តីសញ្ញា ៩៥ ) ។ តើបងប្អូនរៀនអ្វីខ្លះពីគំរូទាំងពីរនេះអំពីអារម្មណ៍របស់ព្រះអម្ចាស់ពីព្រះវិហារបរិសុទ្ធ ?

សូមមើលផងដែរ ឌែល ជី រិនឡាន់ « ព្រះយេស៊ូវគ្រីស្ទគឺជាកំណប់ទ្រព្យ » លីអាហូណា ខែវិច្ឆិកា ឆ្នាំ២០២៣ ទំព័រ ៩៦–៩៩; ធើរ៉ែន អិម វីនសុន « True Disciples of the Savior » Liahona ខែវិច្ឆិកា ឆ្នាំ២០១៩ ទំព័រ ៩–១១ « យើងស្រឡាញ់ដំណាក់ទ្រង់ » ទំនុកតម្កើង ល.រ. ១៤៥; « Provo City Center Temple Completed » ( វីដេអូ ) នៅលើគេហទំព័រ ChurchofJesusChrist.org ។

សាការី ១–៣; ៧–៨; ១៤

ព្រះអម្ចាស់អាចធ្វើឲ្យខ្ញុំបរិសុទ្ធ ។

តាមទស្សនៈរបស់បងប្អូន តើការមានភាព « បរិសុទ្ធដល់ព្រះយេហូវ៉ា » ឆ្លាក់រាល់ថ្ងៃនៅលើវត្ថុទាំងឡាយដូចដែលបានលើកឡើងនៅក្នុង សាការី ១៤:២០ មានតម្លៃអ្វី ? ( សូមមើល និក្ខមនំ ២៨:៣៦–៣៨ ) ។ តើការឆ្លាក់លើព្រះវិហារបរិសុទ្ធសព្វថ្ងៃមានតម្លៃអ្វីខ្លះ ? តើឃ្លានេះមានអត្ថន័យយ៉ាងណាដែរចំពោះបងប្អូន ? តើបងប្អូនអាចធ្វើឲ្យភាពបរិសុទ្ធជាផ្នែកមួយនៃជីវិតប្រចាំថ្ងៃរបស់បងប្អូនដោយរបៀបណា ? សូមជញ្ជឹងគិតពីសំណួរទាំងនេះ នៅពេលបងប្អូនអានការអញ្ជើញរបស់ព្រះអម្ចាស់ដល់រាស្ដ្ររបស់ទ្រង់ឲ្យធ្វើជាមនុស្សបរិសុទ្ធជាងមុន សាការី ១:១–៦; ៣:១–៧; ៧:៨–១០; ៨:១៦–១៧ ។

បងប្អូនអាចអានផងដែរនៅ សាការី ២:១០–១១; ៨:១–៨; ១៤:៩–១១, ២០–២១ ដើម្បីរៀនថា តើជីវិតនឹងទៅជាយ៉ាងណានាថ្ងៃអនាគត ជាពេលដែលយើងទាំងអស់គ្នានឹងរស់នៅជាមួយព្រះអម្ចាស់ក្នុងស្ថានភាពដ៏បរិសុទ្ធនោះ ។ តើបងប្អូនចាប់អារម្មណ៍លើអ្វីខ្លះ អំពីចក្ខុវិស័យរបស់សាការីទាក់ទងនឹងអនាគតនៃក្រុងយេរូសាឡិម ? តើបងប្អូនរកឃើញអ្វីនៅទីនេះដែលបងប្អូនចង់ឲ្យមាននៅក្នុងសហគមន៍របស់បងប្អូនដែរ ? តើបងប្អូនអាចរៀបចំខ្លួនដើម្បីរស់នៅក្នុងស្ថានភាពដែលសាការីបានរៀបរាប់នេះដោយរបៀបណា ?

