Amos; Abdias; Jonas

Iti Amos 3:3–6, indatag ni propeta Amos dagiti pagarigan dagiti konklusion a maaramidtayo manipud kadagiti pagilasinan a mangngeg wenno makitatayo: no agngaretnget ti leon, sigurado a nakatiliw iti biktima; no ti maysa a tumatayab ket natiliw iti silo, adda la ketdi palab-og sadiay. Kadagiti bersikulo 7–8, inaramat ni Amos daytoy a lohiko kadagiti propeta. Ania dagiti konklusion a maaramidtayo no agipadto ti maysa a propeta? Ania pay ti masursurom maipapan kadagiti propeta bayat ti panangbasam iti Amos 7:10–15?

Ania ti impalgak ti Apo kenka babaen kadagiti propetana?

Kinuna ni Elder Ulisses Soares a “ti kaadda dagiti propeta ket maysa a pagilasinan ti ayat ti Dios” (“Prophets Speak by the Power of the Holy Spirit,” Liahona, Mayo 2018, 99). Ibilangmo no kasano a makompletom daytoy a binatog: “Ammok nga ay-ayatennak ti Dios, gapu ta ibaonna dagiti propeta a …” Adtoy ti sumagmamano a nasantuan a kasuratan a makatulong: Deuteronomio 18:18; Ezequiel 3:16–17; Taga Efeso 4:11–14; 1 Nephi 22:2; Doktrina ken Katulagan 21:4–6; 84:36–38; 107:91–92.

Ania koma ti isaoyo iti maysa a tao a makarikna a saan a kasapulan dagiti propeta ita?

Kitaen met iti Topics and Questions, “Prophets,” Gospel Library.

Segun iti Amos 4:6–13, ania ti ninamnama ti Apo a mapasamak kalpasan a napasaran dagiti Israelita dagiti pannubok? (kitaen met iti Helaman 12:3). Idinto a nalabit a saan nga impatulod ti Dios ti pannubokmo, kasano a makaited daytoy kenka kadagiti gundaway nga umasideg Kenkuana?

Bayat ti panangbasam iti Amos 5:4, 14–15, utobem no kasano a nagbalin a managparabur kenka ti Apo. Kasano a nangisangbay iti biagmo ti panagsapsapulmo Kenkuana?

Bayat ti panangbasam iti Amos 8:11–12, panunotem no apay a ti bisin ket nasayaat a panangidilig iti panagbiag nga awan ti balikas ti Dios (kitaen met iti Juan 6:26–35; 2 Nephi 9:50–51; 32:3; Enos 1:4–8). Kasano ti pannakaammom no naespirituan a mabisinka?

Mabalin met a mayaplikar dagitoy a bersikulo iti Nakaro nga Ikakalilis iti Kinapudno (kitaen iti Topics and Questions, “Apostasy,” Gospel Library). Kasano nga inapektuan dayta a naespirituan a “panagbisin” dagiti annak ti Dios? Kasano a pinennek ti Pannakaisubli iti naepirituan a bisinmo?

Kitaen met iti “The Great Apostasy” (video), Gospel Library.

16:36

Iti panangtukoyna iti Obadiah 1:21, inlawlawag ni Presidente Gordon B. Hinckley nga agbalintayo a mangisalakan iti Bantay Sion no umawattayo kadagiti ordinansa para kadagiti natay iti templo (kitaen iti “Closing Remarks,” Liahona, Nob. 2004, 105). Kasano nga umasping ti panangaramid iti dayta nga trabaho—no iti bassit laeng a wagas—iti inaramid ti Mangisalakan para kadatayo? Kasano a nakatulong kenka ti panangaramid iti daytoy a trabaho a mariknam nga as-asidegka iti Mangisalakan?

Kitaen met iti “Holy Temples on Mount Zion,” Hymns, no. 289.

Ti Nineve ti kabusor ti Israel a maam-ammo iti kinaranggas ken kinadawelna. Para ken ni Jonas, kasla saan a pudno a nakasaganadan nga agbabawi. Mabalin a makaay-ayo nga idilig ti galad ni Jonas (kitaen iti Jonas 1; 3–4) kadagiti rikna ni Alma ken dagiti lallaki nga annak ni Mosiah (kitaen iti Mosiah 28:1–5; Alma 17:23–25). Ania ti masursurom manipud iti Jonas 3 a mangparegta kenka a mangibinglay iti ebanghelio uray kadagiti tao a mabalin a kasla saan a nakasagana nga agbalbaliw?