ព្រះយេស៊ូវបានជិះលាចូលទៅកាន់ទីក្រុងយេរូសាឡិម — « មើល ស្តេចរបស់នាង ទ្រង់យាងមកឯនាង ៖ ទ្រង់ជាអ្នកសុចរិត ហើយមានជ័យជំនះ ទ្រង់ក៏សុភាព ទ្រង់គង់លើសត្វលា » ( សាការី ៩:៩ ) ។ Triumphal Entry [ ការយាងចូលដោយជោគជ័យ ] ដោយ ហារី អាន់ឌើរសុន

សាការី ៩:៩–១១; ១១:១២–១៣; ១២:១០; ១៣:៦–៧; ១៤:១–៩

ព្រះយេស៊ូវគ្រីស្ទគឺជាព្រះមែស៊ីដែលបានសន្យា ។

សំណេរជាច្រើនរបស់សាការីបង្ហាញទាំងអំពីការងារបម្រើរបស់ព្រះយេស៊ូវគ្រីស្ទនៅលើផែនដី និងការយាងមកជាលើកទីពីររបស់ទ្រង់នៅទីបំផុត ។ ខាងក្រោមនេះគឺជាការព្យាករមួយចំនួនរបស់សាការី ព្រមជាមួយនឹងបទគម្ពីរអំពីការបំពេញនៃការព្យាករទាំងនោះ ។ នៅពេលបងប្អូនសិក្សាវគ្គបទគម្ពីរទាំងនេះ សូមសួរខ្លួនឯងថា តើការណ៍នេះបង្រៀនអ្វីខ្ញុំអ្វីខ្លះអំពីព្រះអង្គសង្រ្គោះ ?

សាការី ៩:៩–១១ ( សូមមើល ម៉ាថាយ ២១:១–១១; ពេត្រុស ទី១ ៣:១៨–១៩ )
សាការី ១១:១២–១៣ ( សូមមើល ម៉ាថាយ ២៦:១៤–១៦; ២៧:១–៧ )
សាការី ១២:១០ ( សូមមើល យ៉ូហាន ១៩:៣៧; វិវរណៈ ១:៧ )
សាការី ១៣:៦–៧; ១៤:១–៩ ( សូមមើល ម៉ាថាយ ២៦:៣១; គោលលទ្ធិ និង សេចក្តីសញ្ញា ៤៥:៤៧–៥៣ )

តើបងប្អូនគិតថាវានឹងក្លាយទៅជាយ៉ាងណាក្នុងចំណោមមនុស្សដែលទទួលព្រះយេស៊ូវចូលក្រុងយេរូសាឡិម ដូចបានពិពណ៌នានៅក្នុង សាការី ៩:៩–១១ ? តើបងប្អូនអាចស្វាគមន៍ទ្រង់ចូលក្នុងជីវិតបងប្អូន ផ្ទះបងប្អូន និងសហគមន៍បងប្អូនដោយរបៀបណា ?

សូមមើលផងដែរ សេចក្ដីណែនាំដល់បទគម្ពីរទាំងឡាយ « ព្រះមែស៊ី » បណ្ណាល័យដំណឹងល្អ « The Lord’s Triumphal Entry into Jerusalem » ( វីដេអូ ) បណ្ណាល័យដំណឹងល្អ; រ៉ូណល អេ រ៉ាសបាន « ហូសាណាដល់ព្រះដ៏ខ្ពស់បំផុត » លីអាហូណា ខែឧសភា ឆ្នាំ២០២៣ ទំព័រ ១០៨–១១២ ។

សម្រាប់គំនិតបន្ថែម សូមមើលទស្សនាវដ្តី លីអាហូណា និង ដើម្បីកម្លាំងនៃយុវជន ប្រចាំខែនេះ ។

គំនិតសម្រាប់បង្រៀនកុមារ

ហាកាយ ១:២–៨

« ពិចារណាផ្លូវប្រព្រឹត្តរបស់ខ្លួនចុះ » ។

នៅពេលបងប្អូនអានផ្នែកនៃ ហាកាយ ១:២–៥ ជាមួយនឹងកូនៗបងប្អូន សូមជួយពួកគេស្វែងរកពីមូលហេតុដែលព្រះអម្ចាស់មិនពេញព្រះទ័យនឹងប្រជាជនទាំងនេះ ។ ប្រហែលជាកូនៗបងប្អូនអាចរើសឃ្លាមួយចេញពី ខទី ៦ ហើយគូររូបភាពមួយអំពីវា ។ ពួកគេអាចបង្ហាញវាដល់គ្នាទៅវិញទៅមក ហើយទស្សន៍ទាយថាតើឃ្លានីមួយៗតំណាងឲ្យអ្វី ។ នៅពេលយើងចំណាយពេលលើអ្វីផ្សេងពីអ្វីដែលព្រះអម្ចាស់សព្វព្រះទ័យ តើវាដូចជាការទទួលទានអាហារតែមិនបានឆ្អែតយ៉ាងដូចម្ដេចទៅ ? បងប្អូនអាចនឹងនិយាយជាមួយគ្នាអំពីរបៀបដែលបងប្អូនអាចទុកពេលសម្រាប់រឿងដែលសំខាន់ចំពោះព្រះអម្ចាស់ ។
បងប្អូនក៏អាចអាន ខទី ៨ ទៅកាន់កូនៗបងប្អូន ហើយអញ្ជើញពួកគេឲ្យធ្វើដូចជា « ឡើងទៅឯភ្នំ » « យកឈើ » និង « សង់ព្រះវិហារ [ នៃព្រះអម្ចាស់ ] » ផងដែរ ។ កូនៗបងប្អូនអាចធ្វើបញ្ជីមួយអំពីការណ៍ទាំងឡាយ ដែលពួកគេអាចធ្វើបាននៅថ្ងៃធម្មតាៗ រួមទាំងការណ៍ទាំងឡាយដែលព្រះអម្ចាស់បានសូមឲ្យយើងធ្វើផងដែរ ។ សូមសួរឲ្យកូនៗបងប្អូន « ពិចារណាផ្លូវប្រព្រឹត្ត [ របស់ខ្លួន ] ចុះ » ដោយការគូររង្វង់លើអ្វីដែលព្រះអម្ចាស់អាចនឹងមានព្រះបន្ទូលថាជាការណ៍ដែលសំខាន់បំផុតនៅក្នុងបញ្ជីរបស់ពួកគេ ។

ការបង្រៀនដែលផ្ដោតលើគេហដ្ឋាន ។ ប្រធាន រ័សុលអិម ណិលសុន បានបង្រៀនថា គេហដ្ឋានគប្បីជា « មជ្ឈមណ្ឌលនៃការរៀនសូត្រដំណឹងល្អ » ( « Becoming Exemplary Latter-day Saints » Liahona ខែវិច្ឆិកា ឆ្នាំ២០១៨ ទំព័រ ១១៣ ) ។ នៅពេលគ្រួសាររបស់បងប្អូនបានសិក្សាដំបូន្មានរបស់ហាកាយនៅក្នុង « ពិចារណាផ្លូវប្រព្រឹត្តរបស់ខ្លួន » នោះបងប្អូនអាចនិយាយអំពីរបៀបដាក់ព្រះជាអាទិភាពនៅក្នុងជីវិតគ្រួសាររបស់បងប្អូន ។

សាការី ៣:១–៧

ការធ្វើ និងការរក្សាសេចក្ដីសញ្ញាអាចជួយខ្ញុំឲ្យកាន់តែក្លាយដូចជាព្រះវរបិតាសួគ៌ និងព្រះយេស៊ូវគ្រីស្ទ ។

នៅក្នុងការនិមិត្តមួយ សាការីបានឃើញសម្ដេចសង្ឃដែល « ស្លៀកពាក់កខ្វក់ » ( សាការី ៣:៣ ) ។ ទេវតាមួយអង្គបានប្រទានសម្លៀកបំពាក់ស្អាតដល់គាត់ ។ បងប្អូនអាចជួយកូនៗបងប្អូនស្វែងរកសេចក្តីពិតដ៏សំខាន់ដោយការអានជាមួយគ្នា សាការី ៣:១–៧ ហើយនិយាយអំពីអ្វីដែលសម្លៀកបំពាក់កខ្វក់ និងសម្លៀកបំពាក់ស្អាតអាចតំណាងឲ្យ ។ តើយើងអាចបានស្អាតពីអំពើបាបរបស់យើងយ៉ាងដូចម្ដេច សូម្បីតែបន្ទាប់ពីយើងទទួលបុណ្យជ្រមុជទឹកហើយក្តី ? តើសេចក្ដីសញ្ញាបុណ្យជ្រមុជទឹករបស់យើងជួយយើងឲ្យ « ដើរតាមផ្លូវ [ របស់ព្រះអម្ចាស់ ] » ដោយរបៀបណា ?
បងប្អូន និងកូនៗបងប្អូនអាចមើលរូបភាពពិធីបុណ្យជ្រមុជទឹក ដូចជារូបភាពនៅក្នុងគម្រោងនេះ ។ ហេតុអ្វីយើងស្លៀកពាក់ពណ៌សនៅបុណ្យជ្រមុជទឹករបស់យើង ? បងប្អូនក៏អាចច្រៀងចម្រៀងអំពីពិធីបុណ្យជ្រមុជទឹក ដូចជាបទ « ពេលខ្ញុំបានជ្រមុជទឹក » ( សៀវភៅចម្រៀងកុមារ ទំព័រ ៥៣ ) តើបទចម្រៀងនេះបង្រៀនអ្វីខ្លះអំពីមូលហេតុដែលព្រះអម្ចាស់ចង់ឲ្យយើងទទួលបុណ្យជ្រមុជទឹក ?