Bayat ti panangbasam iti Jonas, sapulem dagiti pagarigan ti asi ti Apo. Apay a mariknam a ni Jonas “naapas unay” ken “nagunget” (Jonas 4:1) idi nangipaay ti Apo iti asi kadagiti tao ti Nineve? Ania ti mariknam ti padpadasen ti Apo a mangtulong kenkuana iti kapitulo 4? Utobem no kasano a napadasam ti asina iti biagmo. Ania ti masursurom manipud ken ni Jonas a makatulong kenka nga agbalin a naas-asi?

• Tapno matulongan dagiti annakmo a makaawat iti Amos 3:7, mabalinmo a yarasaas ti simple a mensahe iti maysa kadakuada ket kiddawem kadakuada nga ibinglayda ti mensahe kadagiti dadduma pay nga ubbing. Kasano a maipada iti maysa a propeta ti mensahero iti daytoy nga aktibidad? Apay a mangted ti Apo kadatayo kadagiti propeta?

• Tapno maammuan ti ad-adu pay maipapan iti ar-aramiden dagiti propeta, mabalinmo ken dagiti annakmo a mangrebyu kadagiti kaudiaan a mensahe manipud kadagiti agdama a Presidente ti Simbaan. Mabalinyo pay ti agkansion iti maysa a kanta a kas iti “Follow the Prophet” (Children’s Songbook, 110–11). Ibinglay iti tunggal maysa no apay a piliem ti sumurot iti propeta ti Dios.

• Awisem dagiti annakmo nga agpammarang a mabisinda bayat ti panangbasam iti Amos 8:11–12. Ania ti rikna no mabisintayo iti balikas ti Dios? Mabalin nga agpammarang dagiti annakyo a mangan bayat ti panagbibinninglayyo iti sumagmamano kadagiti paboritoyo a nasantuan a kasuratan.

• Mabalinmo nga usaren ti Pangiwanwan iti Nasantuan a Kasuratan, “Ikakalilis iti Kinapudno” (Gospel Library), wenno “Kalpasan ti Baro a Tulag” (iti Dagiti Estoria iti Baro a Tulag, 167–70) tapno matulongan dagiti annakmo a makaawat iti “bisin” a naggapu iti Nakaro nga Ikakalilis iti Kinapudno ken no kasano a naggibus daytoy iti Pannakaisubli. Ibinglayyo iti tunggal maysa dagiti gapu ti panagyamanyo nga insubli ti Apo ti ebangheliona iti aldawtayo.

  

  2:52

• Tapno matulongam dagiti annakmo a mangsursuro iti estoria ni Jonas, mabalinmo nga irebyu ti “Ni Jonas a Propeta” iti Dagiti Estoria iti Daan a Tulag; kitaen met iti panid ti aktibidad iti daytoy a lawas). Kalpasanna mabalinmo a saludsoden:

  • Ania ti napasamak idi saan a nagtungpal ni Jonas iti Apo? (kitaen iti Jonas 1:4–17).

  • Ania ti inaramid ni Jonas tapno agbabawi? (kitaen iti Jonas 1:10–12; 2:1–4, 9; 3:1–4).

  • Ania ti napasamak idi nagtungpal ni Jonas? (kitaen iti Jonas 3:5).

  

  2:30

• Mabalin a magustuan dagiti annakmo a mangulit iti panangisarita iti estoria ni Jonas wenno panangyakem iti daytoy. Ibinglayyo iti tunggal maysa ti sumagmamano a padas idi tinarigagayan ti Apo nga aramidem ti maysa a banag a narigat para kenka. Kasano a tinulongannaka nga agtungpal Kenkuana?

• Nalabit a mabalin nga agpammarang dagiti annakmo a kaum-umanda ni Jonas maipapan iti padasna. Ania koma dagiti saludsod a damagenda kenkuana? Allukoyem ida nga agsaludsod tapno maammuanda no ania ti nasursuro ni Jonas maipapan iti Apo. Ania ti mabalin nga isao ni Jonas, kas pagarigan, maipapan iti asi ti Apo? (kitaen, kas pagarigan, iti Jonas 2:7–10; 3:10; 4:2).

• Tulongam dagiti annakmo nga agpanunot kadagiti pagarigan idi nangipakita ti Mangisalakan iti asi kadagiti dadduma, kas iti Marcos 2:3–12; Lucas 23:33–34; ken Juan 8:1–11. Mabalinmo ken dagiti annakmo ti agsapul kadagiti ladawan dagitoy a pagarigan. Ania dagiti gundaway nga adda kadatayo tapno agbalintayo a naasi iti dadduma?