ឪពុកកំពុងធ្វើពិធីជ្រមុជទឹកឲ្យកូនស្រីនៅក្នុងទន្លេ

សាការី ៩:៩–១១; ១១:១២; ១៣:៦–៧

ព្រះយេស៊ូវគ្រីស្ទគឺជាព្រះមែស៊ីដែលបានសន្យា ។

កូនៗបងប្អូនអាចចូលចិត្តស្រមៃមើលពីព្រឹត្តិការណ៍ដែលបានប្រាប់ជាមុននៅក្នុង សាការី ៩:៩ នៅពេលដែលព្រះយេស៊ូវបានយាងមកក្រុងយេរូសាឡិមក្នុងអំឡុងសប្តាហ៍ចុងក្រោយនៃព្រះជន្មរមែងស្លាប់របស់ទ្រង់ ។ ដើម្បីជួយក្នុងរឿងនេះ សូមបង្ហាញពួកគេនូវរូបភាពនៃព្រឹត្តិការណ៍ ដូចជារូបភាពនៅក្នុងគម្រោងមេរៀននេះ ។ បងប្អូនក៏អាចចែកចាយជាមួយពួកគេ « ព្រះអង្គសង្គ្រោះយាងទៅក្រុងយេរ៉ូសាឡិម » ( នៅក្នុង ដំណើររឿងព្រះគម្ពីរសញ្ញាថ្មី ទំព័រ ១១០–១១២ ) ។ កូនៗបងប្អូនអាចចង្អុលទៅមនុស្សនៅក្នុងរូបភាពដែល « រីករាយជាខ្លាំង » ។ តើនរណាជាស្តេចនៅក្នុង សាការី ៩:៩ ? ហេតុអ្វីយើងមានអំណរគុណចំពោះទ្រង់ ?

1:35
Chapter 44: The Savior Goes to Jerusalem
សូមពិចារណាជួយកូនៗបងប្អូនប្រៀបធៀបការព្យាករពីសាការីជាមួយនឹងខគម្ពីរក្នុងព្រះគម្ពីរសញ្ញាថ្មីដែលពិពណ៌នាអំពីការបំពេញរបស់ការព្យាករទាំងនេះ ។ នេះគឺជាឧទាហរណ៍មួយចំនួន ៖ សាការី ៩:៩ និង ម៉ាថាយ ២១:៥–៩; សាការី ៩:១១ និង ពេត្រុស ទី១ ៣:១៨–១៩; សាការី ១១:១២ និង ម៉ាថាយ ២៦:១៤–១៦; សាការី ១៣:៧ និង ម៉ាថាយ ២៦:៣១ ។ តើយើងរៀនអ្វីខ្លះអំពីព្រះអង្គសង្គ្រោះចេញមកពីខគម្ពីរទាំងនេះ ?

សម្រាប់គំនិតបន្ថែម សូមមើលទស្សនាវដ្តី ប្រិយមិត្ត ប្រចាំខែនេះ ។

សញ្ញានៅលើព្រះវិហារបរិសុទ្ធជាច្រើនដែលអានសរសេរ « បរិសុទ្ធដល់ព្រះយេហូវ៉ា » និង « ដំណាក់ព្រះយេហូវ៉ា » ជាភាសាផ្សេងៗ — « បរិសុទ្ធដល់ព្រះយេហូវ៉ា » មាននៅលើគ្រប់ព្រះវិហារបរិសុទ្ធ ។

ទំព័រសកម្មភាពសម្រាប់អង្គការបឋមសិក្សា ៖ ព្រះយេស៊ូវគ្រីស្ទអាចធ្វើឲ្យវិញ្ញាណរបស់ខ្ញុំស្អាត — « បរិសុទ្ធដល់ព្រះយេហូវ៉ា » មាននៅលើគ្រប់ព្រះវិហារបរិសុទ្ធ ។